Me Ka e Rekitaki na Siga ni Vakacecegu
Mai vei Elder Russell M. Nelson
Ena Kuoramu ni iApositolo Le Tinikarua
Mo na vakadeitaka vakacava na nomu itovo ena Siga ni Vakacecegu mena yaco vei iko na marau kei na reki?
Kemuni na taciqu kei na ganequ lomani, sa lagilagi dina na rua na siga ni koniferedi oqo. Eda laveti cake ena sere e veivakauqeti kei na masu rogorogo vinaka. Sa mai vaqaqacotaki na yaloda ena itukutuku ni rarama kei na dina. Ena Sigatabu ni Siga ni Mate oqo, eda na duavata tale meda na vakavinavinakataka vakaidina na Kalou ena vukuna na parofita!
Eda na tarogi keda vakayadua kina: ena vuku ga ni veika au sa rogoca ka vakila ena gauna ni koniferedi, meu na veisau beka vakacava? Se cava beka na isau ni nomu taro, au sa sureti kemuni talega mo ni vakadeuca na yalomuni, kei na nomuni itovo baleta na Siga ni Vakacecegu.
Au vakayavalati ena vosa nei Aisea, ni a vakatoka na Siga ni Vakacecegu “me ka e rekitaki.” Ia au vakataroga, e ka rekitaki dina na Siga ni Vakacecegu vei iko kei au?
Ena vuqa na yabaki sa oti a ka rekitaki ena imatai ni gauna vei au na Siga ni Vakacecegu ena gauna au a osooso tu kina vakavuniwai dauveisele, kau kila ni Siga ni Vakacecegu a siga ni veivakabulai vei au. Ni dau cava e dua na macawa, sa daumosi sara ga na ligaqu ena kena masiraki ena sovu, wai, kei na barasi. Au dau gadreva talega meu cegu vakalailai mai na icolacola vakacakacaka bibi vakaoqo e dau gadrevi vakalevu. Au kune vakacegu vakalevu ena Sigatabu.
Na cava beka e tukuna tiko na iVakabula ni a kaya “sa caka na siga ni vakacecegu ena vukudra na tamata, e sega ni caka na tamata ena vuku ni siga ni vakacecegu”? Au vakabauta ni gadreva o Koya meda kila vinaka ni Siga ni Vakacecegu ni sa Nona iloloma vei keda, e solia mai na vakacegu dina mai na cakacaka bibi ni bula ena veisiga ka rawa meda vakavoui vakayalo ka vakayago. Sa solia mai vei keda na Kalou na siga digitaki oqo, sega ni ka ni marau se ka ni cakacaka ia meda vakacegu mai na itavi, ka vakacegui kina na yago kei na yalo.
Ena vosa vaka-Iperiu, na Siga ni Vakacecegu e kena ibalebale mo “vakacegu.” Na inaki ni Siga ni Vakacecegu e lesu tale ki na kena Buli o vuravura, ni oti e ono na siga ni cakacaka, a vakacegu na Turaga mai na cakacaka ni veibuli. E muri ni a qai vakaraitaka na Vunau e Tini vei Mosese, a vakarota na Kalou meda “nanuma na siga ni vakacecegu, mo vakatabuya.” E muri, a rokovi na Siga ni Vakacecegu me vakananumi kina na nodra sereki na Isireli mai na veivakabobulataki i Ijipita. E rairai bibi duadua, ni a soli na Siga ni Vakacecegu me dua na veiyalayalati tawamudu, me veivakavotui tudei tiko ni Turaga ena rawa ni vakatabui ira na Nona tamata.
Me kena ikuri, eda sa mai votai oqo ena sakaramede ena Siga ni Vakacecegu me ivakananumi ni Veisorovaki i Jisu Karisito. Eda sa veiyalayalati tale, ni sa lomada meda taura na Yacana tabu.
A vakatakilai Koya na iVakabula ni sai Koya na Turaga ni Siga ni Vakacecegu. E Nona siga! E kerei keda tikoga, meda maroroya na Siga ni Vakacecegu se vakatabuya na Siga ni Vakacecegu. Sa noda veiyalayalati meda cakava oqo.
Meda na vakatabuya vakacava na Siga ni Vakacecegu? Niu se cauravou, au dau vakadikeva na nodra cakacaka eso era vola na veika mera cakava kei na veika mera kakua ni cakava ena Siga ni Vakacecegu. E muri au sa qai kila rawa mai na ivolanikalou ni noqu cakacaka kei na itovo ena Siga ni Vakacecegu sa ivakatakilakila baleti au kei na Tamaqu Vakalomalagi. Ena kila oqori, sa sega tale ni gadrevi meu vola na veika meu cakava se kua. Ni gauna meu vakatulewa kina se vinaka se ca e dua na itavi ena Siga ni Vakacecegu, au sa tarogi au ga, “Na ivakatakilakila cava meu vakaraitaka vua na Kalou?” Na taro o ya e vakamatatataka vakavinaka na noqu digidigi baleta na Siga ni Vakacecegu.
