ជំនាន់យុវមជ្ឈិមវ័យដ៏រុងរឿងបំផុត

ដោយអែលឌើរ អិម រ័សុល បាឡឺដ

ក្នុងកូរ៉ុមនៃពួកសាវកដប់ពីរនាក់

អ្វីដែលយើងត្រូវការក្នុងពេលនេះ គឺជំនាន់យុវមជ្ឈិមវ័យដ៏រុងរឿងបំផុតនៅក្នុងប្រវត្តិសាស្ត្រនៃសាសនាចក្រ ។ យើងត្រូវការការប្ដេជ្ញាចិត្តដ៏មុតមាំរបស់ក្មួយៗ ។

ឱកាសរីករាយដ៏អស្ចារ្យដែលខ្ញុំពេញចិត្តពេលខ្ញុំធ្វើដំណើរជុំវិញពិភពលោក គឺឱកាសជួប និងស្វាគមន៍អ្នកផ្សព្វផ្សាយសាសនារបស់យើង ។ អែលឌើរ និង ស៊ិស្ទើរដ៏អស្ចារ្យទាំងនេះ បញ្ចេញពន្លឺនៃព្រះគ្រីស្ទ ហើយខ្ញុំតែងត្រូវបានបំផុសគំនិតដោយក្ដីស្រឡាញ់របស់ពួកគេចំពោះព្រះអម្ចាស់ ព្រះយេស៊ូវគ្រីស្ទ និងការបម្រើដោយការលះបង់របស់ពួកគេចំពោះទ្រង់ ។ គ្រប់ពេលដែលខ្ញុំចាប់ដៃពួកគេ ខ្ញុំដឹងពីវិញ្ញាណ និងសេចក្ដីជំនឿដ៏អស្ចារ្យរបស់ពួកគេ ខ្ញុំប្រាប់ខ្លួនឯងថា « បុត្រា និងបុត្រីដ៏ពិសេសរបស់យើងទាំងនេះ ពិតជាអព្ភូតហេតុដ៏អស្ចារ្យមែន ! »

នៅក្នុងការប្រជុំបព្វជិតភាពទូទៅខែ តុលា ឆ្នាំ ២០០២ ខ្ញុំបានលើកទឹកចិត្តឲ្យប៊ីស្សព ឪពុកម្ដាយ នឹងអ្នកត្រៀមចេញផ្សព្វផ្សាយសាសនាថា ត្រូវ « តម្លើងបទដ្ឋាន » សម្រាប់ការផ្សព្វផ្សាយសាសនាពេញម៉ោង ។

បន្ទាប់មក ខ្ញុំបាននិយាយថា « អ្វីដែលយើងត្រូវការ … គឺជំនាន់អ្នកផ្សព្វផ្សាយសាសនាដ៏រុងរឿងបំផុតនៅក្នុងប្រវត្តិនៃសាសនាចក្រ ។ យើងត្រូវការអ្នកផ្សព្វផ្សាយសាសនាដែលសក្ដិសម មានលក្ខណៈសម្បត្តិគ្រប់គ្រាន់ ចាស់ទុំខាងវិញ្ញាណ ។ …

« … យើងត្រូវការការប្ដេជ្ញាចិត្តដ៏មុតមាំរបស់អ្នក ។ យើងត្រូវការអ្នកផ្សព្វផ្សាយសាសនាដែលរវៀសរវៃ ចេះគិតវែងឆ្ងាយ និងក្លៀវក្លា ជាអ្នកដែលចេះពីរបៀបស្ដាប់ និងឆ្លើយតបចំពោះការខ្សឹបប្រាប់នៃព្រះវិញ្ញាណបរិសុទ្ធ » ។^១

