Sel Klisichel a Babier er a Mormon
A kulengit er kid el rokui el mo ngara nglunguuch e dosuub e dolbedebek er a Babier er a Mormon er a bek el sils.
Rodam me a rodos er ngak, ak meral mengemedaol er kemiu el deluut el mocha kldibel er tial klou el ongdibel er a Ikelesia er a Jesus Kristo er a Uriul-klebesei el Santo. Uchei er a kumuchel er a cheldechedechak er chelechal sils, e ng soak el mo ouchais el kirel a kleim el beches el temple el mo dechor er a ikakid el basio: Brasília, Brazil; greater Manila, Philippines, area; Nairobi, Kenya; Pocatello, Idaho, USA; me a Saratoga Springs, Utah, USA.
Chelechal tutau e ak mengedecheduch el kirel a klisichel a Babier er a Mormon me sel klou el ultutelel el kid a rechedal tial ikelesia a kired el mesuub, e melbedebek, e oltirakl a osisechakl er a chelsel er a klengar kid. A klou e mesisiich el klaumerang er a Babier er a Mormon a diak el sebechel nguemed omesodel.
Kede kiei er a taem er a betok el uldikel me a mekngit. Me ngera mo sobecheklid er a klengit me a mekngit el ngii a di omerk er a beluulechad er a chelechal sils? A kuchais el kmo a mesisiich el klaumera er a Osobel, el Jesus Kristo, me a ebangkelio er Ngii a ngoikid el mo er a selbechakl. Alsekum e ng diak monguiu er a Babier er a Mormon er a bek el sils, e a kulengit me bo moruul er ngii. Omko ko mo ngara nglunguuch e menguiu er ngii loba blak el reng el mo medengelii a klemerang, e a Chedaol Reng a mo meketeklii a klemerang er ngii el mei er kau. Alsekum e ng klemerang—e ngak a ouchais el kmo ng klemerang e—seikid e a Joseph Smith a mle profet el milsa Dios el Chedam me a Ngelekel, el Jesus Kristo.
Le Babier er a Mormon el klemerang a uchul, e a Ikelesia er a Jesus Kristo er a Uriul-klebesei el Santo a ngii a Ikelesia er a Rubak el ngara beluulechad, e a chedaol priesthood er a Dios a mla moluut el mo klungioal e klengeltengat el mo er a Rengelekel.
Alsekum e ng diak a mesisiich el klaumera er kau er a ikal tekoi, e bo moruul aikel kirel kedmekill el uchul e ke mo nguu. Ng klou a belkul a le ngarngii a klaumera er kau er a chelsel tial chetituokel el taem, le klaumera er a rebebil a di sobecheklau er a telkib. E ng di, sel tal om nguu, e a klaumera er kau a kirel klou a belkul e mesisiich lultuil er a otireklem er a llechul a Dios me a nglunguuch er a bek el sils me a omesubel chedaol llechukl.
Kemiu el dedak loureor el mo er a Rubak, ak mengelechel er kid el rokui me bo de ngara omenguiu e dolbedebek er a bek el sils el kirel a Babier er a Mormon. Sel bo deuaisei, e kid a mo sebeched el rongesii odbechel Chedaol Reng, e mo odngakl ongetikaik, e choroid a rraureng me a dakt, e mo ngmai a ngeso er a babeluades er a klengar kid. Aika kuchais el kmal ngara renguk, el ngara ngklel a Jesus Kristo, amen.