“Molemolem el ngara Beltkil a Renguk”
A beltik el reng ra Dios a diak a ullebengelel e di melemolem elmo cherechar, engdi tia belkul el me rekid el rokui a di ior ra kmo kede mekerang a dongebkall ersel beltkil a rengul.
A Bibilia a kmur er kid el kmo a “Dios a beltik el reng.” Ngii a cherungel el lokesiul a beltik el reng, e kid a mesisiich e lultuil ersel blechoel el ngarngii e blerek elmo ra re bek el chad el beltik el reng. Ng dilu a President Thomas S. Monson el kmo: “A beltik el reng ra Dios a ngar ngii el kirem a le ngar ngii a usbechem er ngii ma lak. Ngdi blechoel el ngarngii.”
Ng betok a teletael el dosaod e melekoi el kirel a chedaol el beltik el reng. A tara omelekoi el de blechoel rongesii er chelechal taem a kmo a beltik el reng ra Dios a “ultebechel.” Ngmo merang ra tara tekoi, sel lomsodel a ultebechel a diak ke desang ra chedaol el llechukl. Ng bai, beltik el reng er Ngii e lulecholt ra chedaol llechukl a “ mesisiich e klebokel el beltik el reng,” “ng cherungel el beltik el reng,” “ngolsobel el beltik el reng,” e “diak el ngemed el beltik el reng.” A ikang a bedochel a belkul le sel tekoi e lultebechel a sebechel meskid a cheleuid el luldasu el kirel a chedaol el beltik el reng, leng ngocholt a keldei el cheleuid el luldasu ra beltik el reng, el Dios a klou a rengul el kirel a bekl el tekoi e diak el longetiit er kid le beltik el reng er Ngii a ultebechel; malechub a Dios a diak el bo loukerkeriil er kid le beltik el reng er Ngii a ultebechel; malechub e kederokui eldi mo suobel ra babeluades el rengedel a Dios, leng beltik el reng er Ngii el lultebechel. A beltik el reng ra Dios a diak a ullebengelel e mo melemolem elmo cherechar, engdi tia belkul el me rekid el rokui a ultuil ra kmo kede mekerang sel douedikel ersel beltik el reng er Ngii.
A Jesus a dilu el kmo:
“El ua Demak el betik a rengul er ngak, mak betik a renguk er kemiu: molmolem el ngara beltik el reng er ngak.
“Alsekum me koltirakl a llechuk, e ke nguu a beltik el reng er ngak; eldi uai ngak e loltirakl a lechul a Demak, me ak nguu a beltik el reng er ngii.”
Sel “dolemolem el ngara” malechub ke “dultuil ra” beltik el reng ra Osobel a belkul a kede nguu a chedaol el ngeseu er Ngii e mo mecherungel er ngii. Sel mo nguu a chedaol el ngeseu er ngii, eng kirel ngar ngii a klaumerang er kid e ra Jesus Kristo, e olab a lechul, luldimukl er a ouchul a rengud ra kengtid, miltecholb mel mengubet a kengtid, nguu a Chedaol Reng, e melemolem el ngara rael e loltirakl. a lechul.
A Dios a di blechoel el betik a rengul er kid, engdi Ngii a diak losebelid ra kengtid. Lak ke mobes el kmo a Amulek a ulsisechakl ra Zeezrom el kmo a Osobel a diak el losobel ra rechedalmeruul a klengit,eng di le ngara klengit, leng sel kmo a de ngara klengit e kede mekngit e “diak a diak el klikiid el tekoi el soiseb e ra rengedel a babeluades” malechub eng kiei lobengkel a Dios. A [Kristo] a ngar ngii a klisichel el ngiluu ra Demal el mo olsobel ra rechedal ra kengterir leng ouchel el reng a uchul. Ma le uaisei e Ngii a mla odurekelterir a re anghel er Ngii elmo merk a ungil klumech el kirel a ikel tekoi ra ouchul reng, elmo mengai lokiu a klisichel a Osobel, me bol sobel a delebengir.”
A ngara Babier ra Mormon e kede medengelii sel moktek e ra Kristo el mlo cheuarem—sel kot el ngarbab e lolechotel a beltik el reng er Ngii—e tiang a “nguu lodersii a reng ra klechubechub, el metebechelii a oretel a llach, e msa chad a rael me le bo rengii a klaumerang er tir me louchul a rengrir.
“Ma le uasei e a klechubechub a mo mekereuii sel soal a llemalt, e omekereu er tir me te selbechakl, e ngikel diak el bo le ouchul a rengul loba klaumerang a mo mokerekeriil ra llach; ma leuaisei engdi ngkel louchul e ra rengul loba klaumerang a mo nguu sel klou e diak a ullebengelel el luldasu elmo suobel.”
