Dehr Masak Wia me Mwahu
Kauno masanihong kitail me ansou me kitail kin kesihnenkihda pwoson pohn Sapwellime paipalapo, peikasal oh masak kin tikitikila; ah ineng en wia me mwahu kin lalaudla.
Maing riei ko, I kapakapki Ngehn en Kauno en kak ketiket rehtail ni ahi pahn padahk rahnwet. Ahi mohngiong direkihla ahi kaping laud ong Kauno, me sapwellimaniki mwomwohdiso wet, pepehm mwahu me kitail alehsang ni kapakap akan, padahk kaselel kan, oh koul ngilamwahu kan en kapokon wet.
Eipreil samwalahro, Preseden Thomas S. Monson padahngki padahk pwoat me kamwakidada mohngiong kan nan sampah, pil iangahki ahiet. E padahngki manaman en Pwuken Mormon. E koangngoangekin kitail en onopki, medemedewe, oh alasang padahk kan. E inoukiong kitail ma kitail pahn katohrehla ekis ansou nan ehu ehu rahn ononopki oh medemedewe oh kapwaiada Sapwellime kosonned akan me mihmi nan Pwuken Mormon. Kitail pahn ahniki kadehde kehlail en mehlel wet, oh wahn atail kadehde en Krais ieiaso pahn sewesei kitail ansou en kahpwal akan. (Tehk “The Power of the Book of Mormon,” Liahona, May 2017, 86–87.)
Duwehte ekei kumwail, I kin rong mahsen en soukohp duwehte kepihtien Kauno ong ie. Oh, pil duwehte ekei kumwail, I koasoanehdi ien peikiong mahsenko. Sangete ni ahi pwulopwul I iang kadehde me pwuken Mormon mehlel oh e wia mahsen en Koht, oh me Koht oh Sapwellime Iehroso Pwarehng Joseph Smith oh mahsaniheng, oh me wahnpoaron en mahs oko kapwuredohng Soukohp Joseph Smith kih kan en prihsduhd nan Sapwellimen Kauno Mwomwohdiso.
Dahme patehng kadehdeo, I kin wadek Pwuken Mormon rahn koaros daulihier sounpar 50[limeisek]. Eri mwein, I kak medewe me mahsen sang Preseden Monson ong emen tohrohr. Met, duwehte pil ekei kumwail, I pehm sapwellimen soukohpo sawas oh ah inouo lukehiongie ien wiahda doadoahk mwahu. Me tohto kumwail wiahier dahme I wiahier: poadidiong kapakap, poadidiong medemedewe laud pwuhk sarawi, oh nannantihong papah Kauno oh mehtei kan ong Ih.
I pereniki ma kitail wia met, duwehte ekei kumwail, pwe dahme soukohpo inoukiong kitail. Ekei sang nan pwungatail me rong ah kaweid kaselelo kehn Ngehn Sarawi laud sang mwoweo. Atail manaman en powehdi kasongosong lalaudla oh atail pwoson kehlailla duwen Sises Krais me iasadao, Sapwellime rongamwahu, oh Sapwellime Mwomwohdiso.
Nan sampah ansouwet suwed lalaudlahr, irailkan me arail kadehde wie lalaudla sohte pahn peikasal oh masak oh pahn wadohng kitail pepehm kan en peren. Kapwaiada kaweid sang Preseden Monson kahrehda soahng kesempwal riau ongie: Keieu, Ngehn me e inoukio kalaudehla pepehm en kopwoaroapwoarki dahme mihmi mwohi, mehndahte kahpwala akan eh lalaudla nan samapah. Oh, keriau, Kauno ketkihongie—oh kumwail—Sapwellime limpoak ong irail akan me mihla nan apwal. Kitail ahneki laudlahn ineng en doarehla meteikan. Inengo me poahson en sapwellimen Preseden Monson doadoahk oh padahng kan.
Inou en limpoak en Kauno ong mehteikan oh dengang ong Soukohp Joseph Smith oh Oliver Cowdery ansou me ara doadoahk kan mwohra inenen laud. Kauno masanih me anahne dengang pahn kohsang ni arail pwoson oh wiahki Ih arail paipalap.
“Dehr masak wia me mwahu, nei pwutak ko, dahme kumwail padokedi, ihme kumwail pahn dolung; eri ma kumwail padokedi me mwahu kumwail pahn dolung me mwahu.
“Eri, dehr masak, kisin pelin sihpw; wia me mwahu; mweidehng sampah oh ehl en uhkiong uhk, pwe ma ke poasoanda pohn ahi paipalap, re sohte kak kaleweiukedi.
“Kilang, I sohte kalokei kumwail; kohwei oh dehr pwurehng wiahda dihp; kaunopada en wiahda doadoahk me I nda ken wia.
“Kilengdohngie ni madamadau koaros; dehr peikasal, dehr masak.
