Menin Letok eo kōn Tiriam̧o̧
Jān Būreejtōn Dieter F. Uchtdorf
Rikakpilōklōk eo Kein Karuo ilo Būreejtōnji eo Kein Kajuon
Rainin im n̄an indeeo tiriam̧o̧ eo an Anij ej pād n̄an aolep ro erub būruweer im ro jetōb ko aer rettā.
Ilo Jabōt in Ijtō in jej m̧ōņōņō kōn m̧akūtkūt eo etto ad kōttare im eaiboojoj ilo bwebwenato in laļ in.
Ej raan eo ekar ukōt men otemjej.
Ilo raan ņe, mour e aō ekar oktak.
Mour eo am̧ ekar oktak.
Mejān kajjik eo an aolep ajri ro nejin Anij ekar oktak.
Ilo raan ņe ejeram̧m̧an, Rilo̧mo̧o̧r an armej otemjej, Eo ekar bōk ioon Make tomede ko an jerawiwi im mej ko rekar likwōj kōj, kar anjo̧ jān tomede kein im kanemkwoj kōj.
Kōnke katok eo an Ripinmuur eo ad eļap iakwe ippān, mej ejjeļo̧k an kein ire, lūb ejjeļo̧k an anjo̧,1 Setan ejjeļo̧k an kajoor, im jekar “bar … keotak n̄an kōjatdikdik e mour kōn jerkakpeje an Jisōs Kraist.”2
Em̧ool, Rijilōk Paul ekar kajim̧we ke ekar ba jemaron̄ “kaenōm̧m̧an doon kōn naan kein.”3
Tiriam̧o̧ an Anij
Jemaron̄ konono kōn Pinmuur eo an Rilo̧mo̧o̧r eo—ejim̧we bwe jen kōm̧m̧ane!
Ilo naan ko an Jekab, “Etke jab kōnono kōn pinmuur eo an Kraist, im jibadek juon jeļā eo eweppān kōn E?”4Ak jej “kōnono kōn Kraist, … m̧ōņōņō ilo Kraist, … kwaļo̧k kōn Kraist, [im] kanaan kōn Kraist”5 ilo iien otemjej rem̧m̧an, jej aikuj jab luuji en̄jake in kautiej eo ad im kam̧m̧oolol eļap kōn katok eo ejjeļo̧k jem̧ļo̧kin an Nejin Anij.
Pinmuur eo an Rilo̧mo̧o̧r eo ejjab ejjeļo̧k aorōkin kōnke eļap kōjerbale ilo ad katakin, ad oktak, ak ilo būruwōd. Ej ittiņo̧ im kwojarjar, bwe ekar jān “katok eļap im āliktata” bwe Jisōs RiKraist eo ekar bōktok “lo̧mo̧r n̄an aolep ro renaaj tōmak ilo Etan.”6
Ikar bwilōn̄ im ļōmņak bwe Nejin Anij enaaj kōttāeik E n̄an lo̧mo̧o̧r kōj, āinwōt emakijkij in ad jab wāppen, jarreeo, niknik kōm̧m̧an bōd, im jab kam̧m̧ool. Ikar kajjieon̄ in meļeļe Pinmuur eo an Rilo̧mo̧o̧r eo kōn ļōm̧ņak eo aō elikjab, im kōmeļeļe in wōt imaron̄ in wanlōn̄tak kake ej; Anij ej iakwe kōj, wāppen, im n̄an indeeo. Ijjab maron̄ jino anto̧o̧ne “depakpakin, im aetokan, im m̧wilaļ in, im utiej in … [yokwe] an Kraist.”7
Kōnono eo ekajoor kōn iakwe ej ta eo jeje ko rekwojarjar ekkā aer ņae etan tiriam̧o̧ an Anij—jipan̄ eo ekwojarjar im menin letok an kajoor eo jej eddōk jān ad kar armej ro remōjņo̧ im relikjab im kiiō rej wanlōn̄ļo̧k kōn m̧ool im meram, m̧ae iien jej aiboojoj ilo m̧ool im jeļā men otemjej.8
Ej juon men ekabwilōn̄lōn̄, tiriam̧o̧ in an Anij. Kiiō ekkā tarpok kake.9Aaet, jej aikuj jeļā kōn tiriam̧o̧ an Anij eļan̄n̄e jej kōņaan in deļo̧n̄e ta eo emōj kōpooje n̄an kōj ilo aelōn̄ eo An indeeo.
