’Eiaha e mata’u i te rave i te ’ohipa maita’i
Tē parau mai nei te Fatu ia tātou ē ’ia tiʼa anaʼe tātou mā te faʼaroʼo i niʼa i tōna papa, e iti mai te fēʼaʼa ʼe te mataʼu ; e rahi ïa te hinaʼaro i te rave i te ʼohipa maitaʼi.
E au mau taeaʼe, e au mau tuahine here ē, tē pure ha’ehaʼa nei au ’ia pārahi mai te Vārua o te Fatu ia tātou nei ’a paraparau atu ai au ia ʼoutou i teie mahana. ʼUa ī tōʼu ʼāʼau i te maūruuru rahi i te Fatu, teie hoʼi tāna ʼĒkālesia, nō te faʼaururaʼa tā tātou i fāri’i i roto i te mau pure itoito, te mau aʼoraʼa tei faʼauruhia, ʼe te mau hīmene a te mau melahi i roto i teie ʼāmuiraʼa.
I te ʼāvaʼe ʼēperēra ra, ’ua hōroʼa mai te peresideni Thomas S. Monson i te hōʼē poroʼi tei haʼaputapū i te mau ʼāʼau nā te ao nei, ʼe tōʼu atoʼa nei. ʼUa aʼo ʼoia nō niʼa i te pūai o te Buka a Moromona. ʼUa tiʼaoro ʼoia ia tātou ’ia tuatāpapa, ’ia feruri ʼe’ ia faʼaʼohipa i te mau haʼapiʼiraʼa a teie buka. ʼUa fafau mai ʼoia ē mai te mea e faʼataʼa tātou i te taime i te mau mahana ato’a nō te tuatāpapa, ’ia feruri ʼe ’ia haʼapaʼo i te mau faʼaueraʼa e vai nei i roto i te Buka a Moromona, e noaʼa ia tātou te hōʼē ʼiteraʼa pāpū pūai nō te parau mau o te buka ʼe te ʼiteraʼa pāpū e noaʼa mai nō niʼa i te Mesia ora, ’ia ’ite tātou ē tei te vāhi pāpū tātou i te mau tau ʼāhuehue. (Hiʼo « Te Pūai ʼo te Buka ʼa Moromona » Liahona, Mē 2017, 86–87.)
Mai ia ʼoutou e rave rahi, ’ua faʼaroʼo vau i te mau parau a te peropheta mai te reo o te Fatu iāʼu nei. ʼE, ʼoia atoʼa mai ia ʼoutou e rave rahi, ʼua faʼaoti au i te haʼapaʼo i taua mau parau ra. I teienei, mai tōʼu tamaiti-’āpī-ra’a, ’ua fāri’i au i te ʼiteraʼa pāpū ē te Buka a Moromona e parau ïa nā te Atua, ʼe ʼua fā mai te Metua ʼe te Tamaiti ʼe ’ua paraparau atu ia Iosepha Semita, ʼe ʼua haere mai te mau ʼāpōsetolo tahitō i te peropheta Iosepha nō te faʼahoʼi mai i te mau tāviri o te autahu’ara’a o te ʼĒkālesia a te Fatu.
Ma taua ʼiteraʼa pāpū ra, ʼua taiʼo vau i te Buka a Moromona i te mau mahana atoʼa hau atu i te 50 matahiti. Nō reira, ʼua nehenehe iāʼu ’ia manaʼo ē te mau parau a te peresideni Monson nō te tahi atu ïa taʼata. ’Āre’a rā, mai ia ʼoutou e rave rahi, ʼua ʼite au ē te faʼaitoitoraʼa a te peropheta ʼe tāna fafauraʼa, tē ani mai nei iā’u ’ia tūtava rahi atu ā vau. E rave rahi o ʼoutou tei rave i te mea tāʼu i rave : ʼUa pure ma te mana’o pāpū rahi aʼe, ’ua feruri pūai atu ā i te pāpaʼiraʼa moʼa, ʼe ’ua tāmata pūai atu ā i te tāvini i te Fatu ʼe ia vetahi ’ē nōna.
