2010–2019
E tamau noa te Feia Mo‘a i te Mau Mahana Hopea Nei i te tamata
Eperera 2015
10:29

E tamau noa te Feia Mo‘a i te Mau Mahana Hopea Nei i te tamata

Na Elder Dale G. Renlund

No te Hitu Ahuru

Former official portrait of Elder Dale G. Renlund of the First Quorum of the Seventy, April 2009. Formerly a member of the Fifth Quorum of the Seventy. Called to the Quorum of the Twelve Apostles and sustained October 2015. Portrait replaced in November 2015.

Ia tamata tatou ma te faaitoito â e ma te tauturu ia vetahi ia na reira atoa mai, e mau Feia Mo‘a i te Mau Mahana Hopea Nei papû ïa tatou.

Te mau taeaʻe e te mau tuahine, i te ava‘e no titema 2013 ra, ua heva to te ao taatoa nei i te faaru‘eraa Nelson Mandela. I muri mai e 27 matahiti i roto i te fare tape‘araa no to’na aroraa i te faanahoraa « apartheid », ua riro mai Mandela i te peresideni matamua tei ma‘itihia e te huiraatira i Afirita Apatoʻa. E mea faahiahia roa to’na faaoreraa i te hapa o te feia tei tuu ia’na i roto i te fare tape‘araa. E mau haapopouraa e mau arueraa tei tae mai na te ao taatoa nei.1 Pinepine Mandela i te pahono i teie mau haapopouraa ma te parau e, « E ere au i te taata mo‘a—mai te peu râ no outou e taata mo‘a te taata hara e tamau noa nei i te tamata, na reira ïa ».2

Teie parau e—« e taata mo‘a te taata hara e tamau noa nei i te tamata »—e ti‘a roa i te reira ia tamarû i te aau e ia faaitoito ho‘i i te mau melo no te Ekalesia. Noa’tu e, te piihia nei tatou ei « Feia Mo‘a i te Mau Mahana Hopea Nei », i te tahi taime e otohe rii tatou i teie parau. E ohipa mâtau te faaohiparaa i te parau Feia Mo‘a no te pii i te mau taata tei taeahia ia ratou te hoê faito teitei i roto i te mo‘araa e oia atoa i roto i te maitai-roa-raa. Ua ite râ ho‘i tatou e, e ere tatou i te maitai roa.

Te haapii nei ta tatou haapiiraa ihi atua e, e riro tatou i te maitai roa mai na roto i te « ti‘aturi-maite-raa » e te ti‘aturi-tamau-raa e te ti‘aturi rahi atu â i te haapiiraa tumu o te Mesia : te faaohiparaa i te faaroo Ia’na, te tatarahaparaa ; te raveraa i te oro‘a no te faaapî i te mau fafauraa e te mau haamaitairaa no te bapetizoraa e te fariiraa i te Varua Maitai ei hoa tamau i te hoê faito teitei a‘e. E a rave ai tatou i te reira, e riro rahi mai tatou mai te Mesia ra te huru e e ti‘a atura ia tatou ia faaoroma‘i e tae noa’tu i te hopea, noa’tu te titauraa atoa.3 Ei parau ohie, o vai tatou e o vai te taata e riro ra tatou, tera ïa ta te Atua e haapa‘o rahi nei, rahi atu â i to tatou vairaa i tera a‘e ra tau.4 Ia tamau noa tatou i te tamata, o tera ïa Ta’na e haapa‘o nei.

Te faahoho‘a nei te teata faaarearea ra As You Like It, tei papa‘ihia e William Shakespeare, i te tauiraa i roto i te oraraa o te hoê taata. Te imi ra te hoê taata i te haapohe i to’na teina. E noa’tu â ua ite te teina i te reira, ua faaora mai oia i to’na taea‘e parau ti‘a ore mai te pohe. I te iteraa te tuaane i teie huru aroha, aita ho‘i i tu‘ati i ta’na raveraa, ua taui roa oia e a muri noa’tu e ua tupu i te mea e parauhia nei te « faafariuraa ». I muri rii mai, ua haere mai te tahi nau vahine i te tuaane ma te parau e, « E ere anei o oe tei opua noa na i te taparahi [i to taea‘e] ? »

Ua pahono te tuaane e, « I riro na ihoa, e ere roa’tu râ : Aita vau e haamâ nei i te parau ia outou e, o vai na vau, inaha auê ho‘i to’u faafariuraa i te au, no to’u vairaa i teie nei ».5

