2010–2019
Sastenem Ol Profet
Oktoba 2014

Sastenem Ol Profet

I Kam long Elda Rasel M. Nelson

Blong Kworom blong Olgeta Twelef Aposol

Blong yumi sastenem ol profet i wan komitmen blong yumiwan se bae yumi mekem evri samting blong sapotem ol fas wok blong olgeta olsem profet.

Presiden Aering, mifala i talem tangkyu long mesej blong yu we i tijim mo givim insperesen long yumi. Ol dia brata mo sista blong mi, mifala i talem tangkyu from fet mo taem blong yufala. Yestedei, oli bin invaetem yumi wanwan blong sastenem Tomas S. Monson olsem profet blong Lod mo Presiden blong Jos blong Lod. Mo plante taem yumi singsing: “Tangkyu Papa God yu givim profet.”1 ?Yu mo mi, i rili andastanem wanem hemia i minim? !Tingbaot spesel janis we Lod i givim long yumi blong sastenem profet blong Hem, we kaonsel blong hem, bae i no gat tingting blong profet i mekem i doti, i no klin, i giaman, be kaonsel blong hem i tru fulwan nomo!

?Olsem wanem nao yumi rili sastenem wan profet? Longtaem bifo hem i kam Presiden blong Jos, Presiden Josef F. Smit i eksplenem: “Hem i wan impoten diuti we i stap long solda blong olgeta Sent we … oli sastenem ol atoriti blong Jos, blong mekem hemia nomo wetem han we i go antap, i no long wan saen nomo, be long aksen mo long trutok.”2

Mi tingbaot gud wan “aksen” ia nomo blong mi blong sastenem wan profet. Olsem wan medikol dokta mo man blong katem hat, mi gat responsabiliti blong mekem wan open operesen long hat blong Presiden Spensa W. Kimbol long 1972, taem hem i akting Presiden blong Kworom blong Olgeta Twelef Aposol. Hem i nidim wan had operesen. Be mi no gat eksperiens blong mekem kaen operesen ia long wan 77 yia man we hat blong hem i no wok gud. Mi no bin askem blong mekem operesen mo talem long Presiden Kimbol mo Fas Presidensi. Be, wetem fet, Presiden Kimbol i jusum blong kasem operesen ia, from nomo, Fas Presidensi i askem hem blong mekem. !Hemia i soem olsem wanem hem i sastenem ol lida blong hem! Mo desisen ia mekem mi seksek!

Tangkyu long Lod, operesen i bin wan sakses. Taem hat blong Presiden Kimbol i stat blong pam bakegen, !i pam wetem strong paoa! !Long stret taem ia, mi kasem wan klia witnes long Spirit, se man ia, bae wan dei i kam Presiden blong Jos!3

Yu save risal. 20 manis nomo afta, Presiden Kimbol i kam Presiden blong Jos. Mo hem i bin wan lida we i soem lidasip we i klia gud mo i gat strong paoa long tingting blong plante yia.

Afta long taem ia, yumi bin sastenem Presiden Esra Taf Benson, Howod W. Hanta, Godon B. Hinkli, mo naoia Tomas S. Monson olsem Presiden blong Jos— !ol profet long evri mining blong toktok ia!

Ol dia brata mo sista blong mi. Sapos Restoresen i mekem eni samting, i ronemaot ol olfala bilif se God i stop toktok long ol pikinini blong Hem. I no gat wan samting we i moa tru bitim trutok ia. Wan profet i bin stanap long hed blong Jos blong God long evri dispensesen, stat long taem blong Adam kam kasem taem blong yumi naoia.4 Ol Profet oli testifae abaot Jisas Kraes—se Hem i tabu, mo oli testifae abaot misin mo seves blong Hem long wol ia.5 Mifala i givim ona long Profet Josef Smit olsem profet blong las dispensesen. Mo mifala i givim ona long wanwan man we i kam afta long hem olsem Presiden blong Jos.