“Kilang lipwen ohla kan nan pengpengeiet, oh lipwen metehkan nan pehikat oh nehikat; ahniki pwoson, kapwaiada ahi kosonned kan, oh ke pahn sohsohki wein nanleng”(D&C 6:33–37).
Kauno mahsanihong Sapwellime sounkaweid kan en Mwomwohdiso wet, oh E masanihong kitail, me ansou me kitail pahn kesinenkihda pwoson pohn Sapwellime takain pwukekeimw, peikasal oh masak kin sohrala; ineng en wiahda me mwahu kin lalaudla. Ni atail pahn alehda luhk me Preseden Monson wiahiong kitailo en katengediong nan atail mohngiong kan atail kadehde Sises Krais, kitail kin alehdi manaman, ineng kehlail, oh dengngang en kohwei oh sewesehda mehtei kan sang atail pahn nsenohkihte pein kitail.
I kilangehr soangen pwoson oh dengang wet pak tohto ansou me irail Souleng en Imwin Rahn-akan kin sohpai kasongosong apwal akan. Ni karasepe, I mihmi Idaho ansou me Dam en Tetono ohlahu nan June 5, 1976. Lapalahn pihl me kuspeseng. Aramas kid samwa me peisang ni imwarail kan. Ihmw kid samwa oh pesnes tohto ohla. Me kopwuriamwei, malaulau sang aramas 15[ehk me mehla.
Dahme I kilang wasahu, I kilang me sohte lipilipil en dahme wihwiawi Souleng en Imwin Rahn-akan kin tengetengediongete arail kadehde Sises Krais. Pwehki re sohte ahniki peikasal E mahmasanih irail, oh irail sohte kin masak. Irail kin pohnsehsehla arail kahpwal akan oh sewesehda mehtei kan. Oh re wia mepwukat pwehki limpoak en Kauno, re wia ni soh pweipwei.
Ehu karasaras, ansou me Dam en Teton ohla, pwopwoudieu iang Mwomwohdiso wet wie seiseiloak, mwail kei dohsang ni imwarahu. Ni ansou me ira rongadahr rohngo nan radio, ira mwadangete pwurala Rexburg. Ira sohte kohla nimwarahu pwe ira en kilang ma e sou ohla, ahpw ira kohla oh raparapahki ara bishopo. E mihmi nan ihmw me irail kin wiahki wasahn recovery. E mihmi mwo kihkiong kaweid sounsawas kid samwa me kohdo iang skuhl bus oaongoahng ko.
Pwopwoudo aluhla rehn bishopo oh nda, “Se ahpwtehn pwurodo. Bishop, Iawasa se pahn kohla sawas ie?” E kihong ira eden peneinei kei. Pwopwoudo alialu nan pwelmatak oh pil kolahng ni ehu ihmw ong ni ehu ihmw. Ira doadoahk sang nin rahn lel nihpwong. Mwuri ira ahpw koamoal pwe ira en kohla kilang imwarahu. E iangalahr lapakehu, oh sohte mehkot ira pahn kamwakele. Ira ahpw mwadangete pwurala rehn ara bishopo. Ira idek, “Mie me ke mwahuki sen pil sewese?”
Manaman en dengang oh limpoak wet—limpoak unsek en Krais—kin wihwiawi nan sounpar koaros oh wasa koaros nan sampah. Kahpwal en kaloke souleng oh kasongsong kan pil wiawi nan mwein Soukohp Joseph Smith nan Missouri. E wiawi ansou me Brigham Young pil kahlwa mwekido sang Nauvoo oh malipe souleng kan en kohpeseng wasah kan nan -palikapi en United State pwe irail en sawas pene kawada wein Zion
Ma ke pahn wadek soaipen mwekmwekid en irail paionihr ko, ke pahn kilang manaman en pwoson ah kin kihsang peikasal oh masak. Oh ke pahn wadekada irail souleng kan me kin pwilikihda arail nsenamwahu pwe irail en sewesehda mehteikan ong Kauno, mwohn arail kin pwurodohng neirail sihpw kan de arail wasa me ohlah kan.
I pil kilang soangen manamano rahnteiko mwurinte Hurricane Irma me wiawi nan Puerto Rico, Saint Thomas, oh Florida, wasa me tohn Mwomwohdisoh patehng mwomwohdiso teikan, ekei pwihn sang wasahn kousoan akan, oh tohn wehi teikan ni arail wie kamwkamwakelo.
Duwehte kempoakepahi kan me mihmi nan Rexburg, mie pwopwoud sohte iang mwomwohdisoh ieu nan Florida me nantiohng ira en sewese mehteikan mendakihla ara anahne sawas ong pein ara wasahu. Ansou me tohn Mwomwohdisoh sawsawas kihsang lapalahn tuhke riau me perehla wasa me warara sdohsa kin tangiehu, pwopwoudo nda me ira udahn peren ihme karehda ara men kohla oh sewese mehtei kan, pwe ira ahniki pwoson me Kauno pahn ketkidohng ira sawas me ira anahne ohng imwarahu. Ohlo koasoiahda me mwohn tohn Mwomwohdisoh ah pahn kohdo seweseira, ira kapakap. Ira alehdi pasapeng me mie me pahn kohdo seweseira. Met wiawi awahkei mwurin ara kapakapo.