A ouchel el reng a sengk er Ngii el me rekid, el blo lorukem er ngii el mle meringel a kerekerengel.
Ngar ngii a rebebil el lou mondai el kmo a Dios a omekngeltengat ra rokui el chad el diak a ngelekek budel ma ngelekek elsel—loba okesiu el kmo, a tekingel a Jesus ra Sermon ra Mount el kmo: “[Dios] a rirellii a sils el meluich ra re dengerengel me a re mekedung, e odureklii a chull el mora re melmalt me a re diak el lomekereu.” Ng uaisei, a Dios a meral lomesterir a re Ngelekel a rokui el klengeltengat el sebechel—rokui el klengeltengat el mengai e ra beltik el reng ma llach ma bichel ma klechubechub. E ngii a oldurech er kid mede dirrek el bekokeuii.
“Ak kmu er kemiu, Mou beltik el reng ra re cherarou, mo mekngeltengat ra melebiakl er kemiu, moruul a ungil elmo ra ruketui er kemiu, e moluluuch el mortirkel mekngit e lousbech er kemiu, e omekcharem er kemiu;
“Me bo mokodongall el ngelekel a Demam el ngara babeluades.”
Engdi, a ikel meklou el klengeltengat el ngara Dios a ultuil sel doltirakl. A President Russel M. Nelson a smodii el kmo: “Sel klebokel e lulechuul el beltik el reng ra Dios—luldimukl e ra diak a ullebengelel klengar—a ngar ngii a klengeltengat el kired el ngoriakl er ngii, el diak el klengeltengat el domdasu e kede mo ngmai alsekum meng diak ke le klikiid. A re dengerengel a diak el lomsau ra rengul elmo uai tir e le kirel lomekngeltengat er tir e le seluk ra delngerengel. [mesa Alma 11:37]. Alsekum meng sorir el loldeu a rengrir ra bek el klengeltengat el Dios a oldars, eng kirir louchul a rengrir ra kengterir.”
Ng ngelakl ra kuk di sel mesmechokl er ngkel louuchel ra rengul el chad el mesuld a kengtil e klikiid loba sel telbiil elmo “mekiis e ra kodall ra uriul sils,” eng ngar ngii a ongerung el klou a belkul sel dolemolem el ngarsel beltik el reng ra Dios. Ma dolemolem el ngarsel beltkil a rengul a techeled el mo melchesuar sel mui el klisiched, eldi mo uai Ngii. Eldi uai kel dilung a President Dieter F. Uchtdorf: “A chedaol ngeseu ra Dios a diak el dil cherengelid el morsel di mla teleteled. … a Moktek a lemuut el ngarbab: Ngii a soal a rengelekel a le bo uai Ngii.”
Sel dolemolem el ngara beltik el reng ra Dios el ngar tial teletael a belkul a kmo kede mui el kongei loltirakl er Ngii. Ng belkul a kongei er Ngii sel lollach, “le Dios a betik a rengul er ngkel losemchokl er ngii.” Ng belkul a dou beltik el reng el kesiou eldi ua Jesus el betik a rengul e mesiou er kid. Ng belkul a kmo kede mesuub elmo oltirakl a llach ersel kot el ngarbab el renged me bol sebeched el lotekau a klebkelel seikid el dauch. Mesel mo remlii mel semecheklid me dobult, e a Demad ra Babeluades a olengit er kid me bo doltirakl “ersel lokodongel a Chedaol Reng, e bode becherei a mechut el chad e bode santo e lokiu sel tngakireng ra Kristo el Rubak, e bode ua ngalek, el bokokesenges, medemdemk, ngariou a rengul, klou a rengul, mui ra beltik el reng, e kongei a rokui el tekoi el Rubak a soal a bode chelungel, eldi ua ngalek el rongesii a demal.”
A Elder Dallin H. Oaks a mla kmul kmo: “Sel Klou el Kerekeriil a diak eldi bo domes er a cherengelel a ungil ma ikel mekngit el tekoi—el deriruul. Kede mo nger el kirel aikel mocha teleteled ma blekerdeled ma uldesued—leng kid el kuk ngedechang el chad.”
