¡Ofunciona porãiterei!

2015

¡Ofunciona porãiterei!

Presidente Dieter F. Uchtdorf rupive

Segundo Consejero Primera Presidencia-pe

Imágen – Ta’anga

Añembo’e tañañe’enfoka pe “sensillez oĩva Cristo-pe” ha jaheja Igrasia tañandegueraha ha tañanderupi yvate.

Che hermano ha hermanakuéra, amigokuéra ahayhuetéva, avy’aiterei aime haguére penendive ko árape. Roñembyasy rohechávo mbohapy apyka nandi ko estrado-pe. Rohechanga’u Presidente Boyd K. Packer, Élder L. Tom Perry ha Elder Richard G. Scott –pe. Rohayhu ha roñembo’e ifamiliakuéra ñeimeporãre.

Ko fin de semana conferencia aja jaguerekóta privilegio ñasostenévo mbohapy hermanokuéra Ñandejára oñehenóiva oguapy haĝua hendápe Quorum de los Doce Apóstoles apytépe.

Ñane ñembo’e ifavorpe omombaretéta chupekuéra oguerahávo pe apostolado manto sagrado.

¿Ofunciona piko pe evangelio peẽme ĝuarã?

Nda’aréi amoñe’ẽ peteĩ cita chemopensáva Kuri. He’i: “Peje peteĩ yvypórape oĩha mbohapy trillon mbyjakuéra universo-pe ha ogueroviáta. Peje chupe pe pintura pared pegua hykueha gueteri, ha opokóta hese oĩ haĝua seguro”.

¿Ñandépa ndaha’éi upéicha avei? Peteĩ cirugía ramoitéva rire, che doctorkuéra ivaléva he’i chéve mba’épa ajapova’erã akuera porã haĝua. Ha katu, primero a’aprende jeyva’erã peteĩ mba’e chejehegui, aikuaamava’erãmo’ã ymaite guive: paciénteicha, che nachepacienciaiete.

Upévare, adecidi ambopya’evetaha pe jekuera, ajapóvo chete peteĩ investigación internet-pe. Oiméne adescubrise alguna verdad umi médico ndohechaiva’ekue, terã omokañyséva chehegui.

Are’imi ahechakuaa haĝua vyrorei pe ajapóva. Por supuesto, ñaivestiga ñane cuenta rehe noĩvaíri. Ha katu che amboyke hína peteĩ verdad ikatúva rehe ajerovia, ha upéva rangue aime envuelto umi declaración popular oĩva internet-pe, sapy’ánte ha’éva vyrorei.

Sapy’ante, pe verdad ikatu ojogua hesakãiterei terã isimple ha isensilloitereíha jahechakuaa haĝua ivalor añetéva. Upévare ñamboyke upe ña’experimentamava’ekue ha jaikuaa añeteha, jaheka haĝua ambue solución imisterioso ha ikomplikadovéva. Suerte reheve, ña’aprendéta japerseguíramo sombra japersegui asunto ovale pokãva.

Ñañe’ẽvo pe verdad espiritual rehe, ¿Mba’éichapa ikatu jaikuaa ñaimeha tape porãme?

Peteĩ manera ha’e ñañeporandu porãvo – umi porandu ñaneipytyvõtava ñamedita haĝua ñande progreso-re ha ja’evalua haĝua mba’éichapa jaha ñaína. Porandu koichagua:

“¿Oguereko piko significado ko che rekove?

“¿Aguerovia piko Tupãme?”

“¿Aguerovia piko Tupã cheikuaa ha cherayhuha?”

“¿Aguerovia piko Tupã ohendu ha ombohovaiha che ñembo’ekuéra?”

“¿Avy’a piko añetehápe?”

“¿Che gueraha piko hína che esfuerzokuéra ahupyty haĝua umi meta ha valor ijyvatevéva che rekovépe?

Ko’ãichagua porandu pypuku ñande rekove propósito rehe oguerahava’ekue heta individuo ha familiakuérape opa ko mundo jerére oheka haĝua pe añeteguáva. Py’ỹi upe jeheka ogueraha chupekuéra Iglesia de Jesucristo de los Santos de los Ultimos Dias ha pe Evangelio restaurado-pe.