No tatou nei, maoti te aroha o te Atua e te Taraehara o Iesu Mesia, e ere te reira tauiraa i te hoê noa vanaa papa‘i. Na roto ia Ezekiela, ua parau mai te Fatu :

« E te parau ino ho‘i a te taata parau ino ra, e ore oia e hi‘a i te reira i te mahana e fariu mai ai oia i te parau ino na’na ra

« … E ua fariu mai oia i ta’na parau ino, e ua rave i te mea au e te mea ti‘a ra

« … E ua faaho‘i maira taua taata parau ino ra i te paruru, e ua hopoi mai i ta’na i haru ra, e ua haapa‘o i te parau ora ra, e aore i rave i te ino ra ; e ora mau â oia…

« Te mau hara’toa ta’na i rave ra, e ore ïa e mana‘o-faahou-hia ei hara na’na : ua rave oia i te mea au e te parau ti‘a ».6

No To’na aroha, te parau fafau nei te Atua i te faaoreraa hara ia tatarahapa e ia fariu ê ana‘e tatou i te parau ti‘a ore—e tae noa’tu eita ta tatou mau hara e faahiti-faahou-hia mai i mua ia tatou. No tatou nei, maoti te Taraehara o te Mesia e ta tatou tatarahaparaa, e nehenehe ta tatou ia hi‘o i ta tatou mau ohipa tahito ma te parau e, « I riro na ihoa, e ere roa’tu râ ». Noa’tu te faito parau tiʻa ore, e ti‘a ia tatou ia parau e, « I riro na to’u vairaa. E ere faahou râ te taata parau ti‘a ore tahito to’u vairaa ».7

Ua haapii te peresideni Thomas S. Monson : « Te hoê o te mau tao‘a rahi roa a‘e a te Atua no tatou, o te oaoa ïa ia tamata faahou â, inaha aita e titauhia i te manuia-ore-raa ia riro ei hopea ».8 Noa’tu to tatou riroraa ei taata hara tei ite e tei faaoti ia na reira e aore râ noa’tu to tatou faaruru-tamau-raa i te manuia-ore-raa e te inoino, i te taime e faaoti tatou i te tamata faahou â, e tauturu mai te Taraehara a te Mesia ia tatou. E e ti‘a roa ia tatou ia haamana‘o e, e ere na te Varua Maitai e parau mai ua atea roa tatou e e mea tano a‘e ia faaru‘e atu.

Te hiaai o te Atua i te tamau-noa-raa te Feia Mo‘a i te Mau Mahana Hopea Nei i te tamata, e vai noa ïa i muri iho i te upooti‘araa i ni‘a i te hara. Mai te peu te mamae ra tatou no te tahi auraa tafifi, te tahi fifi pae faufaa, te ma‘i e aore râ te faahopearaa no te hara o te tahi atu taata, e ti‘a i te Taraehara hope ore o te Faaora ia faaora atoa—e peneia‘e ia faaora taa ê iho—i te mauiui o te feia tei mamae ma te hara ore. Ua taa maitai roa Ia’na te auraa ia mamae ma te hara ore e no te faahopearaa o to vetahi ê ofatiraa ture. Mai tohuhia, e riro te Faaora i te « faaora ho‘i i te feia aau oto… ei horo‘a’tu ia ratou i te unauna ei mono i te rehu auahi ; e te mono‘i ra i te oaoa ei mono i te oto ; e te ahu pu ra i te haamaitai ei mono i te aau taiâ ».9 Noa’tu e aha te mea, na roto i To’na tauturu, te tia‘i nei te Atua i te Feia Mo‘a i te Mau Mahana Hopea Nei ia tamau noa i te tamata.

Mai Ta’na e haapopou nei a faaitoito â tatou, e inoino mai te Atua ia ore tatou e hi‘o e, te tamata atoa ra te tahi mau pu‘eraa. Ua faa‘ite mai to maua hoa rahi o Thoba nahea to’na metua vahine, o Julia, i haapii ia’na i teie haapiiraa. Tei roto Julia raua Thoba i te mau melo ereere matamua tei faafariuhia i Afirita Apatoʻa. I te hopearaa te faanahoraa « apartheid », ua fariihia ia amui te mau melo ereere e te mau melo papaa o te Ekalesia i te pureraa. No te rahiraa o ratou, ua riro te ‘aifaitoraa i rotopu i na nunaa taata ei mea apî e te fifi rii. I te hoê taime, ua haere Julia raua Thoba i te pureraa, e mai te huru ra e, ua tae mai te mana‘o e, te rave-ino-hia ra raua e te tahi o te mau melo papaa. A reva ai raua, ua amuamu rahi noa Thoba i ni‘a i to’na metua vahine. Ua faaroo hau noa Julia ia Thoba i te puhiraa mai i to’na inoino. Ei reira ua parau atura Julia : « Ia ite oe e Thobia, mai te huru te Ekalesia i te hoê fare ma‘i rahi, e ua pohe paatoa tatou i te hoê ma‘i. Te haere mai nei tatou i te pureraa ia tauturuhia mai tatou ».

