A Rubak el Jesus Kristo a Olsisechakl er Kid el mo Meluluuch
Kau sel omoluluuch, e ke meral meluluuch malechub e kuk di melekoi a nglunguchem?
Se er a 1977, e ak mle mesiou el missionary er a Cusco, Peru. A ulebengkek el msiou me a ngak a ngiluu a kengei el mo ngoititerir a rokui el missionary el ngara Cusco el momes ra klebokel el cheloit el beluu er a Machu Picchu..
Sera ki bochu merek el mesarch, ea rebebil ra re misionari a mle sorir el mora Inca Bridge, ng tebedechel a rael er tial rois. Ng di mle mereched, e ak mlo melchesiu el Chedaol Reng e millerob er ngak meng diak bong. Tial rael a okiu a bkul a rois el bekord 2,000 ft (610 m) a tengel meriou. A tebedechel tial rael a di sebechel a imo el chad el merael er ngii. Ngak ma kldemek a millekoi er tir el kmo ngdiak el kired el mora Inca Bridge.
Engdi, tirkal mesionari a di uluutekangel er kemam el kmo ki merael. Te mlo imis er tial ongterir, ma ikel odbechel a Chedaol Reng el mler ngak a mlo medechel, e ngak a di mlo orrenges er tir me ak dilu el kmo a ki mong eng di ng kired el kmal mo kerekikl.
A ki siliseb ra rael el mora Inca Bridge el ngak a uleak kuriul ra rokui el chad, a kot e a ki milrael el mekekokemam loltirakl a kim kilengei el tekoi. E okor tirkal misionari mocha merchereched el merael e mocha remurt. Te dimlak lorrenges ra kulengit me bo lokekokterir. Ng ua blel kirek lorreched el mor tir, el mo melekoi er tir me ki mobult. Ak meral mle cheroid er tir mak kullereched el remurt el mo er tir.
Se er ak kirel a techukill, eng imis el kekere meng diak el sebechel a re terung el merael er ngii, eng mlar ngii a misionari el dechor er ngii el ulkel a ultuil ra risois. A kuleker el ngera meng dilechor er tiang. Ng dilu er ngak el kmong ngiluu a ulekrael el kirel di dechor er tial basio el telkib el taem meng kirek el melemolem ra omerolek.
Ak ulmelchesiu el kirek loltoir er tirkal mla moruchei, meng ngilsukak el imiu er ngii, meng mlo sebechek el merael telkib el mo ruchei. Ak milsa el kmo tial chutem a bliul ra dellomel. A kulemakes el mor tial chutem loba kadekmel chochik, e mocha medengei, er ak rebet el kmo tia diak el chutem el delekodel ra dellomel. Ak rereuchel el morreked a rachel el ngara cheungel tial rael. Ng mlo sebechek e lomes el meriou el telkib el taem, el kmeed el 2,000 feet er cheungek, a Urubama River lomaoch el mora Sacred Valley er a Incas. A kulmelchesiu el mirrael a klisichek el mo nguemed, e locha di telkid el taem eng modiak el sebechek lorreked er ngak. Seikid el taem, e ak miluluuch el blak a renguk. Ng mle kedeb el nglunguuch. Ak milkengii a ngerek e dulang, “Chedam, mngesukak!”
A ikal rachel a dimlak el mesisiich el sebechel lotekur a berredek. Ak medengei el kmeda ulebongel . Chelsel tial taem ra bochu krebet, e ak mlo melchesiu ra mesisiich el chim el kilersak el merbab. Ngokiu tial ngesou, e ak mlo sebechek el kursak el lemuut el mora rael. Ng kel misionari el di mle kiei a ulsebelak.
Engdi a mera er ngii a Demad ra Babeluades a ulsebelak. Ngullerenges a kulekoi. Ak rirengesii ra lolekoi a Chedaol Reng ledei el taem ruchei, el millekoi er ngak meng diak bora Inca Bridge, engdi dimlak kultirakl er tial ngor. Ak mlo iau a renguk, e ngodech a medak, e dimlak kudenge a bo kulekoi. Ak mlo lotkii el kmo tirkal bebil ra remisionari el mla ruchei er kemam, me a ki milrael mosiik er tir ma ki miltik er tir a uluchais er tir er tial dulubech el merngak.
A kaeri er kemam el mora Machu Picchu, e a ki kmal mle kerekikl me ngak a dililuk, ak ngiluu a uldasu el kmo Ngii a ulerrenges er ngak eng di ngak a dimlak kurrenges er Ngii. Ng mla rengii a dmolech el ringel el ngara renguk leng dimlak kultirakl a lolekoi e direk el osisiu el taem e ak mui ra omereng el saul er a klechubechub er Ngii. Ng dimlak el becherei me kubals ra llachul, ng bai okiu a klou el klechubechub er Ngii, eng ulsebelii a klengar er ngak (mesa Alma 26:20).
