Kev Hloov Siab Lees Txim: Kev Xaiv Kev Xyiv Fab
Vim muaj peb tus Cawm Seej, peb muaj peev xwm hloov siab lees txim thiab yuav ua rau peb muaj kev xyiv fab.
Kuv cov kwv tij thiab cov muam, thaum kuv muaj 12 xyoos, kuv tsev neeg nyob hauv Göteborg, ib lub nroog nyob ntawm ntug dej hiav txwv nyob hauv Sweden. Qhia nej hais tias, yog lub zos ntawm peb tus phooj ywg Txwj Laug Per G. Malm, uas tas sim neej thaum lub caij ntuj sov tas los no. Peb nco nws. Peb kuj zoo siab rau nws tus yam ntxwv zoo thiab nws txoj kev pab thiab nws tsev neeg zoo kawg nkaus tus yam ntxwv. Thiab peb yeej thov kom Vajtswv foom koob hmoov rau lawv.
Tsib caug xyoos tas los, peb tau koom lub koom txoos nyob hauv ib lub tsev loj heev. Muaj ib Hnub Sunday, kuv tus phooj ywg Steffan, uas yog tib tug dikas nyob hauv ceg ntseeg tshuav kuv xwb, nws zoo siab ntsib kuv nyob hauv lub koom txoos. Wb mus rau hauv qhov chaw nyob ntawm chav teev ntuj ib sab, thiab nws rub ib lub paj hluav taws thiab tej lub ntais tawm ntawm nws lub hnab ris. Kuv ua siab loj li ib tug tub hluas, kuv thiaj li zes txoj hlua ntev. Kuv xav tias kuv yuav muab tua ua ntej lub paj hluav taws tawg. Kub kuv ntiv tes thaum kuv sim ua li ntawd, kuv thiaj li ua lub paj hluav taws poob. Steffan thiab kuv wb ntshai heev thaum wb saib txoj hlua hlawv tas lawm.
Lub paj hluav taws tawg tas, thiab ncho pa leej faj mus thoob plaws qhov chaw ntawd thiab chav teev ntuj. Wb sim tu tej qhov seem ntawm lub paj hluav taws tsuag tsuag thiab qhib cov qhov rais sim ua kom tus ntxhiab yaj mus, es wb cia siab tias tsis muaj leej twg yuav paub. Zoo siab uas tsis muaj leej twg rau mob thiab tsis tau ua rau ib yam dab tsi puas tsuaj.
Thaum cov mej zeej tuaj txog, lawv twb hnov tus ntxhiab tsw heev. Yus yeej yuav hnov tsw. Tus ntxhiab meem txom txhua tus kom lawv tsis xav txog qhov dawb ceev ntawm kev sib ntsib ntawd. Vim tsawg tsawg tus uas tuav lub Pov Thawj Hwj Aloos—thiab vim kuv tsis txawj xav zoo—kuv twb muab lub cim nco txog rau lwm tus, tiam sis kuv xav tias kuv tsis tsim nyog txais lub cim nco txog. Thaum muab lub phiab rau kuv, kuv tsis tau noj cov mov mog thiab tsis haus cov dej. Kuv nyuaj siab kawg. Kuv txaj muag, thiab kuv paub tias kuv ua rau Vajtswv tsis zoo siab.
Tom qab kev sib ntsib, ceg ntseeg tus thawj tswj hwm, Frank Lindberg, ib tug txiv neej laus uas muaj plaub hau dawb, hais kom kuv los rau hauv nws lub hoob kas. Tom qab kuv zaum, nws ua siab zoo saib kuv thiab hais tias nws pom tias kuv tsis tau txais lub cim nco txog. Nws nug seb vim li cas. Kuv xav tias nws yeej paub vim li cas. Kuv twb xav tias txhua leej txhua tus paub kuv tau ua li cas. Tom qab kuv qhia nws, nws nug seb kuv xav li cas hauv kuv lub siab. Kuv quaj, thiab qhia rau nws tias kuv thov txim thiab kuv paub tias kuv ua rau Vajtswv tu siab.
