Konafesi Aoao: Faamalosia o le Faatuatua ma le Molimau

Saunia e Elder Robert D. Hales

O Le Korama a Aposetolo e Toasefululua

Tatou te matua manaomia lava konafesi aoao! E ala atu i konafesi e faamalosia ai lo tatou faatuatua ma faalolotoina ai a tatou molimau.

Faafetai Peresitene Monson, mo lau aoaoga ma faataitaiga o auaunaga faaKeriso ma lau faamoemoega mo i matou uma ia avea ma faifeautalai. O loo matou tatalo pea mo oe.

I la tatou tisipenisione, ua faasino atu le Faaola o Iesu Keriso i le faapotopotoina o le Au Paia o “la’u konafesi aoao.”¹

Po o fea lava o tatou i ai i lenei lalolagi, po o le a lava le auala o tatou maimoa ai i nei taualumaga o le konafesi, ou te molimau atu ua tatou potopoto i Lana konafesi. Ou te molimau atu foi o le a tatou faalogo i Lana afioga, aua na ia fetalai, “Pe i lo’u lava leo po o i le leo o a’u auauna, ua tutusa lava.”²

Ua avea lava ia konafesi ma se vaega o le Ekalesia moni a Iesu Keriso. Na faapotopoto e Atamu ana fanau ma vavalo atu i ai i mea o le a oo mai. Na faapotopoto e Mose le fanauga a Isaraelu ma aoao i latou i poloaiga na ia maua. Na aoao atu e le Faaola ia motu o tagata na faapotopoto uma i le Nuu Paia, ma i le konetineta o Amerika. Sa faapotopoto e Peteru ē talitonu i Ierusalema. O le uluai konafesi aoao lava i nei aso e gata ai na faia i le lua masina talu ona faatulagaina le Ekalesia ma na faaauau ai lava konafesi e oo mai i lenei aso.

O nei konafesi o loo i ai pea i lalo o le taitaiga a le Alii, ma taialaina e Lona Agaga.³ O matou o failauga, e le atofaina mai i ai ni autu faapitoa. I le gasologa o vaiaso ma masina, e tele lava i po lēmamoe, matou te faatalitali i le Alii. E ala i le anapogi, tatalo, suesue, ma le mafaufau loloto, matou te iloa ai le savali ua Ia finagalo matou te tuu atu.

Atonu e fesili nisi, “Aisea e le faigofie tele ai ma vave oo mai ia musumusuga?” Na aoao atu e le Alii ia Oliva Kaotui, “E ao ina e suesue i ai i lou mafaufau; ona ao lea ona e ole mai ia te au pe ua sao.”⁴ E oo mai savali mo le konafesi ia i matou pe a maea sauniuniga ma le agaga tatalo, e ala i le Agaga Paia.

E moni lenei mataupu faavae mo tagata uma o le Ekalesia pe a tatou saunia e auai i konafesi faaleuarota, faalesiteki ma konafesi aoao. Matou te suesue i o matou mafaufau mea matou te manaomia ma naunau i ai mai le Tama Faalelagi, ma e matou te tatalo ia malamalama ma faaaoga na mea ua matou aoaoina. A o oo mai taimi o konafesi, tatou te ositaulagaina isi gaoioiga ma “tuu ese mea o lenei lalolagi, ma saili mo mea o se lalolagi sili atu ona lelei.”⁵ Ona tatou faapotopoto mai lea o o tatou aiga e faalogologo i le afioga a le Alii, e pei ona faia e le nuu o le Tupu o Peniamina.⁶

E fiafia le fanau ma le autalavou e faaaofia ai ma latou. Tatou te faia se mea sese ogaoga pe afai tatou te manatu o le konafesi o se mea latou te le malamalama i ai faaleagaga. I le autalavou o le Ekalesia, ou te folafola atu afai o le a outou faalogo, o le a outou lagonaina le faateleina o le Agaga i totonu o outou. O le a tau atu e le Alii ia te outou mea e finagalo o Ia ia outou faia i o outou olaga.