Taem yumi sastenem ol profet mo ol nara lida,6 yumi askem se i mas gat loa blong ful sapot insaed long Jos, from Lod i talem se Hem i no givim raet long eniwan long yumi blong go aot blong prijim gospel blong Hem, o blong bildimap jos blong Hem, be nomo, sapos wan we i gat atoriti i odenem yumi, mo jos i save se man ia i gat atoriti, mo ol lida blong jos oli bin odenem long stret fasin.7

Hemia i givim long yumi, olsem memba blong Jos blong Lod, tras mo fet taem yumi traehad blong kipim tok blong skripja blong folem voes blong Lod,8 taem i kam tru long voes blong ol wokman blong Hem, ol profet. 9 Evri lida insaed long Jos blong Lod, oli singaotem olgeta wetem stret atoriti. I no gat profet o eni nara lida insaed long Jos, we i bin singaotem hemwan. I no gat profet we oli bin ilektem. Lod i mekem hemia i klia taem Hem i talem: “Yufala i no jusumaot mi. Mi mi jusumaot yufala i go mekem wok, [mo odenem yufala].”10 Yu mo mi, i no “vot” from ol lida blong Jos, hemia long eni level. Be, yumi gat spesel janis blong sastenem olgeta.

Ol wei blong Lod oli defren long ol wei blong man. Wei blong man i karemaot ol pipol long ofis o bisnis taem oli kam olfala o handikap. Be ol wei blong man oli no, mo bae oli neva kam ol wei blong Lod. Blong yumi sastenem ol profet i wan komitmen blong yumiwan se bae yumi mekem evri samting blong sapotem ol fas wok blong olgeta olsem profet. Sastening blong yumi i olsem wan saen blong promes we i soem se yumi luksave se koling blong olgeta olsem profet i wan truwan mo yumi joen long hem.

Twantesikis yia bifo hem i kam Presiden blong Jos, Elda Joj Albet Smit i talem: “Diuti we yumi mekem taem yumi leftemap han blong yumi … i wan we i moa tabu. I no minim se bae yumi go kwaet nomo long wei blong yumi mo glad nomo se profet blong Lod bae i daerektem wok ia, be i minim … se bae yumi stanap biaen long hem; bae yumi prea from hem; bae yumi difendem gudfala nem blong hem, mo bae yumi traehad blong mekem folem ol instraksen blong hem olsem we Lod i daerektem.”11

!Lod we i stap laef i lidim Jos blong Hem we i stap laef!12 Lod i talemaot tingting blong Hem long saed blong Jos long ol wokman blong Hem. Yestedei, afta oli bin invaetem yumi blong sastenem Tomas S. Monson olsem Presiden blong Jos, yumi gat bin janis ia tu blong sastenem hem, ol kaonsela long Fas Presidensi, mo ol memba blong Kworom blong Olgeta Twelef Aposol olsem ol profet, ol sia mo ol reveleta. !Tingting long hemia! !Yumi sastenem 15 man olsem profet blong God! Oli holem evri prishud ki we Lod i bin givim long man long dispensesen ia.

Koling blong ol 15 man long tabu wok blong aposol i givim bigfala proteksen long yumi olsem memba blong Jos ?From wanem? From ol desisen blong ol lida ia, evriwan i mas agri long olgeta.13 Yu save tingting hao Spirit i nidim blong muv long 15 man blong mekem ol tingting i stret? Ol 15 man ia oli gat defren level blong edukesen mo wok bakgraon wetem defren tingting abaot plante samting. !Trastem mi! Ol 15 man ia—ol profet, ol sia mo ol reveleta—oli save wanem i tingting blong Lod taem evriwan tugeta oli agri long wan samting! Oli gat komitmen ia blong luk se tingting blong Lod bae i hapen tru. Prea blong Lod i givim paten blong wanwan long ol 15 man ia taem oli prea: “Ol samting we yu yu wantem i mas hapen long wol olsem we i hapen long heven.”14

Aposol we i stap longtaem long ofis blong Aposol i prisaed.15 Sistem ia bae i karem ol olfala man i go long ofis blong Presiden blong Jos.16 I givim fasin we wok i gogohed, wan man we tingting blong hem i raep gud long stret taem, i gat eksperiens, mo i gotru long wan bigfala fasin blong rere, olsem we Lod i lidim hem.

Jos tedei, Lod Hemwan i bin oganaesem. Hem i putum i stap wan nambawan sistem blong lukaotgud long Jos we i save mekem se man i save spel, mo semtaem narawan i kam wok. Sistem ia i givim spes long ol profet blong lid taem oli kasem sik we oli no save ronwe long hem, mo ol defren kaen handikap we i kam taem man i kam olfala.17 Balens mo proteksen oli fulap i stap blong mekem se i no gat wan i save lidim Jos i go rong. Ol senia lida, oli gohed blong kasem tijing blong mekem se, wan dei, oli rere blong sidaon long kaonsel we i hae evriwan. Oli lanem olsem wanem blong harem voes blong Lod tru long smol voes blong Spirit.

