Ewe Ennentin Foun Nongonong
Seni Bisop Dean M. Davies
Oruemonun Chon Aninnis non ewe Mwichen Chon Nemeni Pisop
Sipwe etiwa an ewe Chon Amanau tingor ne feito ngeni I. Sipwe kouta imwach won eu nongonong mi pochokun me kinamwe.
Non October 17, 1989, mwirin wesinon ai angang o ua feino imwei, ua feito ngeni ewe saram kouno non ewe aanen Market me Beale Street non San Francisco, California. Iwe non ena atun ua mefi ewe tarku a chechech chapur me ua ekieki, “Iwe meni mi pwo ai kewe taiya,” Iwe ren ewe taraku a sopweno ne chechech, ua kuna eu bus a arapeto rei pwe a kuuei. Iwe ewe taraku a chechech me chechech nge esap eu mettoch ese och ren ai taraku nge eu fonu chechech mi watte. Ai ua nenengeni nukun ua kuna ekkewe aan pwe ra chechech pwe ita pwe usun konik non monumon. Iwe ne mwei eu imw mi nangatameta a pwal popueta ne mokut usun asepwan, me cemen ra turutiw unukui.
Ewe chechech itan Loma Prieta a tori San Franciso non kunok 5:04 neanowas non ena ran me aramas ra feignau me nap ngeni 12,000 aramas a poutsenir imwer.
Ewe chechech a efisi chommong tatakis non ewe nenien San Francisco, iwe nap ngeni tano a fis non San Franciso me chommong tatano a fifis won ekkewe sokkun fonu a “for seni seni garbage me puun fengen, … me sokkopaten mettoch ese pochokun usun konik mi nofit non. Ekkoch puun ra feito seni ewe chok chechech me nom non ewe ier 1906 a pwal fisino non San Francisco.”1
Arapakan 1915, chommong imw me teninimw ra koueta won ekkena puun. Ewe checheck non 1989 a fisino pokiten ekkewe puun nofit me konik me sokkopaten puun mi apwangapwang a efisi tatano. Iwe, ekkei imw pokiten ewe nongonong a for fan ese pochokun.
Ewe fonu chechech non San Francisco a efiengaua chommong aramas non pekin inis me manauei a pwal feingau non. Iwe ekiekiochueta ena fansoun o pwal apochokuna non ai ekiek me netipei pwe ika sia mochen pochokun ne pworacho ngeni ekkewe monumon, chechech, me sokkopaten tattakis non manauach, sipwe fakkun koueta won ewe nongonong mi pochokuneno.
Ewe soufosen chon Nifai itan Helaman a men afateta auchean kouetan won manauach won ewe nongonong mi pochokun, ennet ewe nongonongun Jises Kraist: “Iwe iei, nei kewe at, chechemeni, chechemeni pwe non ewe chok ewe fau an nouch Chon Amanau, ion ewe Kraist, ewe Noun Kot At, pwe epwe koueta ami nongonong; pwe nupwen ewe setan a atorau an asepwan mi pochokun, ennet, an minen feiengauen monuman, ennet, meinisin an sossot o monumon chapur ra fiu ngonuk, ekkewe ir meinisin esap mo wor tufich feiengau reom an epwe oturouokutiw non ewe pwangen een, pokiten ewe fau ka koueta won, minne ewe ennetin nongonong, eu nongonong ika pwe ekkewe aramas ra koueta ir resap mo tongeni turutiw” (Helaman 5:12).
Non foratan ekkewe tempel ikenai, tichiken ekiek me chekiochu foratan kokkotun me pisekisek mi nounou a fakkun auchea. Ren testeni ewe puun me sokkopaten pisek ne pii ika pwe ewe neni me och ne kouta ewe imw. Kaeochun ewe asepwan, pungutiw ran, me sokkopaten siwinin asepwan ika pwe mi pwichikar are patapatat are epwe tongeni pochokun ngeni monumon me chechech mi tonong non ei ekiek usun mi fiffis non ena neni, nge ewe tempel a forata an epwe nomotiw ne pworacho ne pochokuneno ngeni sokkopaten monumon meni epwe fiffis. Non chomong tempel, mi wor nangatamen fochen mecha fitifengen me semen ra oturatiw non puun an epwe eu pochokunen nongonongen ewe tempel.
