!Hem I Wok Gud Tumas!
I Kam long Presiden Dita F. Ukdof
Seken Kaonsela long Fas Presidensi
Mi prea se bae yumi lukluk nomo long “gud fasin blong lavem Kraes” mo letem gladhat blong Hem i leftemap, i tekem yumi long rod ia.”
Ol brata mo sista we mi laekem, ol dia fren blong mi, hem i wan glad blong stap wetem yufala tedei. Yumi sore tumas blong luk trifala emti jea long stan. Yumi misim Presiden Peka, Elda Peri mo Elda Skot. Yumi lavem olgeta mo prea se ol famle blong olgeta bae oli oraet.
Long taem blong wiken konfrens ia, bae yumi gat spesel janis blong sastenem trifala we Lod i singaotem olgeta blong oli tekem ples blong olgeta long Kworom blong Olgeta Twelef Aposol.
Prea blong yumi from olgeta bae i mekem olgeta i kam strong moa taem oli stap mekem tabu wok ia blong wan aposol.
?Gospel I Stap Wok long Laef blong Yu?
I no longtaem i pas, mi bin luk wan kwot we i mekem mi stop mo tingting. I go olsem: “Talem long wan man se i gat trilian sta long yunives, mo bae hem i bilivim yu. Talem long hem se i gat peint we i wetwet long wol, mo bae hem i tajem blong jekem.”
?Be yumi, yumi no olsem smol? Afta long wan tes, ol gudfala dokta blong mi oli eksplenem wanem mi nidim blong mekem blong kam oraet gud. Be fastaem, mi mas lanem wan samting abaot miwan, wan samting we mi sapos blong save blong longtaem: olsem wan sikman, mi no gat fasin blong save wet longtaem.
From hemia, mi disaed mekem mi oraet kwik mo lukaotem infomesen miwan long Intanet. Mi ting se mi faenem trutok ia nao we dokta i no save, o i traem blong haedem long mi.
I tekem mi sam taem bifo mi luksave krangke samting we mi bin stap mekem. I tru, blong lukaotem samting blong yumiwan i no wan nogud tingting. Be mi sarem ae long trutok we mi save dipen long hem, mo mi go from infomesen long Intanet we i no tru oltaem.
Samtaem, trutok i stret nomo i stap, i klia tumas, mo i simpol tumas blong yumi glad fulwan olsem we i stap. Mekem se yumi putum i stap long saed wanem we yumi gat eksperiens long hem mo save se i tru, mo go from infomesen we moa defren o i moa had blong andastanem. Mi hop se bae yumi lanem se taem yumi stap ron from ol ansa we i no tru, yumi stap ron from samting we i smol nomo mo i no impoten nating.
Taem we yumi tokbaot trutok long saed blong spirit, ?olsem wanem bae yumi save se yumi stap long raet rod?
Wan wei blong save i blong askem stret kwestin—kaen kwestin ia we bae i helpem yumi tingting hevi long progres blong yumi mo skelem sapos samting i wok gud blong yumi o no. Ol kwestin olsem:
“?Laef blong mi i gat mining o no?”
“?Mi, mi biliv long God o no?”
“?Mi, mi biliv se God i save mo i lavem mi?”
“?Mi, mi biliv se God i harem o ansarem prea blong mi o no?”
“?Mi, mi hapi tru o no?”
“Ol hadwok blong mi oli lidim mi i go kasem gol mo valiu long saed blong spirit we oli moa hae olgeta long laef o no?”
Ol bigfala kwestin long saed blong stamba tingting blong laef i lidim plante man, woman mo famle raon long wol blong lukaotem trutok. Plante taem, taem oli mekem, i lidim olgeta long Jos blong Jisas Kraes blong Ol Lata-dei Sent mo gospel we i kambak.
Mi askem miwan se, yumi, olsem ol memba blong Jos, bae i gud long yumi blong askem yumiwan wanwan taem: “?Eksperiens blong mi long Jos ia i wok gud blong mi? ?I stap tekem mi kolosap moa long Kraes o no? ?I stap blesem mi mo famle blong mi wetem pis mo glad we gospel i promesem o no?”
Alma i askem semmak kwestin long ol memba blong Jos long Sarahemla taem hem i askem: “?Yufala i bin kasem pikja blong hem long fes blong yufala? ?Yufala i save filim samting ia naoia?”1 Ol tingting olsem oli save helpem yumi stretem lukluk o stretem yumi wetem tabu plan blong fasin blong sevem man.
Plante memba bae oli ansa wetem gud hat se eksperiens blong olgeta olsem wan memba blong Jos i wok gud, i stret nao long olgeta. Bae oli testifae se nomata oli stap long pua taem o gat plante samting, nomata ol samting i gud o i nogud, oli faenem mining, pis, mo glad from oli putum laef blong olgeta long Lod mo seves blong olgeta long Jos. Evri dei, mi mitim ol memba blong Jos we oli fulap long glad we i saen, mo oli soem hemia long toktok mo aksen, se laef blong olgeta i rij plante tru long gospel we i kambak blong Jisas Kraes.
