2010–2019
Lagolagoina o Perofeta
Oketopa 2014
15:20

Lagolagoina o Perofeta

Saunia e Elder Russell M. Nelson

O Le Korama a Aposetolo e Toasefululua

Official portrait of Elder Russell M. Nelson of the Quorum of the Twelve Apostles, 2004. Set apart as president of the Quorum on Wednesday, July 15, 2015 by President Thomas S. Monson.

O lo tatou lagolagoina o perofeta o se tautinoga patino lea o le a tatou faia le mea sili tatou te mafaia e tausi ai a latou faamuamua faaperofeta.

Peresitene Eyring matou te faafetai atu mo lau savali anoa ma musuia. Ou uso e ma tuafafine pele, matou te faafetai atu mo lo outou faatuatua ma le tuuto. O ananafi, sa valaaulia ai tatou taitoatasi ia lagolagoina Thomas S. Monson o le perofeta a le Alii ma o le Peresitene o le Ekalesia a le Alii. Ma e tatou te pepese soo lava i le, “Ia viia oe le Atua, mo le perofeta.” Pe o tatou malamalama ea i le uiga o lena mea? Mafaufau i le avanoa ua tuu mai e le Alii ia i tatou e lagolago ai Lana perofeta, o ana fautuaga o le a mama, tonu, e le uunaia e soo se lagona faaletagata, ma e moni atoatoa!

E faapefea ona tatou lagolagoina moni lava se perofeta? Ae lei taitai avea o ia ma Peresitene o le Ekalesia, sa faamalamalama mai ai e Peresitene Iosefa F. Samita e faapea, “O se tiute taua ua tuuina mai i luga o le Au Paia … e lagolago taitai o le Ekalesia, i le faia lea e le gata i le sii ae o lima, o se faailoga faigofie, faapea foi i galuega ma le upumoni.”

Ou te manatua lelei la’u “galuega” sili ona tupito e lagolago ai se perofeta. I le avea ai ma se fomai faalesoifua maloloina ma se fomai tipitipi o le fatu, sa ou maua ai se tiutetauave e faatino se taotoga o le fatu o Peresitene Spencer W. Kimball i le 1972, a o avea o ia ma Peresitene Lagolago o le Korama a Aposetolo e Toasefululua. Sa ia manaomia se taotoga sili ona faigata. Ae sa leai so’u poto masani i le faia o se taotoga faapena i se gasegase e 77 tausaga le matua i le faaletonu o le fatu. Ou te lei fautuaina le taotoga ma o lea sa faailoa atu ai ia Peresitene Kimball ma le Au Peresitene Sili. Ae, i le faatuatua, sa filifili ai Peresitene Kimball e faia pea lona taotoga, ona sa fautuaina ai e le Au Peresitene Sili. Ua faaalia i lena mea le auala sa ia lagolagoina ai ona taitai! Ma o lana faaiuga sa ou popole tele ai!

E faafetai ai i le Alii, sa manuia le taotoga. Ina ua toe tātā le fatu o Peresitene Kimball, sa tātā ma se malosi tele! I lena lava taimi, sa ou maua ai se molimau manino mai le Agaga e faapea o lenei tamalii o le a i ai se aso e avea ai ma Peresitene o le Ekalesia!

Ua outou silafia le taunuuga. E na o le 20 masina mulimuli ane, ae avea Peresitene Kimball ma Peresitene o le Ekalesia. Ma sa ia tuuina mai se taitaiga lototoa ma le lototele mo le tele o tausaga.

Talu mai lena taimi ua tatou lagolagoina ai Peresitene Ezra Taft Benson, Howard W. Hunter, Gordon B. Hinckley, ma o le taimi nei o Thomas S. Monson o ni Peresitene o le Ekalesia. O ni perofeta moni lava!