ពិភពលោកសព្វថ្ងៃនេះ មានបញ្ហាពិបាកច្រើនជាងកាលពី ១៣ ឆ្នាំមុន ។ យុវជន និងយុវនារីរបស់យើង មានការរំខានអារម្មណ៍ក្នុងការរៀបចំខ្លួនបម្រើបេសកកម្ម និងជីវិតអនាគតដ៏រីករាយកាន់តែច្រើនឡើង ។ បច្ចេកវិទ្យាបានរីកចម្រើន ហើយស្ទើរតែគ្រប់គ្នាមានឧបករណ៍អេឡិចត្រូនិចដែលអាចទាក់ទាញចំណាប់អារម្មណ៍ក្រុមគ្រួសារមនុស្ស ដែលជារបស់ផងព្រះ ទាំងសម្រាប់ការល្អ និងការអាក្រក់ដ៏ខ្លាំង ។

ល្ងាចនេះ ខ្ញុំនិយាយទៅកាន់អ្នកផ្សព្វផ្សាយសាសនាដែលកំពុងបម្រើ អ្នកដែលត្រៀមខ្លួនចេញបម្រើ និងអ្នកដែលបានត្រឡប់មកវិញ និងយុវជនទាំងអស់នៅក្នុងសាសនាចក្រ ។ ខ្ញុំសូមអធិស្ឋានសុំឲ្យអ្នកនឹងយល់ ហើយគិតពិចារណាពីអ្វីដែលខ្ញុំនិយាយទៅកាន់អ្នក កាលដែលប្អូនៗធ្វើដំណើរឆ្លងកាត់ពេលវេលាដ៏រំភើបក្នុងជីវិតនាពេលនេះ ។

កាលពីសាសនាចក្រទើបបានបង្កើតឡើង អ្នកផ្សព្វផ្សាយសាសនាត្រូវបានសម្ភាសន៍ដោយអ្នកមានសិទ្ធិអំណាចទូទៅ មុនពេលគេចេញទៅតំបន់បេសកកម្ម ។ សព្វថ្ងៃនេះ អ្នកត្រូវបានសម្ភាសន៍ឲ្យបម្រើជាអ្នកផ្សព្វផ្សាយសាសនាដោយប៊ីស្សព និងប្រធានស្តេកអ្នក ហើយស្ទើរតែគ្រប់គ្នាដែលពុំឆ្លងកាត់ការសម្ភាសន៍ពីអ្នកមានសិទ្ធិអំណាចទូទៅក្នុងជីវិតនេះ ។ នេះជាការឆ្លុះបញ្ចាំងពីភាពពិតក្នុងសាសនាចក្រទូទាំងពិភពលោក ដែលមានសមាជិកជាង ១៥ លាននាក់ ។ ខ្ញុំដឹងថា ខ្ញុំនិយាយជំនួសពួកបងប្អូនប្រុស ពេលខ្ញុំប្រាប់ក្មួយៗថា យើងប្រាថ្នាចង់ស្គាល់ក្មួយៗគ្រប់គ្នាដោយផ្ទាល់ ហើយអាចប្រាប់ក្មួយៗថា យើងស្រឡាញ់ក្មួយៗ ហើយយើងគាំទ្រក្មួយៗ ។

សំណាងល្អ ដែលព្រះអម្ចាស់បានប្រទានវិធីជាច្រើនសម្រាប់យើងប្រាស្រ័យជាមួយក្មួយៗបាន ។ ឧទាហរណ៍ សមាជិកក្នុងកូរ៉ុមនៃពួកដប់ពីរនាក់ បានចាត់តាំងអ្នកផ្សព្វផ្សាយសាសនាគ្រប់រូប ។ ទោះជាវាត្រូវបានធ្វើឡើងដោយគ្មានការជួបសម្ភាសន៍ផ្ទាល់ដូចសម័យមុនក្ដី ក៏ការរួមផ្សំនៃបច្ចេកវិទ្យា និងវិវរណៈផ្ដល់នូវបទពិសោធន៍ផ្ទាល់ខ្លួនដ៏អស្ចារ្យដែរ ។ ខ្ញុំសូមប្រាប់ក្មួយៗពីរបៀបដែលវាកើតឡើង ។