Añeporandu, ñandépa, miémbroicha, ñañebeneficiane ñañeporandúramo sapy’a py’a: “¿Che experiencia tupaópe piko ofunciona hína cheve ĝuarã? ¿Chemo’aĝuive piko Cristo-re? ¿Che rovasa piko chéve ha che familia-pe pe py’aguapy ha vy’a reheve oñeprometeháicha pe evangelio-pe?

Alma ojapo upeichagua porandu umi miembro Zarahemla tupaopeguápe he’ívo: “ ¿Peñandu piko ko tuicha ñemoambue pene korasõme?...[ha] ikatu piko peñandu upéva ko’áğaite?”¹ Ñapensávo umívare ikatu ñanepytyvõ ñañecentra jey haĝua pe divino plan de salvación-pe ha ña’alinea jey ñande esfuerzo diario heseve.

Heta miembro ombohováita entusiasmo reheve ijexperiencia tupaopegua miembroicha ofunciona porãitereiha chupekuéra ĝuarã. Otestifikáta taha’e mboriahu árape terã po’a árape, mba’e igustova terã hasývape, ojuhu hikuái tuicha significado, py’aguapy ha vy’a hekovépe, ikompromiso Ñandejára ndive ha iservicio dedicado tupaópe rupive. Opa ára atopa tupaopegua miembrokuéra oguerekóva peteĩ vy’a omimbipáva ha ohechaukáva iñe’ẽ ha hembiapópe hekovekuéra tuicha ojehovasaha pe Jesucristo evangelio restaurado rehe.

Ha katu avei ahechakuaa oĩha umi oguerekóva peteĩ experiencia naiporãiva, oñandúva ha’évo tupaogua miembro sapy’ánte ndaha’éi pe ha’ekuéra oha’arõva’ekue.

Ambyasy upéva, aikuaágui personalmente mba’éichapa pe evangelio ñanemombarete ha ombopyahu ñane espíritu – mba’éichapa ikatu omyanyhẽ ñane korasõ esperanza reheve ha ñane apytu’ũ tesape reheve. Aikuaa chejehegui mba’éichapa umi Jesucristo evangelio yvá ikatu omoambue ñande rekove pe común ha corriente ha deprimentegui peteĩ mba’e extraordinario ha sublime-pe.

Ha katu, ¿ mba’ére piko ofunciona porãve alguno peĝuara ha nahániri ambuévape? ¿ Mba’épa ha’e diferencia umi ijexperiencia tupaópe omyanyhẽva hi’ánga pe mborayhu orredimíva reheve² ha umi oñandúva ofaltaha chupekuéra peteĩ mba’e?

Ameditávo ko’ã porandu rehe, ou che akãme heta pensamiento. Ko árape akompartise mokõi.

Pesimplifikáke

Peteĩha: ¿ñakomplikaiterei piko hína ñande discipulado?

Ko evangelio porã isensilloiterei ikatuhaĝuaicha peteĩ mitã okomprende, ha avei ipypykueterei ha ikompleho oguerahahaĝuaicha opa ko tekove – ha jepe peteĩ eternidad – jastudiávo ha jadescubrívo ñakomprende porã haĝua.

Sapy’ánte, jajagarra pe lirio Tupã verdad rehegua ha ñambojegua idea porã, programa ha yvypóra expectativakuéra reheve. Umíva, ipype voi, ikatu oipytyvõ ha oĩ porã peteĩ tiempo ha circunstancia peĝuarã, ha katu ñamoĩvo ojo’ári, ikatu oiko chugui peteĩ montaña tuichaiterei ha ipohýiva, ha ikatu japerde de vista pe yvoty porãite jahayhuetéva’ekue.

Upévare, líder-kuéra háicha japroteheva’erã pe tupao ha evangelio pureza ha sencillez, ha anive ñamoĩ mba’e pohýi oñeikotevẽ’ỹva ñane miembrokuéra ári.