Be mi luksave tu se i gat sam we oli no gat fulap eksperiens—we oli filim se membasip blong olgeta long Jos, i no wanem oli bin hop from.
Hemia i mekem mi, mi harem nogud from se mi save stret olsem wanem gospel i save givim paoa long laef mo i save mekem spirit i laef—olsem wanem i save fulumap hat blong yumi wetem hop, mo maen wetem laet. Mi save miwan olsem wanem ol frut blong gospel blong Jisas Kraes i save jenisim laef we i olbaot, i nogud i kam gud mo gud evriwan.
Be ?from wanem nao i luk se i wok gud long sam be i no long narawan? ?Wanem i defren bitwin olgeta ia we eksperiens blong olgeta long Jos i fulumap sol blong olgeta wetem ol singsing blong lav we i pemaot man,2 mo olgeta ia we oli filim se i gat wan samting we i no gat?
Taem mi tingting hevi long ol kwestin ia, wan hip blong ol tingting oli kam long maen blong mi. Tedei, bae mi serem tu:
Mekem I Kam Simpol
Faswan: ?Yumi stap mekem wok blong yumi olsem disaepol i go had tumas?
Naes gospel ia i simpol gud, mekem se wan pikinini i save kasem; mo semtaem i dip o i gat plante defren samting we bae i tekem wan ful laef—taem we i no save finis—blong stadi mo faenemaot blong save andastanem fulwan.
Be samtaem, yumi tekem naesfala lili blong trutok blong God, mo kavremap wetem plante, plante gudfala tingting mo program blong man. Wanwan long ol samting ia, maet i help mo i stret blong wan smol taem ia mo situesen, be taem oli hivimap wan antap long narawan, oli mekem wan hil blong ol doti we i kam tik mo hevi tumas mekem se yumi nomo luk naesfala flaoa ia we yumi bin lavem gud long fastaem.
From hemia, olsem ol lida, yumi mas strik blong protektem Jos mo gospel, mo holem i klin gud mo i klia mo no traem blong putum sam hevi trabol long ol memba blong yumi.
Yumi evriwan, olsem ol memba blong Jos, yumi nid blong gat tingting blong traehad blong givim ful paoa blong bodi mo taem blong yumi long ol samting we oli moa impoten, mo semtaem leftemap tingting blong ol narawan oli kam strong moa mo stap bildim kingdom blong God.
Wan sista, wan tija blong Rilif Sosaeti, oli save gud hem from hem i rere long ol gudfala lesen. Wan taem, hem i disaed blong somap wan naes tik blanket we bae i stap olsem bakgraon blong lesen blong hem. Be tumas samting long laef—mas pikimap pikinini long skul, helpem neiba blong muv, hasban we i gat fiva, mo wan fren blong leftemap tingting blong hem. Dei blong lesen i kam, mo blangket ia i no finis yet. Nao, long naet bifo long lesen, hem i no slip tumas be i wok ful naet long blangket ia.
Long nekis dei, hem i taet tumas mo i no save putum tingting blong hem i kam i stret, be hem i stanap mo givim lesen ia.
Mo blangket ia i naes tumas—ol tred oli stret, kala i saen, paten i naes gud. Long medel i gat wan toktok we i talem stamba tingting blong lesen blong hem: “Mekem I Kam Simpol.”
Ol brata mo sista, blong stap laef folem gospel i no nid blong yumi tantanem tumas.
Hem i wan stret laen nomo. Oli save tokbaot olsem:
-
Blong harem toktok blong God wetem tru tingting i lidim yumi blong biliv long God mo blong trastem ol promes blong Hem.3
-
Moa yumi gat tras long God, moa hat blong yumi i fulap wetem lav long Hem mo wanwan long yumi.
-
From lav we yumi gat long God, yumi wantem blong folem Hem mo mekem aksen blong yumi i go stret laen wetem toktok blong Hem.
-
From se yumi lavem God, yumi wantem blong wok blong Hem; yumi wantem blesem laef blong ol narawan mo helpem olgeta we oli pua mo stap long nid.
-
Moa yumi wokbaot long rod ia blong stap disaepol, moa bae yumi wantem lanem toktok blong God.
Mo i gogo olsem, wanwan step i go long narawan mo fulumap yumi wetem fet, hop mo jareti we i gohed blong gro.
Hem i naes mo simpol, mo i wok gud tumas.
Ol brata mo sista, sapos yu ting se gospel i no wok gud long yu, mi invaetem yufala blong gobak, lukluk long laef blong yu, mo mekem i simpol blong stap disaepol. Lukluk nomo long ol stamba doktrin, prinsipol, mo wei blong yusum gospel. Mi promesem yu se God bae i lidim mo blesem yu long rod blong yu i go kasem wan gudfala laef, mo gospel bae i wok gud moa long yu.