Taem hem i stap olsem Fas Kaonsela blong Presiden Esra Taf Benson, we long taem ia hem i stap kolosap long en blong laef blong hem long wol ia, Presiden Godon B. Hinkli i eksplenem:

“Ol prinsipol mo ol fasin blong wok we Lod i putum i stap blong lidim Jos blong Hem, i rere from eni … situesen. Hem i impoten … se i no gat tu tingting o wari abaot fasin blong lidim Jos mo fasin blong yusum ol presen blong ol profet, we i tekem tu, raet blong kasem insperesen mo revelesen blong lidim ol wok mo ol program blong Jos, taem Presiden i sik o i no save wok fulwan.

“Fas Presidensi mo Kaonsel blong Olgeta Twelef Aposol, God i singaotem mo odenem olgeta blong holem ol ki blong prishud, gat atoriti mo responsabiliti blong lidim Jos, blong mekem ol odinens, blong eksplenem ol doktrin, mo blong putum mo holemtaet ol praktis blong hem.”

Presiden Hinkli i gohed:

“Taem Presiden i sik o i no save wok fulwan long evri diuti blong ofis blong hem, tufala kaonsela blong hem tugeta i mekem Kworom blong Fas Presidensi. Tufala i gohed wetem ol wok blong Presidensi blong evri dei. …

“… Be eni bigfala kwestin blong polisi, fasin blong wok, program, o doktrin, Fas Presidensi mo tugeta wetem Olgeta Twelef, oli tokbaot long ditel mo wetem prea.”18

Las yia, taem Presiden Monson i kasem 5 yia blong seves blong hem olsem Presiden blong Jos, hem i luklukbak long ol 50 yia blong seves olsem wan aposol mo i mekem toktok ia: “Yia i soem paoa blong hem long yumi evriwan. Be, yumi joenem voes blong yumi long hemia blong King Benjamin we i talem: ‘… Be mi mi olsem yufala nomo, mi mi save kasem evri kaen fasin blong no strong long bodi mo tingting; be stil ol pipol i bin jusum mi … mo papa blong mi i bin konsekretem mi, … mo Lod i bin sevem mi wetem paoa blong hem we i bitim eni narafala paoa blong wok blong helpem yufala wetem evri strong, tingting, mo paoa we Lod i bin givim long mi’ (Mosaea 2:11).”

Presiden Monson i gohed: “Nomata long ol jalenj blong helt we i save kam long yumi, nomata eni samting we yumi no strong long hem long saed blong bodi mo tingting, yumi givim seves wetem ful paoa blong yumi. Mi save promesem yufala se Jos i stap long ol gudfala han. Sistem we oli bin putum blong Kaonsel blong Fas Presidensi mo Kworom blong Olgeta Twelef [Aposol] i promesem [yumi] se bae Jos bae i stap long ol gud han oltaem, mo nomata wanem i save kam, i no nid blong wari o fraet. Sevya blong yumi, Jisas Kraes, Hem we yumi folem, Hem we yumi wosipim, mo Hem we yumi wok blong Hem, oltaem i lidim Jos.”19

!Presiden Monson, mifala i talem tangkyu from olgeta trutok ia! Mo mifala i talem tangkyu from ful laef blong yu we i fulap long eksampol mo tru seves. Mi ting se mi save toktok long bihaf blong ol memba blong Jos raon long wol, blong mifala i joen mo talem tangkyu tru blong mifala long yu. !Mifala i givim ona long yu! Mifala i lavem yu! Mifala i sastenem yu, i no nomo taem mifala i stap leftemap han be wetem ful hat mo ful wok we mifala i givim wetem ful paoa. Wetem wan tingting we i stap daon, mo wetem strong tingting, !mifala i oltaem prea from yu, dia profet blong mifala!20 Long nem blong Jisas Kraes, amen.

Ol Not

  1. “Tangkyu Papa God Yu Givim Profet,” Singsing Tabu mo Singsing blong Ol Pikinini, pej 36.

  2. Teachings of Presidents of the Church: Joseph F. Smith (1998), 211; oli ademap italik. Toktok ia, oli mekem long 1898, taem Presiden Smit i bin Seken Kaonsela long Fas Presidensi.