រូបថតរបស់ក្មួយៗបានបង្ហាញលើកញ្ចក់កុំព្យូទ័រ ជាមួយនឹងព័ត៌មានសំខាន់ៗដែលបានផ្ដល់ឲ្យដោយប៊ីស្សព និងប្រធានស្តេករបស់ក្មួយៗ ។ ពេលឃើញរូបថតក្មួយៗយើងសម្លឹងមើលកែវភ្នែក ហើយពិនិត្យចម្លើយទៅនឹងសំណួរដែលទាក់ទងនឹងការផ្សព្វផ្សាយសាសនារបស់ក្មួយ ។ ក្នុងរយៈពេលដ៏ខ្លីនោះ វាហាក់ដូចជាក្មួយៗនៅជាមួយយើង ហើយឆ្លើយមកកាន់យើងដោយផ្ទាល់ ។

ពេលយើងមើលរូបថតរបស់ក្មួយៗ យើងទុកចិត្តថា ក្មួយៗបានអនុវត្តតាម « បទដ្ឋានដែលបានតម្លើង » គ្រប់យ៉ាងដែលទាមទារក្នុងពេលនេះ ដើម្បីធ្វើជាអ្នកផ្សព្វផ្សាយដ៏ស្មោះត្រង់ និងដ៏ជោគជ័យ ។ បន្ទាប់មក ដោយព្រះចេស្តានៃព្រះវិញ្ញាណនៃព្រះអម្ចាស់ និង ក្រោមការដឹកនាំរបស់ប្រធាន ថូម៉ាស អេស ម៉នសុន យើងចាត់តាំងក្មួយៗទៅកាន់បេសកកម្មមួយក្នុងចំណោម បេសកកម្មទាំង ៤០៦ នៃសាសនាចក្រជុំវិញពិភពលោក ។

វាមិនដូចជាការសម្ភាសន៍ទល់មុខគ្នានោះទេ ។ ប៉ុន្តែ វាហាក់ដូចជាមែនដែរ ។

ការជួបមុខក្នុងការប្រជុំតាមវីដេអូ ជាវិធីមួយដែលជួយយើងជួបនឹងថ្នាក់ដឹកនាំសាសនាចក្រ និង សមាជិកដែលរស់នៅឆ្ងាយពីទីស្នាក់ការសាសនាចក្រ ។

ដោយដឹងពីជម្រើសនេះ ខ្ញុំចង់ឲ្យក្មួយៗដែលកំពុងរៀបចំខ្លួនបម្រើបេសកកម្ម អ្នកដែលបានត្រឡប់មកវិញ យុវមជ្ឃិមវ័យទាំងអស់ចំណាយពេលពីរបីនាទីជាមួយខ្ញុំ ដូចជាយើងមានការប្រជុំតាមវីដេអូឥឡូវនេះដែរ ។ សូមមើលមកខ្ញុំពីរបីនាទី ទោះបីជាក្មួយៗនៅទីណាក៏ដោយ ដូចជាក្មួយ និង ខ្ញុំនៅតែពីរនាក់នៅក្នុងបន្ទប់ប្រជុំដូច្នោះដែរ ។