I konafesi e mafai ona tatou maua ai le afioga a le Alii ua na o i tatou e faatatau i ai. Sa molimau mai se tasi tagata o le Ekalesia: “Ina ua ou faalogo i lau lauga, sa ou maofa lava. … O lau lauga o se faaaliga patino tuusao mai le Alii mo lo’u aiga. Ua ou lagonaina se faaaliga malosi o le Agaga i lo’u olaga i na minute a o fetalai tuusao mai le Agaga Paia ia te au.”

Sa fai mai se isi, “Ou te lei lagonaina lava muamua se mamana o se lauga na tuu mai ia te au.”

E mafai ona tupu lea mea ona e molioo e le Agaga Paia le afioga a le Alii i o tatou loto i le ala tatou te malamalama ai.⁷ A ou tusitusi ni manatu i konafesi, ou te le tusia i lalo i taimi uma mea tonu o loo saunoa ai le failauga; ae ou te tusia faatonuga patino a le Agaga o loo tuuina mai ia te au.

E le taua tele mea o tautalagia i lo mea tatou te faalogo i ai ma mea tatou te lagonaina.⁸ O le mafuaaga lena tatou te faia ai se taumafaiga ia maua se aafiaga mai le konafesi i se siosiomaga lea e manino ai le faalogo, lagona, ma le malamalama i le leo filemu ma le itiiti o le Agaga.

Tatou te matua manaomia lava konafesi aoao! E ala atu i konafesi e faamalosia ai lo tatou faatuatua ma faalolotoina ai a tatou molimau. Ma pe a liua i tatou, tatou te faamalosia le tasi ma le isi ina ia tutu malosi ai i le lotolotoi o faaosoosoga i nei aso e gata ai.⁹

I le silia ma le sefulu tausaga talu ai nei, sa tele vaega o le Ekalesia sa le oo i ai ni malamalamaaga sese matuia ma sauaga ia na oo i ai uluai Au Paia. O le a le faapena i taimi uma. O loo o ese le lalolagi mai le Alii i se saoasaoa faateleina nai lo se isi lava taimi muamua. Ua faasaolo solo le tiapolo i le lalolagi. Ua tatou matamata, faalogo, faitau, suesue, ma faasoa atu upu a perofeta ina ia muai lapataiina ma puipuia ai i tatou. Mo se faataitaiga, “O Le Aiga: O Se Folafolaga i le Lalolagi” ua leva ona tuuina mai ae tatou te le i taitai oo i luitau ua feagai nei ma aiga. “O Le Keriso Soifua: O Le Molimau a Aposetolo” ua leva lava ona saunia mo le taimi o le a sili ona tatou manaomia ai.

Atonu tatou te leiloa ni mafuaaga uma pe aisea e lauga mai ia i tatou perofeta ma failauga o le konafesi i ni autu faapitoa i konafesi, ae ua silafia e le Alii. Sa aoao mai Peresitene Harold B. Lee: “E na o le pau le saogalemu i le avea ai ma tagata o lenei ekalesia o le … usitai lea i afioga ma poloaiga o le a tuu mai e le Alii e auala mai i Ana perofeta. … O le a i ai nisi mea e manaomia ai le onosai ma le faatuatua. Atonu e te le fiafia i mea o le a tau mai e le pulega o le Ekalesia. Atonu o le a feteenai ma ou manatu [faaletagata lava ia]. Atonu o le a feteenai ma ou manatu faaleagafesootai. Atonu o le a faalavelave i nisi o vaega o lou olaga tafao. Ae a e faalogo i nei mea, e pei lava o loo pa’u mai i le fofoga o le Alii Lava Ia, i le onosai ma le faatuatua, o le folafolaga e faapea ‘o le a le manumalo lava faitotoa o seoli ia te oe; … ma o le a tafiesea e le Atua mana o le pouliuli mai ou luma, ma faia ia luluina le lagi mo lou lelei ma le mamalu o lona suafa’ (MF&F 21:6).”¹⁰

