Karekean Mwaakan Iesu Kristo nakon Maiura

Iroun Beretitenti Russell M. Nelson

Beretitenti n aia Kooram n te Tengaun ma Uoman

Ana euangkerio Iesu Kristo e kaonaki ma Mwaakana, ae tauraoi nakoia natin te Atua aine ke mwaane aika a ukeuke ma te aki mani kangare.

Tariu ao mwaneu aika tangiraki, ti bane ni maeka ni boong aika moan te kaangaanga. Kaangaanga, itabaraaraa, ao kamangaongao a katobibiira. Taai ni kaangaanga aikai a kaman nooraki iroun te Tia Kamaiu. E kauringiira bwa inanon ara bong te riaboro e na karikirakea te un irouia aomata ao ni kairiia n tiotionako.¹ Ma irarikina, e aki kona Tamara are i Karawa ni kantaningaia bwa ti na tabeakin oin ara kaangaanga ao ma kaangaanga aika irekereke ma te botanaomata i bon iroura.

Ba e tangiriia aomata te Atua n te aro are E anga Natina ae te Rikitemanna ² ni buokiira.³ Ao Natina, Iesu Kristo, E anga maiuna ibukira. A karaoi bwai aikai bwa ti aonga ni karekea mwaakan te Atua—te mwaaka ae e tau ni mwakurii rawawata, kaangaanga, ao kariiri aika riki n ara tai.⁴ N te bong aei I tangiria n taekinna bwa tera arora ni karekea inanon maiura mwaakan te Uea ao te Mwatita, Iesu Kristo.

Ti moanna (karekean mwaakan Iesu Kristo nakon maiura) man reiakinan Taekana.⁵ “E kaangaanga ibuki [ra] bwa ti na kamaiuaki n aki atai ana bwai te Atua.”⁶ Ataakin riki taekan ana mwakuri ao ana mition te Tia Kamaiu ⁷—ao ti na ataa riki Ana reirei⁸ ao anne te bwai ae E karaoia ibukira—ao e na korakora riki ataakina ae E kona ni karekea te mwaaka ae ti kainnanoia ibukin maiura.

Ni moan te ririki aei, I titirakiniia kairake ikawai n te Ekaretia bwa a na kabanea mwakoron aia tai ni katoa wiiki ni kamatebwai bwaai ni kabane ake e taekin Iesu ao ni karaoi ake a tauaki mwiia n te koroboki ke n ana booki aika tabu ( te Ekaretia).⁹ I kaoia bwa ana karika mwiin koroboki aika tabu iaon Iesu Kristo n te Bwai ni Kairi bwa aia karikuram ibukin kamatebwaian te euangkerio.¹⁰

I anga te kakao anne bukina bwa I a tia ni kariaia. I wareware ao n rainii kiibu ni kabane ake a taekina taekan Iesu Kristo, are e karinanaki iaan atuun rongorongo ao 57 karinrin n te Kairi n Atuun Rongorongo.¹¹ Ngke e bane te waaki ni kakukurei ae kakaongora anne, e titirakinai kainnabau bwa tera mwiina nakoiu. I tuangnga, “I a riki bwa te mwaane ae kaokoro!”

I namakina kabouan nanou nako Ina ngke I a manga warekia n Ana Boki Moomon ana rongorongo te Tia Kamaiu iaon Ana mwakuri n te maiu aei. E katanoata:

“I roko nakon te aonaaba ni karaoa nanon Tamau, ibukina bwa e kanakomaiai Tamau.

“Ao e kanakomaiai Tamau bwa I aonga n tabekakirake iaon te kaibangaki.”¹²

Ngaira Aika Itiaki ni Boong Aika Kaitira ti nanona Ana mwakuri bwa Ana Mwakuri ni Kamaiu Iesu Kristo, are e karika te mangauti bwa te bwai ae koaua ibukira ni kabane ao ni karika te maiu ae akea tokina ibukiia ake a rairi nanoia man aia bure ao ni karekea ao ni kawakin otenanti ao berita aika tabu.

Bon reirei aika aki bwanin n taetae iaon ana mwakuri ni kamaiu te Uea ni kabonganai taeka aika kauarerekeaki, n aron “te Mwakuri ni Kamaiu” ke “mwaakan te Mwakuri ni Kamaiu,” ke “kamwakuran te Mwakuri ni Kamaiu,” ke “ni kakorakoraaki man te Mwakuri ni Kamaiu.” Kabonganaakin kamataata aikai a na bita ara onimaki man karaoan te bwai ae riki bwa kaanga te bwai ae maiu iai ao ana konabwai ae inaomata mairoun Tamara are i Karawa ao Natina, Iesu Kristo.

