O Fea le Itu o E Faasaga I Ai?

Saunia e Elder Lynn G. Robbins

O Le Au Peresitene o Fitugafulu

O le taumafai e faamalie isi a o le’i faamalieina le Atua o le fesuiaia lea o le poloaiga muamua ma le sili ma le lona lua.

“O fea le itu o e faasaga i ai?” na faate’ia a’u e Peresitene Boyd K. Packer i lenei fesili lavelave a o ma malaga faatasi i la’u tofiga muamua i le avea ai ma se Fitugafulu fou. E aunoa ma se faamalamalamaga ina ia auiliili mai le fesili, sa ou lē mautonu. “O se Fitugafulu,” na ia faaauau ai, “e le fai o ia ma sui o tagata i le perofeta, ae e fai ma sui o le perofeta i tagata. Aua lava nei galo le itu e te faasaga i ai!” O se lesona mamana lea.

O le taumafai e faamalie muamua isi i lo le faamalieina o le Atua o le fesuiaia lea o le poloaiga muamua ma le sili ma le lona lua (tagai Mataio 22:37–39). O le faagaloina lea o le itu e ao ona tatou faasaga i ai. Ae peitai, ua tatou faia uma lena mea sese ona o le fefe i tagata. I le Isaia ua lapatai ai tatou e le Atua, “Aua le fefefe i le faalumaina mai e tagata” (Isaia 51:7; tagai foi 2 Nifae 8:7). I le miti a Liae, o lenei fefe na amataina e ala i tamatamailima o le faatauemu na tusitusi mai i le fale tele ma le ateatea, na mafua ai ona galo i le toatele le itu na latou faasaga i ai ma tuua ai le laau ma le “[maasiasi]” (tagai 1 Nifae 8:25–28).

O lenei faatosinaga mai i isi tagata o loo taumafai e suia uiga o se tagata, a le o lena o amioga, e ala i le faia ia lagona e se tasi le tausalaina mo le faatiga atu i se tasi. A faaosoosoina e lenei fefe i tagata i tatou e faamaonia le faia o le agasala, o le a avea ma se “mailei” e tusa ai ma le tusi a Faataoto (tagai Faataoto 29:25). O le mailei e mafai ona faafoliga mai ma le atamai ina ia faaseseina lo tatou itu agaalofa, e talia ai pe faamaonia foi se mea ua ta’usalaina e le Atua. Mo ē ua vaivai le faatuatua, e mafai ona avea ma mea e tausuai ai. Mo se faataitaiga, e o atu lava nisi o faifeautalai talavou ma avatu lenei fefe i tagata i totonu o le misiona ma lē lipotia le lē usiusitai ua iloagofie a se soa i lo latou peresitene o le misiona ona latou te le mananao e faatiga i a latou soa lē usiusitai. O faaiuga a tagata ua faia e ala i le manatuaina o le faatulagaga sa’o o poloaiga muamua ma le sili ma le lona lua (tagai Mataio 22:37–39). Pe a iloaina e nei faifeautalai lē mautonu latou te tali atu i le Atua ae lē o a latou soa, e tatau ona latou maua ai le lototele e sui ai le itu latou te faasasaga i ai.

I le talavou o lona matua e 22 tausaga, na galo ai foi ia Iosefa Samita po o fea le itu e faasaga i ai ina ua ia talosagaina pea lava pea le Alii pe mafai e Matini Harisi ona nōnōina itulau e 116 o tusitusiga. Atonu na manao Iosefa e faaali atu ia Matini le agaga faafetai mo lana lagolagosua. Ua tatou iloaina na matuā naunau lava Iosefa mo nisi molimau patino e lagolagoina o ia e faasaga i faigata o mea sese ma pepelo na faasalalauina e uiga ia te ia.

Po o a lava ni mafuaaga na i ai ia Iosefa, pe na tauamiotonuina e pei ona foliga mai ai, ae sa le’i faatagaina e le Alii [ia mafuaaga] ma a’oa’i malosi ai o ia: “Ua faafia ona e soli o poloaiga ma tulafono … ma e alu pea i faatauanauga a tagata. Aua, faauta, sa lē tatau ona sili atu lou fefe i tagata nai lo i le Atua” (MF&F 3:6–7; faaopoopo le faamamafa). O lenei aafiaga faalelagona na fesoasoani ia Iosefa e manatua ai pea e faavavau, le itu e ao ona faasaga i ai.