Na faapefea ona silafia e Peresitene Lee mea o le a tatou feagai ai i o tatou aso? Na ia silafia ona sa avea o ia o se perofeta, tagatavaai, ma talifaaaliga. Ma afai tatou te faalogo i perofeta i le taimi nei, e aofia ai i latou o le a lauga mai i lenei lava konafesi, o le a faamalosia ma puipuia i tatou.

O faamanuiaga silisili o le konafesi aoao e oo mai ia i tatou pe a mavae le konafesi. Manatua le mamanu o loo faamaumau soo i tusitusiga paia: tatou te faapotopoto e faalogo i afioga a le Alii, ma a tatou toe foi atu i o tatou aiga ia tatou ola ai.

Ina ua uma ona aoaoina e le Tupu o Peniamina lona nuu, “sa faataape atu e ia le motu o tagata, ma sa latou foi atu, o tagata taitoatasi, e tusa ma o latou aiga, i o latou lava fale.”¹¹ I lona vaitaimi, sa faia ai foi e le Tupu o Limae lea lava mea e tasi.¹² Ina ua uma ona aoao ma auauna atu i tagata i le malumalu i Nuumau, na augani atu le Faaola i tagata, “Ia outou o atu i o outou fale, ma mafaufau i mea ia na ou fai atu ai, ma ole atu i le Tama, i lou igoa, ina ia outou malamalama, ma saunia o outou mafaufau mo a taeao, ma ou te toe sau ai ia te outou.”¹³

Tatou te taliaina le valaaulia a le Faaola pe a tatou mafaufau loloto ma tatalo ia malamalama i mea sa aoaoina ona ō lea i luma ma faia Lona finagalo. Manatua upu a Peresitene Kimball: “Ua tonu i lo’u mafaufau e faapea pe a ou alu i le fale mai lenei konafesi [aoao] … e matua anoanoai vaega o lo’u olaga e mafai ona ou faaatoatoaina. Ua ou faia se lisi faalemafaufau o na mea, ma ou faamoemoe ou te alu ma galue i le taimi lava e maea ai.”¹⁴ Sa saunoa Peresitene Monson talu ai nei: “Ou te uunaia outou e faitau i lauga … ma mafaufau loloto i savali o loo i ai i totonu. Ua ou iloaina i lou lava ia olaga e mafai ona ou mauaina nisi mea sili atu mai nei lauga musuia pe a ou suesueina i le loloto atili.”¹⁵

E faaopoopo atu i le valaauliaina o i tatou e faia suesuega o tusitusiga paia faaletagata lava ia ma faaleaiga, ua finagalo le Tama Faalelagi ia tatou suesueina soo ma faaaoga mea ua tatou aoaoina i le konafesi. Ou te molimau atu o ē e tuu lo latou faatuatuaga i le Alii ma faalogo i lenei fautuaga i le faatuatua o le a mauaina le malosi sili atu e faamanuia ai o latou lava olaga ma o latou aiga mo tupulaga a sau.

Ua saunia e le Tama Faalelagi le auala. I lenei konafesi, ua mafai e le 97 pasene o le Ekalesia ona lagonaina nei savali i a latou lava gagana. E faitau miliona tagata o le ekalesia i atunuu e 194 o le a maimoa i lenei konafesi i gagana e 95. I totonu o aso e lua pe tolu o le a maua ai savali i luga i le LDS.org i le FaaPeretania, ma i totonu o le vaiaso e tasi o le a amata ai ona maua i gagana e 52. O le taimi nei ua tatou mauaina ia mekasini a le Ekalesia ua lolomiina i totonu o le tolu vaiaso pe a maea le konafesi aoao. Ua tatou le toe faatalitali mo ni masina mo lauga ina ia taunuu mai le meli. I luga o se komepiuta, telefoni, po o isi masini faaeletonika, ua mafai ona tatou faitauina, faalogo, matamata, ma faasoa atu aoaoga a perofeta. I soo se taimi i soo se mea, ua mafai ona faalautele lo tatou malamalama, faamalosia lo tatou faatuatua ma le molimau, puipuia o tatou aiga, ma taitai saogalemu atu i latou i le aiga.