Usun chon forata me chon kokkotun koueta imw non ach fansoun, Samach won Nang mi achengicheng me Noun we At ra forata eu kokkot, me pisekin angang, me ekkewe ekkoch mettoch ach sipwe aea ne apochokuna manauach an epwe pochokuneno me ese chechech. Ewe kokkot pwe ewe kokkotun manau, ewe ochun kokkotun pwapwa. Ewe kokkot a amecheresi eu fatochun me ekiekiochun seni nepopotan ngeni nesoponon pwan me ekkewe mettoch sipwe fori usun angangen pin, minne mi namot ren emon me emon noun ewe Sam semirit are repwe niwinsefan ngeni I me nonnom ren feinfeino.
Nuku, aier, papatis, me ewe nifangen Ngun mi Fel, me nikitiw tori soponon ir meinisin ra eu kinikinin kokkotun manau. Ir repwe anisi ne forata ekkewe pisekin nongonong pwe epwe eu foun nongonong ngeni ewe Angangen Affor an Kraist. Ekkei mettoch a forata an epwe anisi ne apochokuna manuan emon non ei manau. Iwe, usun chok ewe kokkotun ewe tempel pwe mi namot ne sinei tichikin ifan ne forata ne nofiti ekkewe piseken koueta iwe pwan ina usun kich pisekin koueta non pekin ngun ne iotek, annea pukful, angei sakrament, me angei ekkewe efeiochun pristut me sokkopaten angangen pin pwe ir repwe nofiti ekkewe mettoch non pekin ngun an epwe apochokuna manau.
Nonno chok non aea ekkei mettoch mi fakkun namot. Ren kapasen awewe, non ewe aanen for simen, mi namot ukkukun puun, simen, fau me konik mi naf ne nofiti pwe epwe watte pochokunan. Ika pwe a wor mwaninn auku ekkei mettoch iwe epwe for pwe apwangapwang o esap tongeni aea pwe epwe forian imw.
Non ewe chok, ika pwe sisap awora pwe manauach esap osukosuk usun esap wor iotek iteitan ran me amongoni ngunuch won pukfel, apochokuna kich non pekin ngun ne angei sakrament, me anganga forien angangen pritut usun angangen tempel, iwe kich pwan sipwe apwangapwang non pekin ngun.
Paul, non noun taropwe ngeni chon Ephesus, a era pwe non iei aan ren auchean forata ach sipwe wenechar: “Kraist I ewe a amwochu fengenni unusen ewe imw pwe epwe mammarita o winiti eu imwenipin ngeni ewe Samol” (Ephesus 2:21).
Iotek a eu mettochun nongonong a auchea ren piseken koueta fan itan ach nuku me tipewenechar. Non iotek kich sia tongeni pwarata ach kinisou, tong me ingeiti ngeni Kot. Ren iotek sia tongeni nifangeno ach mochen ngeni I me niwinin sipwe angei pochokunen ne aram ngeni An afanafan. Iotek inai ewe aan sia tongeni tapweno mwirin An memmef non manauach kapachenong pwarata.
Alma a aiti: “Fonoufengenni ren ewe Samon non mettoch meinisin ka fori, me I epwe emwenukeno ren ewe aanen murinno; ennet, nupwen ka kokkor nepwin kopwe kokkor ngeni ewe Samon, pwe I epwe mamasaok non om annut; iwe nupwen ka neno nessor, aura netipom ren kinisou chapur ngeni Kot; ika pwe ka fori ekkei mettoch, en kopwe ekieta non ekkewe ranin soponon” (Alma 37:37).
Aeafengenni ach ekiek, memmef, me mochenin ren Kot non netipekison iotek epwe eu mettoch emon me emon kich usun chok ngasangas me ani mongo.