A taumafai tagata e faafoliga ona o vaaiga a tagata, e lilo ia te ia ua ia aveesea le vaaiga a le Atua [mai ia te ia]. O le manatu o se tasi e mafai ona ia faamalieina le Atua ae i le taimi lava e tasi ia le amanaiaina le lē usiusitai a tagata, e le’o se lē faaitu’au, ae o le faa’ole’ole po o le faafoliga po o le taumafai foi e “auauna i matai e lua” (Mataio 6:24; 3 Nifae 13:24).

E ui e mautinoa le manaomia o le lototele e fetaia’i ai ma faigata, ae o le faailoga moni o le lototele o le faatoilaloina lea o le fefe i tagata. Mo se faataitaiga, o tatalo a Tanielu na fesoasoani ia te ia e fetaia’i ai ma leona, ae o le mea na avea ai o ia ma tagata toa, o le tetee lea i le Tupu o Tariu (tagai Tanielu 6). O lena ituaiga o lototele o se meaalofa a le Agaga i ē matata’u i le Atua o loo faia a latou tatalo. O tatalo a le Tupu Tamaitai o Eseta na ia maua ai foi lena lava lototele e tasi e fetaia’i ai ma lona toalua, le Tupu o Asueru, ma le iloaina ua ia lamatiaina lona ola i le faia o lea mea (tagai Eseta 4:8–16).

O le lototele e le na o se tasi o uiga mama taua, ae e pei ona matauina e C. S. Lewis: “O le lototele o le ituaiga o uiga mama uma i le taimi e tofotofoina ai. … Na alofa mutimutivale Pilato seia oo ina lamatiaina le alofa mutimutivale.” Na faanoanoa le Tupu o Herota i le talosaga e vavae ese le ulu o Ioane le Papatiso ae na manao ina ia faamalie “e ua taooto e aai faatasi ma ia” (Mataio 14:9). Na sauni le Tupu o Noa e faasaoloto Apinati ae na ia faasilasila atu se faasalaga oti, ina ua malosi le uunaiga mai i ana faitaulaga sili amioleaga lea na mafua ai ona sui lana faaiuga (tagai Mosaea 17:11–12). Na lē usitaia e le Tupu o Saulo le afioga a le Alii e ala i le taofia o vete o le taua aua na ia “fefe i le nuu, ma faalogo i a latou upu” (1 Samuelu 15:24). Ina ia faamalieina Isaraelu fouvale i le auvae o le Mauga o Sinai, na gaosi ai e Arona se tamai povi auro, ma le faagaloina o le itu e faasaga i ai (tagai Esoto 32). E toatele pule sili o le Feagaiga Fou sa “talitonu i [le Alii]; ae ona o le au Faresaio sa latou faafitia ai o ia, ne’i tulia i latou i fafo i le sunako: Auā ua sili lo latou manao i le viiga mai tagata, i le viiga mai le Atua” (Ioane 12:42–43). O loo i ai i tusitusiga paia le tele o nei ituaiga faataitaiga.

Ia faalogo mai i nisi nei o faataitaiga musuia:

Muamua, o Mamona: “Faauta, ou te tautala atu ma le lototoa, ona ua ou maua le pule mai le Atua; ma ou te le fefe po o a mea e mafai ona faia e tagata; ona e lafo ese i fafo e le alofa ua atoatoa le fefe uma” (Moronae 8:16; faaopoopo le faamamafa).
O Nifae: “O le mea lea, o mea e fiafia i ai le lalolagi ou te lē tusia, ae o mea e fiafia i ai le Atua ma i latou o e e lē o ni isi o le lalolagi” (1 Nifae 6:5).
O Kapeteni Moronae: “Faauta, o au o Moronae, o lo outou kapeteni silisili. Ou te le saili mo le pule, ae ia to ifo i lalo. Ou te le saili mo le mamalu o le lalolagi, ae mo le mamalu o lo’u Atua, ma le saolotoga ma le manuia o lou atunuu” (Alema 60:36).

