Reskatehápe: ¡Ikatu jajapo!
Élder Mervyn B. Arnold rupive
Setenta-gua
El Señor ome’ẽ opa tembipuru oñeikotevẽva jaha hağua umi ñane amigokuéra menos activos-pe ha ndaha’éiva miembro-pe.
Ñandejárape hesakã porã mba’épa pe Imisión orreskata hağua umi Túva Yvagagua ra’ykuérape, he’íre:
“… pe Kuimba’e Ra’y ou osalvávo okañỹ’akuépe.
“… [ndaha’éire] Pende Ru Yvágape oĩva voluntad tokañỹ ni peteĩva umi michĩvévagui”1.
Che sy angelical, Jasmine Bennion Arnold-pe, hesakã porã ifunción oipytyvõ hağua reskatehápe umi Ñande Ru Yvagagua ovecha okañỹva’ekue térã oñeñopῦva’ekue, avei umi imemby ha inietokuérape. ¡Iporãitépa upe función ikatúva oguereko umi abuelo-kuéra inietokuéra rekovépe!
Py’ỹi che sy asignación ha’e ovisita umi ikangývape ife, umi menos activos ha umi familia-kuéra ndaopavavéi miembro-va; ha katu, irreváño ryepýpe oike heta umi avave oñe’asigna’ỹva gueteri ojevisita. Che sy niko ohendukuaa, ha irrevaño’i o’abrí ikorasõ ha hi’ánga chupe. Jepiveguáicha ivisitakuéra ndaha’éi peteĩ jeýnte káda mes oikóva, oministra haguére kirirĩhápe umi hasývape ha ome’ẽ chupekuéra aliento mborayhupópe. Umi hekove pahápe mése aja, opyta ógape, upépe ohasa hora o’escrivívo carta, ohechaukávo imborayhu, okompartívo itestimonio ha omopu’ãvo umi ovisitávape chupe.
Jahávo reskatehápe, Tupã ome’ẽ ñandéve poder ñemokyre’ỹ ha hovasapy. Ha’e ombou ramoguare Moisés-pe orreskata hağua Israel ra’ykuérape, Moisés okyhyje, heta ñande ñañanduháicha avei. Moisés niko oje’exkusa he’ívo: “Che ndaha’éi kuimba’e oñe’ẽ kuaáva… hasy añe’ẽ hağua ha ndachekῦjereporãi”2.
Ñandejára ombopy’aguapy Moisés-pe he’ívo:
“Mávapa ome’ẽ ijuru kuimba’épe? … ¿Ndaha’éi piko che, Jehová?
“Áğa katu, tereho, che aimétagui nde jurúpe, ha rombo’éta umi erétava”3.
Upéicha, Ñandejára he’i Moisés-pe, “¡Ikatu rejapo!” ¿Ha peikuaápa mba’e? ¡Ñande avei ikatu!
Takompartimína penendive irundy principios oipytyvõkuaáva ñane ñeha’ã reskaterã.
Principio 1: Nañande’aréiva’erã jaha hağua reskatehápe
Élder Alejandro Patania, oserviva’ekue Setenta de Área ramo, omombe’u iñermano pahague historia, Daniel, osẽva’ekue opeska mar-pe itripulación ndive. Tiempo rire, Daniel orresivi avíso urgente peteĩ aravai guasu oñemoağui pya’éha hína. Daniel ha itripulación oho pya’e puerto gotyo.
Áravai oñemombaretevévo ohóvo, bote de pesca motor oĩva ağui chuguikuéra, nomba’apovéima. Daniel tripulación o’engancha peteĩ káblere upe bote oñembyaíva ha oñepyrῦ orremolka peteĩ tenda seguro peve. Ojerure pytyvõ radio rupi, oikuaávo, aravai okakuaavandihína oikotevẽtetaha ñeipytyvõ pya’e.