Iaan ana baire te Tama are akea tokina, bon te Tia Kamaiu ae karawawataaki. Bon te Tia Kamaiu ae urua ana kabaebae te mate. Bon te Tia Kamaiu ae kabooi mwiin ara bure ao ara kairua ni kamaunai man ara rairannano. Bon te Tia kamaiu ae kamaiura man te mate n rabwata ao n tamnei.

Akea te aomata ae aranaki bwa te “Mwakuri ni Kamaiu” are ti kona iai ni weteia ibukin te ibuobuoki, katoki aoraki, kabwarabure, ke te mwaaka. Iesu Kristo bon ngaia aan bwaai aikai. Taeka aika tabu n aron Mwakuri ni Kamaiu ao te Mangauti a kabwarabwarai bwaai aika e karaoi te Tia Kamaiu, ni kaineti ma ana baire te Tama, bwa ti aonga ni maeka ma te kantaninga n te maiu aei ao ni karekea te maiu are aki toki n te aba are na roko. Ana mwakuri n ibuobuoki te Tia Kamaiu—boton te mwakuri n rongorongon te aomata—e na ataaki ao ni kakaitau te aba iai ngkana ti kamatataa ao n reitia nako Ina.

Kakawakin ana mwakuri te Tia Kamaiu e katuruturuaki ni kamatataaki iroun te Burabeti Iotebwa Timiti, are e katanoata ma te kairoro bwa “aan raoi reirein Ana Ekaretia Iesu Kristo ibukiia Aika Itiaki ni Boong Aika Kaitira bon aia kakoaua Abotoro ao Ana Burabeti, ni kaineti ma Iesu Kristo, are E mate, tauraki, ao ni manga uti te kateniua n tai, ao ni waerake nako karawa; ao bwaai ni kabane ake a kaineti nakon ara aro bon ti boutoka nakon aia koaua Burabeti ao Abotoro.”¹³

Bon aio ana rongorongo te Burabeti ae onoti are e karekea te ungannano ibukiia 15 burabeti, taan mamata, ao taan kaotioti ni kanakoa ao n tiaina aia kakoaua ni kauringa te ka 2,000 ni bungiakin te Uea. Te kakoaua ae kakawaki anne e atunaki “Te Kristo ae Maiu.”¹⁴ A mwaiti membwa aika a tia ni kamatenanoa koauana. Tabeman a tibwa ataa aron moan rekena. Ngkana ko ukeuke ko reiakina ae mwaiti riki ibukin taekan Iesu Kristo, I kaumaki ngkami bwa kam na kamatebwaia “Te Kristo ae Maiu.”

Ngkana ti kabanea te tai ni kamatebwaia taekan te Tia Kamaiu ao Ana Mwakuri ni kamaiu, ti aki tangiria n raoniia n te bwai teuana ae riai bwa ti aonga ni karekea Mwaakana: ti rineia ni karekea te onimaki Irouna ao n Iria.

Ana reirei ni koaua Iesu Kristo a kukurei ni kaokoroia, n taetae, ao ni kaokoro mai rouia aomatan te aonaaba. A ninikoria, a bane nanoia iai, ao n tatauraoi. I reiakin reirei aikanne n tain te katabeaki teuana i Mexico, ngke I kaitibo ma taan mwakuri n te tautaeka n raonaki ma taan kairiiri n aaro ake tabeua. Taan kairiiri aikanne n tatabemaniia nako a kaitauai ibukin aia kekeiaki ara membwa aika anainano ao n nakoraoi ni kamanoi ao ni kateimatoai maare ao utu aika korakora n abaia.

Akea te bwai ae bebete ke n otemaetiki ibukin te kan riki bwa ana reirei ae mwaaka Iesu. E riai ara taratara ni matoa iroun te Tia Kamaiu ao Ana euangkerio. E kainnanoa te mwakuri ae korakora ni kataia n Taraia n ara iangoni kabane.¹⁵ Ma ngkana ti karaoia, nanououara ao maakura a na mauna nako.¹⁶

N te tai ae aki maan n nako ao I reiakina taekan te kairake n Raurere ae aki kona ni maaku. E kaoaki bwa e na ira te kaboo irouia kaain te kauarinan n reirei n te tairiki naba are e a tia ni motinnanoia bwa e na ira aia Bootaki Aine n te titeiki. Ngke e ataia ae iai te kaangaanga n ana tai e kabwarabwara nakoia taan kaira te kaboo bwa e na moan taai ni kitana te kaboo ni kaea ana bootaki ae kakawaki, e tuangaki bwa e na aki kona ni moanna n te kaboo ngkana e karaoa anne.