Kōn unin, ikōņaan kōnono kōn tiriam̧o̧. Eļaptata, juon, ewi wāween an tiriam̧o̧kōppeļo̧ki kōjem̧ ko ilan̄ im, ruo, ewi wāween an kōppeļļo̧ke wintō ko ilan̄.
Juon: Tiriam̧o̧ ej Kōppeļo̧k Kōjem̧ ko Ilan̄
Kōnke kōj aolep raar “jero̧wiwi, im rej likjab jān aiboojoj an Anij”10im kōnke “im ejjeļo̧k jabdewōt men ettoon emaron̄ deļōn̄ ilo aelōn̄ in Anij,”11kōj kajjojo rej jab wānōk n̄an ro̧o̧l n̄an im̧aan mejān Anij.
Aaet men̄e jaar iten jerbal n̄an Anij kōn aolepān ad, ej jab bwe; bwe jenaaj wōt “rikarejar ro ejej tokjāer.”12Jejjab maron̄ kōļļāik iaļ in ad n̄an lan̄; jutak ikōtaer im ekajet ej jutak āinwōt juon menin bōbrae, eo ejjeļo̧k ad maron̄ ie n̄an anjo̧ jāne kōn kōj make.
Ak aolep rej jab jako.
Tiriam̧o̧ an Anij ej kōjatdikdik eo ad eļap im ejjeļo̧k jem̧ļo̧kin.
Jān katok eo an Jisōs Kraist, karōk in tiriam̧o̧ eo eņamejļan kajjitōk ko an ekajet13 “im [bōktok] wāween ko n̄an armej bwe ren maron̄ tōmak n̄an ukweļo̧k.”14
Jerawiwi ko ad, men̄e bōd ko ami rej āinwōt būrōrō, renaaj mouj āinwōt sno.15Kōnke ad Rilo̧mo̧o̧r ejitōn bōro “ekar leļo̧k E bwe En pinmuur n̄an armej otemjej,”16juon kōjem̧ n̄an aelōn̄ eo An ejjeļo̧k jem̧ļo̧kin kar kōpooje n̄an kōj.17
Kōjem̧ eo ejjab ļak!
Ak tiriam̧o̧ an Anij ejjab wōt kōjepļaaktok n̄an kōj jikin eo m̧okta em̧m̧an. Eļan̄n̄e lo̧mo̧o̧r ej meļeļein wōt jereļo̧k bōd ko ad im jerawiwi ko, innām lo̧mo̧o̧r—em̧m̧an āinwōt ej—ejjab kakūrm̧ool wōt kōttōbar eo eļap an Jemād n̄an kōj. Jibadbad eo an eutiejļo̧k: E ekōņaan bwe ļaddik im leddik ro nejin ren erom āinwōt E.
Kōn menin letok in tiriam̧o̧ an Anij, iaļ in rikaļo̧o̧r ejjab tōl likļo̧k kōj; ej tōl lōn̄ļo̧k kōj.
