Jajerovia mbarete Tupãre
Nañañemovãi ha ndajadudáiramo ñande jeroviápe, Ñandejára ombotuicháta katupyry jarekóva jahasa hağua mba’evaikuéra ko vida gua ári.
Hermano ha hermana-kuéra ojehayhúva, amoñepyrũvo che mensaje ko ára atestifikase che aikuaa presidente Thomas S. Monson ha’eha profeta ko aragua; i’consejerokuéra Primera Presidencia gua ha umi Doce Apóstol, péicha, ha’e avei profeta, vidente ha rrevelador. Ha’ekuéra orrepresenta Ñandejára Jesucristo ha oguereko derecho he’i hağua Idisposiõ ha hembipota ojerrevela háicha chupekuéra. Atestifika iseguroha jasegui i’consejo. Ñandejára o’inspira hína chupekuéra he’i hağua ñandéve ñamombarete hağua ñande fe Túva Yavagua ha Taýra Jesucristo-re ha Ijexpasiõre, ani hağua jaduda ñambohovake vove mba’evai ñande aragua.
Mormón Kuatiañe’ẽme jalee peteĩ kuimba’e hérava Ammón oñemondo’akue Zarahemla retãgui Lehi-Nefi retãme oikuaa hağua iñemanokuéragui. Upépe ojuhu rey Limhi ha itavaygua, oĩva lamanitakuéra poguýpe. Rey Limhi ovy’a umi mba’e Ammón he’ívare chupe itavaygua Zarahemla guáre. Ikorasõ henyhẽ rupi tuicha esperanza ha vy’águi ombyaty itavayguakuéra témplope ha he’i:
“Upévare, pemopu’ã pene akã ha pevy’a, ha pemoĩ pende jerovia Tupãre …
“…Ha katu pejeréramo Ñandejára gotyo korasõ añetépe…ha peipytyvõramo chupe opa pene apytu’ũ jesarekópe, …ha’e, he’iháicha ha oipotaháicha, penemosãsóta pene ñeñapytĩmbýgui”.
Ammón ñe’ẽ oike mbarete rupi Limhi tavayguakuéra jerovia rehe, ojapo hikuái Tupã ndive peteĩ konvénio oservi ha iñe’ẽrendutaha hembiapoukapýre, jepe umi mba’evai ohasáva hína hikuái. Ijerovia rupi, ou iñapytu’ũme peteĩ plan osẽ hağua hikuái lamanita-kuéra poguýgui.
Hermano ha hermana-kuéra, ajerure tapehechami imba’egusuha pe invitasiõ rey Limhi ojapo’akue umi itavayguápe ha mba’éichapa oje’aplika ñandéve ğuarã. Ha’e he’i: “Upévare, pemopu’ã pene akã ha pevy’a, ha pemoĩ pende jerovia Tupãre”. Ko’ã ñe’ẽme, Limhi o’invitákuri itavayguápe oma’ẽ hağua pe futuro gotyo con el ojo de la fe; omyengovia hağua ikyhyjekuéra pe optimismo de la esperanza oúva gueroviágui rehe; ha ani hağua oduda omoĩ hağua ijerovia Tupãre taha’e ha’e umi mba’e ohasáva hina.
Ko vida terrenal ha’e peteĩ ára jajepy’ara’ã ojehecha hağua jajapópa opaite mba’e Ñandejára ñaneTupã he’íva ñandéve. Pévarã tekotevẽ peteĩ fe mbarete Cristo-re, aravaive jave jepe. Tekotevẽta jaha tenonde gotyo ñemova’ỹme Cristo-pe, jajeguiávo pe Espíritu rehe ha jajeroviávo Tupã ome’ẽtaha ñaneremikotevẽ.
Iministerio terrenal opa potávo, ojejagarra mboyvemi chupe, pe Salvador ombo’eakue Idiscipulokuérape: “Peguerekóta jehasa’asy ko mundo-pe. Ha katu pejerovia; che ningo chepu’aka pe mundore.”