E dina ga ni vunau baleta na Siga ni Vakacecegu sa ka mai liu sara, ia sa mai vakavoui ena siga edaidai me tiki ni dua na veiyalayalati vou e yalataki tiko kina e dua na ka. Vakarogoca na kaukauwa ni vunau vakalou oqo:
“Raica sa kilikili sara mo qarauni iko vinaka me kakua ni tauvi iko na duka ni ka vakavuravura, ia mo lako ki na vale ni soqoni ena noqu siga ni Vakacecegu ka qaravi au kina;
“Ia oqo na siga sa vakaroti vei iko mo vakacegu kina mai na nomu cakacaka kecega, ia mo qaravi Koya ga sa Cecere Sara; …
“Ena siga ko ya, … mo vakarautaka ga na kakana e ganita; io me taucoko kina na inaki ni lolo, … ka vuabale na nomu marau. …
“Ia mo dou vakavinavinakataka na ka oqo ena yaloreki, kei na matamamarau, … dou na vakalougatataki vakalevu e vuravura.”
Vakasamataka mada na cecere ni itukutuku o ya! Na veivakalougatataki levu e vuravura sa yalataki tu vei ira era vakatabuya na Siga ni Vakacecegu. Sa rauta me kaya kina o Aisea ni Siga ni Vakacecegu “e ka rekitaki.”
Mo na vakadeitaka vakacava na nomu itovo ena Siga ni Vakacecegu mena yaco vei iko na marau kei na reki? Me ikuri ni nomu gole tiko ki lotu, votai ena sakaramede, ka gugumatua ena nomu veikacivi mo veiqaravi, na itaviqaravi cava so tale mo na cakava me ka ni reki vei iko na Siga ni Vakacecegu? Na ivakatakilakila cava ko na solia vua na Turaga mo vakaraitaka ni ko lomani Koya?
E vakarautaka na Siga ni Vakacecegu e dua na madigi vinaka ni vaqaqacotaki na matavuvale. Ni sa vinakata tiko mada ga na Kalou, vei keda yadua, na Luvena, meda lesu Vua ni da sa Yalododonu vakaedaumenitaki, vauci vakamatavuvale e valetabu, kivei ira na noda qase e liu, vakakina vei ira na noda kawa.
Eda cakava na Siga ni Vakacecegu me ka rekitaki ni da vakavulica na kosipeli vei ira na luveda. Sa matata vinaka tu na noda itavi na itubutubu. E kaya kina na Turaga, “Raica ko ira na itubutubu mai Saioni … era sega ni vakavulici ira na luvedra e na ivakavuvuli dina ni ra sa yabaki walu; io na ivakavuvuli ni veivutuni, na vakabauti Jisu Karisito na Luve ni Kalou Bula, na papitaiso kei na isolisoli ni Yalo Tabu ena veitabaki ni liga; ia kevaka e sega, era na cudruvi kina.”
Ena vuqa na yabaki sa oti e ratou a vakaraitaka kina na Mataveiliutaki Taumada na bibi ni gauna vata vakamatavuvale. E ratou a vola:
“Keitou sa kerei ira na itubutubu mera solia na nodra sasaga vinaka duadua ki na nodra vakavulici ka susugi ira na luvedra ena ivakavuvuli ni kosipeli ka na vakavolekati ira tiko ki na Lotu. Na itikotiko sa yavu ni dua na bula sa savasava, ka sega ni rawa ki na dua tale na sala me veisosomitaki se vakayacora na kena inaki bibi ena kena muataki ki liu na itavi oqo sa solia mai na Kalou.
“Keitou sa vakasalataki ira na itubutubu kei na gone mera dau vakaliuca na masu vakamatavuvale, lotu vakamatavuvale, vulici ni kosipeli kei na ivakasala, vata kei na itaviqaravi vakamatavuvale savasava. Se cava sara na kena kilikili ka dodonu na soqo se itaviqaravi tale eso, mera kakua ga ni sosomitaka na ilesilesi vakalou era na vakayacora ga vakavinaka na itubutubu kei na matavuvale.”
Niu vakasamataka vakatitobu na ivakasala oqo, au diva meu tubutubu cauravou tale. Sa tu oqo vei ira na itubutubu na ivurevure totoka mera vukei me vakaibalebale cake nodra gauna vata vakamatavuvale, ena Siga ni Vakacecegu kei na veisiga tale eso. Sa tu ena LDS.org, Mormon.org, na vidio ni iVolatabu, na Mormon Channel, na Media Library, na iTokani, na New Era, na Ensign, na Liaona, kei na vuqa—ka vuqa tale. Na ivurevure oqo sa veivuke sara ga vakalevu vei ira na itubutubu mera cakava na nodra itavi ni vakavulica na luvedra. E sega tale ni dua na cakacaka me bibi cake mai na cakacaka vakaitubutubu e dodonu, ka nakiti!
