From Samting Ia Oli Bin Stopem Ol Fraet blong Olgeta

I Kam long Elda David A. Bednar

Blong Kworom blong Olgeta Twelef Aposol

Hem i no semmak long fraet ia blong wol we i mekem man i lukaot, mo i wari; fraet o ona long God i wan ples blong kasem pis, stret save, mo tras. …

Mi tingbaot gud wan eksperiens mi gat taem mi smol boe. Wan dei, taem mi stap pleiplei wetem ol fren blong mi, mi mestem mi brekem wan windo blong stoa kolosap long haos. Taem glas i brok sekiuriti alam i krae mo wan fraet i fulumap hat mo maen blong mi. Wantaem nomo mi luksave se bae mi mas go long kalabus blong ful laef blong mi. Papa mo Mama blong mi i kam karemaot mi long ples we mi haed long hem we hem i andanit bed, mo helpem mi blong stretem samting wetem ona blong stoa. Laki nomo mi nomo go long kalabus.

Fraet we mi filim long dei ia i bigwan mo i ril. Ating yufala tu i bin filim wan bigfala fraet olsem afta we oli talem se yu gat wan bigfala sik o faenem se wan memba blong famli i stap long hadtaem o denja o taem yu stap luk ol samting we i stap hapen raon long wol. Long ol taem olsem, ol bigfala nogud filing i kam antap from i gat denja, i no gat sekiuriti, o harem nogud mo go tru long ol eksperiens we yu sek long olgeta mo en blong hem i nogud.

Long evri dei laef blong yumi, i gat fulap ripot blong vaelens, hanggri, wo, korapsen, teroris, nogud fasin, sik mo ol disasta we oli save mekem man i fraet. Yes i tru yumi stap long wan taem we Lod i tokbaot finis: “Mo long dei ia … ful wol bae i muvmuv olbaot, mo hat blong ol man i nomo strong” (D&K 45:26).

Stamba tingting blong mi i blong tokbaot olsem wanem yumi sakemaot fraet taem yumi kasem stret save mo gat fet long Lod Jisas Kraes. Mi prea had se Tabu Spirit bae i blesem wanwan long yumi taem yumi tingting long impoten topik ia.

Fraet blong Wol Ia

Taem tufala i harem voes blong God afta we tufala i kakae frut we i no blong kakae, Adam mo Iv i haed long Garen blong Iden. God i singaot Adam mo askem: “Ei yu stap wea? Mo [Adam i ansa] Mi harem voes blong yu …, nao mi fraet”Jenesis 3:9-10). Yumi luk gud se wan long ol fas risal blong Foldaon i blong Adam mi Iv i gat fraet. Bigfala filing ia i impoten long laef blong yumi long wol ia.

Wan eksampol long Buk blong Momon i soemaot gud paoa blong save abaot Lod (luk long 2 Pita 1:2-8; Alma 23:5-6) blong save sakemaot fraet mo givim pis nomata yumi fesem strong enemi.

Long graon blong Helam, ol pipol blong Alma oli bin fraet from wan ami blong ol man blong Leman we oli stap kam.

Be Alma i bin go fored mo i stanap long medel blong olgeta mo i talem strong long olgeta se oli no mas fraet; be, se oli mas tingbaot Lod, God blong olgeta mo bae hem i mekem olgeta oli go fri.

“Taswe oli bin stopem fraet blong olgeta” (Mosaea 23:27-28).

Yu save luk se Alma i no stopem fraet blong ol pipol. Be Alma i givim advaes long olgeta we oli biliv blong oli tingbaot Lod God blong olgeta mo bae hem i mekem olgeta i go fri. (luk long 2 Nifae 2:8). Mo from ol pipol oli bin save se Sevya i stap lukaot long olgeta, nao fraet blong olgeta i stop.

Stret save mo fet long Lod i givim paoa long yumi blong stopem ol fraet blong yumi from Jisas Kraes nomo hem i stamba blong kasem pis we i stap oltaem. Hem i talem: “Lanem samting aot long mi, mo lisin long ol toktok blong mi; wokbaot wetem fasin blong no stap flas we i kam long Spirit blong mi,mo bae yu kasem pis long mi” (D&K 19:23).