Ou uso e ma tuafafine pele, afai e i ai se mea na faia e le Toefuataiga, na ia olopalaina le talitonuga ua leva e faapea ua le toe fetalai mai le Atua i Lana fanau. E leai se mea o toe mamao mai le upumoni. E tu se perofeta e taitai le Ekalesia a le Atua i tisipenisione uma, mai ia Atamu e oo mai i aso nei. E molimau mai Perofeta ia Iesu Keriso—e uiga i Lona paia ma Lana misiona ma auaunaga i le lalolagi. Tatou te faamamaluina le Perofeta o Iosefa Samita o le perofeta o lenei tisipenisione mulimuli. Ma tatou te faamamaluina foi tamalii taitasi na sosoo mai ai o ni Peresitene o le Ekalesia.

A tatou lagolagoina perofeta ma isi taitai, tatou te tausia le tulafono o le finagalo autasi, aua na fetalai le Alii, “O le a le tuuina atu i soo se tasi e alu e talai atu la’u talalelei, pe ati a’e la’u ekalesia, vagana ai ua faauuina o ia e se tasi ua i ai le pule, ma ua lauiloa i le ekalesia ua ia te ia le pule ma ua faauuina o ia i le ala e tatau ai e ao o le ekalesia.”

O lenei mea tatou te maua ai o ni tagata o le Ekalesia a le Alii, le mautinoa ma le faatuatua a o tatou tauivi e tausi le poloaiga faatusitusiga paia e faalogo i le siufofoga o le Alii pe a oo mai e ala i le leo o Ana auauna, o perofeta. O taitai uma i le Ekalesia a le Alii e valaauina e le pule tatau ai. E leai se perofeta po o soo se taitai i lenei Ekalesia, i lena tulaga, na ia valaauina o ia lava. E leai ma se perofeta ua filifilia faapalota. Na faamanino mai e le Alii lena mea ina ua Ia fetalai mai, “Ua le filifilia a’u e outou, a ua filifili outou e a’u, ma faauuina outou.” Tatou te le “palotaina” ia taitai o le Ekalesia i soo se tulaga lava. Ae tatou te maua le avanoa e lagolagoina ai i latou.

O ala a le Alii e ese mai i ala a tagata. O ala a tagata e aveesea tagata mai ofisa ma pisinisi pe a latou matutua pe ua le toe mafaia foi se mea. Ae o ala a tagata e le avea ma o le a le avea lava ma ala a le Alii. O lo tatou lagolagoina o perofeta o se tautinoga patino lea o le a tatou faia le mea sili tatou te mafaia e tausi ai a latou faamuamua faaperofeta. O la tatou lagolago o se faailoga faapei o se tautoga lea tatou te faamamaluina ai lo latou valaauga o se perofeta ina ia faamaoni ma [ia iloa] o loo noatia ai i tatou.

E luasefulu-ono tausaga a o lei avea o ia ma Peresitene o le Ekalesia, a o valaauina ia Elder Siaosi Alapati Samita, sa ia saunoa ai: “O le matafaioi tatou te faia pe a sii ae o tatou lima … o se matafaioi e sili ona paia. E le faapea o le a tatou o atu gugu ai i o tatou ala ma le naunau o le a taitaiina e le perofeta a le Alii lenei galuega, ae o lona uiga … o le a tatou lagolagoina o ia; o le a tatou tatalo mo ia; o le a tatou puipuia lona igoa lelei, ma o le a tatou taumafai e faatino ana faatonuga e pei ona taitaiina ai o ia e le Alii.”

O loo taitaia e le Alii soifua Lana Ekalesia ola! E faaali mai e le Alii Lona finagalo mo le Ekalesia i Lana perofeta. O ananafi, ina ua maea ona valaaulia i tatou e lagolagoina Thomas S. Monson o le Peresitene o le Ekalesia, sa tatou maua foi le avanoa e lagolagoina ai o ia, o fesoasoani i le Au Peresitene Sili, ma uso o le Korama a Aposetolo e Toasefululua o ni perofeta, tagatavaai, ma talifaaaliga. Mafaufau i lena mea! Tatou te lagolagoina tamalii e 15 o ni perofeta a le Atua! Ua latou umiaina ki uma o le perisitua ua faaee mai i luga o tagata i lenei tisipenisione.