Thawj Tswj Hwm Lindbergh muab ib phau Lus Qhuab Qhia thiab Kev Khi Lus uas twb siv ntau lawm thiab hais kom kuv nyeem ob peb nqe vaj lug kub. Kuv tau nyeem nqe no hais tias:
Saib seb, tus uas hloov siab lees txim ntawm nws tej kev txhaum, twb tau zam txim rau tus ntawd, thiab kuv, tus Tswv, tsis nco qab tej ntawd lawm ntxiv.
Los ntawm qhov no nej thiaj yuav paub seb ib tug neeg puas tau hloov siab lees txim rau nws tej kev txhaum—saib seb, nws yuav lees tej ntawd thiab tso tej ntawd tseg.
Kuv yeej yuav nco ntsoov Thawj Tswj Hwm Lindberg txoj kev luag nyav thaum kuv ntsia nws tom qab kuv yeem ntawv tas. Nws quaj me ntsis, es nws qhia kuv tias nws xav tias tsim nyog uas kuv rov qab txais lub cim nco txog. Thaum kuv tawm ntawm nws lub hoob kas, ua rau kuv xyiv fab heev.
Kev xyiv fab yeej yog ib qho uas los ntawm kev hloov siab lees txim. Lo lus Akiv repent txhais hais tias “saib tom qab” thiab “hloov siab” Nyob hauv yam lus Swedish, lo lus omvänd txhais hais tias “tig rov qab.” Tus kws sau ntawv txog Khetos C. S. Lewis sau txog vim li cas peb yuav tsum hloov siab thiab tus txheej txheem hloov. Nws hais tias kev hloov siab lees txim yog kev “rov qab taug txoj kev yog. Yus yeej kho tau kev txhaum: tsuas yog yus rov qab mus txog thaum yus nrhiav tau qhov twg yus ua yuam kev thiab txij ntawd mus yus taug txoj kev yog, yeej kho tsis tau yog yus cia li mus tom ntej xwb.” Kev hloov peb tus yam ntxwv thiab kev rov qab mus taug “txoj kev yog” yog ib feem ntawm kev hloov siab lees txim. Tiam sis kev hloov siab lees txim tiag tiag kuj yog kev hloov peb lub siab thiab lub siab nyiam kom coj zoo li Vajtswv thiab kev tsis ua txhaum ntxiv. Raws li Exekees piav hais tias, kev hloov siab lees txim txhais hais tias tus uas “tso nws tej kev txhaum tseg, ua ncaj ncees thiab ua zoo, … thim tej khoom uas … nyiag los rov rau luag, [thiab] … ua raws li txoj kev cai uas pab tau neeg muaj txoj sia.”
Tiam sis nqe vaj lug kub no tsis piav tag nrho thiab. Nqe no tsis hais txog lub hwj chim uas ua rau peb muaj peev xwm hloov siab lees txim, yog tus Cawm Seej txoj Kev Theej Txhoj. Peb yuav tsum ntseeg tus Tswv Yexus Khetos kom muaj peev xwm hloov siab lees txim tiag tiag, kev ntseeg uas Nws hloov tau peb, kev ntseeg tias Nws yuav zam txim pub rau peb, thiab kev ntseeg tias Nws yuav pab peb tsis ua yuam kev ntxiv. Kev ntseeg ntawd ua rau Nws txoj Kev Theej Txhoj muaj hwj huam nyob hauv peb lub neej. Thaum peb “saib yav tas los” thiab “tig hlo” nrog tus Cawm Seej txoj kev pab, peb yuav cia siab rau Nws tej lus cog tseg thiab kev xyiv fab uas muaj thaum txais kev zam txim. Yog tsis muaj tus Txhiv Dim, kev cia siab thiab kev xyiv fab ploj mus, thiab kev hloov siab lees txim tsuas yog kev hloov yus tus cwj pwm uas tsis muaj kev zoo siab hlo li. Tiam sis yog peb rau siab ntseeg Nws, peb yuav hloov siab los ntseeg Nws txoj kev txaus siab zam txim pub rau peb.