E maramarama rahi e vai ra i roto i te parau a Julia. Eiaha tatou e huru faaoromai noa a haa noa ai te tahi mau pu‘eraa i ni‘a i to ratou mau paruparu ; ia hamani maitai atoa râ, ia faaoromai papû, ia turu atu e ia taahia to ratou vairaa. A faaitoito noa ai te Atua ia tatou ia tamau noa i te tamata, te tia‘i atoa nei Oia ia vaiiho tatou i te tahi area no te tahi mau pu‘eraa ia na reira atoa mai. E tae mai te Taraehara i roto i to tatou oraraa ma te faito rahi a‘e ; E riro atura tatou i te ite e, noa’tu â te taa-ê-raa e itehia nei, titauhia no tatou paatoa tera Taraehara hope ore.

Maa matahiti i ma‘iri a‘enei ua piihia te hoê tamaroa, to’na i‘oa o Curtis, ia tavini i te hoê misioni. Ua riro oia mai te misionare e pure noa te mau peresideni misioni atoa ia tae mai. E mea haapa‘o i ta’na fa e e mea rave i te ohipa. I te hoê taime, ua tonohia ia’na ra te hoê hoa misionare feruriraa paari ore, e e mea ê te peu sotiare e e ere i te mea anaanatae i te ohipa.

Ia tae i te hoê mahana, te taahi ra raua i te pereoo, e i te fariuraa Curtis i muri ia’na, te ite atura oia i to’na hoa, tei pou i raro i to’na pereoo e te na raro noa ra i te haere. Ua mamû noa Curtis i te faa‘iteraa i to’na inoino i mua i te Atua ; e aha ïa huru utu‘a te horo‘araahia mai te hoê hoa e huti noa na muri ia’u no te rave i te hoê mea. E i muri rii iho, ua tae mai ia Curtis teie mana‘o hohonu mai te huru ra te parau maira te Atua ia’na e : « Ia ite mai oe e Curtis, ia faaauhia ia’u, e ere roa’tu orua i te mea atea roa ». Haapii a‘era Curtis e, titauhia ia’na ia faaoromai i teie hoa iti maitai ore o te tamata atoa nei mai te au i ta’na rave‘a.

Ta’u aniraa ia tatou paatoa, maoti râ, ia hi‘opo‘a tatou i to tatou oraraa, ia tatarahapa e ia tamau noa i te tamata. Ia ore tatou ia tamata, e mau feia hara ana‘e ïa tatou i te mau mahana hopea nei ; ia ore tatou ia faaitoito â, e mau feia faaru‘e ohipa ana‘e ïa tatou i te mau mahana hopea nei ; e ia ore tatou ia vaiiho ia vetahi ia tamata, e mau feia faahua paieti noa ïa tatou i te mau mahana hopea nei.10 Ia tamata tatou ma te faaitoito â e ma te tauturu ia vetahi ia na reira atoa mai, e mau Feia Mo‘a i te Mau Mahana Hopea Nei papû ïa tatou. A taui noa ai tatou, e ite mai tatou e, o vai tatou e o vai te taata ta tatou e riro mai, tera mau ïa ta te Atua e haapa‘o rahi nei, rahi atu â i to tatou vairaa i tera a‘e ra tau.11

Ua mauruuru roa ino vau no te Faaora, no To’na Taraehara hope ore e no te mau peropheta i te mau mahana hopea nei o te faaitoito nei ia tatou ia riro ei Feia Mo‘a i te Mau Mahana Hopea Nei, ia tamau noa i te tamata.12 Te faa‘ite papû nei au no te ora papû o te Faaora, i te i‘oa o Iesu Mesia, amene.

Te mau nota

  1. Hi‘o Nelson Rolihlahla Mandela, Long Walk to Freedom (1994) ; « Biography of Nelson Mandela », nelsonmandela.org/content/page/biography ; and President Barack Obama’s 10 no titema 2013, eulogy for Nelson Mandela, at whitehouse.gov/the-press-office/2013/12/10/remarks-president-obama-memorial-service-former-south-african-president-. E itehia te rauraa o te mau feti‘a Mandela mai te Feti‘a Nobel no te hau, te Feti‘a no te Vai-ti‘amâ-raa a te peresideni no te mau hau amui no Marite e te Ti‘araa Soviete e Lenin.