  3. Blong gat moa ditel, luk long Spencer J. Condie, Russell M. Nelson: Father, Surgeon, Apostle (2003), 153–56.

  4. Luk long Bible Dictionary, “Dispensations.”

  5. Samfala profet oli bin talem finis se bae Lod i kam, mo wan long olgeta i Lihae (luk long Fas Nifae 1:19), Nifae (luk long Fas Nifae 11:31–33; 19:7–8), wan i Jekob (luk long Jekob 4:4–6), wan i Benjamin (luk long Mosaea 3:5–11, 15), wan i Abinadae (luk long Mosaea 15:1–9), wan i Alma (luk long Alma 40:2), mo wan i Samuel man blong Leman (luk long Hileman 14:12). Bifo Sevya i bon i kam long wol long Betlehem, oli bin luk finis sakrifaes blong Hem we bae i pem praes from ol sin blong man, mo oli bin luk tu we Hem i laef bakegen long ded.

  6. Prinsipol blong sastenem ol lida i wan stamba prinsipol insaed long Jos blong Lod. Oli sastenem wan bifo oli odenem hem long wan ofis blong prishud.

  7. Luk long Doctrine and Covenants 42:11. Praktis ia blong sastenem ol lida blong yumi, oli statem long 6 Epril 1830, taem we oli bin oganaesem Jos, mo long Maj 1836, taem oli sastenem ol memba blong Fas Presidensi mo Kworom blong Olgeta Twelef Aposol olsem ol profet, ol sia, mo ol reveleta (luk long History of the Church, 1:74–77; 2:417).

  8. Buk blong Momon i givim woning blong ol denja sapos yumi no stap mekem folem ol tijing blong ol profet. Long buk ia, yumi ridim se “bigfala haos we i gat fulap spes ia, i hae tingting blong wol; mo haos ia i foldaon, mo foldaon blong haos ia i bigwan tumas. Mo enjel blong Lod i toktok …, i talem se: ‘Olsem ia nao Lod bae i prapa spolem gud evri kantri, famle, lanwis, mo pipol, we bae oli faet agensem olgeta twelef aposol blong Smol Sipsip.” (Fas Nifae 11:36).

  9. Luk long Daniel 9:10; Amos 3:7; Doctrine and Covenants 21:1, 4–5; 124:45–46.

  10. Jon 15:16. Nambafaef toktok blong bilif i mekem hemia i klia: “Mifala i biliv we God i mas singaotem wan man, tru long profesi, mo tru long ol man we oli gat raet blong putum han antap long hed blong hem, blong hem i prijim Gospel mo mekem ol odinens we i stap.”

  11. Teachings of Presidents of the Church: George Albert Smith (2011), 64; oli ademap italik. Kwot ia i kamaot long wan toktok blong konfrens we i kam long Elda Joj Albet Smit long yia 1919. Hem i bin kam Presiden blong Jos long 1945.

  12. Luk long Doctrine and Covenants 1:30, 38.

  13. Luk long Doctrine and Covenants 107:27.

  14. Nambatri Nifae 13:10; luk tu long Matiu 6:10; Luk 11:2.

  15. Taem wan Presiden blong Jos i ded, Fas Presidensi i nomo gat, mo tufala kaonsela i tekem ples blong tufala insaed long Kworom blong Olgeta Twelef Aposol. Nao Kworom blong Olgeta Twelef Aposol i prisaed ova long Jos kasem taem oli oganaesem Fas Presidensi bakegen. Smol taem ia we i no gat Fas Presidensi, oli talem se wok blong aposol i stop smol. Folem histri, taem ia, longfala blong hem i defdefren, i bin stap blong fo dei i go long tri dei, mo i go kasem tri mo haf yia.

  16. I tru, fasin blong tekemap wok ia i no wok long koling blong Josef Smit, from God i bin singaotem hem finis blong i kam profet blong Gospel we I Kambak, mo blong hem i fas Presiden blong Jos (luk long Seken Nifae 3:6–22; luk tu long Abraham 3:22–23).

  17. Yumi save se Lod Hemwan i save singaotem eniwan long yumi i gobak hom long eni taem sapos Hem i jusum.

  18. Gordon B. Hinckley, “God Is at the Helm,” Ensign, Mei 1994, 54; luk tu long Gordon B. Hinckley, “He Slumbers Not, nor Sleeps,” Ensign, Mei 1983, 6.

  19. “Message from President Thomas S. Monson,” Church News, 3 Feb 2013, 9.

  20. Luk long “We Ever Pray for Thee,” Hymns, no. 23.