O savali o lenei konafesi o le a aofia ai foi i le mataupu aoaoina a le autalavou i luga o le initoneti. Matua, e mafai ona outou mauaina lesona a le autalavou mo outou lava i luga o le LDS.org. Saili i ai po o a mea o loo aoaoina e a outou fanau, ma avea o ni mataupu o au lava ia suesuega, talanoaga faaleaiga, afiafi faaleaiga, fonotaga faaleaiga, ma faatalanoaga patino taitoatasi ma lau fanau e faatatau i mea e ao ona aoaoina ai i latou taitoatasi.

Ou te uunaia tagata uma o le ekalesia ia faaaoga ia punaoa o i luga o uepisaite a le Ekalesia ma polokalama feaveai. O loo faaauau pea ona faaleleia ina ia faafaigofie pea ona faaaogaina ma sili atu ona talafeagai ma o outou olaga. I luga o le LDS.org o le a e maua ai punaoa e fesoasoani ia te oe e suesue ai i le talalelei, faamalosia ai lou aiga ma le auaiga, ma auauna ai i lou valaauga. Ua mafai foi ona e sailia ou tuaa o e o loo manaomia ia sauniga o le malumalu ma punaoa e lagolago ai oe i le galuega o le faaolataga, e aofia ai le faasoaina atu o le talalelei. E mafai e matua ona taimua i le sauniaina o a latou fanau mo papatisoga, le perisitua, misiona faamamaluina, ma le malumalu. E mafai ona fesoasoani ia i tatou ia savavali i le ala sao ma le vaapiapi o sauniga ma feagaiga o le malumalu ma agavaa ai mo faamanuiaga o le ola e faavavau.

I le konafesi talu ai ia Aperila, i le sauniga aoao o le perisitua, sa ou faamatalaina ai se tala e uiga i le tusiaina e lou tama o se ata o se fitafita ma le ofutau e aoao ai au e uiga i le ofuina o le ofutau atoa a le Atua ma le puipuiga faaleagaga na te aumaia.

Ina ua uma lena sauniga, na lipoti atu e se tamā i lona aiga se mea na ia aoaoina. I le musuia ai, na saili ai e lo la atalii laitiiti o Jason le LDS.org e fia faalogo i le savali mo ia lava. I ni nai aso mulimuli ane na ia tu ai i le afiafi faaleaiga e faasoa atu le lesona i ona uso ma tuafafine. O ia lenei:

O se savali faigofie, na musuia e le Alii, na mauaina e se tamaitiiti, ma sa aoaoina i se aiga i se ala patino ma mamana. Ou te fiafia i lana ufifatafata o le amiotonu. Ou te fiafia i lana talita o le faatuatua e taofia ai u fanafana mumu a le fili. O faamanuiaga nei o le konafesi.

Ou uso e ma tuafafine, ou te tuu atu lau molimau faapitoa o loo soifua le Alii o Iesu Keriso ma o loo tu i le ulu o lenei Ekalesia. O Lana konafesi aoao lenei. Ou te folafola atu ia te outou i Lona suafa afai tou te tatalo ma se manaoga faamaoni ia faafofoga i le siufofoga o lou Tama Faalelagi i savali o lenei konafesi, o le a outou iloaina o loo Ia fetalai atu ia te outou, e faamalosia outou, ma taitai outou i le aiga i Lona afioaga. I le suafa o Iesu Keriso, amene.