Tē hopeʼa ʼoaʼoa nōʼu nei, ʼe nō ʼoutou e rave rahi, ’o te mea ïa tā te peropheta i fafau mai. Tātou tei fāriʼi maitaʼi i teie aʼo tei faʼauruhia, ʼua faʼaroʼo pāpū aʼe ïa tātou i te Vārua. ʼUa noaʼa ia tātou te hōʼē pūai rahi aʼe nō te pātoʼi atu i te faʼahemaraʼa ʼe ’ua noaʼa ia tātou te faʼaroʼo rahi aʼe ia Iesu Mesia tei tiʼafaʼahou mai, i roto i tāna ra ʼEvanelia, ʼe i tāna ʼĒkālesia ora.
I roto i te hōʼē tau ʼua rahi te ʼāhuehue i roto i te ao nei, ʼua tiʼavaru ’ē atu taua mau ʼiteraʼa rahi ra i te fēʼaʼa ʼe te mataʼu ʼe ʼua hōpoi mai i te mau manaʼo hau ia tātoū nei. ʼUa tupu mai i niʼa iho iāʼu e piti ʼohipa faʼahiahia nā roto i te faʼaroʼoraʼa i te aʼo a te peresideni Monson : ’A tahi, te Vārua tāna i fafau mai ʼua faʼatupu i te manaʼo ʼanaʼanatae nō te mau mea e tupu mai i te mau mahana i mua nei, noa atu ē tē mara’a rahi noa atu ra te ʼāhuehue i te ao nei. ʼE te piti, ʼua hōroʼa mai te Fatu iāʼu—ʼe ia ʼoutou—i te hōʼē manaʼo rahi aʼe nō tōna aroha i te mau taʼata i roto i te hepohepo. ʼUa ʼite tātou i te hōʼē maraʼaraʼa o te hinaʼaro ’ia haere e faʼaora ia vetahi ’ē. Taua hinaʼaro rā ’o te tītaura’a ïa i roto i te tāviniraʼa ʼe te haʼapiʼiraʼa a te peresideni Monson.
ʼUa fafau te Fatu i te aroha ia vetahi ’ē ʼe te itoito i te peropheta Iosepha Semita ʼe ia Olive Kaudere i te taime e au ra ē ʼua rahi roa te mau ʼohipa i mua ia rāua. ʼUa parau te Fatu ē, e tae mai te itoito e hina’arohia nā roto i tō rāua faʼaroʼo iāna ʼei papa nō rāua :
« ’Eiaha e mata’u i te rave i te ’ohipa maita’i, e tā’u nā tamaiti ē, nō te mea ’o tā ’ōrua e ueue ra, ’o tā ’ōrua ato’a ïa e ’ō’oti ; nō reira mai te mea e ueue ’ōrua i te maita’i e ’ō’oti ato’a ho’i ’ōrua i te maita’i ’ei utu’a nō tā ’ōrua ’ohipa.
« Nō reira, ’eiaha e mata’u e te nana iti ē : ’a rave i te ’ohipa maita’i ; ’ia ’āmui noa atu tō te ao nei ’e tō te pō ho’i i te pāto’ira’a ia ’outou, nō te mea ’ua patuhia ’outou i ni’a i ta’u nei papa, e ’ore roa rātou e manuia.
« Inaha, ’aore au i fa’ahapa nei ia ’ōrua ; ’a haere ’ōrua i tō ’ōrua haere’a ’e ’eiaha e hara fa’ahou ; ’a rave ma te ’ā’au māmahu i te ’ohipa tā’u i fa’aue atu ia ’ōrua na.
« ’A hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u.