សម្រាប់ខ្ញុំវិញ ខ្ញុំនឹងស្រម៉ៃថាខ្ញុំកំពុងសម្លឹងមើលកែវភ្នែកក្មួយៗ ហើយកំពុងស្ដាប់យ៉ាងយកចិត្តទុកដាក់ចំពោះចម្លើយក្មួយៗទៅនឹងសំណួរមួយចំនួន ដែលខ្ញុំជឿថានឹងប្រាប់ខ្ញុំជាច្រើនអំពីជម្រៅនៃទីបន្ទាល់ និងការលះបង់របស់ក្មួយៗចំពោះព្រះ ។ បើខ្ញុំអាចនិយាយអ្វីដែលខ្ញុំបាននិយាយទៅកាន់អ្នកផ្សព្វផ្សាយសាសនាកាលពី ១៣ ឆ្នាំមុនថា អ្វីដែលយើងត្រូវការក្នុងពេលនេះ គឺជំនាន់យុវមជ្ឈិមវ័យដ៏រុងរឿងបំផុតក្នុងប្រវត្តិសាស្ត្រនៃសាសនាចក្រ ។ យើងត្រូវការការប្ដេជ្ញាចិត្តដ៏មុតមាំរបស់ក្មួយៗ ។ យើងត្រូវការយុវមជ្ឈិមវ័យដែលរវៀសរវៃ ចេះគិតវែងឆ្ងាយ និងក្លៀវក្លា ជាអ្នកដែលចេះពីរបៀបស្ដាប់ និងឆ្លើយតបចំពោះការខ្សឹបប្រាប់នៃព្រះវិញ្ញាណបរិសុទ្ធ កាលប្អូនៗឆ្លងកាត់ឧសគ្គ និង ការល្បួងជាប្រចាំ ក្នុងការធ្វើជាយុវវ័យពួកបរិសុទ្ធថ្ងៃចុងក្រោយសម័យថ្មី ។

ម្យ៉ាងទៀត វាជាពេលដើម្បីតម្លើងបទដ្ឋានមិនតែសម្រាប់អ្នកផ្សព្វផ្សាយសាសនាប៉ុណ្ណោះទេ តែថែមទាំងសម្រាប់អ្នកដែលបានត្រឡប់ពីផ្សព្វផ្សាយសាសនា និងគ្រប់ជំនាន់ផងដែរ ។ ដោយហេតុផលទាំងនេះ សូមពិចារណាក្នុងដួងចិត្តអ្នកលើចម្លើយអ្នកចំពោះសំណួរទាំងនេះ ៖

តើក្មួយៗសិក្សាព្រះគម្ពីរជារៀងរាល់ថ្ងៃឬទេ ?
តើក្មួយៗលុតជង្គង់ចុះដើម្បីនិយាយទៅកាន់ព្រះវរបិតាសួគ៌អ្នករាល់ព្រឹក និងរាល់យប់ឬទេ ?
តើក្មួយៗបានតមអាហារ ហើយបង់ដង្វាយតមអាហាររាល់ខែ—ទោះជាក្មួយៗនៅជានិស្សិតក្រីក្រដែលមិនអាចបង់ច្រើនឬទេ ?
តើក្មួយៗបានគិតល្អិតល្អន់អំពីព្រះអង្គសង្គ្រោះ និងពលិកម្មធួនរបស់ទ្រង់សម្រាប់ក្មួយៗ ពេលក្មួយត្រូវបានសូមឲ្យរៀបចំ ចែក ឬ ទទួលទានសាក្រាម៉ង់ដែរឬទេ ?
តើក្មួយៗបានចូលរួមការប្រជុំរបស់ក្មួយៗ ហើយព្យាយាមរក្សាថ្ងៃឈប់សម្រាកឲ្យបរិសុទ្ធឬទេ ?
តើក្មួយៗស្មោះត្រង់នៅគេហដ្ឋាន សាលារៀន សាសនាចក្រ និងកន្លែងធ្វើការដែរឬទេ ?
តើក្មួយៗស្អាតស្អំទាំងខាងអារម្មណ៍ និងខាងវិញ្ញាណឬទេ ? តើក្មួយៗបានចៀសវាងពីការមើលរូបអាសគ្រាម ឬ មើលគេហទំព័រ ទស្សនាវដ្ដី ភាពយន្ត ឬ កម្មវិធី ដែលរួមមានកម្មវិធី Tinder ឬ រូបថតលើកម្មវិធី Snapchat ដែលធ្វើឲ្យក្មួយៗអាម៉ាស់ បើឪពុកម្ដាយក្មួយ អ្នកដឹកនាំសាសនាចក្រ ឬព្រះអង្គសង្គ្រោះផ្ទាល់បានឃើញក្មួយៗប្រព្រឹត្តដែរឬទេ ?
តើក្មួយៗប្រយ័ត្នប្រយែងនឹងពេលវេលាក្មួយ—ដោយចៀសវាងពីបច្ចេកវិទ្យា និងប្រព័ន្ធផ្សព្វផ្សាយសង្គមមិនសមរម្យ រួមមាន វីដេអូហ្គែម ដែលអាចធ្វើឲ្យវិញ្ញាណក្មួយអាប់អួរដែរឬទេ ?
តើមានអ្វីក្នុងជីវិតក្មួយដែលក្មួយត្រូវការផ្លាស់ប្ដូរ ឬកែប្រែចាប់ផ្ដើមពីល្ងាចនេះដែរឬទេ ?