A cheldechedechal a Helen Keller a kora olachitnger e lolecholt el kmo ng mekerang a chedaol el beltik el reng a sebechel chad el soal eng ngobult. A Helen a milchell ra beluu er a Alabama ra Merikel sera 1880. Sera le dirk el teruich ma etiu a rekil, eng mlo smecher er a dimlak el betik er ngii rakt meng mlo mechad e cheuiko. Ng mle imis el mellomes a rengul e mlo bekengesengasech a rengul sel lolasem elmo medengelii e lomtab er a basio e le ngar ngii. A Helen sel lomtab a ngerir a rechad er a blil e lodengei el kmo te ousbech a ngerir mengedecheduch, “eng kmal ngmasech a rengul [leng] ngii elmo diak el ngara belsachel.” Sera elolem a rekil, e a usbechelel a Helen el mengedecheduch ma ngesechel a rengul a mirael kmal mo meringel me a “kelsbengel a rengul a mlo mekdekudem, e a bebil ra taem eng kakar ra sikang ra klok.”
A rechad er a blil a Helen a ngiluu a sensei el molsisechakl ra ngelekir, el redil el ngklel a Anne Sullivan. Eldi ua de betik er ngii ra Jesus Kristo el medengei a ngesengesed, a Anne Sullivan a ilarem ra oberoad el chelitechetul ma ringel e medengelii a ngesengesengel a Helen. Sera leim a rekil, e a Anne a mlo smecher ra rakt el milkdebechii a meringel el telabt ra elsul a medal luchul eng mlo mekngit osengel. A Anne sera le eiai a rekil, a delal a mlad; ea demal a ilitii ma kekerei el lochedal ra Jimmie; me te milngai elmo kiei a blirir a re mechebuul el kmal mle kikiongel el basio luchul a Jimmie a mlad ra di mle elsel a edei el buil. Meng nguluutekangel, e a Anne a siliseb ra Perkins School el mora re cheuiku ma mekngit osengir, el kmal mlo ungil ra subelel. Ng mlora botk ma osengel a mlo oikab meng mlo menguiu a lechukl. Ma demal a Helen sera lomekedong ra Perkins School e losiik er a chad elmo sensei ra ngelekel, e a Anne a milngilt.
Ng dimlak e lungil el blekeradel a dilubech sera uchelel. A “Helen a “milik menguld, e mesebek er a sensei er ngii e tilkir a tara ungelel lotebedii. A [Anne] ruriul a mlo sebechel el metebechelii a [Helen] ra bocha le kie ra kekerei el blai el mla ra chetemir a re Keller’s. Ngokiu a kelou el reng ma duch el reng, e ngkol mocha kokerengii a klaumerang ma beltik el reng er a Helen.” Ngosisiu el tekoi, sel bo doumerang ra bai doltngakl er ngkel chedaol el Sensei, Ngii a sebechel e loureor lobengked el losisecheklid e ngosukid mede ngeriakl el bedul a beches el klechad.
Mesel lolngeseu ra Helen el mesuub a tekoi, e a Anne a meluches a ngakl ra lodengei el klalou loba chekngelel a imal ra elsel a imal a Helen. A “[Helen] a mle soal tial ‘lomeluches er a chim,’ engdi ng dimlak e lolchesuar eldi le merkmo sel merael a isel taem er a [Anne] ra le beldukl a tekoi el ‘w-a-t-e-r’ e lomomb a ralm er bebul a imal a Helen. A [Helen] ra uriul a miluches el kmo:
“‘Ak dim le kiul mo melchesuar ra tekoi el kora bla kubes er ngii … e sel kora mle berotel el klaudengei ra tekoi a mle chemolt er ngak. Seikid e ak mlo medengei el kmo a “w-a-t-e-r” a belkul sel lungil el mekelkolt el kmung ngerang el lomauch er bebul imak. Sel klou a belkul tekoi a ulekisii a delebengek, el meklemelsii, me a urrungulek, deurreng, el mlo mimokl! … A bekl el tekoi a ngar ngii a ngklel, e rokui ngakl el milkdibechii ra elsel a uldesuek a beches el luldasu. Sera ki mluut elmo remei[,] e a rokui el klalou … el krirutech a kora ngar ngii a klengar er ngii’”
Sera lorael a Helen Keller el klungang el redil, eng mlo merael isel el semeriar a tekoi, a dechal ra omeluches, e meduch el mengedecheduch ra medal a buai.