Ej tōl n̄an utiej ko jemaron̄ meļeļe jon̄an utiej ko aer! Ej tōlļo̧k n̄an jikin eo ilōn̄tata ilo aiboojoj in al ippān Jemedwōj Ilan̄, ijo jej, kabooļ kōn ro rejitōn bōro, bōk tarlep in aiboojoj eo An.18Men otemjej rej ad, im kōj rej an Kraist.19Em̧ool, men otemjej ko an Jemād renaaj itok n̄an kōj.20
N̄an deļo̧n̄e aiboojoj in, jej aikuj eļapļo̧k jān kōjem̧ eo eppeļļo̧k; jej aikuj deļo̧n̄e kōjem̧ in kōn juon bōro eikdeleel n̄an oktak—juon oktak elem̧ōņōņō eo jeje ko rej kōmeļeļeiki āinwōt em̧ōj “bar ļotak; aaet, ļotak jān Anij, oktak jān jekjek in ļōn̄ im wōtlo̧k eo aer, n̄an jekjek eo ejim̧we, im lo̧mo̧ren jān Anij, im erom m̧aan im kōrā ro nejin.”21
Ruo: Tiriam̧o̧ ej Kōppeļļo̧k Wintō ko Ilan̄
Bar juon wāween an Anij tiriam̧o̧ ej kōppeļļo̧k wintō ko ilan̄, jān ijo Anij ej lutōktok kōjeram̧m̧an ko kōn kajoor im maron̄, kōmaron̄ kōj n̄an bōk men ko renaaj kar pen n̄an ad tōpari. Ej waļo̧k jān tiriam̧o̧ eo ekabwilōn̄lōn̄ an Anij bwe ajri ro Nejin ren maron̄ anjo̧ ioon kauwōtata ko im kapo ko rettiņo̧ an rim̧oņ eo, anjo̧ jān jerawiwi, im “rej wāppen ilo Kraist.”22
Men̄e kōj aolep ewōr ad m̧ōjņo̧ ko, jemaron̄ in anjo̧ jāni. Ilo m̧ool, menin ej jān tiriam̧o̧ an Anij bwe, n̄e jej kōttāik kōj make im wōr ad tōmak, mōjņo̧ ko ad rej erom kajoor.23
Ilo aolepān mour ko ad, tiriam̧o̧ an Anij ej letok ioon kōjeram̧m̧an ko an ānbwin im menin letok ko an jetōb ko rej kōļapļo̧k maron̄ ko ad im kam̧weieik mour ko ad. Tiriam̧o̧ an Anij ej kōkōm̧anm̧anļo̧k kōj. An tiriam̧o̧ ej jipan̄ kōj erom ro rem̧m̧antata.
Wōn Emaron̄ Ekkar?
Ilo Baibōļ jej riit kōn loļo̧k eo an Kraist n̄an m̧weo im̧ōn Saimon Riparisee eo.
Āinwōt, Saimōn juon emm̧aan em̧m̧an im em̧ool. Ej aolep iien etale laajrak in jerbal ko an im eddo an kabun̄: ekar kōjparok kien ko, kōļļā juon m̧ōttan jon̄oul, kōjparok raan in Jabōt, jar aolep raan, im etal n̄an jikin kweilo̧k.
Ak ke Jisōs ekar pād ippān Saimōn, juon kōrā ekar kepaak ļo̧k, kwaļ neen Rilo̧mo̧o̧r kōn dān in kōm̧jaļļaaļ in mejān im kapit Neen kōn oil.
Saimōņ ekar jab m̧ōņōņō kōn wāween kabun̄ jar in, kōnke ekar jeļā bwe kōrā eo ekar juon rijerawiwi. Saimōn ekar ļōmņak n̄e Jisōs ekar jab jeļā menin, E jab aikuj in juon rikanaan ak E ej jāmin kar kōtļo̧k an kōrā eo un̄ūri.
Kōļmenļo̧kjeņ kōn ļōmņak ko an, Jisōs ekar oktak n̄an Saimōn im kajjitōk juon kajjitōk. “Ruo ri m̧uri an juon ri kam̧uriri: … “Juon ej m̧uri kōn limabukwi sillin̄, … eo juon kōn lemn̄oul.
“Im ke ejjeļo̧k ippāerro bwe ren kōļļā, ear jeorļo̧k airro m̧uri. Kōn men in, kwōn ba n̄an Eō, wōn iaerro eļap an yokwe e?”
Saimōn e uwaak im ba eo eļap an jeorļo̧k an m̧uri.
Innām Jisōs ekar katakin juon katak em̧m̧an: “Kwōj lo kōrā in ke? … jerawiwi ko an, relōn̄, em̧ōj julo̧k; bwe eļap an yokwe: a n̄an eo e dik an jako, e dik an yokwe.”24
Wōn iaan armej rein ruo jej lukkuun āinwōt?
Jej ke āinwōt Saimōn? Jej ke lōke kōj make im aenōm̧m̧an ilo kōm̧anm̧an ko ad, lōke ilo ad make wāppen? Jej ke jaje kōmaanwa ippān ro rej jab mour kōn jon̄ak ko ad? Jej ke kōtļo̧k an m̧wil ko m̧wilid tōl m̧akūtkūt ko ad, kōm̧m̧ane juon men ilo ad jab ļōmņak, etal n̄an kweilo̧k ko ad, pād ilo kūlaaj ko men̄e rejelmo, im etale cell phone eo ad ilo iien kwojkwoj?