O le valaauina o tamalii e 15 i le valaauga paia faaaposetolo ua tuuina mai ai se puipuiga tele mo i tatou o tagata o le Ekalesia. Aisea? Ona o faaiuga a nei taitai e tatau ona autasi. E mafai ona e mafaufauina le manaomia e le Agaga ona musuia tamalii e 15 ia maua ai le autasi? O nei tamalii e 15 e eseese uma o latou tulaga faaleaoaoga ma faalegaluega, faatasi ai ma manatu eseese e uiga i le tele o mea. Talitonu mai! O nei tamalii e 15—o perofeta, tagatavaai, ma talifaaaliga—latou te silafia le finagalo o le Alii pe a ausia le autasi! Ua tuuto lava i latou ia vaaia o le a faia moni lava le finagalo o le Alii. O le tatalo a le Alii o loo i ai le mamanu mo nei tamalii taitoatasi e 15 pe a latou tatalo: “Ia faia lou finagalo i le lalolagi e pei ona faia i le lagi.”

E pulefaamalumalu le Aposetolo e sili ona umi i le tofi o le Aposetolo. O le faatulagaga o le umi i le tofi e masani lava ona oo ai tamalii matutua i le tofi o le Peresitene o le Ekalesia. E maua ai le le motusiaina, lava o le poto masani, aafiaga, ma sauniuniga e tele, e pei ona taiala ai e le Alii.

O le Ekalesia i nei ona aso ua faatulagaina e le Alii lava Ia. Ua Ia faatulagaina se faiga ofoofogia o le pulega lea e le motusia ai i latou e faasolo i tofiga ma e o loo saunia e faatumu ia tofiga pe a avanoa. O lena faatulagaga e maua ai le taitaiga faaperofeta e oo foi pe a o mai faatasi le matua o tausaga ma gasegase le maalofia ma le le gafatiaina. Ua anoanoai foi aiaiga ma puipuiga ina ia le mafai ai e se tasi ona taitaiseseina le Ekalesia. E aoao pea lava pea taitai sinia ina ia oo mai lena aso ua latou saunia e nofo i aufono sili ona maualuluga. Latou te aoao i le auala e faalogo ai i le siufofoga o le Alii e ala i musumusuga a le Agaga.

A o auauna ai o le Fesoasoani Muamua ia Peresitene Ezra Taft Benson, o le sa pulapula lagoto lona soifua faaletino, sa faamalamalama mai ai e Peresitene Gordon B. Hinckley:

“Ua i ai i mataupu ma ala faatutuina ua faia e le Alii mo le taitaiga o Lana ekalesia ni fuafuaga mo tulaga faapenei. E taua … ona le i ai o le masalosalo po o le popole e uiga i le taitaiga o le Ekalesia, ma le faaaogaina o meaalofa faaperofeta, e aofia ai le aia i musumusuga ma faaaliga i le taitaiga o le galuega ma polokalama o le Ekalesia, pe a gasegase le Peresitene pe ua le mafai ona ia galue atoatoa.

“O le Au Peresitene Sili ma le Aufono a Aposetolo e Toasefululua, ua tofia ma faauuina e umia ki o le perisitua, ua i ai le pule ma le tiute e taitai ai le Ekalesia, ma faia ai ona sauniga, ma faamalamalama ona mataupu, ma faatuina ma faamautuina ona aoaoga.”

Sa faaauau pea le saunoaga a Peresitene Hinckley:

“A gasegase le Peresitene pe ua le mafai ona ia galue atoatoa i tiute uma o lona tofi, o ona fesoasoani faatasi e toalua, o le Korama lena a le Au Peresitene Sili. O i laua e faia galuega o aso taitasi a le Au Peresitene Sili. …

“… Ae o soo se mataupu mamafa o aiaiga, tulafono, polokalama, po o mataupu, e iloiloina ma le agaga tatalo faatasi e le Au Peresitene Sili ma le Toasefululua.”

