“I Katuka te Rau i Roumi”
E berita karekean te rau te Uea nakoia Ana reirei ngke iaon kawaina ni kitaniia. E a tia ni karaoa te berita naba anne nakoira.
Mwaneu aika tangiraki, ti a tia ni kakabwaiakaki n Tamnein te Atua n te tairiki aei. Rongorongo aika kairaki mai ieta mairouia taan kairiiri aine ao te katangitang e a tia ni karikirakei ara onimaki ao nanora ni kawakin berita aika tabu aika ti a tia ni karaoi ma Tamara are i Karawa. Ti namakina rikiraken ara tangira ibukin te Uea Iesu Kristo ao ara kakaitau ibukin Ana bwaintangira n Ana mwakuri ni kamaiu.
Au rongorongo n te tairiki aei e bebete. Ti a tia ni bane n namakina te rau n te tairiki aei. Ngaira ni kabane ti tangiria n namakina te aeka n rau anne inanora, inanon ara utu, ao kaain irarikira. Te Uea e beritana te rau nakoia Ana reirei ngke iaon kawaina ni kitaniia. E a tia ni karaoa te berita anne nakoira. Ma E taku bwa E na anga te rau n Ana kawai, tiaki n ana kawai te aonaaba. E kabwarabwara ana kawai ni kanakoa te rau n raon aei:
“Ao te tia Buobuoki, are te Tamnei are Raoiroi, are E na kanako maia te Tama n arau, E na reireingkami bwaai ni kabane, ao E na kaururing i nanomi bwaai ni kabane ake i atongi nako imi.
“I katuka te rau i roumi, I anganingkami au rau: I aki anganingkami n ai aron te aba, ngkana e anga. A na tai rawawata nanomi, ao a na tai maku” (Ioane 14:26–27).
Natin Motiaea mwaane a kainnanoa te aeka n rau anne ngke a nakon aia mition nakoia Reimwanaite. Ma rakan nanoia ngke a namakina korakoran aia mwakuri, a tataro ibukin manga kakoauakina. Ao “te Uea e kawariia n Tamneina, ao e taku nakoia: Karau nanomi. Ao a rau nanoia” (Aramwa 17:10; taraa naba Aramwa 26:27).
Inanon taai, ake ko na kainnanoa te rau ngkana ko kaitara ma bwaai aika ko aki koaua iai bwa tera kakaewenako aika kakamaaku. Natin Motiaea mwaane a reiakina te reirei are anga te Uea nakon Moronaai. Bon te kairi nakoira ni kabane. “Ao ngkana a roko aomata nakoiu N na kaota nakoia mamaaraia. I anganiia aomata mamaaraia bwa aonga n nanorinano; ao e tau au akoi nakoia aomata ni kabane [ake] a kananorinanoia i matau; ma n onimakinai, ao ngkanne N na kakorakorai mamaaraia nakoia” (Ita 12:27).
E taekinna Moronaai bwa ngke e “tia n ongo taeka aikai,” e “rau nanona” (Ita 12:29). Ana riki bwa bwaai ni karaunano nakoira ni kabane. Naake aki noori mamaaraia aki rikirake. Ataakin mamaaram bon te kakabwaia, bukina bwa e kateimatoako n nanorinano ao ni kateimatoako n onimakina am Tia Kamaiu. E aki ti kamwengaraoiko te Tamnei, ma Ngaia naba te tia tei are e kamwakura iai Ana mwakuri ni kamaiu ni bon arom. Ngkanne bwaai aika mamaara a riki ni kakorakorako.
N taai tabetai am onimaki e na kaitaraaki iroun Tatan, e riki aei nakoia ana reirei ni kabane Iesu Kristo. Kamanoam nakon kataaki aikai bon man kawakinan te Tamnei ae Raoiroi bwa raoraom. E na taetae te Tamneim n rau nakon tamneim. E na kairoroiko te Tamnei bwa ko na waaki nako n te onimaki. Ao E na uoti rikaaki uringakin taai akanne ngke ko namakina te ota ao ana tangira Iesu Kristo.
E kona te ururing n riki bwa ana bwaintituaraoi te Tamnei ae kakawaki ae kona n anganiko. E na “kaururingkami ma bwaai ni kabane, ake e atongi [te Uea] nako imi” (Ioane 14:26). E kona te ururing n ae kaekaan te tataro, reken te otenanti n te nakoanibonga, kamatoaan te koaua, ke n te tai are ko noora iai ana kairi te Atua ni maium. Tao n taai aika ana roko ngkana ko kainnanoa te korakora, te Tamnei e na uoti namakin aika iai iroum n tain te bootaki aei. I tataro bwa e na riki aei.