« ’A hi’o na i te nā puta i ha’aputahia i roto i tō’u nei ’ao’ao, ’e i te tāpa’o o nā naero i roto i tō’u nā rima ’e i te ’āvae ho’i ; ’a fa’aitoito noa, ’a ha’apa’o i ta’u mau fa’auera’a, ’e e noa’a ia [’outou] te bāsileia o te ao ra » (PH&PF 6:33-37).
ʼUa parau atu te Fatu i tāna feiā faʼatere o te Faʼahoʼifa’ahoura’a mai, ’e tē parau mai nei ʼoia ia tātou ē, ’ia tiʼa anaʼe tātou mā te faʼaroʼo i niʼa i tāna papa, ʼe iti mai te fēʼaʼa ʼe te mataʼu ; e rahi te hinaʼaro i te rave i te ʼohipa maitaʼi. ’Ia fāriʼi anaʼe tātou i te aniraʼa a te peresideni Monson ’ia tanu i roto i tō tātou ʼāʼau te hōʼē ʼiteraʼa pāpū nō Iesu Mesia, e noaʼa ia tātou te pūai, te hinaʼaro ʼe te itoito nō te haere e faʼaora ia vetahi ’ē mā te ʼore e haʼapeʼapeʼa i tō tātou iho mau hinaʼaro.
ʼUa ʼite au i taua faʼaroʼo ra ʼe te itoito e rave rahi taime ’a faʼaruru ai te Feiā Moʼa faʼaroʼo i te mau Mahana Hopeʼa nei i te mau tāmataraʼa riʼariʼa. ʼEi hiʼoraʼa, tei Idaho vau i te taime ’a pararī ai te pahuraʼa pape nō Teton i te 5 nō tiunu 1976. ʼUa maniʼi mai te hōʼē patu pape. E rave rahi tauasini taʼata tei faʼaruʼe i tō rātou mau fare. E rave rahi tauasini fare ʼe te mau fare raveraʼa ʼohipa tei vāvāhi-roa-hia. ’Aua’a a’e māoti, tei raro mai i te 15 taʼata i pohe.
Te mea tāʼu i ʼite i reira,’ua ʼite au i te mau mahana atoʼa, ’ua tiʼa pāpū mai te Feiā Moʼa i te mau Mahana Hopeʼa nei i niʼa i te papa nō te hōʼē ʼiteraʼa pāpū nō Iesu Mesia. Nō te mea ʼaita rātou i fēʼaʼa, ’e tē tīaʼi nei ʼoia ia rātou, ʼua riro rātou ʼei mau taʼata mataʼu ʼore. ʼAita rātou i haʼapaʼo i tō rātou iho mau fifi nō te haere atu e tauturu ia vetahi ’ē. ʼE ʼua nā reira rātou nō tō rātou here i te Fatu, mā te ʼore e ani i te haʼamāuruururaʼa.
’Ei hiʼoraʼa, ’a pararī ai te pahuraʼa pape nō Teton, tē tere ra te hōʼē tāne ʼe tāna vahine, e rave rahi kilometera i te ātea i tō rāua fare. I tō rāua iho ā faʼaroʼoraʼa i te parau ʼāpī i roto i te ratio, ʼua hoʼi vitiviti mai rāua i Rexburg. ʼAita rāua i haere atu i tō rāua iho fare nō te hiʼo ē ʼua pararī ānei, ʼua haere rā rāua e ʼimi i tō rāua ’episekōpo. Tei roto ʼoia i te hō’ē fare tei faʼaʼohipahia ’ei pū fāriʼiraʼa tauturu. Tē tauturu ra ʼoia i te faʼanaho i te mau tauasini taʼata e hōroʼa nei i tō rātou taime ʼe ’o te tae mai ra nā niʼa mai i te mau pere’oʼo reʼareʼa uta nō te fare haʼapiʼiraʼa.