I le tausaga ua tea, ina ua ausia e Peresitene Monson le matāti’a o le 5 tausaga o le auaunaga o se Peresitene o le Ekalesia, sa ia toe manatunatu ai i lona 50 tausaga o le auaunaga faaaposetolo ma faia ai le saunoaga lenei: “E oo mai lava aafiaga le lelei o le matua ia i tatou uma. Peitai, tatou te tuufaatasi o tatou leo ma le Tupu o Peniamina, lea na fai mai, … ‘Ua pei lava a’u o outou, e oo i ai vaivaiga eseese uma o le tino ma le mafaufau; peitai ua filifilia a’u … ma faapaiaina e lo’u tama, … ma sa tausia ma faasaoina e lona mana le mafaatusalia, e auauna atu ia te outou ma le manatu atoa, mafaufau, ma le malosi atoa ua tuu mai e le Alii ia te a’u’ (Mosaea 2:11).”

Sa faaauau pea le saunoaga a Peresitene Monson: “E ui i soo se luitau o le soifua maloloina e ono oo mai ia i tatou, e ui i soo se vaivaiga i le tino po o le mafaufau, tatou te auauna pea i le mea sili tatou te mafaia i lo tatou tomai. Ou te faamautinoa atu ia te outou o le Ekalesia o loo saogalemu lona taitaiga. O le faatulagaga ua faatulagaina mo le aufono a le Au Peresitene Sili ma le Korama a [Aposetolo] e Toasefululua ua faamautinoa ai [ia i tatou] o le a i ai pea i taimi uma le saogalemu o lona taitaiga ma po o le a lava se mea e ono oo mai, e leai ma se mea e ono popole ai pe fefe ai. O lo tatou Faaola, o Iesu Keriso, le o loo tatou mulimuli i ai, le o loo tatou tapuai i ai, ma le o loo tatou auauna i ai, o loo i ai pea i le taitaiga [o le Ekalesia].”

Peresitene Monson, matou te faafetai atu mo na upumoni! Ma e matou te faafetai atu mo lou soifuaga atoa o faataitaiga ma auaunaga tuuto. Ou te fia fai ma sui o tagata o le Ekalesia i le lalolagi atoa i lo matou faailoaga autasi ma le faamaoni o le loto faafetai mo oe. Matou te faamamaluina oe! Matou te alolofa ia te oe! Matou te lagolagoina oe, e le na o le siilima ae ma o matou loto atoa ma taumafaiga faapaiaina. I le lotomaualalo ma le faatauanau, “le perofeta pele e, ia talosia”! I le suafa o Iesu Keriso, amene.

Faamatalaga

  1. “Ia Viia Oe le Atua mo le Perofeta,” Viiga, nu. 10.

  2. Aoaoga a Peresitene o le Ekalesia: Iosefa F. Samita (1998), 217; faaopoopo le faamamafa. Na faia lenei faamatalaga i le 1898, ao Fesoasoani Lua Peresitene Samita i le Au Peresitene Sili.

  3. Mo nisi faamatalaga, tagai Spencer J. Condie, Russell M. Nelson: Tamā, Fomai Tipitipi, Aposetolo (2003), 153–56.

  4. Tagai Bible Dictionary, “Dispensations.”

  5. O le toatele o perofeta sa valoia le afio mai o le Alii, e aofia ai Liae (tagai 1 Nifae 1:19), Nifae (tagai 1 Nifae 11:31–33; 19:7–8), Iakopo (tagai Iakopo 4:4–6), Peniamina (tagai Mosaea 3:5–11, 15), Apinati (tagai Mosaea 15:1–9), Alema (tagai Alema 40:2), ma Samuelu le sa Lamana (tagai Helamana 14:12). Ao lei fanau mai le Faaola i Peteleema, sa latou muai vaai i Lana taulaga togiola ma Lona Toetu mulimuli ane.