Teuana te ururing ae aki toki ni uotia te Tamnei nakon au iango bon te bootaki n toa n te tairiki ae karaoaki n ririki aika mwaiti n nako n te auti te biti i Innsbruck, Austria. Te auti ni katantan e mena iaan kawain te turein. Ti tao e tatin te aomata n roko, n tekateka iaon kaintekateka kaai. Angiia bon aine, tabeman kairake ao ikawai. I noori rannimata ni kakaitau ngke e kabutaki te toa imarenaia kaain te taromauri. I namakina ana tangira te Tia Kamaiu ibukiia Aika Itiaki, ao ngaiia naba. Ma te kakai ae I uringnga ae e rangin n itiaki bon te ota ae I noria n te auti te biti, ae uota namakinan te rau. Bon n te tairiki ao akea winto, ao te ruu e ota kanga otan te tawanou.
Otan te Tamnei ae Raoiroi e ota mwaaka ao ni korakora n te tairiki anne. Ao te ang are e karina te oota bon nanoia ae mangori Aika Itiaki, ake a tia n roko imatan te Uea n tangira kabwaraan aia bure ao ni motinnanoia bwa ana Ururingnga. E aki kaangaanga Uringakina, ao au ururing n te atatai ae tabu anne e a tia ni kabebetea ibukiu bwa n na Uringnga ao Ana Mwakuri ni Kamaiu n ririki ake imwiina. N te bong anne te berita n te tataro bwa e na raoniira te Tamnei ao ni uota namakinan te oota ao te rau.
N aekakim, I a tia n rangin ni kakaitau ibukin ana kawai te Uea aika mwaiti ni kawarai ma te Tia Buobuoki ngke I kainnanoa te rau. Ma Tamara are i Karawa e tabeaianga tiaki ti ibukin ara buobuoki ma iaon riki ara kekeiaki. Te “Tia Buobuoki” ti teuana ibuakon kawai ae kabwarabwaraaki iai te Tamnei ae Raoiroi inanon booki aika tabu. Aio naba teuana: “Ao ngkai, e koaua, koaua, I taku nakoimi, angan onimakinan te Tamnei ae Raoiroi are e kairiira ni karaoa ae raoiroi” (taraa D&C 11:12). N angiin te tai, te raoiroi ae E na tuangko bwa ko na karaoia e na irekereke ma buokaia tabeman ni karekea te ibuobuoki mairoun te Atua.
Ni Wanawanan te Uea, e uoti ngkami ni kabane inanon bootaki ao kiraati n Ana Ekaretia. E a tia ni karaoia bwa e na kakorakora mwaakam ni karaoa ae raoiroi. Inanon bootaki aikai, iai tabem aika onoti ni buokiia tabeman Ibukina. Te katooto, ngkana ngkoe te ataeinnaine, ko kona n tuangaki iroun am bitiobi ke am tia kairiiri n te Bootaki n Ataeinnaine bwa ko na nakon te Raurere ae a tia n riki n aron ae ti atongnga n tabetai “aki kakaonimaki.” Ko kina riki nakon te Bitiobi ke ana tia kairiiri te Ataeinaine. Ko ataia ae e namakina riki te kaangaanga ni mweengana ke n te reirei ke tao ni kauoua. Am taan kairiiri irouia kairake aki ataia bwa bukin tera a anaaki nanoia n tuangko bwa ko na nakoina, ma te Uea e karaoia, ao E anga te mwakuri aei rinanon ana kairoro Tamneina.
Nakoraoin am kekeiaki e kainnanoa te kakai ni bitakin nanom ao nanon te ataeinnaine are ko nako ni kamaiua—ao anne e kainnanoa ana iraorao te Tamnei ae Raoiroi. E na karekea am tai n noriia Raurere aika aki rangin ni kakaonimaki n aron ana taratara te Uea nakoina. E ata nanona ao nanom te Uea, ao E atai ara namakin ao ara iango, ao E atai aron bitakin naano. E kona ni kawariko n Tamneina ni karika te taotaonaki n nano, te kabwarabure, ao te tangira.
Te Tamnei anne e kona ni kakorakorai taeka, te mwakuri, ao te taotaonaki n nano ibukim ni kaokiia tiibu nakon te nanai. Ao E kona n ana nanoia kaain te nanai n te kiraati n te Raurere n tangira ao ni butimwaea te tiibu are e bua, bwa ngkana e oki, e na namakinna ae a okira mweengana.
Mwaakam ni karaoa ae raoiroi bwa ana kurubu natin te Atua aine e na kaineti, ma korakoran nanoia, iaon te katiteuanaaki ao te tangira ibuakomi. Aio te bwaintituaraoi teuana n te rau ae roko rinanon te Tamnei ae Raoiroi.
E ota n te bwai aei Aramwa. Anne bukina ngkai e tang ibukiia ana aomata “e riai n akea te itabaraaraa imarenaia, ma a riai ni katiteuanaaki n aia mwakuri, inanon te onimaki ao te bwabetito ae ti teuana, ao a na bootaki nanoia n te nano ae ti teuana inanon te tangira imarenaia” (Motiaea 18:21).