Stat long Ples we Yu Stap long Hem
Nambatu tingting blong mi i: stat long ples we yu stap long hem.
Samtaem yumi kam slak from se yumi no “moa” long wan samting—moa spirit, moa respek, waes, helti, rij, fren, o save mekem moa. I no gat samting i rong blong wantem kam antap. God i bin krietem yumi blong yumi gro mo progres. Be tingbaot, ol samting we yumi no strong long hem oli save helpem yumi blong putum tingting i stap daon moa, mo helpem yumi tanem yumi long Kraes we bae i mekem yumi kam strong long olgeta samting we yumi no strong long olgeta.4 Long nara saed, Setan i yusum ol samting we yumi no strong long hem blong yumi kam slak mo nomo stap traem.
Mi lanem long laef se yumi no nid blong kam “moa” long eni samting blong stat blong kam huia we God i wantem yumi kam.
Bae God i tekem yu olsem we yu stap long stret taem naoia, mo i stat wok wetem yu. Wanem yu nidim i wan hat we i wantem, wan tingting we i wantem biliv, mo tras long Lod.
Gidion i bin luk hemwan olsem wan pua fama, hem we i moa daon long haos blong papa blong hem. Be God i bin luk hem olsem wan strong man wetem strong tingting.5
Taem Samuel i jusum Sol blong kam king, Sol i traem toktok se i no posibol. Sol i kamaot long wan long traeb we i moa smol long haos blong Isrel. ?Olsem wanem nao bae i kam king?6 Be God i luk hem olsem wan naes gudfala yang man.7
Iven profet Moses i bin filim se i tumas mo tingting blong hem i slak long wan taem, mekem se hem i wantem givap mo ded.8 Be God i no bin givap long Moses.
Ol dia brata mo sista, sapos yumi luk yumi tru long ol ae blong wol nomo, bae yumi no lukluk gud long yumi. Be Papa blong yumi long Heven i luk yumi olsem we yumi stap mo huia yumi save kam. Hem i luk yumi olsem ol boe mo gel blong Hem, olsem ol man blong laet we i no save finis, wetem paoa we i no gat en, mo wetem wan tabu fiuja.9
Sakrifaes blong Sevya i bin openem doa blong fasin blong sevem man blong evriwan i gobak long God. “Gladhat blong [Hem], i naf blong evri man we i putum tingting blong olgeta i stap daon long fored blong [Hem].”10 Gladhat blong Hem ia, i paoa we i save letem man i kasem ol kingdom God blong fasin blong sevem man. From gladhat blong Hem, bae yumi evriwan i laef bakegen long ded mo bae Hem i sevem yumi long wan kingdom blong glori.
Iven kingdom blong glori we i daon long ol narawan, telestial kingdom “i bitim save blong yumi,”11 mo plante pipol we namba i no save kaontem, bae oli kasem glori ia.12
Be gladhat blong Sevya i save mekem moa long yumi. Olsem ol memba blong Jos blong Jisas Kraes blong Ol Lata-dei Sent, yumi wantem blong mekem wan samting we i bigwan moa. Hem i blong kam olsem god long selestial kingdom. Hem i laef we i no save finis wetem Papa blong yumi long Heven. Hem i presen we i moa hae bitim ol nara presen we God i givim.13 Long selestial kingdom, yumi kasem evri samting we Hem i gat mo glori blong Hem.14 I tru, evri samting we Papa i gat, bae Hem i givim long yumi.15
Blong kam olsem wan god i gol blong yumi; stap olsem disaepol i rod blong yumi.
Taem yu stap praktisim smol fet mo statem wokbaot blong yu olsem wan gudfala man blong folem Lod Jisas Kraes, bae hat blong yu i jenis.16 Ful bodi blong yu bae i fulap long laet.17
God bae i helpem yu blong kam wan samting we i moa hae bitim we yu ting se i posibol. Mo bae yu faenemaot se gospel blong Jisas Kraes, i tru, i stap wok gud long laef blong yu.
!Hem I Wok!
Ol brata mo sista, ol dia fren, mi prea se bae yumi lukluk nomo long “gud fasin blong lavem Kraes”18 mo letem gladhat blong Hem i leftemap, i tekem yumi long rod ia, long weaples yumi stap long hem i go long ples blong glori long ples blong Papa blong yumi.
Taem yumi stap mekem olsem, mo wan i askem yumi: ?I olsem wanem blong stap wan memba blong Jos blong Jisas Kraes blong Ol Lata-dei Sent i wok gud long yu?” bae yumi save talem wetem gud hae tingting mo wetem glad: “!I wok gud tumas! !Tangkyu blong askem! ?Yu wantem save moa?”
Hemia i hop blong mi, prea blong mi, testemoni blong mi mo blesing blong mi long nem blong Jisas Kraes, amen.