Thawj Tswj Hwm Boyd K. Packer pom zoo rau kev cia siab los ntawm kev hloov siab lees txim nyob hauv nws lub tuam rooj sab laj kawg thaum lub Plaub Hlis Ntuj xyoo 2015. Nws piav txog lub hwj chim ntawm tus Cawm Seej txoj Kev Theej Txhoj kom kho tau neeg es kuv xav tias nws tej lus yog lub ntsiab ntawm tag nrho nws lub tswv yim thaum nws ua ib tug thwj tim tau tsib caug xyoo lawm. Thawj Tswj Hwm Packer hais tias: “Txoj Kev Theej Txhoj tsis tseg txoj lw dab tsi rau yus pom. Txoj Kev Theej Txhoj twb kho tag lawm. … Tej yam uas kho los yeej yuav kho tas mus li.”
Nws hais ntxv tias:
“Txoj Kev Theej Txhoj, uas pab tau peb txhua tus, yeej tsis ua rau peb muaj caws pliav. Qhov no txhais hais tias txawm peb tau ua dab tsi los yog peb tau mus qhov twg los yog muaj xwm txheej dab tsi los, yog peb hloov siab lees txim tiag tiag, [tus Cawm Seej] cog lus tias Nws yuav theej peb lub txhoj. Thiab thaum Nws theej peb lub txhoj, tsis muaj teeb meem ntxiv. …
“… Txoj Kev Theej Txhoj … ntxuav tau txhua qhov tsis huv txawm nyuaj npaum li cas los yog ntev li cas los yog tau ua ntau zaus npaum li cas los.”
Tus Cawm Seej txoj Kev Theej Txhoj yeej nyob mus ib txhis rau nej thiab rau kuv. Tiam sis Nws yeej yuav tsis yuam peb. Raws li tus yaj saub Lihais piav hais tias, tom qab peb txais kev qhia txaus kom paub qhov zoo txawv qhov phem, peb “muaj kev ywj siab xaiv txoj kev nyob ywj siab thiab txoj sia nyob mus ib txhis, los dhau ntawm tus Neeg Nruab Nrab uas tseem ceeb ntawm neeg sawv daws txhua leej txhua tus, los sis xaiv txoj kev poob cev qhev thiab txoj kev ploj kev tuag.” Yog li ntawd, kev hloov siab lees txim yog ib qho uas peb xaiv.
Peb yeej muaj peev xwm xaiv ua lwm yam. Tej zaum peb yuav xav tias kev xaiv ua li ntawd tsis yog kev txhaum, tiam sis tej kev xav li ntawd ua rau peb tsis lees txim peb thiaj yuav tsis xav hloov siab lees txim tiag tiag. Piv txwv hais tias, tej zaum peb xaiv kom liam lwm tus. Thaum kuv yog ib tug tub hluas uas muaj 12 xyoos nyob hauv Göteborg, tej zaum kuv yuav liam Steffan. Nws yeej yog tus uas nqa lub paj hluav taws loj thiab cov ntais rau lub koom txoos. Tiam sis yog peb liam lwm tus, txawm peb muaj cai ua li ntawd, ntshe peb zam txim rau peb tus yeeb yam. Thaum peb ua li ntawd, peb muab peb txoj kev lav ris rau tej yam peb ua rau lwm tus. Thaum peb muab kev lav ris rau lwm tus, peb ua rau peb tus kheej xav tias peb tsis tas ua dab tsi. Peb muab peb tus kheej rais los ua neeg uas tsis muaj hmoov, tsis ua neeg uas txawj ua tej yam peb tus kheej.