Ngarngii ra katsudo el mesaod er a klengar ra Helen Keller, e lolecholt ra rechad er a blil a ua lungil a rengrir ra urrelel a Anne Sullivan el mla semecheklii a ngelekir el kmal tebelik el morsel sebechel kung a Helen el dengchokl e lultebechel sel le belsoil, ungil lomengur, e tatam er a oseldel a ngerel sel le merko belsoil. Engdi a Anne a mle medengei el kmo a Helen a lmuut el sebechel a meklou el tekoi e ngarngii a meklou belkul el tekoi el bol ruul. Me kid me kede mo mechelaod er a ikel bla de ketmokl ra elsel a klengar er kid, e omes eldi ungil besul a klengar rekid , e a kuk chedaol e Losobel er kid a omes er a klebokel el klisiich el kuk di domes er ngii “lokiu a mengebechab el klas.” Kede rokui el sebeched el melchesuar ra klou el deureng ersel chedaol klisiich el ngar kid e di uai sel deureng el Helen a mlo melchesuar er ngii ra ikal cheldecheduch ra bo lolchesuar a klisichel, el milklemesii a delebengel, e ngilbetii elmo mimokl. Kede rokui el sebeched el lou beltik el reng e mesiou ra Dios e mo mesisiich el lomekngeltengat ra rebebil er kid. “Ng lechukl, a Medad a direkak el ues, ma dingll blal rengesii, el ka le blal medalem ra rengul a chad, a ikal tekoi el Dios a mla kutmokl elmo er tirkel betik a rengrir er ngii.”
Ng kired e lomes ra kesiokel el beltik el reng ra Dios. Jesus a ulechotii el kmo sel tngakireng el kirel a kengtid olsobel er kid ra kodall, ra bedenged ma reng, Ngii el mlo cheuarem a rirelli, “molmuut er a Dios, el ngarbab er a rokui el tekoi, el mlo mriitel ra ringel, e mlo merael a rasech er a bedengel, e mlo cheuarem el bedengel ma reng—e ulengit me lak el bol ermii sel kob ra cheluached, me bol medakt.” A ringel e le bla rengii ra Gethsemane ma le ngara kerus a liluut el klou el diak a ngidil chad el sebechel lotekur. Meng uaisei, leng beltik el reng er Ngii el mora Demal me kid, Ngii a uluutekangel, meng tiakid, eng sebechel mlodars el me rekid el diak ke deluut el mad mesel diak a ullebengelel klengar.
Ng ngutebengall el lokesiu sel rasech el tilobed er a bedengel” ra le charem a Jesus er a Gethsemane, sel basio lolsarech a olive. A loruul a cheluch sera le temel Osobel, e a olive a kot eng mosarech e loba klou el bad el melitai er bebul. E a ikel bla le “kisosous” a lesuk er a medidai el elaus el delmik e olab el mengisois. A beredel a otebedii sel kot e ungil el cheluch. E te lmuut e loserchii el mengisois a meklou e lotauel ra ikel elisois el delmik, lotobed a lmuut el betok el eluuch. Mesel bo loltobed a ikel derengel, e a ikel lotauel a losarech lolab a bad er aikel bkul meng otebedii sel mui el beraud. E uaisei, sel cheluch a kmal di ua rasech sel bel tobed.
A kumdasu a tekingel a Mateus el kirel Osobel sera le siseb ra Gethsemane er seikid el kesus—e Ngii le “bocha lomuchel el mekngit a rengul e mechitechetong. …
“Meng liluut el merael, e mle bengkangk ra medal, e miluluuch, el kmo, Chedam, alsekum eng sebechel, e mo iuelii tial kob er ngak: engdi diak ke doltirakl er a soak, engdi sel lungil er kau.”
E ngii a kumdasu, sel beraod a di merael el mengai el merenglang, Ngii a mecha lengit ra ongeru el taem me lolenguul e, dikeang, leng ngarsel kot el rengelel a ongarem, eng mong meng ngongedei el taem e lolengit me lolenguul. Ngii a ultekangel el molmuut er a llemalt a mloungil el morsel mlo medechel el ngimech. Ngii a kiltmeklii elmo osebelid.
Ng meral kesiokel el sengk a beltik el reng! Meng mui er seikid el beltik el reng, e a Jesus a olengit, “Ng sebechem e lobult el me rengak, e ouchul a rengum ra kengtim, me bok omekungil er kau?” Ngii a oba delmedemk el reng e mengelou a rengud el kmo, “Mesang, a kuba klechubechub el loleker er kau, e ngkel rongesak … ak nguu; e ngeltengat tirkel lotireklak.”
Ng sebechem elmo betik a rengum er Ngii eldi mle uchelel eng betik a rengul er kau? Mada moltirakl a lechul. Ng sebechem elmo sechelil le Ngii mlo nguu a klengar er Ngii tongetengii elmo ra resechelil? Mada moltirakl a lechul. Ng sebechem lurekodel ersel beltkil a rengul eng mai a rokui el Ngii oba klechubechub el lomeskau? Mada moltirakl a llechul. Ak meluluuch me bo de mesisiich el durekodel ersel beltik el reng er Ngii, loba ngklel a Jesus Kristo, amen.