  6. O le mataupu faavae o le lagolagoina o taitai e taua i le Ekalesia atoa a le Alii. E muamua lagolagoina se tagata ao lei vaetofiaina i se valaauga pe faauuina i se tofi o le perisitua.

  7. Mataupu Faavae ma Feagaiga 42:11. O le faatinoga o le lagolagoina o o tatou taitai sa faataunuuina i le aso 6 Aperila, 1830, ina ua faatulagaina le Ekalesia, ma ia Mati 1836, ina ua lagolagoina le Au Peresitene Sili ma le Korama a Aposetolo e Toasefululua o ni perofeta, tagatavaai, ma talifaaaliga (tagai History of the Church, 1:74–77; 2:417).

  8. Sa lapatai mai le Tusi a Mamona e uiga i tulaga lamatia pe afai tatou te le amanaiaina ia aoaoga a perofeta. Ua tatou faitau i ai faapea “o le fale tele ma le ateatea o le faamaualuga lea o le lalolagi; ma sa pa’ū, ma o lona pa’ū sa matua tele lava. Ma sa toe fetalai mai le agelu a le Alii ia te a’u, fai mai: O le a faapea lava le faaumatiaga o atunuu uma, ituaiga, gagana eseese, ma tagata, o e e faasagatau i aposetolo e toasefululua a le Tamai Mamoe” (1 Nifae 11:36).

  9. Tagai Tanielu 9:10; Amosa 3:7; Mataupu Faavae ma Feagaiga 21:1, 4–5; 124:45–46.

  10. Ioane 15:16. O loo faamaninoina mai e le mataupu faavae o le faatuatua lona lima e faapea: “Matou te talitonu e ao ina valaauina se tagata e le Atua, e ala i le valoaga, ma ala i le faaeega o lima o i latou o e o i ai le pule, e talai atu ai le Talalelei ma faia sauniga o i ai.”

  11. Aoaoga a Peresitene o le Ekalesia: Siaosi Alapati Samita (2011), 65; faaopoopo le faamamafa. O lenei upusii na sii mai se lauga a Elder Siaosi Alapati Samita mai se konafesi i le 1919. Sa avea o ia ma Peresitene o le Ekalesia i le 1945.

  12. Tagai Mataupu Faavae ma Feagaiga 1:30, 38.

  13. Tagai Mataupu Faavae ma Feagaiga 107:27.

  14. 3 Nifae 13:10; tagai foi Mataio 6:10; Luka 11:2.

  15. A maliu se Peresitene o le Ekalesia, e faataape le Au Peresitene Sili ma e see atu ia fesoasoani e nofoia o laua tulaga i le Korama a Aposetolo e Toasefululua. Ona pulefaamalumalu lea o le Korama a Aposetolo e Toasefululua i le Ekalesia seiiloga ua toe faatulaga le Au Peresitene Sili. E taua lena vaitaimi o le apostolic interregnum. E masani lava, ona eseese le umi o lena vaitaimi mai le fa aso i le tolu ma le afa tausaga.

  16. E moni, e lei faaaogaina lena mamanu i le valaauga o Iosefa Samita, lea sa muai faauuina e avea ma perofeta o le Toefuataiga ma le uluai Peresitene o le Ekalesia (tagai 2 Nifae 3:6–22; tagai foi Aperaamo 3:22–23).

  17. Ua tatou silafia e mafai ona valaauina soo se tasi o i tatou e le Alii Lava Ia e toe foi atu i le aiga i soo se taimi e finagalo i ai o Ia.

  18. Gordon B. Hinckley, “O Le Atua o Loo i le Ao o Lenei Ekalesia,” Liahona, Iulai 1994, 72–73; tagai foi Gordon B. Hinckley, “He Slumbers Not, nor Sleeps,” Ensign, May 1983, 6.

  19. “Message from President Thomas S. Monson,” Church News, Feb. 3, 2013, 9.

  20. “Le Perofeta Pele e,” Viiga, nu. 11.