Tera ae karaoia te Raurere aei? E kawakina ana motinnano bwa e na ira ana bootaki te Bootaki n Aine. N aron ae are a tia n taekinna taan babaire n te kaboo, e a kamaunaaki arana man te kaboo n te aba ae bwanin. Ngke e titirakinaki ibukin ana iango, e kaeka n ae bebete, “Eng, e kakawaki riki te Ekaretia, e koaua anne?”

Te onimaki iroun Iesu Kristo e kaungaira bwa ti na karaoi bwaai aika ti na aki karaoi. Te onimaki are e kaungaira bwa ti na karaoia e anganiira te kona ni karekea Mwaakana.

Ti karikirakea naba mwaakan te Tia Kamaiu inanon maiura ngkana ti karaoi berita aika tabu ao ni kawakin berita aikanne ma te kororaoi. Ara berita aika tabu e kabaeira ma Ngaia ao n anganira te mwaaka n Atua. Ngkai ngaira ana reirei Iesu aika kakaonimaki, ti rairi nanora ao ni bwabetitoaki n Arona. Ti nakonako rinanon kawain te berita ae tabu bwa ti aonga ni karekei otenanti riki tabeua aika kakawaki.¹⁷ Ao ti kakaitau ,bwa ana baire te Atua e katauraoa te kawai ibukin kakabwaia aikanne bwa ana anganaki ara bakatibu ake a mate n akea aia tai ni karekei n aia tai n te maiu ae mamate.¹⁸

Mwaane ao aine aika a kawakin aia berita a ukeuke ibukin kawai ni kawakiniia man barekan te aonaaba bwa ana akea te bwai ae na totokoa reken mwaakan te Tia Kamaiu irouia. Temanna te kainnaba ao te tina ae kakaonimaki a korea te bwai aei n te tai ae aki maan n nako: “Aikai taai ni kaangaanga ao ni kakawaki. Ti rangin ni kakabwaiaki ni karekea rikiraken ara atatai iaon te baire ni kamaiu ao te kairi mai ieta mai rouia burabeti, abotoro, ao taan kairiiri aika tangira ni buokiira ni kamanoira man kaangaangan te maiu aei. Ti katoka kateira ni katanga te rerio n te moaningabong. Irarikina, ti kakauongo nakon te taetae n te maungatabu ni kabuta iaon ara mobwaira tareboon ni katoa ingabong ngkai ti katauraoira ibukin te bong riki teuana.”

Teuana riki iteran karekean mwaakan te Tia Kamaiu nakon maiura bon te rairaki nakon ke te tang nakon te Tia Kamaiu ibukin te ibuobuoki. Te aeka ni karoko anne e kainnanoa te mwakuri ae korakora, ni kabanean am iango nako iai.

Ko uringa karakinan te aine inanon te Baibara are e karawawataaki inanon 12 te ririki ma te aoraki ae korakora, te kaangaanga?¹⁹ E kamwakura te onimaki ae korakora iroun te Tia Kamaiu, n takarua, “Ngkana tao I ti riinga naba kunnikaina, ao I a maiu.”²⁰

Te aine ae onimaki, man iai nanona e kainnanoia ni kakorakora n aron ana kabanea ni kona ni karoko ni Mwaakana. Ana kakorakora anne bon kanikinaean ana kakorakora n tamnei.

A mwaiti mai ibuakora ae a tia n takarua ma nanoia ae korakora te kaokoro n ana taeka te aine aei: “Ngkana I kona ni kakorakoraai n tamnei n ae tau ni karekea mwaakan te Tia Kamaiu nakon maiu, n na ataia bwa n na kanga n tabeakina au kaangaanga. N na karaoa ae I ataia. Ao n na karekea te mwaaka ni karaoia.”

Ngkana ko roko ieta ibukin mwaakan te Uea inanon maium ma te aeka ni korakora ae karekea te aomata ae bwabwa ngke e ukoukora ao ni ukeuke ibukin te eea, te mwaaka mairoun Iesu Kristo bon am bwai. Ngke e ataia te Tia Kamaiu e ataia ae ko tangiria raoi ni karoko Irouna—ngke E kona n namakina te bwai ae tangiria nanom bon anaakin Mwaakana nakon maium—ko na kairaki iroun te Tamnei ae Raoiroi n ataa raoi te bwai ae ko riai ni karaoia.²¹

Ngkana ko aroriko n tamnei are riaon te bwai ae ko tuai kakaraoia mai imwaina, ngkanne e na nakoim Mwaakana.²² Ao ko na ataa raoi nanon taeka ake ti anenei n te boki n anene “Tamnein te Atua”:

E karababai otara te Uea ao e kaoki bwaai ake ngkoa. …

Ao ataakin te Atua e rikirake;