Na maua e Moronae le lototele maoae i le manatuaina o le itu e faasaga i ai, na ia faapea mai, “A na pei tagata uma sa i ai, ma o i ai, ma o le a i ai, o Moronae, faauta, po ua luluina i lalo e faavavau mana o seoli; ioe, po ua le maua e le tiapolo se mana i luga o loto o le fanauga a tagata” (Alema 48:17).

O perofeta i le talafaasolopito atoa sa osofaia i taimi uma i tamatamailima o le faatauemu. Aisea? E tusa ma tusitusiga paia, ona “e ave e tagata ua sala le upumoni o se mea faigata, ona e tuia ai i latou i le totonugalemu lava” (1 Nifae 16:2), ma e pei ona matauina e Peresitene Harold B. Lee, “E apatā le manu ua lavea!” O a latou tali faatauemu, i le mea moni lava, o le ta’usalaina o loo taumafai e faamautinoa o ia lava, e pei lava o Korioa o lē na mulimuli ane tautino atu, “Sa ou iloa i taimi uma lava o loo i ai se Atua” (Alema 30:52). Sa matuā faatalitonuina Korioa i lana taufaasese lea na amata ai ona ia talitonu i ana lava pepelo (tagai Alema 30:53).

E tele lava ina tu’uaia e le au faatauemu ia perofeta mo mea ua pasiā po o le faailogalanu. Latou te taumafai e faatauanau pe uunai malosi le Ekalesia ina ia tu’u i lalo tulaga faatonuina a le Atua i le tulaga o loo i ai o latou lava amio lē talafeagai, lea e faaupuina e Elder Neal A. Maxwell, o le a “atiinaeina le faamalieina faaletagata lava ia nai lo le sailia o le faaleleia o le tagata lava ia” ma le salamo. O le tuuina i lalo o tulaga faatonuina a le Alii i le tulaga o i ai amioga lē talafeagai o malo o le—liliuese lea. O le toatele o Ekalesia sa i ai i sa Nifae ina ua mavae le lua seneturi o le asiasiga a le Faaola ia i latou, na amata ona “faafaigofieina” aoaoga faavae, i le nonoina mai o se fasifuaitau mai ia Elder Holland.

A o e faafofoga i lenei fuaitau mai le 4 Nifae, tagai mo ni tulaga tutusa i o tatou aso: “Ma sa oo ina mavae atu le lua selau ma le sefulu o tausaga, e tele ekalesia ua i ai i le laueleele; ioe, e tele ekalesia sa i ai sa fai mai ua latou iloa le Keriso, ae peitai sa latou teena vaega e tele o lana talalelei, sa oo ina latou talia amioleaga ituaiga eseese uma ma latou avatu lena mea ua paia, ia te ia o le na faasa mai ai ona o le le agavaa” (4 Nifae 1:27).

O le mea lava e tasi o loo tupu i aso e gata ai! O nisi o tagata o le ekalesia latou te lē iloaina ua latou pauu atu i le mailei lava e tasi pe a latou taumafai e u’unaia le taliaina o “uputuu a o latou tama” (MF&F 93:39) faalelotoifale ma faaleaganuu ia e le o ogatusa ma le aganuu a le talalelei. Ae o isi, i le faaseseina o i latou lava ma i le faafitia o i latou lava, e augani pe poloai ia tuu i lalo e epikopo tulaga faatonuina o le pepa faataga o le malumalu, faamaoniga mo aoga, po o pepa talosaga a faifeautalai. E lē faigofie le avea ai ma se epikopo o loo i ai lena ituaiga avega. Peitai, e pei o le Faaola o lē na faamamaina le malumalu ina ia puipuia lona paia (tagai Ioane 2:15–16), o epikopo o aso nei ua valaauina e puipuia ma le lototoa tulaga faatonuina o le malumalu. O le Faaola lava na Ia fetalai, “O le a ou faaali atu a’u lava i lo’u nuu i lenei fale i le alofa mutimutivale … afai e tausi lo’u nuu i a’u poloaiga, ma ia lē faaeleeleaina lenei fale paia” (MF&F 110:7–8).