Peñepy’amongeta chendive sapy’ami: Jesucristo, pe Túva Ra’y Peteĩete, oviviakue peteĩ vida sin pekado ha ipu’aka opa mundo gua tentasiõ, mba’e’rasy, mba’evai ha jehasa’asýre. Oñohẽakue tyky tuguyguigua Getsemanípe; ohasava’ekue peteĩ mba’erasy ndaikatúiva oje’e; ojagarrava’ekue Ijehe opa umi ñanemba’erasy ha ñanemba’asy. Ha’e oĩma ñanepytyvõ hağua—opapavépe—opa mba’epohýi reheve. Hekove, ijehasa’asy, iñemano ha ijeikovejevy rupi, oipe’ava’ekue opáichagua pa’ã jareko hağua vy’apavẽ ha jahuhu hağua py’aguapy ko yvy’ári. Ijehasa’asy expiatorio mba’eporã ojepyso mayma oaceptáva chupe ğuarã ha hesaráivape ijehegui, ha umi ohupíva Ikurusu ijapére ha oseguíva ichupe Idiscípulo añete háicha. Upévare, ñamomba’apo vove fe Jesucristo ha Hi’expiasiõre, ñañemombaretéta, oñembovevúita ñanemba’e pohýi, ha Ha’e rupi ñandepu’akáta mundore.
Hermano ha hermana-kuéra, jahechávo fuerza ha esperanza Salvador-gui ikatúva jarrecibi, jareko mba’ére ñamopu’ã hağua ñane’akã, javy’a ha jaha tenonderã guerovia reheve jaduda’ỹre, “pe ipy’amokõiva ojoguágui yguasu pu’ãme, pe yvytu ogueraháva ápe ha pépe… Pe kuimba’e hekokarẽva ningo ndahekopytái opaite hapépe”.
Ha péicha rey Limhi he’i avei: “Pejere Ñandejára gotyo korasõ añetépe,…peipytyvõ chupe opa pene ánga jesarekópe, pejapóramo kóva, ha’e, he’iháicha ha oipotaháicha, penemosãsóta pene ñapytĩmbýgui”
Pehendu Salvador ñe’ẽte ojerurévo ñandéve:
“Ani pejepy’apy; pejerovia Tupãre, pejerovia avei cherehe …
“Pecherayhúramo, peñe’ẽrendu umi che rembiapouakapýre …
“Pe oguerekóva che rembiapoukapy ha iñe’ẽrendu hese, péva ha’e pe cherayhúva; ha pe cherayhúva, che Ru ohayhúta chupe, ha che ahayhúta chupe ha ajehechaukáta chupe.”
Tupã ñande rovasa fe jarekóva rupi. Fe ha’e pe fuente del vivir con propósito divino ha perspectiva eterna. Fe ha’e peteĩ principio ojeporukuva’erã, oinspiráva diligencia. Ha’e peteĩ fuerza vital ha viviente oñemanifestáva ñande actitud positivape ha deseo jarekóvape ñandejehegui jajapo hağua opa mba’e Tupã ha Jesucristo ojeruréva. Ñande reraha ñañesũ ha jajerure Ñandejárape guía ha ñapu’ã ha ja’actua hağua jerovia reheve jahupity hağua umi Hembipotápe oĩporãva.
Heta áñoma, aservi aja presidente de misión-ramo, che renói por teléfono peteĩ che misionero ahayhuetéva ru ha omombe’u chéve upe misionero hermana omano hague. Chemandu’a, upe momento hasývape, upe misionero ha che roñemongeta pe Tupã plan hechapyrãva ta’ýra ha tajyrakuéra peğuarãre ha mba’éichapa upe kuaapy ombopy’aguapýta chupe.