អរគុណសម្រាប់ការចំណាយពេលរបស់ក្មួយ ។ ខ្ញុំសង្ឃឹមថា ក្មួយៗបានឆ្លើយសំណួរនីមួយៗដោយស្មោះត្រង់ និងល្អិតល្អន់ ។ បើក្មួយៗឃើញថាខ្លួនក្មួយខ្វះចន្លោះក្នុងគោលការណ៍ដ៏សាមញ្ញទាំងនេះ នោះខ្ញុំសូមលើកទឹកចិត្តក្មួយឲ្យមានភាពក្លាហានដើម្បីកែប្រែចិត្ត ហើយដឹកនាំជីវិតក្មួយត្រឡប់មកលើផ្លូវនៃបទដ្ឋានដំណឹងល្អ នៃភាពជាសិស្សដ៏សុចរិតវិញ ។

ឥឡូវនេះបងប្អូនប្រុសទាំងឡាយ តើខ្ញុំអាចផ្ដល់ការប្រឹក្សាបន្ថែម ដែលនឹងជួយបងប្អូនឲ្យមានទីបន្ទាល់នៃដំណឹងល្អ ជ្រាបចូលជ្រៅក្នុងដួងចិត្ត និងព្រលឹងបងប្អូនបានដែរឬទេ ?

ខ្ញុំសូមរំឭកដល់ក្មួយៗដែលត្រឡប់មកពីផ្សាយសាសនាថា ការរៀបចំខ្លួនក្មួយសម្រាប់ជីវិត និងសម្រាប់ក្រុមគ្រួសារ គួរតែបន្តជានិច្ច ។ « អ្នកត្រឡប់ពីផ្សាយសាសនា » ពុំមានន័យថាជា « ពួកមរមនដែលចូលនិវត្តន៍ » នោះទេ ! ក្នុងនាមជាអ្នកត្រឡប់មកពីផ្សាយសាសនា ក្មួយ « ត្រូវឧស្សាហ៍ចូលរួមក្នុងប្រយោជន៍ល្អ ហើយប្រព្រឹត្តអ្វីៗជាច្រើន តាមបំណងចិត្តរបស់ [ក្មួយៗ] ហើយនាំមកនូវសេចក្ដីសុចរិតដ៏ច្រើន » ។^២

សូមប្រើជំនាញដែលបានរៀនក្នុងបេសកកម្មរបស់ក្មួយ ដើម្បីប្រទានពរដល់មនុស្សនៅជុំវិញក្មួយជារៀងរាល់ថ្ងៃ ។ សូមកុំបង្វែរចំណាប់អារម្មណ៍ក្មួយពីការបម្រើអ្នកដទៃ ទៅផ្ដោតតែលើកិច្ចការសាលា ការងារ ឬសកម្មភាពសង្គមឡើយ ។ ផ្ទុយទៅវិញ សូមរកលំនឹងក្នុងជីវិតក្មួយជាមួយនឹងបទពិសោធន៍ខាងវិញ្ញាណដែលរំឭក និងរៀបចំក្មួយសម្រាប់ការបន្តបម្រើអ្នកដទៃជាប្រចាំ ។