Akkaneani ekkewe pukfel iteitan ran epwe forata nukuchar me netipewenechar. Usun chok sipwe mochen mongo ne amongoni inisich, ngunuch repwe pwan mochen pochokuneno non kamatip won kapasen Kraist pwe ir mi masoueni kapasen ekkewe soufos. Nifai a aiti, “Oupwe mongo anemi mongon kamatip won ewe kapasen Kraist; pun nengeni ewe kapasen Kraist epwe apasa ngenikemi mettoch meinisin met oupwe fori.” (2 Nifai 32:3).
Ren ach annea ekkewe pukfel mi murinno, anneani chok esap naf ne angei unusan me anonnonunun afanafanen ewe Samon. Kukkuta, ekiekiochu, me aeafengenni ekkewe kapasen Kraist pwe mi pwa non ekkewe pukfel ra wato rech tipemirit me sineinapoch mi nap ngeni ach weiweiti non ei manau. Repwe apochokuna ach mochen ne awora pochokunen ne fori ukkukun ach tongeni.
Eu me nein ekkewe mettoch mi auchea ne fori pwe sipwe apochokuna manauach ne nikitiu o pachengeni nongonongun ewe Samon pwe sipwe fich ngeni ne angei sakrament iteitan wiik. Ewe sakrament a eu angangen pin pwe meinisin chon Mwichefen repwe tufichin ekieki en me manauan, ne pwan ekieki kokkotun pwe repwe fori aier seni, iwe pwan angi ewe pinawa me konik ne achecheminien futuk me chaan Jises Kraist, pwe minen pwarata An Angangen Affor. Ika pwe fori fan netipetekison me ennetin tipach, sipwe asofosefanni ach angangen pwonen fochofoch, me sipwe angei omusamus me angei pwon pwe epwe nom rech iteitan An Ngun and epwe nonnom rech. Ewe Ngun mi Fel a efisi pwe usun chok eu mettoch un ne achema kich ach pwon me pwarata sefan pwe Jises ewe Kraist. Ach fich ngeni ne angei ewe sakrament a apochokuna ach nonnom nefinan ewe foun nongonongen fau, ennet ewe Jises Kraist.
Fansoun An afanafan fetan ewe Chon Amanau a aiti fan tong me fatafatochun ekkewe nongonong, tetten me ekkewe foffor pwe sipwe fori an epwe apochokunata manauach. Nesponon an Afanafan won ewe Chuuk, I A era:
“Iei minne, iteiten aramas meinsin mi rong ai kei kapas nge a pwan fori, epwe wewe ngeni chok emon mwan mi mirit, [minne] a aueta imwan won achau.”
“Iwe, a pung ran watte, a pu konik, a enen asepwan o monumoniti ewe imw; nge ese tur, pokiten a kouta won achau.”
“Iwe, iteiten aramas meinsin mi rong ai kei kapas nge ese fori, epwe wewe ngeni chok emon mwan mi umwes, [minne] a aueta imwan ne pii—
“Iwe, a pung ran watte, a pu konik, a enien asepwal, o monumoniti ewe imw, iwe a turno o kitetereino” (3 Nifai 14:24–27; pwan nengeni Matthew 7:24–27).
Pwi me fefinei kana, esap wor neich sipwe forata imwach, are neni angang, are imweninpin won nongonong mi apwangapwang nofit ren puun ese och are pwal esap wor kokkotun. Sipwe etiwa an ewe Samol pesepes ne feito Ren. Sipwe forata manauach won ewe nongonong mi pochokun.
Non netipetekison uwa pwarata pwe ika sia wenengeni foun nongonong non manauan Jises Kraist me An Angagnen Affor me pwnl tichiken ne tapweno mwirin An kokkot ren ach pwapwa, apachfengenni iteitan iotek, anneani pukel iteitan, me angei sakrament iteitan wiik iwe sipwe fakkun pochokuneno, sipwe enetin fefeita me ekkesiwin tori feinfeino, kich sipwe ammonaochueno ne pworacho ngeni monumon me tatakisin manau, kich sipwe mefi pwapwa me kinamwe a pwonei kich, me kich sipwe pochokun pwe manauach a koueta won nongonongun pochokun: efou nongonong esap fakkun turutiw. Fan pinnin itan Jises Kraist. Amen.