Ni ko vakavulica na kosipeli, o na vulica e levu na ka. Oqo na sala ni veivuke ni Turaga vei iko mo kila vinaka na Nona kosipeli. E kaya kina:
“Io au sa vakaroti kemudou talega mo dou veivakavulici vakai kemudou ena ivakavuvuli ni matanitu.
“Mo dou gumatua sara ena veivakavulici … , mo dou vulica na yavu, na ivakavuvuli kei na ivakaro ni lotu … mo dou kila na veika ni matanitu ni Kalou, sa kilikili mo dou kila.”
Na vulici vakaoqo ni kosipeli sa rekitaki kina na Siga ni Vakacecegu. Na yalayala oqo sa baleta na matavuvale se cava sara na kena levu, iwiliwili, se vanua e tiko kina.
Me ikuri ki na gauna vata vakamatavuvale, sa rawa me ka rekitaki dina vei iko na Siga ni Vakacecegu na cakacaka ni tuva kawa. Na vakasaqarai kei na kunei ni lewe ni matavuvale era a bula taumada eke—o ira a sega ni rawa mera ciqoma eke na kosipeli—ena kauta mai na marau levu.
Au sa raica sara ga qo e mataqu. Ena vica na yabaki sa oti, a saga gumatua o watiqu lomani, o Wendy, me vulica na vakadikevi ni tuva kawa. A berabera na nona tekivu, ia a vulica toka ga vakalalai, na kena rawarawa me cakava na cakacaka tabu oqo. Au se bera mada ni raica me marau cake me vakaoqo. E sega talega ni gadrevi mo gole sara ki na dua na matanitu se ki na valenivolavola ni tuva kawa. E vale, ena veivuke ni dua na kompiuta se talevoni, mo kunei ira na tamata era gadreva tiko mai na nodra cakacaka vakalotu. Me ka rekitaki vei iko na Siga ni Vakacecegu ni ko vakasaqarai ira nomuni qase e liu ka sereki ira mai na vuravura ni yalo!
Me ka rekitaki vei iko na Siga ni Vakacecegu ena nomu qaravi ira na tamata, vakabibi o ira era tauvimate tiko se o ira era galili se o ira era tiko vakaleqai. Ni ko laveta cake na yalodra o na laveti talega.
Ena nona vakatoka o Aisea na Siga ni Vakacecegu me “ka rekitaki,” e vakavulica talega vei keda na sala me rekitaki kina. A kaya kina:
“Kevaka ko na tarova … mo kakua ni cakava na ka ko sa vinakata ga ena noqu siga tabu; ka vakatoka na siga tabu me ka e rekitaki, … ka dokai koya [na Turaga], ka sega ni cakava kina na nomu cakacaka, se muria kina na ka ko sa vinakata, se vosa wale kina:
Na noda sega ni cakava na “veika eda sa vinakata” ena Siga ni Vakacecegu ena gadrevi na bula vakaivakarau. Mo na cakitaki iko mai na veika o na rairai vinakata. Kevaka mo digitaka mo rekitaki Jiova, o na sega ni cakava me vaka e dua tale na siga. Sa rawa me caka ena dua tale na siga na itavi vakacakacaka kei na itaviqaravi veivakabulabulataki.
Vakasamataka mada qo: ni da saumi ikatini, eda vakasuka e dua nai katini ni noda rawa-ka vua na Turaga. Ni da vakatabuya na Siga ni Vakacecegu, eda maroroya e dua na siga mai na vitu me Nona. Sa qai noda madigi meda vakatabuya ruarua na ilavo kei na gauna Vua sa lolomataka mai vei keda na bula ena veisiga.
Ni da vakabauta na Kalou ena yaco meda lomana na Siga ni Vakacecegu; ni da vakabauta na Siga ni Vakacecegu eda na lomana na Kalou. Sa ka rekitaki dina na Siga ni Vakacecegu e vakatabui.
Ia oqo, ni sa mai tini tale na koniferedi oqo, eda sa kila tu ni vanua cava ga eda vakaitikotiko kina sa dodonu meda ivakaraitaki ni tamata sa vakabauta vei ira na noda matavuvale, neiba, kei na itokani. O ira ga na tamata vakabauta dina era vakatabuya na Siga ni Vakacecegu.
Meu tinia ena nona vakamamasu ni veitalatala o Moronai, ni sa sogota na iVola i Momani. A vola kina, “Io dou lako vei Karisito, ka biuta tani na ivalavala sa sega ni vakalotu, mo dou vinaka kina; ia kevaka dou sa biuta tani na ivalavala sa sega ni vakalotu ka lomana na Kalou ena lomamudou taucoko, kei na yalomudou taucoko, kei na nomudou igu taucoko … mo dou nei Karisito.”
Mai na loloma ni yaloqu, sa noqu masu, ivakadinadina, ka veivakalougatataki oqo vei kemuni ena yaca tabu i Jisu Karisito, emeni.