Umi hayhuharakuéra oha’arõ asy aja, guardia costera representante-kuéra, pescadoregua asociación ha marina oñembyaty odesidi hağua mba’e estrategia iporãvévapa oipurúta hikuái reskaterã. Heta oĩ osẽse pya’éva, ha katu oje’e chupekuéra toha’arõ hikuái peteĩ plan. Upe aja umi oĩva aravai mbytépe ojerure hína pytyvõre, umi representantes oñembyatýnte hína, ohekávo peteĩ protocolo porã ha plan de acción.
Ipaha oñe’organisa vove peteĩ aty reskaterã, ou peteĩ ñehenói paha desesperádova. Pe aravai ñarõ omondoho káble oĩva mokõivéva bote mbytépe, Daniel tripulación ojevy jey jahechápa ndaikatúi osalva umi iñirῦnguéra pescador-pe. Ipahápe, mokõivéva bote oñapỹmi itripulantekuéra omanóva ndive, avei Daniel, élder Patania hermano.
Élder Patania ombojoja itragedia Ñandejára amonestación ndive he’ívo: “Napemombaretéi… ni napembojevýi pe oho’akue, ni ndapehekái okañyva’ekue …ha a’exijíta che ovechakuéra [pende pógui]”4.
Élder Patania he’i ñaime aja organizado ore consejo-kuéra, cuórumes, organizaciones auxiliares ha avei personas ramo, nañande’aréiva’erã jaha hağua reskatehápe. Sapy’ánte jahasa heta semana ñañemongetávo mba’éichapa ñaipytyvõta umi familia térã persona-kuéra oikotevẽvape hína. Jahecha mávapa ikatúta ovisita chupekuéra ha mba’éichapa ojapóta hikuái. Upe aja, ñane hermano ha hermana-kuéra okañy’akue ojerurénte hína ñepytyvõ. Ndaikatúi ñande’are.
Principio 2: Araka’eve ñañañerrendíriva’erã
Presidente Monson, ombopúva clarín ñehenói ojeho hağua reskatehápe, he’i, “Tekotevẽ ñamomandu’a ñane miembro-kuérape araka’eve ndaha’eiha tarde ñañe’ẽvo ñane… miembro-kuéra menos activo-re… umi ikatúva ñaimo’ã peteĩ causa perdida-ha”5.
Ojehuháicha heta peẽme, heta umi akomparti haguéndi Evangelio ikarai ha oje’activa pya’e, ha ambue katu, che amigo Tim ha hembireko inactiva Charlene-icha, oikotevẽ hetave ára.
Veinticinco áño rasa pukukue añe’ẽ Tim ndive Evangelio-re ha agueraha chupe Charlene ndive casas abierta-hápe templo-pe. Ambue persona-kuéra ojoaju reskatehápe, ha katu Tim orrechasa káda invitación ojejapóva chupe ojehecha hağua misionero-kuéra ndive.
Peteĩ fin de semana-pe añe’asigna apresidi hağua peteĩ conferencia de estaca. Ajerurékuri presidente de estaca-pe to’ayuna ha toñembo’e oikuaa hağua mávapepa javisitakuaa. Apyta añesorprendeiterei ha’e opresentávo chéve che’amigo Tim réra. Tim obispo, ipresidente de estaca ha che rombota hokẽ, Tim o’abri, amaña cherehe, omaña obispo-re ha he’i: “¡Obispo, aimo’ã erékuri reguerutaha peteĩ ijespesialva!”.
Upépe Tim opuka ha he’i: “Ehasa, Merv”. Pe árape ojehu peteĩ milagro. Tim ikarai ha ha’e ha Charlene ojesella templo-pe.
Principio 3: ¡Tuichaitétapa pende gozo pegueru ramo peteĩ ángante jepe Cristo-pe!
Ojapo heta áño petei conferencia general-hápe, añe’ẽ mba’éichapa José de Souza Marques-pe hesakã porã umi Ñandejára ñe’ẽ: “… oĩrõ pende apytépe peteĩ imbaretéva Espíritu-pe togueraha ikangyvévape, ikatu hağuáicha… imbarete avei”6.