Ib qho ntxiv uas ua rau peb tsis hloov siab lees txim yog kev xav tias peb ua yuam kev me me xwb. Thaum lub paj hluav taws tawg hauv Göteborg, tsis muaj leej twg raug mob, tsis ua rau lub tsev puas tsuaj, thiab peb muaj peb txoj kev sib ntsib. Yeej yooj yim rau kuv hais tias kuv tsis tas hloov siab lees txim. Tiam sis, thaum peb xav tias peb ua yuam kev me me xwb, txawm yog zoo li peb tsis raug xwm txheej dab tsi los, ua rau peb xav tias peb tsis tas hloov siab. Kev xav li no ua rau peb tsis pom tej yam ua yuam kev thiab tej kev txhaum uas yuav hloov peb lub neej nyob mus ib txhis.
Ib txhia xav tias peb tej kev txhaum yeej tsis ua li cas vim Vajtswv hlub peb txawm peb ua dab tsi los xij. Tib neeg nyiam ntseeg qhov uas Nihos qhia cov neeg nyob hauv Xalahelas hais tias: “Tib neeg sawv daws yuav raug cawm dim nyob rau hauv hnub kawg, thiab tias kom lawv tsis txhob ntshai los sis tshee, … thiab, nyob thaum kawg, neeg txhua tus yuav muaj txoj sia nyob mus ib txhis.” Tiam sis lub tswv yim no tsis muaj tseeb. Vajtswv yeej hlub peb. Tiam sis, tej yam peb ua yeej muaj nqi rau Nws thiab rau peb. Nws tau qhia meej rau peb hais tias peb yuav tsum coj zoo li cas. Peb hu nws tej lus qhia ua tej lus txib. Nws txoj kev pom zoo thiab peb txoj sia nyob mus ib txhis nyob ntawm seb peb coj yam ntxwv zoo li cas, tsis hais peb txoj kev txaus siab hloov siab lees txim tiag tiag los yog.
Tsis tas li ntawd xwb, peb tsis hloov siab lees txim tiag tiag thaum peb xav tias Vajtswv tej lus txib tsis yog los ntawm Vajtswv. Vim hais tias, yog lub cim nco txog tsis yog ib qho dawb ceev, ces tsis ua li cas yog tus ntxhiab los ntawm lub paj hluav taws tau meem txom cov neeg nyob hauv kev sib ntsib txais lub cim nco txog hauv Göteborg. Peb yuav tsum ceev faj kom tsis txhob xav tias tsis ua cas yog peb coj yam ntxwv ua txhaum thaum peb tsis ntseeg tias Vajtswv yog tus uas tau tsim Nws tej lus txib. Kev hloov siab lees txim tiag tiag qhia tias peb yuav tsum paub tias tus Cawm Seej yog los ntawm Vajtswv los thiab Nws txoj hauj lwm hauv hnub nyoog kawg no muaj tseeb.
Xav kom peb tsis txhob daws peb tus kheej, xav kom peb xaiv kev hloov siab lees txim. Thaum peb hloov siab lees txim, peb yuav nco dheev, xws li tus tub hluas ua txhaum nyob hauv zaj lus piv txwv, thiab xav txog qhov uas tej yam peb ua tseem ceeb npaum li cas nyob mus ib txhis. Thaum peb to taub tias peb tej kev txhaum hloov tau peb txoj kev zoo siab nyob mus ib txhis, ua rau peb tu siab txog peb tej kev txhaum thiab ua rau peb xav sib zog ua neeg zoo dua ntxiv. Thaum peb raug kev ntxias, peb yuav nug peb tus kheej, xws li William Shakespeare sau hais tias:
Yog tias peb twb tso kev nyob mub ib txhis tseg kom tau ib yam khoom ua si, peb muaj peev xwm hloov siab lees txim. Vim muaj Yexus Khetos txoj Kev Theej Txhoj, peb muaj sij hawm rov qab ua zoo. Piv txwv hais tias, peb muab khoom ua si uas peb ua yuam kev yuav tso rov qab thiab rov qab txais tau kev cia siab tias yuav muaj txoj sia nyob mus ib txhis. Tus Cawm Seej piav hais tias, Tus Tswv nej tus Txhiv Dim tau raug kev tuag ntawm sab cev nqaij daim tawv; yog li ntawd nws tau raug tag nrho tib neeg tej kev mob, xwv kom tag nrho tib neeg yuav hloov siab lees txim thiab los cuag nws.