Ha opavave ñande, tupaogua miémbroicha, tekotevẽ jajapo peteĩ esfuerzo conciente jadedika haĝua ñane energía ha tiempo umi mba’e oimporta añetévape, ñamombarete aja ñande rapichakuérape ha ñamopu’ã Tupã Reino.

Peteĩ hermana, maestra Sociedad de Socorro-pe, ojeikuaaporã ombo’e porãitereihaguére. Peteĩ jave odecidί ojapo peteĩ acolchado porã oservítava telón de fondoicha ilección tema peĝuarã. Ha katu pe tekove ointerveni; oĩ mitãnguéra ohekava’erã colegio-gui, peteĩ vecina oikotevẽva pytyvõ ova haĝua, imena iñakanundu ha peteĩ iñamiga oñeñandu ha’eño. Pe lección ára oĝuahẽ ha ndojapopái pe acolchado. Ipahápe, upe pyhare iclase mboyve, ndoke hetái ojapopa haĝua.

Upe ára rire ikane’oiterei ha apena ikatu o’organiza ipensamientokuéra, ha katu py’aguasu reheve oñembo’y ha ome’ẽ iclase.

Pe acolchado hechapyrãiterei: umi puntada iperfecta, umi color ojajai ha pe diseño iporã. Ha mbyteitépe oĩ peteĩ ñe’ẽ añónte ojapóva eko pe lección-gui: “ Pesimplifikáke”

Hermano ha hermanakuéra, javivi pe evangelio ndaha’éivae’rã komplikádo.

Añetehápe isensillo. Ikatu ojedescribi kóicha:

Ñahendúvo Tupã ñe’ẽ intención añete reheve ñandegueraha jaguerovia haĝua Tupãme ha ñaconfia haĝua ipromesakuérare³.
Ñaconfiavévo Tupãre, henyhẽvéta ñane korasõ mborayhúgui Hese ha ñande rapicháre.
Jahayhúgui Tupãme, jaseguise Chupe, ha ja’actuase armonía-pe iñe’ẽ ndive.
Jahayhúgui Tupãme, jaservise Chupe; jahovasase ñande rapichakuéra rekove ha ñaipytyvõse umi imboriahu ha oikotevẽvape.
Jaguatavévo pe discipulado rapére, ña’aprendesevéta Tupã ñe’ẽ.

Ha upéicha ocontinua, cada paso ñandegueraha ambuévape ha ñanemyanyhẽ peteĩ jerovia, esperanza ha karida okakuaameméva.

Isensilloporã ha ofunciona de maravilla.

Hermano ha hermanakuéra, sapy’ánte pepensarõ pe evangelio nofuncionaporãieterei peẽme ĝuarã, po’invita peme’ẽ haĝua peteĩ paso tapykue gotyo, pema’e pende rekove peteĩ plano yvateve guive ha pesimplifika pene enfoke pe discipulado gotyo. Peñenfoka umi evangelio doctrina, principio ha aplikasión básico-pe. Apromete peẽme Tupã pendeguia ha penderovasataha pende rapére peteĩ tekove porãve gotyo; ha pe evangelio definitivamente ofuncionaporãveta peẽme ĝuarã.

Peñepyrũ peimehápe

Che sugerencia mokõiha ha’e : peñepyrũ peimehápe

Sapy’ánte ñañeñandu desanimado ndaha’é “vei” gui algo: espiritualve, respetadove, inteligenteve, resãive, rrikove, amistoso terã katupyryve. Añetehápe noĩvaíri jadesearõ ñanemehorve: Tupã ñande’apo jakakuaa ha japrogresa haĝua, ha katu penemandu’áke, ñande kangykue ñaneipytyvõvae’erã ñanehumilde haĝua ha jajere haĝua Cristo gotyo, ikatúva ojapo umi mba’e kangy taimbarete”⁴. Ambue hendápe, Satana oipuru ñane kangykue ñanedesanima peve naña’intentansevei peve.

A’aprende che rekovépe nañaikotevẽiha ha’eve” mba’evégui oiko haĝua ñandehegui pe yvypóra Tupã oipotáva.