ʼUa haere atu te tāne ʼe te vahine i te ’episekōpo ma te parau atu : « Nō hoʼi noa mai nei māua. E te ’episekōpo, i hea māua e nehenehe ai e tauturu ? » ʼUa hōroʼa atu ʼoia ia rāua te mau iʼoa nō te hōʼē ʼutuāfare. ʼUa faʼaea mai taua tāne ʼe te vahine nō te tātararaʼa i te vari ʼe te pape i roto i te mau fare e rave rahi. ʼUa haʼa rāua mai te poʼipoʼi ē tae atu i te pō e rave rahi mau mahana. ʼUa faʼafaʼaea aʼera rāua nō te haere atu e hiʼo i tō rāua iho fare. ʼUa reva atu te fare i roto i te pape pu’e, ʼaore ïa mea e tāmā atu. Nō reira ’ua hoʼi vitiviti atu rāua i tō rāua ’episekōpo ra. ʼUa ani atu rāua : « E te ’episekōpo tē vai ra ānei te tahi taʼata e tiʼa ia māua ’ia tauturu atu ? »
Taua temeio ra nō te itoito ʼe te aroha o te hau—te aroha mau o te Mesia—’ua tupu tāmau noa e rave rahi matahiti ʼe nā te ao tāʼātoʼa nei. ʼUa tupu te reira i te mau mahana riʼariʼa nō te hāmani-’ino-raʼa ʼe te mau tāmataraʼa i te tau o te peropheta Iosepha Semita i Missouri. ʼUa tupu te reira ’a arataʼi ai Brigham Young i te tere o te mau pionie mai Nauvoo atu ʼe ’a piʼi ai ʼoia i te Feiā Moʼa i te mau vāhi taʼata ʼore i te pae tōʼo’a o te rā nō te Fenua Marite, nō te tauturu i te tahi ʼe te tahi ’ia patu ia Ziona nō te Fatu.
Mai te mea e taiʼo ʼoutou i te mau pāpaʼiraʼa a taua mau pionie ra i roto i tā rātou mau buka ’ā’amu, e ʼite ’outou i te temeio nō te faʼaroʼo tei tiʼavaru ’ē atu i te fēʼaʼa ʼe te mataʼu. ʼE e taiʼo ʼoutou nō niʼa i te Feiā Moʼa tei vaiiho i tō rātou iho mau hinaʼaro nō te tauturu i te tahi ’ē atu taʼata nō te Fatu, hou ’a hoʼi mai ai i tā rātou iho mau mamoʼe ʼaore rā tā ratou iho mau faʼaʼapu tei ʼore i faʼaʼapuhia atura.
ʼUa ʼite au i taua iho temeio ra tau mahana noa i muri aʼe i te mataʼi rorofaʼi Irma i Puerto Rico, Saint Thomas ʼe Floride, i reira te Feiā Mo’a i te Mau Mahana Hope’a Nei i te ’āmuira’a atu ’e te tāhi atu mau ha’apa’ora’a fa’aro’o, te mau pupu o te ’oire iho ’e te fa’anahora’a nā te ao nei nō te ha’amata i te tauto’ora’a nō te tāmāra’a.
Mai tō’u mau hoa nō Rexburg, hō’ē nā ta’ata fa’aipoipo melo ’ore nō Floride tei fa’atumu i ni’a i te tauturura’a i te huira’atira, ’eiaha rā i tō rāua iho vāhi. I tō te tahi mau ta’ata tupu Feiā Mo’a i te Mau Mahana Hope’a Nei hōro’ara’a i te tauturu nō nā e piti tumu rā’au rārahi e tāpahi ra i tō rātou purūmu, ’ua fa’ata’a mai teie nā ta’ata ē ’ua nene’ihia rāua ’e ’ua fāriu rāua ia vetahi ’ē ra, ma te ti’aturi ē e hōro’a mai te Fatu i te tauturu o tā rāua e hina’aro iō rāua ra. ’Ua fa’a’ite mai te tāne teie, nā mua a’e tō tātou mau melo o te ’Ēkālesia taera’a atu nō te tauturu, ’ua pure teie nā ta’ata fa’aipoipo. ’Ua fāri’i rāua i te hō’ē pāhonora’a ē e tae mai te tauturu. ’Ua tae mai tau hora iti i muri mai i teie ha’apāpūra’a.
