Na Mana ni iVola i Momani.
Au vakauqeti keda kece me da vulica ena yalomasumasu ka vakananuma vakatitobu e veisiga na iVola i Momani.
Kemuni na taciqu kei na ganequ, au kidavaki kemuni ena yalomarau ni da mai sota tale ena dua na koniferedi raraba cecere ni Lotu i Jisu Karisito ni Yalododonu Edaidai. Ni bera niu tekivuna na noqui itukutuku nikua, au via kacivaka e lima na valetabu vou ena tara ena veivanua oqo: Brasília, Brazil; na wasewase levu e Manila, Philippines, Nairobi, Kenya, Pocatello, Idaho, Amerika; kei Saratoga Springs, Utah, Amerika.
Ena mataka nikua au vosa me baleta na mana ni iVola i Momani kei na kena bibi vei keda na lewe ni Lotu me da vulica, vakananuma vakatitobu, ka bulataka na kena ivakavuvuli. Ena sega ni rauta rawa ena dua na gauna na tukuni tiko ni kena bibi me dua noda ivakadinadina tudei ka qaqa ni iVola i Momani.
Eda bula donumaka na gauna ni leqaleqa levu kei na caka ca. Na cava ena taqomaki keda mai na ivalavala ca kei na ca sa takalevu tu i vuravura nikua? Au na tukuna tikoga ni na vukea me da rawata e dua na ivakadinadina kaukauwa ni noda iVakabula, ko Jisu Karisito, kei na Nona kosipeli ena vukei keda. Kevaka o sega ni se wilika tiko e veisiga na iVola i Momani, yalovinaka cakava. Kevaka o na wilika ena masumasu ena gagadre ni vuniyalomu mo kila na dina, ena vakatakila na kena dina vei iko na Yalo Tabu. Kevaka e dina—kau vakadinadinataka ni vakadina kina—sa qai parofita dina ka a raica na Kalou na Tamana kei na Luvena, o Jisu Karisito o Josefa Simici.
Baleta ni dina na iVola i Momani, sa nona Lotu na Turaga e vuravura na Lotu i Jisu Karisito ni Yalododonu Edaidai, ka sa vakalesui mai na matabete tabu ni Kalou me yaga vei ira ka ra vakalougatataki kina na Luvena.
Kevaka e se bera ni dua tiko na nomu ivakadinadina ni veika oqo, cakava na veika e ganita mo rawata kina e dua. E yaga vei iko me tiko e dua na nomu ivakadinadina, baleta na nodra ivakadinadina na tani ena tauri iko ga ena dua na gauna. Ia, ni sa rawati, sa gadrevi me maroroi vinaka na ivakadinadina ka vakabulabulataki ena talairawarawa tikoga ki na ivakaro ni Kalou kei na masumasu ka wili ivolanikalou e veisiga.
Kemuni na noqu itokani ena cakacaka ni Turaga, au vakauqeti keda kece me da vulica ena yalomasumasu ka vakananuma vakatitobu e veisiga na iVola i Momani. Ni da vakayacora vakakina, eda na rawa kina ni rogoca na domo ni Yalo, me da vorata na veitemaki, me da ulabaleta na vakatitiqa kei na rere, ka ciqoma na veivuke mai lomalagi ena noda bula. Oqori au vakadinadinataka, mai vuni yaloqu taucoko, ena yaca i Jisu Karisito, emeni.