Tupã pende’aceptáta ha’eháichaite peẽ ko’aĝaite ha oñepyrũta penepytyvõ. Opaite peikotevẽva ningo ha’e peteĩ korasõ dispuesto, peteĩ jegueroviase ha confianza Ñandejárare.

Gedeón oñekonsidera peteĩ campesino mboriahu, pe michĩvéva itúva rógape; ha katu Tupã ohecha chupe peteĩ kuimba’e ovale hetávaramo⁵.

Samuel oiporavóramo’akue Saúl-pe ha’e haĝua rey, Saul oñeha’ã okonvense chupe ani ojapo upéva. Saul ha’ékuri pe tribu michĩvévagui Israel rógape. ¿Mba’éicha piko ikatu ha’e rey?⁶; ha katu Tupã ohecha chupe “mitãkaria’y pyahu ha porãramo”⁷.

Jepe pe profeta guasu Moisés oñeñandu abrumado ha desanimado sapy’ánte ha ohejapase opa mba’e ha omanose⁸.Ha katu Tupã ndodesistíri.

Che hermano ha hermanakuéra ahayhuetéva, jajehecharõ ñandejupe tesa mortal rehevénte, ikatu ndajahechái ñane porãha. Ha katu ñande Ru Yvagagua ñanderecha mba’eichaitépa ñande ha’e. Ñanderecha Ita’ýra ha tajyrakuéraicha, yvypóra oguerekóva luz eterna, potencial infinito ha destino divínoicha⁹.

Pe Salvador sacrificio ojapo opavave ikatu jahajey Tupã ndive. “; ha iporãntema [I] grásia opa yvypóra oñemomirĩvape [Tupã] renondépe”¹⁰. Igrasia ha’e pe poder habilitador opermitíva jahupyty umi Tupã salvasiõ rreino.Igrasia rupive opavave ikatu jarresusita ha jajesalva peteĩ rreino de gloria-pe.

Jepe pe rreino de gloria michĩvéva, pe rreino telestial, “ohasa opa komprensión”¹¹, ha heta yvypóra ohupytýta upe salvasiõ¹².

Ha katu pe Salvador grasia ikatu ojapo hetave mba’e ñanderehe. Iglesia de Jesucristo de los Santos de los Ultimos Dias miembroicha, ja’aspira peteĩ mba’e tuichavéva: pe exaltación rreino celestial-pe; péva ha’e vida eterna ñande Ru Yvagagua presencia-pe; péva ha’e Tupã don tuichavéva¹³. Rreino Celestial-pe jarrecibi “iplenitud ha igloriagui”¹⁴. Añetehápe opa ñande Ru orekóva oñeme’ẽta ñandéve¹⁵.

Exaltación ha’e ñane meta; pe discipulado ha’e ñande rape.

Pe’ehersévo fe michĩmi ha peñepyrũ peguata hapére, Ñandejára Jesucristo pasifiko seguidor-cha, pene korasõ oñemoambuéta¹⁶; opa pende rete henyhẽta tesapégui¹⁷.

Tupã penepytyvõta oiko haĝua pendehegui tuichave mba’e peẽ pegueroviava’ekue oikotaha; ha pedescubríta Jesucristo evangelio añetehápe ofuncionaha pende rekovépe. Ofunciona.

¡Ofunciona!

Hermano ha hermanakuéra, amigokuéra pohayhuetéva, añembo’e tañañe’enfoka pe “sensillez oĩva Cristo-pe”¹⁸, ha jaheja Igrasia tañandegueraha ha tañanderupi yvate, ñande rrekorrido aja, ñaimehágui ko’aĝa guive ñande destino glorioso, ñande Ru presencia peve.

Jajapóvo upéicha, ha máva oporandurõ ñandéve: ¿Mba’éichapa ofunciona peẽme ĝuarã ha’évo miembro Iglesia de Jesucristo de los Santos de los Ultimos Dias-gua?, taikatu ja’e orgullo, humildad-pe ha vy’a reheve: ¡Ofunciona porãiterei! Che aguije reporandu haguére! ¿Reikuaasevénepa?

Kóva ha’e che esperanza, che ñembo’e, che testimonio ha che jehovasa: Jesucristo rérape. Amén.