O le Faaola, lo tatou Faataitaiga sili, na faasaga atu i Lona Tama i taimi uma. Na Ia alofa ma auauna atu i Ona uso a tagata ae na fetalai mai, “Ou te le manao i le viiga mai tagata” (Ioane 5:41). Na Ia finagalo ia i latou na Ia aoaoina e mulimuli ia te Ia, ae Na te le’i saili mo lo latou agalelei. Ao Ia faatinoina se galuega alofa, e pei o le faamaloloina o se ma’i, e oo mai e le aunoa le meaalofa faatasi ai ma le talosaga ina ia “aua le ta’u atu i se tasi” (Mataio 8:4; Mareko 7:36; Luka 5:14; 8:56). O se vaega, ina ia aloese mai le lauiloa lava lea na mulimuli atu ia te Ia e ui lava i Ana taumafaiga e aloese mai ai (tagai Mataio 4:24). Na Ia tausalaina le au Faresaio mo le faia o galuega lelei ina ia iloa ai e tagata (tagai Mataio 6:5).

O le Faaola, ua na o le pau lea o le tagata atoatoa na soifua mai, sa sili atu ona le fefe. I Lona soifuaga, na Ia fetaiai ai ma le toatele o tagata faifai ae e le’i gauai atu lava i lo latou tamatamailima o le faatauemu. E na o Ia lava le tagata e leai ma se taimi se tasi na galo ai le itu e faasaga i ai: “Ou te faia pea lava o mea e lelei [i le Tama]” (Ioane 8:29; faaopoopo le faamamafa), ma “Ou te le usiusitai i lo’u lava loto, a o le finagalo o le Tama, o le na auina mai a’u” (Ioane 5:30).

I le va o le 3 Nifae mataupu e 11 ma le 3 Nifae matupu e 28, na faaaoga ai e le Faaola le faalagiga Tama e le itiiti ifo ma le faa-150, lea sa matua faamanino atu ai ia sa Nifae, na i ai o Ia iina e fai ma sui o Lona Tama. Ma e mai le Ioane mataupu e 14 e oo atu i le 17, na faasino atu ai le Faaola i le Tama e le itiiti ifo ma le faa-50. I auala uma e mafai ai, na avea ai o Ia ma soo atoatoa o Lona Tama. Na matua atoatoa o Ia i le avea ma sui o Lona Tama, lea o le iloaina o le Faaola, o le iloaina foi lea o le Tama. O le vaai atu i le Alo o le vaai atu foi lea i le Tama (tagai Ioane 14:9). O le faalogo i le Alo o le faalogo foi lea i le Tama (tagai Ioane 5:36). O le mea moni, na leai se eseesega o Ia mai i Lona Tama. Na tasi o Ia ma Lona Tama (tagai Ioane 17:21–22). Na Ia silafia atoatoa le itu e faasaga i ai.

Tau ina ia avea Ana faataitaiga musuia e faamalosia ai i tatou e faasaga atu i mailei o viiga mai i isi po o le faasausili o i tatou lava. Tau ina ia tatou maua le lototele ia le fefefe ai pe taumafai e faamalieina i latou e taufaafefe mai ia i tatou. Ou te faamoemoe o Ana faataitaiga o le a uunaia ai i tatou e agalelei atu e aunoa ma le faailoaina i le mea e gata ai le mafai, ma ia lē “saili i viiga a tagata” (MF&F 121:35). Ma ou te faamoemoe o Lana faataitaiga le mafaatusalia e fesoasoani ia i tatou e manatua ai i taimi uma lē fea o “poloaiga muamua ma le sili” (Mataio 22:38). Pe a poloaiina e isi le faamaoniga e le usitaia ai poloaiga a le Atua, ou te faamoemoe ia tatou manatua Lē ua avea ai i tatou ma Ona soo, ma le itu tatou te faasaga i ai, o lau tatalo lea i le suafa o Iesu Keriso, amene.