’Ua fa’aro’o vau i te hō’ē parau fa’a’ite ē ’ua ha’amata vetahi i te pi’i haere i te Feiā Mo’a i te Mau Mahana Hope’a Nei e ’ahu nei i te ’ahu re’are’a Rima tauturu « Te mau melahi re’are’a ». Hō’ē melo tei rave i tōna pere’o’o nō te ’ohipa, ’e te ta’ata tāna i tauturu ’ua fa’a’ite mai i te « ’itera’a pae vārua » tāna i fāri’i i te ’īritira’a te mau ta’ata ’ahu re’are’a i te mau tumu rā’au i roto i tōna ’āua ’e i muri iho, ’ua parau ’oia « ’ua hīmene rātou i te hō’ē hīmene nō ni’a i te rirora’a ’ei tamari’i nā te Atua ».
Te tahi e fa’aea ra i Floride—’aita ato’a i tā tātou ha’apa’ora’a—’ua fa’a’ite mai ē ’ua haere mai te Feiā Mo’a i te Mau Mahana Hope’a Nei i tōna fare, tē ’ohipa ra ’oia i roto i tōna ’āua tei ninahia ’e ’ua ’ite ’oia i te ’ohipa rahi, te tahitira’a ’e tē toe noa ra te ta’ira’a. ’Ua fa’atupu te mau ta’ata tauturu, nā roto i tāna mau parau « hō’ē temeio ateate ». ’Ua tāvini rātou ’eiaha noa ma te itoito, ma te ’ata ’e te ’ata’ata, ma te ani ’ore ra i te hō’ē mea.
’Ua ’ite au i teie itoito ’e ’ua fa’aro’o vau teie ’ata, i tō’u haerera’a e fārerei i te hō’ē pupu Feiā Mo’a i te Mau Mahana Hope’a Nei i Floride, i te hō’ē mahana mā’a i te maorora’a pō. ʼUa faʼaea te mau taʼata tei hōroʼa i tō rātou taime i tā rātou ʼohipa tāmāraʼa ’ia nehenehe iāʼu ’ia aroha rima atu. ʼUa parau mai rātou ē ʼua ʼōpua e 90 melo nō tā rātou titi i Georgia i te ʼāmui mai i roto te tautururaʼa i Floride i te pō noa nā mua atu.
ʼUa faʼaruʼe rātou i Georgia i te hora 4 i te poʼipoʼi, ’ua faʼahoro mai e rave rahi hora, ’ua rave i te ʼohipa i te tāʼātoʼaraʼa o te mahana ʼe i te pō, ʼe ʼua ʼōpua i te ʼohipa faʼahou i te poʼipoʼi aʼe.
ʼUa faʼaʼite mai rātou i te reira iā’u ma te ʼataʼata ʼe te ’ārearea. Te hōʼē noa manaʼo peʼapeʼa tāʼu i ʼite ’o tō rātou ïa hinaʼaro ’ia faʼaea rātou i te haʼamāuruuruhia ’ia ti’a ia rātou ’ia hoʼi i te ʼohipa tā rātou e rave ra. ʼUa faʼatere faʼahou te peresideni titi i tāna mātini ʼeʼe ʼe ʼua ʼohipa i niʼa i te hōʼē tumu rāʼau tei marua, ʼe te huti ra te hōʼē ’episekōpo i te mau ’āmaʼa rāʼau ’a haere ai mātou i tō mātou pere’oʼo uira nō te haere e fārerei i te tahi atu pupu tauturu.