Te katiteuanaaki bon te bwai ae riai ibukira ni karekea te Tamnei n ara kiraati ao n ara utu. Ma ko ataia man te taneiai, n aron ae I ataia te katiteuanaaki anne e matoatoa karaoana. E tangira te Tamnei ae Raoiroi bwa raoraora ni kakerikaaki nanora ao ni kauki matara ao ni kakerikaaki ara namakin.
I uringnga natira te ataeinimwaane ae itiua ke waniua ana ririki are e kiba iaon ana kainiwene are I taku n au iango bwa e na bae n uruaki. I namakina te un, ao I waekoa n nako ni barongaa au auti. I katika natiu n angana ae uarereke ao n tabekia rake nakon te tabo are a kaitibo iai matara.
Taeka aikai a roko n au iango. E taraa n ae te bwanaa ae maraara ma e taetae nakon nanou. “Ko taua te aomata ae tamaroa.” I karaurau ni kawenea iaon te kainiwene ao ni kabwarabure.
Ngkai e a riki bwa te mwaane ae tamaroa are kariaia te Tamnei ae Raoiroi bwa n na noria 40 te ririki n nako. I kakaitau n ae akea tokina bwa e a tia te Uea ni kamaiuai man namakin aika aki tangira man kanakoan te Tamnei ae Raoiroi ni kariaia bwa n na noora natin te Atua n aron are E noria.
Te katiteuanaaki ae ti noria inanon ara utu ao n te Ekaretia e na roko ngkana ti kariaia te Tamnei ae Raoiroi ni karaoa te bwai ae ti noria ngkana ti taraira—ao riki n iangoakira bon iroura. Te Tamnei e taratara ma a na tangira ae itiaki Kristo. Kakauongo nakon taeka aika e kabonganai Moomon ni kabwarabwara te tangira ae kororaoi. Iangoi taai ake ko a tia n namakinna:
“Te tangira ae kororaoi e taotaonaki n nano, ao e akoi, ao e aki bakantang, ao e aki kainikatonga, ao e aki ukoukora oin nanona, e aki kakai un, e aki iangoa te buakaka, ao e aki kimwareirei n te buakaka ma e kimwareirei n te koaua, e keiakin bwaai ni kabane, e kakoauai bwaai ni kabane, e kantaningai bwaai ni kabane, ao e teimatoa n nanomwaaka ni bwaai ni kabane.
“Ngaia are, tariu aika kam tangiraki [ao I kariniia mwaneu], ngkana akea iroumi te tangira ae kororaoi, ao bon akea ngkami, bwa akea kabwakan te tangira. Ngaia are, niim ma te tangira, are te kabanea ni korakora i aon bwaai nako, bwa bwaai ni kabane a na bwaka—
“Ma te tangira ae kororaoi bon ana tangira Kristo ae itiaki, ao e teimatoa n uaa te toki; ao ane e kuneaki irouna n te kabane ni bong, ao e na bon nakoraoi ibukina.
“Ngaia are, tariu aika tangirai [ao mwaneu], tataro nakon te Tama ma korakoram ni kabane, bwa kam na kaonaki n te tangira aio, are e a tia ni katoka i aoia ni kabane ake taan iriira Natina, are Iesu Kristo ni koaua; bwa kam aonga n riki bwa natin te Atua mwaane [ao aine; bwa ngkana e kaoti ao ti na riki n arona, bwa ti na nooria n arona ngkai; bwa ti aonga ni karekea te kantaninga aio; bwa ti aonga ni kaitiakaki n arona ae e itiaki” (Moronaai 7:45–48).
Aio te kouru ae karekea Tamam are i Karawa ibukim, Natina aine aika kakawaki. Ko kona n taraia bwa te kouru ae raroa nako, ma man Ana taratara, ko aki raroa nako. Ngaia ae e kawariko ma Tamneina ni karaua nanom, boutokaiko, ao ni kaungako.
I katuka au kakoaua ae koaua nakoimi bwa e kinai ngkami te Tama—e atai kainnanomi ao arami—ao e tangiri ngkami, ao e ongo ami tataro. Natina ae Tangiraki e kaoi ngkami bwa kam na Nakoina. Ao a kanakoa te Tamnei ae Raoiroi bwa e na buokiko n am kekeiaki ni mwakuri Ibukiia.
Ibukin Ana mwakuri ni kamaiu Iesu Kristo, ana reitaki ae teimatoa te Tamnei ae Raoiroi e na iai mwiina ae kakawaki ao n itiaki n tamneim. Ko na namakina ngkanne te rau are e beritanna te Tia Kamaiu bwa e na katikua ma Ana reirei. Ma te rau anne e na roko te kantaninga ae tamaroa ao namakinan te oota ao te tangira mairoun te Tama ao Ana Rikitemanna, are, e kaira Abanueana iaon te aba rinanon te kaotioti nakon Ana burabeti ae maiu. I taekin ma te koaua n aran te Uea Iesu Kristo, amen.