Hermano Marques oikuaa peteĩteĩ ovechakuéra réra icuórum-pegua ha oñeme’ẽ en cuenta Fernando ndaiporiha. Oheka Fernando-pe hógape, upéi peteĩ iñamígo rógape ha avei oho playa peve.
Ipahápe ojuhu Fernando-pe ojapóvo surf mar-pe. Ha’e noha’ãrõi pe bote oñapymi, Daniel historia-peguáicha. Oike pya’e ýpe orreskata hağua ovecha okañy’akue, ovy’aitévo ogueru jey vove ógape7.
Upéi oje’asegura peteĩ ministerio constante rupive Fernando ani hağua ohejave upe redil8.
Tamombe’umína peẽme ojehuva’ekue Fernando ojerreskata guie ha takomparti pe vy’a oúva jarreskatávo peteĩnte jepe ovecha okañýva. Fernando omenda templo-pe María ndive, hekovegua mborayhu. Ko’áğa oreko hikuái cinco familia ha trece nietos, opavave ijactívo Tupaópe. Heta hogaygua avei ojoaju Tupaópe. Oñondive omondo miles ijypykuéra réra orresivi hağua templo-pegua ordenanza-kuéra, ha tovasapy oğuahẽnte hína.
Fernando oservi ko’áğa obispo ramo mbohapyha jey ha opororreskatánte ohóvo. Ramoite okomparti: “Ore barrio-pe roguereko treinta y dos mitãkuimba’e activos Sacerdocio Aarónico-pe, veintiuno umíva apytépe ojerreskatava’ekue ko’ã dieciocho meses ohasava’ekuépe”. Personas, familias, cuórumes, organizaciones auxiliares, clases, maestras visitantes ha maestros orientadores ramo, ¡ ikatu jajapo!
Principio 4: Oñeimporta’ỹre ñande eda, opavave ñañehenói jaha hağua reskatehápe
Presidente Henry B. Eyring, he’i: “Taha’e ha’éva ñande eda, capacidad, llamamiento tupaogua térã jajejuhuhápe, ñañehenói ñamba’apo joja ñaipytyvõ hağua Chupe ánga ñemono’õme, Ha’e ou jey peve”9.
Ára ha ára hetave pende apytépe oĩ opa edad-pegua pehendúva Ñandejára clarín ñehenói reskaterã. ¡Gracias pende ñeha’ãre! Ha’esemi peẽme ejemplokuéra:
Amy, siete año orekóva, o’invita iñamíga Arianna ha hogayguápe Primaria programa anual-hápe reunión sacramental-pe. Mése rire, Arianna ha hogayguakuéra ikarai.
Allan, peteĩ karia’y omenda’ỹva, oñandu inspiración okompartívo umi video Tupaopegua, Mensajes Mormones ha Escrituras versículo-kuéra opavave iñamigokuéra ndive redes sociales rupi.
Hermana Reeves oñepyrῦ okomparti Evangelio umi vendedorekuéra ohenóivandi teléfono rupi.
James o’invita Shane-pe, iñamigo ndaha’éiva miembro, itajýra ñemongaraihápe.
Spencer omondo iñermana menos activa-pe peteĩ vínculo conferencia mensaje rehegua presidente Russell M. Nelson mba’éva ha he’i: “Ha’e olee pe discurso ha oje’abri peteĩ ventana”.
Ñandejára ome’ẽ opa tembipuru ñaikotevẽva jaha hağua umi ñane amigo-kuéra menos activos ha ndaha’éiva miembro reskatehápe; ¡Opavave ikatu jajapo!
Po’invita peteĩteĩme pehendu porã hağua Ñandejára ñehenói peho hağua reskatehápe. ¡Ikatu jajapo!
Atestifika solemnemente aikuaaha Jesucristo ha’eha upe Buen Pastor, Ha’e ñanderayhuha ha ñanderovasa jahakuévo reskátepe. Aikuaa Ha’e oikoveha, aikuaa. Jesucristo rérape. Amén.