’A faʼaātea ’ē atu ai mātou nō te tahi atu vāhi, taua mahana ra, ’ua haere mai te hōʼē taʼata i te pere’o’o, ’īriti iho ra i tōna taupoʼo ʼe ’ua haʼamāuruuru mai ra nō te mau taʼata tei hōroʼa i tō rātou taime. ʼUa parau ’oia : « E ʼere au i te hōʼē melo nō tā ʼoutou ʼēkālesia. Mea māere mau te ’ohipa tā ʼoutou i rave nō mātou. ’Ia ha’amaita’i mai te Atua ia ʼoutou ». ʼUa ʼataʼata te melo FMMH e tiʼa ra i pihaʼi iho iāna i roto i tōna piriaro re’are’a ʼe ’ua haʼapeʼe aʼera tōna tapono, mai te mea ra ē ʼaita ʼoia e hinaʼaro e ’ia haʼapoupouhia ʼoia.
ʼA haere ai te mau taʼata nō Georgia mai e tauturu i teie taʼata tei māere roa i teie ʼohipa tei ravehia, e rave rahi ïa hānere Feiā Moʼa i te mau Mahana Hopeʼa nei nō te vāhi tei vāvāhihia i Floride tei tere e rave rahi kilometera i te ātea i ’apato’a i te tahi atu tufaʼa i Floride tā rātou i fa’aroʼo ē ’ua pēpē rahi roa.
I taua mahana ra, ʼua haʼamanaʼo vau, ’e ʼua māramarama maitaʼi a’e i te mau parau tohu a te peropheta Iosepha Semita : « E’ita te hō’ē ta’ata ’o tei ’ī i te aroha o te Atua e māuruuru i te ha’amaita’i noa i tōna iho ’utuāfare, e tere rā ’oia nā te ao ato’a nei, ma te ’ana’anatae i te ha’amaita’i i te tā’āto’ara’a o te nūna’a ta’ata » (Te Mau Ha’api’ira’a a te Mau Peresideni o te ’Ēkālesia : Iosepha Semita [2007], 484).
Tē ʼite nei tātou i taua aroha ra i roto i te oraraʼa o te Feiā Moʼa i te mau Mahana Hopeʼa nei i te mau vāhi atoʼa. I te mau taime atoʼa e vai ra te hōʼē ’ati rahi i te mau vāhi atoʼa nā te ao nei, e hōroʼa te Feiā Moʼa i te mau Mahana Hopeʼa nei i tō rātou taime i te mau tautoʼoraʼa tauturu a te ʼĒkālesia. E mea varavara te tītaura’a ’ia piʼi atu. ʼOia mau, i te tahi mau taime, e tiʼa ia mātou ’ia ani i te feiā hinaʼaro e tauturu ’ia tīaʼi riʼi nō te tere atu i te vāhi ’ati, ē tae noa atu ʼua ineine te feiā e arataʼi ra i te ʼohipa i te fāriʼi mai ia rātou.
Taua hia’ai ra ’ia haʼamaitaʼi ’o te hotu ïa nō te feiā tei noaʼa ia rātou te hōʼē ʼiteraʼa pāpū nō Iesu Mesia, nō tāna ʼevanelia, nō tāna ʼĒkālesia tei faʼahoʼihia mai, ʼe nō tāna ra peropheta. Nō reira hoʼi te nūnaʼa o te Fatu e ʼore ai e fēʼaʼa ʼe e ʼore ai e mataʼu. Nō reira hoʼi te mau misiōnare e hōroʼa ai i tō rātou taime nō te tāviniraʼa i te mau vāhi atoʼa nā te ao nei. Nō reira hoʼi te mau metua e pure ai ʼe tā rātou mau tamariʼi nō vetahi ’ē. Nō reira hoʼi te feiā faʼatere e ani ai i tā rātou feiā ʼāpī ’ia fāriʼi i te aniraʼa a te peresideni Monson ’ia tuatāpapa hōhonu i te Buka ʼa Moromona. E tae mai te hotu ʼeiaha nā roto noa i te tiʼaororaʼa a te feiā faʼatere nā roto atoʼa rā i tō te feiā ’āpī e te mau melo ʼohipara’a i ni’a i te faʼaroʼo. E faʼatupu mai te faʼaʼohiparaʼa i taua faʼaroʼo ra ’o te tītau i te faʼatusiaraʼa, i te tauiraʼa o te ʼāʼau tei faʼatiʼa ia rātou ’ia ʼite i te aroha o te Atua.