Oñeñanduvai ha ndovy’áiramo jepe ko mba’evai rupi, upe misionero –tesaýpe, ha ojerovia reheve Tupãre— ovy’a pe iñermana rekovére. He’i jerovia mbarete orekóva Ñandejára poriahuvereko kyrýire. Seguroporã, he’i chéve okontinuataha oservi imisión opa fe ha diligencia reheve, tekopotĩme ohupity hağua umi promesa Tupã orekóva chupe ha ifamilia peğuarã. Upe ára tekotevẽ jave, upe fiel misionero ome’ẽmbaite ikorasõ Tupãme, omoĩmbaite Hese ijerovia, ha ombopyahujey ikompromiso oservi hağua Ñandejárape fe ha opa jesarekópe.
Hermano ha hermana-kuéra, ndajajejokóiramo peteĩ jerovia ova’ỹvape Tupãre ha deseo jaservi hağua ichupe, umi tembiasa hasýva ko vida terrenal gua oñanduykakuaa ñandéve jaraharõ guáicha peteĩ júgo pohýi, ha ikatu japerde pe kyre’ỹ jarekóva javivi paite hağua pe Evangelio. Fe ỹre, japerdéta katupyry jarekóva javalora hağua umi ñane Tupã propósito umi mba’e ojehútavare tenonderã ñande rekovépe.
Umi momento de prueba, pe aña—akóinte oikóva ñande rapykuéri— oha’ã oiporu pe jaikuaáva iporãha ha pe ñane apytu’ũme oĩva ñane kontra. Oñeha’ã oroviauka ñandéve mba’evereiha javivi hağua umi Evangelio principio. Ajerure’asy peẽme penemandu’a hağua pe lógica del hombre natural “ndohechái umi mba’e Tupã Espíritu reheguáva, vyroreígui chupe ğuarã”. Penemandu’áke Satana ha’eha “Tupã hayhu’ỹha, ha [ha’e] oñorairõ meme hendive, ha [ñane]renói ha ñanembojuruhe’ẽ jajapo hağua angaipa ha jajapo meme hağua ivaíva”. Ndajahejaiva’erã ñanembotavy; ha jahejáramo, ikãnguy ñande jerovia ha japerde pu’aka jahupity hağua umi Tupã jehovasa.
Nañañemovãi ha ndajadudáiramo ñande jeroviágui, Ñandejára ombotuichavéta pu’aka jarekóva jahasa hağua ko vida gua mba’evaikuéra ári. Ikatúta jajoko umi impulso negativo ha jadesarrolláta kapacida jasupera hağua umi mba’e ivaitéva jepe. Péicha rupi rey Limhi tavayguakuéra ojapova’ekue jarovia’ỹva kañỹ lamanita-kuéra jejokuapýgui.
Hermano ha hermana-kuéra po’invita pemoĩmbaite hağua pendejerovia Tupãre ha Iprofetakuéra mbo’epýre. Po’invita pe mbopyahu hağua pene konvénio Tupã ndive ha peservi hağua ichupe pene korasõite guive, taha’e ha’e umi mba’vai ko vida gua. Atestifika pende jerovia atã pu’aka rupi Cristo-re pejejoráta pekádo, duda, guerovia’ỹ, vy’a’ỹ ha jahasa’asy ñapytĩmby poguýgui; ha pehupitýta opa jehovasa ñande Ru Yvagagua opohayhúva oprometeva’ekue.
Atestifika Tupã añeteguaha. Ha’e oikove. Ha’e ñanderayhu. Ha’e ohendu ñane ñembo’e ára javy’a jave ha avei jaduda, ndajavy’ái ha jajejopyvai jave. Atestifika Jesucristo ha’eha pe Salvador del mundo. Ha’e ningo pe Redentor.
Ambopaha che ñe’ẽ ko ára himno letra-pe “Ndaha’éi ko’ãga, ha katu umi ára oútavape”, oĩva himnario portugués-pe:
Ha ko’ã mba’e ha’e Jesucristo réra marangatúpe. Amén