Ak jej ke āinwōt kōrā in, eo ekar ļōmņak ejjeļo̧k an kōjatdikdik kōnke jerawiwi ko an?
Eļap ke ad iakwe?
Jej ke meļeļe m̧uri eo ad n̄an Jemedwōj Ilan̄ im akweļap kōn aolepān ad kōn tiriam̧o̧ an Anij?
N̄e jej bukwelōlō n̄an jar, ej ke n̄an keememej men eo em̧m̧antata jekar kōm̧m̧ane, ak ej ke n̄an kwaļo̧k kōn bōro bōd ko ad, akweļap kōn tiriam̧o̧ an Anij, im kōtōro̧o̧lļo̧k dān in kōmjaļaaļ kōn kam̧m̧oolol kōn karōk in em̧m̧an kōn pinmuur?25
Lo̧mo̧o̧r ej jab maron̄ wiaiki kōn mani in pokake; ej pojak n̄an kōj kōnke bōtōktōk in Nejin Anij.26 Ļōmņak bwe jemaron̄ in jāniji jerbal ko ad rem̧m̧an n̄an bōk lo̧mo̧o̧r ej āinwōt wiaki juon tiket in baļuun innām ļōmņak bwe waad baļuun eo. Ak ļōmņak bwe ālkin ad reen e m̧weo im̧ōd, kiiō ej ad aolepān laļ in.
Innām Etke Jej Pokake?
Eļan̄n̄e tiriam̧o̧ ej menin letok an Anij, innām etke pokake kien ko an Anij relukkuun aorōk? Etke jej elļo̧k n̄an kien ko an Anij—ak ukweļo̧k, kōn unin? Etke jejjab kwaļo̧k ke jejerawiwi im kōtļo̧k bwe Anij en lo̧mo̧o̧ren kōj?
Ak, n̄an likūt kajjitōk eo ilo naan ko an Paul, “Jen pād ilo jero̧wiwi ke, bwe jouj en orļo̧k?” Uwaak eo an Paul ej pidodo: “Anij ej kōtļo̧k.”27
Ro jeiū im jatū, jej pokake kien ko an Anij—kōnke ad iakwe n̄an E!
Kajjieon̄ meļeļe menin letok an Anij ej tiriam̧o̧ kōn aolepān būruwōd im ļōmņak ej letok n̄an kōj aolep elōn̄ ļo̧k un ko n̄an iakwe im pokake Jemedwōj Ilan̄ kōn meanwōr im kam̧m̧oolol. Ilo ad etetal ilo iaļ in rikaļoor, ej kōkōm̧anm̧anļo̧k kōj, ej ejaake kōj, ej jipan̄ kōj erom āinwōt E, im ej tōlļo̧k n̄an im̧aan Mejān. “Jetōb eo an Irooj Ekajoor Pōtata” ej bōktok “juon oktak ekajoor ilo kōj, … bwe jej jab bar itok wōt in kōm̧m̧an nana, ak n̄an kōm̧m̧an em̧m̧an wōt.”28
Kōn menin, ad pokake kien ko an Anij ej itok āinwōt waļo̧k in ad iakwe im kam̧m̧ool ejjeļo̧k jem̧ļo̧kier kōn em̧m̧an eo an Anij. Wāween iakwe in em̧m̧an im kam̧m̧ool in enaaj tuwe ta eo jej kōm̧m̧ane kōn tiriam̧o̧ an Anij. Wānōk enaaj aolep iien pād ilo ļōmņak ko ad, im ad lōke enaaj kajoorļo̧k im̧aan mejān Anij.29
Ro jeiū im jatu, mour tiljek kōn gospel eo ej jab juon eddo. Ej juon kaminene elem̧ōņōņō—juon kōbpopo n̄an deļo̧n̄e aiboojoj eo eļap an indeeo im indeeo. Jej pukōt n̄an pokake Jemedwōj Ilan̄ kōnke jetōb ko ad renaaj ļapļo̧k reel n̄an men ko an jetōb. Jenaaj meļeļe men otemjej jekar jab ļōmņaki m̧okta. Meramļo̧k im meļeļe rej itok n̄an kōj n̄e jej kōm̧anm̧an ankilaan Jemād.30
Tiriam̧o̧ ej menin letok an Anij, im ad kōņaan in pokake n̄an kajjojo kien ko an Anij ej ilo ad leļo̧k pā kein peid rewabanban bwe jen maron̄ bōk menin letok kein rekwojarjar jān Jemedwōj Ilan̄.