Teie rā e vai taui noa tō tātou ʼāʼau ’a tāmau noa ai tātou i te peʼe i te aʼo a te peropheta. Mai te mea e faʼaea tātou i te tāmata i muri noa mai i te hōʼē tautoʼoraʼa pūai, e mōrohi atu te tauiraʼa.
ʼUa faʼarahi te Feiā Moʼa i te mau Mahana Hopeʼa nei i tō rātou faʼaroʼo i te Fatu ia Iesu Mesia, i roto i te Buka a Moromona ʼei parau nā te Atua, ʼe i roto i te faʼahoʼi-fa’ahou-raʼa-hia mai te mau tāviri nō te autahuʼaraʼa i roto i tāna ʼĒkālesia mau. ʼUa hōroʼa mai taua ʼiteraʼa rahi ra ia tātou i te itoito rahi aʼe ʼe te haʼapeʼapeʼaraʼa nō te tahi atu mau tamariʼi a te Atua. Tera rā e rahi atu ā te tītauraʼa o te mau fifi ʼe te mau taime e vai nei i mua ia tātou.
Eʼita e nehenehe ia tātou ’ia ʼite ātea i te mau huʼahuʼaraʼa, ʼua ʼite rā tātou i te mau mea e tupu i te mau mahana i muri nei. ʼUa ʼite tātou ē i te mau mahana hopeʼa, e ʼārepurepu te ao nei. ʼUa ʼite tātou ē i rotopū i te mau huru peʼapeʼa ʼo te tupu mai, e arataʼi te Fatu i te Feiā Moʼa haʼapaʼo i te mau Mahana Hopeʼa nei ’ia ʼāfaʼi i te ʼevanelia a Iesu Mesia i te mau fenua atoʼa, i te mau nūnaʼa atoʼa, i te mau reo atoʼa, ʼe i te mau taʼata atoʼa. ʼE ʼua ʼite tātou e riro te mau pipi mau a te Fatu ʼei feiā parau tiʼa ʼe e ineine hoʼi rātou i te fāriʼi iāna ’ia hoʼi faʼahou mai ʼoia. ’Eiaha tātou e mata’u.
Nō reira, ’a patu rahi ai tātou i te faʼaroʼo ʼe te itoito i roto i tō tātou ʼāʼau, e rave rahi atu ā ïa te mea tā te Fatu e tītau ia tātou ’ia rave—ʼe i te mau uʼi i muri mai ia tātou. E tiʼa ia rātou ’ia pūai ʼe ’ia itoito nō te mea e rave rātou i te mau ʼohipa rahi aʼe ’e te paʼari aʼe, i te ʼohipa tā tātou i rave na. ’E e faʼaruru rātou e rave rahi mau pātoʼiraʼa nā roto mai i te ʼenemi o tō tātou vārua.
ʼUa hōroʼa mai te Fatu i te ’ēʼa i te ʼanaʼanataera’a ’a haere ai tātou i mua : « ’A hi’o mai iā’u nei i tō mau mana’o ato’a na ; ’eiaha e fē’a’a, ’eiaha e mata’u » (PH&PF 6:36). ʼUa parau mai te peresideni Monson ia tātou e nāhea ’ia rave i te reira. E tiʼa ia tātou ’ia feruri hōhonu ʼe ’ia faʼaʼohipa i te Buka a Moromona ʼe te mau parau a te mau peropheta. Pure tāmau noa. Ti’aturi i te mau parau. Tāvini i te Fatu mā tō tātou ʼāʼau atoʼa, tō tātou pūai atoʼa, tō tātou manaʼo atoʼa, ʼe tō tātou itoito atoʼa. E tiʼa ia tātou ’ia pure mā te pūai atoʼa o tō tātou ’ā’au nō te hōroʼaraʼa o te aroha, te aroha mau o te Mesia (hiʼo Moroni 7:47-48). ʼE i niʼa atu i te mau mea atoʼa, e tiʼa ia tātou ’ia tāmau noa ʼe ’ia tāpeʼa noa i te peʼe i te aʼo a te peropheta.