Masta tu i eksplenem: “Be yufala i mas lanem se hem we i mekem ol wok long stret mo gud fasin bae i kasem praes blong hem, we i pis long wol ia, mo laef we i no save finis long wol we bae i kam” (D&K 59:23).

Tras long Kraes mo blong dipen long wanem Hem i gat blong givim, sore, mo gladhat blong Hem i lidim yumi tru long Atonmen blong Hem, blong hop long Laef Bakegen long Ded mo long laef we i no save finis (luk long Moronae 7:41). Kaen fet mo hop ia i mekem se i gat insaed long laef blong yumi, swit pis long tingting we yumi evriwan i wantem. Paoa blong Atonmen i mekem se yumi save sakem sin mo i stopem fasin blong lusum hop from i gat sin; i mekem yumi kam strong moa blong luk samting, mekem samting mo kam gud long plante wei we bae yumi no luksave o mekem wetem paoa blong yumi nomo. I tru, wan long ol bigfala blesing blong stap olsem ol tru disaepol hem i pis blong God we i bitim wanem man i save andastanem” (Filipae 4:7).

Pis blong Kraes i mekem se yumi luk laef long wol ia tru long ae we i luk long taem we i no save finis mo i mekem se tingting i kwaet long saed blong spirit (luk long Kolosi 1:23) mo hemia i helpem yumi stap lukluk nomo long ples blong kasem long heven. From hemia yumi gat blesing ia blong stopem ol fraet blong yumi from doktrin blong hem i givim wan stamba tingting mo daereksen long evri pat blong laef. Ol odinens mo ol kavenan oli mekem yumi strong mo gat pis long gud taem mo nogud taem. Mo prishud atoriti blong Hem i mekem tingting i kwaet mo talem se ol samting we oli moa impoten oli save stap strong long taem naoia mo long taem we i no save finis.

?Be yumi save stopem fraet isi mo plante taem long wanem yumi fesem long wol tedei? Ansa long olgeta kwestin ia i wan yes. Trifala stamba prinsipol oli ki blong kasem blesing ia long laef blong yumi: (1) luk long Kraes, (2) bildimap yu antap long fandesen blong Kraes, mo (3) gogohed wetem fet long Kraes.

Luk long Kraes

Advaes we Alma i givim long boe blong hem Hileman i stret tu long wanwan long yumi tedei: “meksua se yu luk long God mo stap laef”(Alma 37:47). Yumi mas luk long Sevya mo stap lukluk nomo long Sevya long evri taem mo long evri ples.

Tingbaot olsem wanem ol Aposol blong Lod oli stap long sip, mo solwota i raf. Jisas i go long olgeta, i wokbaot antap long wota; be oli no luksave Hem, mo oli singaot from oli fraet.

“Be wantaem nomo, Jisas i talem long olgeta se: ‘Yufala i no harem nogud. Mi nomo ya. Yufala i no fraet.”

“Mo Pita i talem se: ‘?Masta i tru, yu ya? Sapos i olsem, yu talem long mi blong mi wokbaot antap long wota mi kam long yu.’

“Mo !Hem talem Yu Kam!” (Matiu 14:27-29).

Afta Pita i wokabaot antap long wota i go long Jisas.

Be taem hem i luk se win i stap kam strong, mo ol wef oli muvmuv andanit leg blong hem, Pita i fraet mo “stat draon mo i singaot se: ‘Masta, plis yu sevem mi.’

“Nao wantaem nomo Jisas i stretem han blong hem i holem hem nao i talem se: “?Man, from wanem yu gat tu tingting olsem?” (Matiu 14:30–31).

Mi stap luk Pita i ansa wetem strong tingting mo wantem nomo i folem invitesen blong Sevya. Wetem ae blong hem we i luk nomo long Jisas, hem i aot long sip mo olsem merikel i wokbaot antap long wota. Be taem ae blong hem i tanem i go long win mo ol wef hem i fraet mo i stat blong draon.

Yu save gat blesing blong winim ol fraet blong yumi mo mekem fet i kam strong moa taem yumi folem toktok blong Masta: “Lukluk long mi long evri tingting blong yufala; no gat tu tingting, no fraet.”(D&K 6:36).