ក្នុងបេសកកម្ម ក្មួយៗ បានរៀនពីសារៈសំខាន់នៃការសួរសុខទុក្ខមនុស្សដល់គេហដ្ឋានពួកគេ ។ ខ្ញុំសង្ឃឹមថា យុវមជ្ឈិមវ័យទាំងអស់ ទោះជាបានបម្រើបេសកកម្មពេញម៉ោង ឬមិនបានក្ដី នឹងយល់ពីសារៈសំខាន់នៃការសួរសុខទុក្ខអ្នកដែលឯកោ ឈឺ ឬបាក់ទឹកចិត្ត—មិនត្រឹមតែជាកិច្ចការចាត់តាំងទេ ប៉ុន្តែដោយសារសេចក្ដីស្រឡាញ់ដ៏ស្មោះត្រង់ដែលក្មួយៗមានចំពោះព្រះវរបិតាសួគ៌ និងកូនចៅរបស់ទ្រង់វិញ ។

ក្មួយៗដែលរៀននៅវិទ្យាល័យ ហើយកំពុងរៀបចំខ្លួនបម្រើបេសកកម្ម ខ្ញុំសូមលើកទឹកចិត្តឲ្យក្មួយចូលរៀន និងរៀនឲ្យចប់ថ្នាក់សិក្ខាសាលា ។ យុវមជ្ឈិមវ័យទាំងឡាយ គួរចុះឈ្មោះរៀនក្នុងថ្នាក់វិទ្យាស្ថាននៃសាសនា^៣ បើក្មួយៗកំពុងរៀនក្នុងសាលារបស់សាសនាចក្រ សូមបញ្ចូលថ្នាក់សាសនាមួយថ្នាក់នៅរាល់ឆមាស ។ អំឡុងពេលដ៏សំខាន់នៃការរៀបចំខ្លួនបម្រើបេសកកម្ម ឬអាពាហ៍ពិពាហ៍ដ៏អស់កល្ប និងជីវិតជាមនុស្សពេញវ័យនេះ ក្មួយត្រូវបន្តស្វែងរកវិធីរៀន និងរីកចម្រើន ហើយទទួលបានការបំផុសគំនិត និងការដឹកនាំតាមរយៈព្រះវិញ្ញាណបរិសុទ្ធ ។ ការសិក្សាដំណឹងល្អប្រកបដោយការអធិស្ឋាន និងយកចិត្តទុកដាក់ តាមរយៈថ្នាក់សិក្ខាសាលា ថ្នាក់វិទ្យាស្ថាន ឬការថ្នាក់អប់រំសាសនា អាចជួយក្មួយៗឲ្យធ្វើតាមគោលដៅនោះ ។

ទោះក្មួយរៀននៅសាលាសាសនាចក្រ ឬអត់ ក្មួយរៀននៅមហាវិទ្យាល័យ ឬអត់ សូមកុំគិតថាក្មួយរវល់ពេកគ្មានពេលសិក្សាដំណឹងល្អឡើយ ។ ថ្នាក់សិក្ខាសាលា ថ្នាក់វិទ្យាស្ថាន ឬថ្នាក់សាសនានឹងផ្ដល់នូវតុល្យភាពដល់ជីវិតក្មួយ និងបន្ថែមដល់ការអប់រំដែលមិនទាក់ទងនឹងសាសនា ដោយផ្ដល់ឲ្យក្មួយនូវឱកាសមួយទៀតដើម្បីចំណាយពេលសិក្សាព្រះគម្ពីរ និងការបង្រៀនរបស់ពួកព្យាការី និងពួកសាវក ។ មានវគ្គសិក្សាបួនវគ្គថ្មីដ៏ល្អ ដែលខ្ញុំលើកទឹកចិត្តយុវមជ្ឈិមវ័យគ្រប់រូបឲ្យចូលរៀន ។^៤