E rabuna te ro iaon te aba.²³

Ana euangkerio Iesu Kristo e kaonaki ma Mwaakana, ae tauraoi nakoia natin te Atua aine ao mwaane ni kabane. Bon au koaua bwa ngkana ti ana Mwaakana nakon maiura, Ngaia ao ngaira ti na bane ni kimwareirei.²⁴

N tabeu ae Ana tia kakoaua ae onoti, I katanoata bwa e maiu te Atua! Iesu bon te Kristo! E a tia ni kaokaki Ana Ekaretia nakon te aonaaba! Ana burabeti te Atua iaon te aonaaba n te bong aei bon Beretitenti Thomas S. Monson, ae I kamatoa ma nanou ni kabane. I kakoaua, ma kaotan au tangira ao au kakabwaia ibukimi ni kabane, n aran Iesu Kristo, amen.

Bwaai aika a na taraaki

1. Taraa 2 Nibwaai 28:19–30.

2. Taraa Ioane 3:16.

3. Iesu bon te Aomata ae Kabiraki—kabiraki iroun te Tama are i Karawa bwa e na riki bwa Ana tia tei ni bwaai ni kabane ni kaineti ma kamaiuakia aomata. E katabuaki Iesu bwa ara Tia Kamaiu ao te Tia Kabooi Maiura. Imwain karaoan te aonaaba, Iesu e katabuaki bwa e na kakoaua bwa natin te Atua ni kabane a na karekea te aki mamate ao bwa a na kona aomata ni karekea te maiu ae akea tokina. (taraa John 17:24; 1 Betero 1:20). Ngaia ae, Iesu e katei uoua aara aika onoti: te Metia (Ebera) ao te Kristo (Greek)—a nanonaki n ae “kabiraki.” (Taraa Bible Dictionary, “Anointed One.”)

4. Ti kona ni kamanoira man ataakin ao ni maiu n ana taeka te Atua (taraa I-Ebeto 6:17–18; Doctrine ao Covenants 27:18).

5. Iaan ana kaetieti Tamana, Iesu te Tia Karika te aonaaba (taraa Ioane 1:2–3) ao aonaaba ake tabeua aika aki kona ni warekaki (taraa Moses 1:33). E maan imwain Bungiakina n ae E mamate, Iesu bon Iehova ae tamaroa—Atuaia kaain te O Tetemanti. Bon Iehova ae reitaki ma Moses iaon Maungan Tinai. Bon Iehova ae karaoa te berita ae tabu ma Aberaam bwa aaba ni kabane iaon te aonaaba a na kakabwaiaki rinanon ana kariki Aberaam. Ao bon Iehova ae karaoi berita aika tabu ma utu n te bata are Iteraera. Iesu bon te Emanuera are e beritanaki, are taekinaki iroun Itaia (taraa Itaia 7:14).

6. Doctrine ao Covenants 131:6.

7. Taraa Doctrine ao Covenants 76:40–41.

8. Taraa 2 Nibwaai 31:2–21.

9. Te Baibara ae Tabu, Ana Boki Moomon, Doctrine ao Covenants, ao te Pearl of Great Price.

10. Taraa te Topical Guide, “Iesu Kristo.” Irarikin taeka iaan raoi atuun rongorongo aika kakawaki, iai 57 karinrin Ibukina. Ibukin booki aika tabu aika tiaki taetae n Ingiriti, kabongana te Guide to the Scriptures.

11. E raka iaon 2,200 karinrin aika taekinaki inanon 18 iteraniba n te Topical Guide.

12. 3 Nibwaai 27:13–14.

13. Teachings of Presidents of the Church: Joseph Smith ((2007), 49.

14. Taraa “The Living Christ: The Testimony of the Apostles,” Liahona, Eberi. 2000, 2–3.

15. Taraa Ereman 8:15.

16. Taraa Doctrine ao Covenants 6:36.

17. E reireiniira Iesu Kristo kakawakin otenanti aika tabu, n aron te bwabetito (taraa Ioane 3:5), te toa e (taraa Doctrine ao Covenants 59:9), ao te entaumente ao otenanti ni kabaebae n te tembora (taraa Doctrine ao Covenants 124:39–42).

18. Taraa Doctrine ao Covenants 124:29–32.

19. Taraa Ruka 8:43–44.

20. Mareko 5:28.

21. Taraa Doctrine ao Covenants 88:63.

22. Ngke te aine ae onimaki e riinga ana kunnikai te Tia Kamaiu, E waekoa ni kaeka, “I ataia ba te mwaaka [man te Greek dunamis, nanona “te mwaaka”] e oti nako mai Rou” (Ruka 8:46; e kairaki karawawataan te iango).

23. “Tamnein te Atua,” Anene, nambwa 2.

24. Taraa 3 Nibwaai 17:20.