Bildimap Yu antap long Fandesen blong Kraes

Hileman i tok strong long ol boe blong hem, Nifae mo Lihae: “Tingbaot, tingbaot se hem i long ston blong Ridima blong yumi, we i Kraes, Pikinini blong God, we yutufala i mas bildim fandesen blong yutufala; blong mekem se taem we devel bae i sendem aot ol strongfala win blong hem, yes ol spia blong hem long wael win, yes, taem we ol ston blong aes blong hem mo strong win blong hem bae foldaon long yutufala, bae i no gat paoa ova long yutufala blong pulum yutufala i go daon long bigfala hol blong sore mo sore tumas we i no gat en, from ston; long hem we yutufala i bin bildimap yutufala, we i wan sua fandesen, wan fandesen, long hem we sapos ol man i bildimap olgeta long hem oli no save foldaon” (Hileman 5:12).

Ol odinens mo ol kavenan oli ol brikis we yumi yusum blong bildimap laef blong yumi antap long fandesen blong Kraes mo Atonmen blong Hem. Yumi joen gud wetem Sevya taem yumi stap klin inaf mo kasem ol odinens mo mekem ol kavenan, taem yumi fetful blong tingbaot mo mekem ol tabu komitmen, mo taem yumi mekem bes blong laef folem ol promes we yumi bin akseptem. Mo joen ia i stamba blong paoa long saed blong spirit mo i wanem i mekem yumi no stap muvmuv long eni kaen taem blong laef blong yumi.

Yumi save kasem blesing blong stopem ol fraet blong yumi taem yumi wantem tumas mo aksen blong yumi i stanap long fandesen blong Sevya tru long ol odinens mo kavenan.

Gogohed Wetem Fet long Kraes

Nifae i talem: “From samting ia yufala i mas wokbaot fored wetem strong bilif long Kraes wetem wan stret mo klin hop, mo wan lav blong God mo blong evri man. From samting ia, sapos yufala i gohed strong, mo stap kakae gud long toktok blong Kraes, mo stap strong kasem en, luk, olsem ia nao Papa i talem: Bae yufala i kasem laef we i no save finis” (2 Nifae 31:20

Blong gat disiplin mo stap strong we ves ia i tokbaot, i risal blong spirit blong yu i andastanem samting mo yu gat visen yu gogohed yu wet longtaem mo kasem gladhat blong God. Blong praktisim fet long tabu nem blong Jisas Kraes blong no flas mo folem tingting mo taem blong Hem long laef blong yumi mo gat tingting i stap daon mo luksave han blong Hem long evri samting mo kasem ol samting blong pis we i blong kingdom blong God we i mekem yu gat glad mo laef we i no save finis (luk long D&K 42:61). Iven taem yumi fesem ol hadtaem mo ol samting we i no klia long fiuja yumi save stap glad mo gogohed mo gat wan laef we i gat pis mo gat gud fasin mo stap ones” (1 Timoti 2:2).

Yumi save gat blesing blong stopem ol fraet blong yumi taem yumi kasem paoa we i kam taem yumi lanem samting mo stap laef folem ol prinsipol blong gospel mo mekem tingting blong gogohed long rod ia blong kavenan.

Fraet long Lod

Hem i defren be i go wetem ol fraet we yumi fesem plante taem; hem i wanem skripja i tokbaot olsem “fraet long God” (Hibrus 12:28)) o “tanem baksaed long ol fasin nogud”(Job 28:28; Ol Proveb 16:6; Aesea 11:2-3). I no semmak long fraet blong wol we i mekem man i tingting tumas, fraet long God i mekem man i gat pis stret save mo tras.

?Olsem wanem nao samting we i go wetem fraet i stap leftemap tingting o save help long saed blong spirit?

Stret mo gud fraet we mi traem blong tokbaot i olsem wan bigfala filing blong revren respek mo sapraes long ol samting blong Masta Jisas Kraes (luk long Ol Sam 33:8; 96:4), blong obei long ol komanmen blong Hem (luk long Dutronome 5:29; 8:6; 10:12; 13:4; Ol Sam 112:1) mo stap wet from Las Jajmen mo jastis long han blong Hem. From hemia fraet long God i kam from yumi andastanem gud se Masta Jisas Kraes i tabu mo i gat wan misin mo yumi glad blong folem tingting blong Hem mo yumi save se evri man mo woman bae i ansa from sin blong hem long Dei blong Jajmen (luk long D&K 101:78; Ol Toktok blong Bilif 1:2).