ហើយសូមកុំភ្លេចថាថ្នាក់ និង សកម្មភាពទាំងឡាយដែលធ្វើនៅឯវិទ្យាស្ថានក្នុងមូលដ្ឋានក្មួយៗ ឬតាមរយៈវួដយុវមជ្ឈិមវ័យក្មួយៗ ឬស្តេកក៏ជាកន្លែងដែលក្មួយៗអាចជួបជាមួយយុវជន និងយុវនារីដើម្បីលើកតម្កើង និងបំផុសគំនិតគ្នាទៅវិញទៅមក កាលក្មួយៗរៀននឹងរីកចម្រើនខាងវិញ្ញាណ ព្រមទាំងការប្រាស្រ័យក្នុងសហគមន៍ផងដែរ ។ បងប្អូនប្រុសអើយ បើបងប្អូននឹងទុកទូរសព្ទដៃបងប្អូនមួយអន្លើរ ហើយមើលជុំវិញខ្លួនបងប្អូនបន្តិច នោះបងប្អូនប្រហែលជានឹងអាចរកឃើញដៃគូដ៏អស់កល្បរបស់បងប្អូនផង ។

រឿងនេះធ្វើឲ្យខ្ញុំនឹកដល់ការប្រឹក្សាមួយទៀតដែលក្មួយៗដឹងថាខ្ញុំនឹងនិយាយ ៖ មជ្ឈិមវ័យនៅលីវចាំបាច់ត្រូវណាត់ជួប ហើយរៀបការ សូមឈប់ពន្យាពេលទៀតទៅ ! ខ្ញុំដឹងថា ក្មួយៗមួយចំនួនភ័យខ្លាចក្នុងការចាប់ផ្ដើមគ្រួសារ ។ ប៉ុន្តែ បើក្មួយរៀបការជាមួយមនុស្សត្រឹមត្រូវ និងនៅកន្លែងត្រឹមត្រូវ នោះក្មួយមិនត្រូវភ័យខ្លាចឡើយ ។ តាមពិត បញ្ហាជាច្រើនដែលក្មួយៗជួបប្រទះ នឹងអាចចៀសផុតបាន បើក្មួយ « ឧស្សាហ៍ចូលរួម » ក្នុងការណាត់ជួប ការដើរលេងជាគូ និងអាពាហ៍ពិពាហ៍ត្រឹមត្រូវនោះ ។ សូមកុំផ្ញើសារទៅនាង ! និយាយណែនាំខ្លួនក្មួយដល់បុត្រីដ៏សុចរិតរបស់ព្រះដែលនៅជុំវិញក្មួយៗ ។ ការឮសំឡេងមនុស្សពិត និងធ្វើឲ្យនាងឆ្លើយថា យល់ព្រម ។

ឥឡូវនេះ ខ្ញុំសូមថ្លែងទីបន្ទាល់ទៅកាន់បងប្អូនថា ព្រះអម្ចាស់ព្រះយេស៊ូវគ្រីស្ទអាចជួយយើងឲ្យជួសជុលអ្វីគ្រប់យ៉ាង ដែលត្រូវការជួសជុលក្នុងជីវិតយើងតាមរយៈពលិកម្មធួនរបស់ទ្រង់ ។