’Ia paʼari anaʼe te ’ēʼa, e nehenehe tātou e tiʼaturi i ni’a i te fafauraʼa a te Fatu—te fafauraʼa tā te peresideni Monson i faʼahaʼamanaʼo mai ia tātou ’a faʼahiti pinepine ai ʼoia i teie mau parau a te Faʼaora : « ’E ’o ’oia ’o te fāri’i mai ia ’outou na, ’ei reira ato’a ia vau, nō te mea e haere au nā mua i tō ’outou mata. E vai ho’i au i tō ’outou pae ’atau ’e i tō ’outou pae ’aui, ’e i roto ho’i tō’u Vārua i tō ’outou mau ’ā’au, ʼe tā’u mau melahi ho’i e ’ati noa a’e ia ’outou na, ’ia ha’amara’a mai ia ’outou i ni’a » (PH&PF 84:88).
Tē faʼaʼite pāpū atu nei au ē e haere te Fatu i mua ia ʼoutou i te mau taime atoʼa ’ia rave ʼoutou i tāna ʼohipa. I te tahi taime e riro ʼoutou ’ei melahi tā te Fatu e tono nō te faʼateitei ia vetahi ’ē. I te tahi taime e hāʼatihia ’outou e te mau melahi nō te faʼateitei ia ʼoutou. E fāriʼi tāmau rā ’outou i tōna Vārua i roto ia ʼoutou, mai tei fafauhia ia ʼoutou i te mau taime atoʼa nō te ʼōroʼa. E fafau ato’a ’outou ’ia ha’apa’o i tāna mau fa’auera’a.
I te mau mahana i muri nei te mau mahana maitaʼi roa aʼe nō te bāsileia o te Atua i niʼa i te fenua nei. E haʼapūai te pātoʼiraʼa i tō tātou faʼaroʼo ia Iesu Mesia, mai tei ravehia mai te tau mai ā o te peropheta Iosepha Semita. E upoʼotiʼa mau iho ā te faʼaroʼo i mua i te mataʼu. E tupu te tahōʼēraʼa nā roto i te tiʼa-ʼāmui-raʼa. ’E e faʼaroʼo ʼe e pāhono te hōʼē Atua here i tā ʼoutou mau pure nō te feiā i roto i te ’ati. Eʼita roa atu ʼoia e ti’aruhe ʼaore rā e tāʼoto roa.
Tē faʼaʼite nei au i tōʼu ʼiteraʼa pāpū ē tē ora nei te Atua te Metua ʼe tē hinaʼaro nei ʼoia ’ia hoʼi ʼoutou i te fare iāna ra. Teie te ’Ēkālesia mau a te Fatu o Iesu Mesia. ’Ua ’ite ’oia ’ia ’outou, ’ua here ’oia ’ia ’outou, ’e tē tīa’i nei ’oia ia ’outou. ’Ua ʼaufau ʼoia nō tā outou mau hara ʼe tā’u nei, ’e te mau hara a te mau tamariʼi atoʼa a te Metua i te Ao ra. Tē peʼeraʼa iāna i roto i tō ʼoutou oraraʼa ʼe i roto i tā ʼoutou tāviniraʼa ia vetahi ’ē ’o te ’ēʼa anaʼe e tae atu ai i te ora mure ʼore.
Tē faʼaʼite pāpū atu nei au i te reira ʼe tē vaiiho atu nei au ia ʼoutou i tāʼu haʼamaitaʼiraʼa ʼe tōʼu here. I te i’oa mo’a o Iesu Mesia ra, ’āmene.