Yexus Khetos muaj peev xwm zam txim vim Nws twb them tus nqi rau peb tej kev txhaum.
Peb tus Txhiv Dim xaiv kom zam txim rau peb vim Nws muaj kev khuv leej thiab kev hlub tshaj txhua tus.
Peb tus Cawm Seej xav zam txim rau peb vim nov yog Nws ib tug cwj pwm.
Thiab, vim Nws yog tus Tswv Yug Yaj Zoo, Nws yeej zoo siab thaum peb hloov siab lees txim.
Thaum peb tu siab tiag tiag txog peb tej kev txhaum, thaum peb xaiv kev hloov siab lees txim, peb caw tus Cawm Seej los rau hauv peb lub neej. Raws li Amulej qhia hais tias, “Xav kom nej yuav tawm los thiab tsis txhob ua nej tej siab tawv ntev ntxiv lawm; vim saib seb, nim no yog lub sij hawm thiab yog hnub ntawm nej txoj kev cawm seej; thiab yog li ntawd, yog nej yuav hloov siab lees txim thiab tsis txhob ua nej tej siab tawv, tsis ntev ces txoj kev txhiv dim yuav raug coj los rau nej.” Peb muaj kev tu siab tiag tiag txog peb tej kev txhaum thaum tib lub sij hawm peb muaj kev xyiv fab vim tus Cawm Seej pab peb.
Qhov uas peb muaj peev xwm hloov siab lees txim yeej yog qhov zoo ntawm txoj moo zoo! Peb txoj kev muaj txim yuav ploj mus. Peb yuav muaj kev xyiv fab, txais kev zam txim, thiab nyob kaj siab lug. Peb yuav dim ntawm txoj kev poob siab thiab kev ua cev qhev rau kev txhaum. Peb yuav muaj Vajtswv txoj kev kaj zoo kawg nkaus puv npo thiab “tsis muaj mob ib zaug ntxiv li.” Vim muaj peb tus Cawm Seej, peb muaj peev xwm hloov siab lees txim thiab yuav ua rau peb muaj kev xyiv fab. Kuv tseem nco ntsoov kuv xav li cas thaum nyob hauv ceg ntseeg tus thawj tswj hwm hoob kas tom qab kuv ua li ntawd rau lub paj hluav taws. Kuv yeej paub tias kuv twb txais kev zam txim. Kuv txoj kev muaj txim twb ploj mus lawm, kuv tsis poob siab ntxiv, thiab kuv nyob kaj siab lug.
Cov kwv tij thiab cov muam, thaum peb xaus lub rooj sab laj no, kuv caw nej muaj kev xyiv fab ntxiv nyob hauv nej lub neej: kev xyiv fab vim nej paub tias Yexus Khetos txoj Kev Theej Txhoj muaj tseeb; kev xyiv fab vim tus Cawm Seej txaus siab thiab xav zam nej lub txim; thiab kev xyiv fab thaum nej hloov siab lees txim. Cia peb ua raws li tej lus qhia no kom “daus cov dej tawm ntawm tej qhov dej cawm seej nrog txoj kev xyiv fab.” Thov kom peb yuav hloov siab lees txim, tso peb tej kev txhaum tseg, thiab hloov peb lub siab thiab lub siab nyiam kom coj raws li tus Cawm Seej. Kuv ua tim khawv tias Nws muaj txoj siab nyob tiag tiag. Kuv ua tim khawv tias kuv pheej tau txais Nws txoj kev siab hlub, kev khuv leej, thiab kev hlub. Kuv thov kom nej yuav txais tau cov koob hmoov los ntawm Nws txoj Kev Theej Txhoj tam sim no—thiab rov qab txais tau tas nej lub neej, ib yam li kuv tau txais hauv kuv lub neej. Los ntawm Yexus Khetos lub npe, amees.