  2. Ei hi‘oraa, hi‘o te a‘oraa a Nelson Mandela i te Baker Institute no Rice University i te 26 no atopa 1999, bakerinstitute.org/events/1221. Mai te huru ra te tipee rii ra oia i te faahitiraa mâtau maitai, tei parauhia na Robert Louis Stevenson : « Te feia moʻa, e mau taata hara ïa e tamau noa nei i te tamata ». Na roto i te mau matahiti ua faahiti atoa mai te tahi mau pu‘eraa i teie mana‘o ; Ei hi‘oraa, te parauhia nei ua parau Conficius e, « E ere to tatou hanahana rahi roa a‘e i roto i te oreraa e marua tei roto râ i te ti‘a-faahou-raa i te taime atoa e marua tatou ».

  3. Hi‘o ei hi‘oraa, 2 Nephi 31:2–21 ; 3 Nephi 11:23–31 ; 27:13–21 ; Moroni 6:6 ; Te Parau Haapiiraa e Te mau Parau Fafau 20:77, 79 ; 59:8–9 ; Buka arataʻi 2: Faatereraa o te Ekalesia (2010), 2,1.2.

  4. Ia parauhia e, O vai tatou e o vai te taata e riro mai tatou, tera ïa ta te Atua e haapa‘o rahi nei, rahi atu â i to tatou vairaa i tera a‘e ra tau, te auraa ra, e ere ïa, e tau‘a ore te Faaora i te mau faahopearaa o te hara o te hoê taata i ni‘a i te tahi taata. Oia mau, te haapa‘o rahi roa nei te Faaora i te feia tei pêpê, tei mauiui e tei oto te aau no te mau ofatiraa ture o te tahi atu taata. E e rave te Faaora « i to ratou paruparu i ni‘a ia’na iho ia faaîhia to’na ra aau i te aroha i au i te tino, ia ite oia na roto i te tino i te rave‘a e faaora’i i to’na mau taata i to ratou paruparuraa ra » (Alama 7:12).

  5. William Shakespeare, As You Like It, ha‘utiraa 4, tuhaa 3, reni 134–37.

  6. Ezekiela 33:12, 14–16.

  7. Ua riro te faaohiparaa i te taunei o te mau ta‘o haa ei ohipa mâtau i roto i te mau papa‘iraa mo‘a ei faatu‘atiraa i te haavâraa hopea. Hi‘o ei hi‘oraa, 2 Nephi 9:16 ; Moromona 9:14 ; Te Parau Haapiiraa e Te mau Parau Fafau 58:42–43.

  8. Thomas S. Monson, « The Will Within », Ensign, Me 1987, 68.

  9. Isaia 61:1–3 ; hi‘o atoa Luka 4:16–21.

  10. Te parau feia faahua paiete e aore râ feia haavare tei faaohipahia i roto i te Faufaa Apî, e nehenehe te reira ia iritihia mai te reo heleni ei « taata haavarevare » ; « te auraa o te ta‘o heleni, oia ho‘i ïa, ‘e taata ha‘uti teata ora’ e aore râ ‘e taata e faahua ra, e faarahi roa ra i te hoê tuhaa ohipa’ » (Mataio 6:2, nota raro a). Ia ore tatou e horo‘a i te taata te taime no te taui ia au i to ratou puai, te faahua ra ïa tatou ei Feia Mo‘a i te Mau Mahana Hopea Nei.

  11. Hi‘o i te nota 4, i ni‘a mai.

  12. E mea maere te rahiraa taime e itehia teie poro‘i i roto i te mau a‘oraa a te Peresideniraa Matamua e te Pŭpŭ no te Tino Ahuru Ma Piti Aposetolo. Ua haapapû te peresideni Dieter F. Uchtdorf i te reira a na ô ai oia, « I roto i te mau parau tumu atoa i haapiihia mai e te mau peropheta i tera e tera tenetere, te hoê o te reira mau parau tumu o tei faahiti-tamau-noa-hia mai maori râ, o te parau poro‘i maitai ïa e te mahanahana te haapii mai nei e, e nehenehe ta te taata e tatarahapa, e taui i te haerea, e e ho‘i faahou mai i ni‘a i te e‘a ti‘a o te ti‘araa pĭpĭ » (« E nehenehe ta outou e rave i teie nei ! » Liahona, Novema 2013, 56).