Sera bochal merek tial sils, me sera bol temek el meluluuch el di ngak, e ak miluluuch el mlara renguk to mora “A Chedam er a klechubechub, e Dios el mengelaod a reng” (2 Korinth 1:3). Ak miluluuch “el meral ngara renguk, lungil a moktek, loba klaumerang ra Kristo” (Moroni 10:4).
Sel tutau ra osisiu el sils, e a nglunguchek a di mle bereked ra berdel a ngerek, e se er ak bochu ra kodall, e ak miluluuch el mla ra renguk el mor er Ngii. Ak mlomdasu ra klengar er ngak er tiakid el taem. Ak miltik er ngii el betok el taem, ea Demad er a Babeluades e meral mle chubechubechad el merngak. Ng ulsisecheklak ra betok el suobel er sel sils er ak ngara Machu Picchu me a Cusco, Peru. A tara kot el ngarbab el suobel a kmo ngkired el blechoel el meluluuch “el ngara rengud, lungil a moktek er kid, [loba] klaumerang er a Kristo.”
A tara taem ea Rubak el Jesus Kristo a “miluluuch er a tara basio,” e “sera bol merek, ea tara rulbengkel a dilu er ngii, Rubak, mosisecheklemam el meluluuch” (Lukas 11:1). Meng ulsisechekelterir a rulbengkel el meluluuch. E chelechal sils e ngolsisechakl er kau me a ngak el meluluuch sel domes er Ngii el meluluuch er a Gethsemane el kmo, “Eng di ng diak el sel soak, ng bai sel soam, bol mekedmokl” (Lukas 22:42). Mesel bocha moluluuch, kau ke meral, soam tiang el “diak el sel soak, ngbai sel soam, bol mekedmokl”?
A Paulus a milsaod er sera loluluuch a Jesus “er sera le kiei,” tokuni sera le ngara Gethsemane: “Sera lodersii a nglunguchel ma ongtil el llangel ma iuechel a medal a mlor ngkel sebechel losebelii er a kodall, meng mlorenges el kmo ng mle medakt” (Hebru 5:7). Kau sel moluluuch, ke meral meluluuch malechub e kekuk di melekoi a nglunguchem? Kau ng diak el merang a nglunguchem?
A Jesus a miluluuch el meral ngara rengul e mengedecheduch el mora Demal. “Ng dirrek el mlouaisei, el Jesus er a lolai ra techolb chelid, ea babeluades a ulebok” (Lukas 3:21). Sel moluluuch, e komelchesiu er a babeluades el mla obok? Se ng mle oingerang er a omomelchesiu er sel lomak el mora babeluades?
A Jesus a kildmeklii el mo melilt a ikel ngii a meklou a ultutelel lokiu a nglunguuch el mora Demal.
“Ng tilobed el mora rois el mo meluluuch, e millemolem er sel rokir el kesus el ngara nglunguuch el mora Dios.
“E sera bochal mellomes, eng milkedongeterir a rulbengkel el morngii: seikid eng mlo melilt er tirkel teruich ma terung” (Lukas 6:12–13).
Kau ke mengodmokl er kau el mo meruul a meklou a belkul tekoi meke meluluuch el mora Demam ra Babeluades? Kau ke mengedmokl er kau el kirel sel bocha moluluuch?
A Jesus er sera lebora beluu er a Merikel, eng ulsisechekelterir a rechad er ngii el mo meluluuch. “Ma Jesus a dilu er tir el kmo: Di moluluuch; meng mlo uaisei el dimlak el bo lak e loluluuch” (3 Nephi 19:26).
A Jesus a oleker er kid el mo “blechoel el meluluuch” (D&C 10:5). A Jesus a medengei el kmo a Demad er a Babeluades a orrenges e meskid sel ngii a ungil er kid. Ngera uchul mesel bebil eng diak el soak el ngmai a ikel kired el melai? Ngera uchul?
Tiakid el taem e kede kmul uase, “Chedam er a Babeluades,” Ngii a rongesii a nglunguched e medengelkid ma ikel dousbech. Maleuaisei ea medal ma dingal a bedul kau. Ngii a mes a ngara uldesued, e medengei a ngara rengud. Kau a diak el sebechem el mart a ngii di el ngerang er Ngii. Chelechang, e sel klungiolel a tiakid el Ngii a mesekau loba beltikelreng ma klechubechub—beltikelreng ma klechubechub el kid a diak el sebeched el moungil medengelii. Engdi a beltikelreng ma klechubechub a obengkel er sel taem el omdu el kmo, “Chedam el ngara Babeluades.”
Maluaisei e sel temel a nglunguuch a kot, limis el chedaol taem. Ngika diak el chad mel du el kmo “Ngdiak, ng diak kurrenges le kau el di mer ngak sel tal omsiseb ra chetituokel el tekoi.” Te di rechad a meruul el uaisei. Ng kang a diak el chad me ledul kmo, “Eang, ng meral diak modengei ak meral mechesang.” Te di rechad a melekoi el uaisei.
Me bo dululuuch el ua ikel bla lolsisechakl er kid a Jesus a urungulek e nglunguchek el ngara ngklel a Rubak el Jesus Kristo, amen.