Olsem ol skripja oli talem tru, fraet long God “stat blong kasem save” (Ol Proveb 1:7), “i toksave blong waes tingting” (Proveb 15:33), “i save gud samting i stap”(Proveb 14:26), mi “i springwota we i givim laef long man” (Proveb 14:27).

Plis luk gud se fraet long God i joen stret wetem wan stret save long saed blong Las Jajmen mo se wanwan long yumi bae i ansa from ol samting we yumi wantem, ol tingting, ol toktok, mo ol aksen blong yumi (luk long Mosaea 4:30). Fraet long God i no blong fraet blong stanap long fored blong Hem mo kasem jajmen. Mi no biliv se bae yumi fraet long Hem nating. Be, i taem yumi stanap long fored blong Hem mo tingtingbak long yumiwan mo kasem “wan stret save” (2 Nifae 9:14; luk tu long Alma 11:43) long evri eskius, priten, giaman blong yumi. Long en, bae yumi no gat eskius.

Evriwan we i bin laef o bae i laef yet long wol ia “bae oli karem olgeta blong stanap long kot blong God, blong kasem jajmen folem ol wol blong [hem,] sapos oli gud o sapos oli nogud” (Mosaea 16:10). Sapos wanem we yumi bin wantem i blong stret o gud samting mo wok blong yumi i gud, nao bae jajmen blong yumi i gud (luk long Jekob 6:13; Inos 1:27; Moronae 10:34). Mo long las dei bae yumi “kasem pei blong stret mo gud fasin” (Alma 41:6).

Semmak, sapos wanem yumi bin wantem i nogud o wok blong yumi i no stret, nao jajmen bae i konkon. “Bae yumi gat fasin blong fraet blong lukluk antap long God blong yumi; mo bae yumi glad plante blong talem long ol ston mo ol bigfala hil blong foldaon long yumi blong haedem yumi long fes blong Hem” (Alma 12:14). Mo long las dei bae yumi “kasem pei blong nogud wok.” (Alma 41:5).

Olsem oli talem i sot long Prija:

“Mas fraet long God, mo kipim ol komanmen blong Hem: from hemia nao ful diuti blong man.

“From God bae i jajem evri wok, wetem evri sikret samting, nomata i gud, o i nogud” (Prija 12:13–14)

Ol brata mo sista blong mi we mi lavem fraet long God i ronemaot ol fraet long wol ia. I stopem wari ia se bae yumi neva gud inaf long saed blong spirit, mo bae yumi neva kasem mak we Masta i wantem yumi kasem. Wanem i tru, i we yumi no save kam gud inaf o kasem mak ia sapos yumi stap dipen nomo long paoa mo wok blong yumi. Ol wok mo samting we yumi wantem oli no save sevem yumi. “Afta we yumi mekem evri samting we yumi save mekem, ”(2 Nifae 25:23), nao yumi kam fulwan tru long sore mo gladhat we i stap tru long sakrifaes blong Sevya we i no bigwan mo i no save finis, we i pemaot yumi (luk long Alma 34:10, 14). I tru, “[Yumi] biliv we tru long Atonmen blong Kraes, bae evri man oli save stap sef, taem oli stap obei long ol loa mo olgeta odinens blong Gospel” (Ol Toktok blong Bilif 1:3).

Fraet long God i blong lavem mo trastem Hem. Moa yumi fraet long God, moa yumi lavem Hem long stret fasin. Mo “from lav we i stret gud i sakemaot evri fraet” (Moronae 8:16). Mi promes se laet blong fraet long God i ronemaot ol tudak blong fraet long wol (luk long D&K 50:25) taem yumi luk o go long Sevya, mo bildimap yumi antap long Hem olsem fandesen blong yumi, mo gogohed long rod blong kavenan blong Hem wetem wan komitmen we i gat ful tingting mo hat.

Testemoni mo Promes

Mi lavem mo respektem Masta bigwan. Paoa blong Hem mo pis blong Hem i tru tumas. Hem i Ridima blong yumi, mo mi witnesem se Hem i stap laef. Mo from hem, i no nid blong hat blong yumi i trabol o i stap fraet (luk long Jon 14:27) mo bae yumi gat blesing blong stopem ol fraet blong yumi. Mi testifae olsem long tabu nem blong Lod Jisas Kraes, amen.