Men Eo Wōt Jemaron̄ Kōm̧mane
Rikanaan Nipai ekar kōm̧m̧ane juon jipan̄ eaorōk n̄an meļeļe eo ad kōn tiriam̧o̧ an Anij ke ekar kwaļo̧k, “Kimij niknik jerbal … n̄an kareel buruōn ro nejim, im barāinwōt ro jeim̧ im jatūm̧, n̄an tōmak ilo Kraist, im jepļaaktok n̄an Anij; bwe kōm jeļā bwe ej jān jouj jej mour, ālkin aolep ijo jemaron̄ kōm̧m̧an make.”31
Kōn menin, ij ļōmņak n̄e jet iien ej ebōd ad ukōt naan eo “ālkin jon̄an wōt ad maron̄e.” Jej aikuj meļeļe bwe “ālkin” ejjab juon wōt aero meļeļe “kōnke.”
Kōnke jejjab lo̧mo̧o̧r “kōnke” jon̄an eo wōt jemaron̄ kōm̧m̧ane. Kōj aolep jekar ke kōm̧m̧ane aolepān jon̄an wōt ad maron̄? Anij ekar ke kōttar m̧ae iien jekar kōļapļo̧k kijejeto ko ad m̧okta jān An naaj bōk kōņaan eo ilo mour ko ad kōn tiriam̧o̧ in lo̧mo̧o̧r eo An?
Elōn̄ armej rej ebbweer kōnke er rej likjab. Er rejeļā jān imminene bwe “An e kōņaan, a kanniōk e m̧ōjņo̧.’”32 Rej lelōn̄ļo̧k ainikier ippān Nipai ilo kwaļo̧k, “Aō ej liejļoļ kōn nana ko aō.”33
Ijeļā Nipai ekar jeļā tiriam̧o̧ eo an Rilo̧mo̧o̧r eo ej kōtļo̧k im kōmaron̄ n̄an anjo̧ jān jerawiwi.34En̄in ej etke Nipai ekar lukkuun tiljek jerbal n̄an kareel ajri ro nejin ro jein im jatin “n̄an tōmak ilo Kraist, im n̄an jepļaaktok n̄an Anij.”35
Āliktata, en̄in ej ta eo jemaron̄ kōm̧m̧ane! Im en̄in ej jerbal eo ad ilo mour in!
Tiriam̧o̧ Ej Pojak n̄an Aolep
N̄e ij ļōmņak kōn ta eo Rilo̧mo̧o̧r eo ekar kōm̧m̧ane n̄an kōj n̄an tōlļo̧k n̄an Ijtō eo jinointata, ikōņaan in kotak ainikiō im lamōj nōbar n̄an Anij Eutiej Pōtata im Nejin, Jisōs Kraist!
Kōjem̧ ko ilan̄ reppeļļo̧k!
Wintō ko ilan̄ reppeļļo̧k!
Rainin im n̄an indeeo tiriam̧o̧ an Anij ej pojak n̄an aolep bōro ko rej rub im jetōb ko aer rej ettā.36Jisōs Kraist ekar kalikkar iaļ eo n̄an kōj n̄an wanlōn̄ļo̧k n̄an ijoko routiej jōko ļōmņak ko ad reban meļeļe kaki.37
Ij jar bwe jenaaj loe kōn māj ko rekāāl im juon bōro ekāāl em̧m̧an ko an katok in pinmuur eo an Rilo̧mo̧o̧r eo. Ij jar bwe jenaaj kwaļo̧k ad iakwe n̄an Anij im ad kam̧m̧oolol kōn menin letok in an Anij tiriam̧o̧ eļap jān kōjparok kien ko An im lan̄lōn̄ “etetal ilo juon mour ekāāl.”38 ilo etan ad M̧aajta im Ripinmuur, Jisōs Kraist, amen.