នៅល្ងាចនេះ កាលយើងរៀបចំខ្លួនដើម្បីប្រារព្ធបុណ្យអ៊ីសស្ទើរនៅស្អែកថ្ងៃអាទិត្យ សូមផ្អាកមួយស្របក់ជាមួយខ្ញុំដើម្បីនឹកចាំពីអំណោយទាននៃដង្វាយធួនរបស់ព្រះគ្រីស្ទ ។ សូមចាំថា ព្រះវរបិតាសួគ៌ និងព្រអង្គសង្គ្រោះជាព្រះយេស៊ូវគ្រីស្ទរបស់យើង ស្គាល់ក្មួយៗយ៉ាងច្បាស់ ហើយស្រឡាញ់ក្មួយៗខ្លាំងបំផុត ។

តាមរយៈដង្វាយធួន ព្រះដ៍ប្រោសលោះបានលើកដាក់លើអង្គទ្រង់នូវបញ្ហា ការឈឺចាប់ និងអំពើបាបទាំងឡាយ ។ ព្រះអង្គសង្គ្រោះនៃពិភពលោកបានយល់ពីយើងម្នាក់ៗផ្ទាល់ ដោយទទួលបទពិសោធន៍ពីសេចក្ដីសង្ឃឹម បញ្ហា និងសោកនាដកម្មតាមរយៈការរងទុក្ខរបស់ទ្រង់ក្នុងសួនច្បារគែតសេម៉ានី និងនៅលើឈើឆ្កាង ។^៥ ទ្រង់សុគតដោយព្រោះទ្រង់ស្រឡាញ់យើង ហើយត្រូវបានបញ្ចុះទៅក្នុងផ្នូរថ្មីនៅយប់ដ៏អកុសលនោះ ។

នៅព្រឹកថ្ងៃអាទិត្យ ព្រះយេស៊ូវបានមានព្រះជន្មរស់ឡើងវិញពីការសុគត—ផ្ដល់នូវការសន្យានៃជីវិតថ្មីដល់យើងម្នាក់ៗ ។ ព្រះអម្ចាស់មានព្រះជន្មរស់ឡើងវិញ ហើយទ្រង់បានបញ្ជាសិស្សរបស់ទ្រង់ឲ្យបង្រៀនមនុស្សគ្រប់គ្នាឲ្យមានជំនឿលើព្រះគ្រីស្ទ ប្រែចិត្តពីអំពើបាប ទទួលបុណ្យជ្រមុជទឹក ទទួលអំណោយទាននៃព្រះវិញ្ញាណបរិសុទ្ធ និងស៊ូទ្រាំដល់ទីញ្ចប់ ។ បងប្អូនប្រុស យើងដឹងថាព្រះជាព្រះវរបិតា និងព្រះរាជបុត្រាស្ងួនភ្ងារបស់ទ្រង់បានបង្ហាញព្រះកាយមកចំពោះព្យាការី យ៉ូសែប ស៊្មីធ ហើយតាមរយៈលោក ទ្រង់បានស្ដារឡើងវិញនូវភាពពេញលេញនៃដំណឹងល្អរបស់ព្រះយេស៊ូវគ្រីស្ទ ។

ឱសូមរឹងមាំឡើងបងប្អូនប្រុសអើយ ។ សូមរក្សាព្រះបញ្ញត្តិទាំងឡាយរបស់ព្រះ ។ ព្រះអម្ចាស់ព្រះយេស៊ូវគ្រីស្ទ សន្យាប្រទាននូវអ្វីៗដែលយើងប្រាថ្នាចង់ធ្វើក្នុងសេចក្តីសុចរិត ។ ពួកអ្នកដឹកនាំសាសនាចក្រកំពុងពឹងទៅលើបងប្អូនហើយ ។ យើងត្រូវការយុវមជ្ឈិមវ័យទាំងអស់ឲ្យរៀបចំខ្លួនរៀបការ បម្រើ និងដឹកនាំនៅថ្ងៃខាងមុខ ខ្ញុំសូមអធិស្ឋាននូវរឿងទាំងនេះដោយរាបសាក្នុងព្រះនាមនៃព្រះអម្ចាស់ព្រះយេស៊ូវគ្រីស្ទ អាម៉ែន ។