I pil rong rohng ehu me dene, aramas akan pil tepier ekerki tohn Mwomwohdisoh me kin likawih Seht me Helping Hands ntingiehu “Tohnleng Oangoahng.” Emen lih en Mwomwohdisoh wahla were sdohsahu pwe en sawaski, eri ohl me re sewsewesehu kawewehda met “pali ngene kehn mehkot” ansou me irail aramas likou oangoahng kan kikihsang tuhke kan likin imwehu, e nda irail “koulkiongie koul me pid wia Sapwellimen Koht seri.
Pil emen nan—Florida me pil kaidehn tohn Mwomwohdisoh—Souleng kan pil kohla ni imwehu pwe irail en sewese re lel mwo ansou me e kamwkamwakele likin imwehu oh udahn e pwangadahr, karakaradahr, oh kerenieng e pahn sengiseng. Sounsawas ko karehieng, ah nda, “manaman ehu met.” Irail papah kaidehnte ni arail inangih ahpw irail kin kokouruhr oh pil sinsirei, oh irail pil sohte anahne pweipwei.
Iet me wiawi, ninsoutik en rahnkaunopo, I pwarek pwihn ehu Souleng en Imwin Rahn-akan nan Florida. Irail likauih seht oangoahng kei me nting powe iei “Helping Hands” me koasoandi sang Mwomwohdisoh. Irail uhdier pwe irail en itik pehi kat. Irail nda me towe meh 60[wenehk] sang nan arail stake o nan Georgia koasoanehdi me irail pahn kohdo iang sawas nan Florida.
Irail mwesel sang Georgia kuloak 4:00 nisourahno, draipkihla awahkei, doadoahk sang nin rahn lel ni pwong, oh koasoanehdi me irail pil pahn sawas mandahu.
Irail kawehwehda ni arail sirei oh nsenamwahu. Ihte me I kilang me irail men wia en uhdier kalahngan me wihwiawiheng irail pwe irail en kak pwuralahng arail doadoahk. Stake preseden o kamauradahr nah misihn en rasaraso oh resrese tuhkeh kan me tipwedi ah bishop kihkihsang rahntuhke laud kan ansou me se douda nan warat sdohsahu sen uhd kohla rehn ehu pwihn en sawas.
Mandao ni aht mwekidiei sang mwo, ohl emen aluhdo ni sdohsao, kihsang ah lihosaropo, oh kalahnganki pwihn en sawaso. E nda, “Kaidehn ngehi tohn amwail mwomwhdisohn. I sohte kamehlele dahme kumwail wiaiong kitehr. Koht kapai kumwailda.” Soun sawas en LDS me karanihkit ko sirei oh kamwekid pwopwe ko, e mwomwen nda sohte anahnepen kaping.
Mwurin ansou kis sounsawas kan sang Georgia kodohr sewese ohl me sohte kamehleleo, tohn mwomwohdisoh me epwiki samwa sang wasa ohla laud kan nan Florida iang kohla mwail epwiki samwa ekei wasa nan Florida me irail rong me e uhdahn ohla.
Rahno, I tamataman, oh esehla mwahu, mahsen en kokohp en Soukohp Joseph Smith: “Aramas emen me audaudkihda limpoak en Koht, sohte kin nsenohkihte kapai en ah peneinei kelehpw, ahpw pil kin sewese sampah pwon, nsenohki kapai en aramas teikan” (Padahk kan en preseden en Mwomwohdiso wet: Joseph Smith [2007], 426).
Se kin kilang limpoak nan mour en tohn Mwomwohdisoh wasa koaros. Ehu ehu ansou e kin mie ansou en kahpwal nan sampah, Souleng kan kin kihda mwohni oh sawas ong nan pelien sawas en Mwomwohdiso. Se sohte kin anahne peki mahs arail sawas. Ni mehlel, ong ekei kemwekid, kitail pahn peki rehn irail me kin sawas kan en awih kohla wasahu lao irail me kawkaweid doadoahko pahn kaunopada pwe en aleirailda.
Soangen ineng en mehn sawas pwukat kohsang aramas me kin alialehdi arail kadehde en Sises Krais, Sapwellime rongamwahuo, Sapwellime Mwomwohdiso kopwurpwurdohu, oh Sapwellime soukohp. Ihme kahrehda Sapwellimen Kauno aramas sohte kin peikasal oh masak. Ihme karehda misineri kan wie papah soh pweipwei wasa koaros nan keimw en sampah. Ihme karehda nohno pahpa oh seri kan ehupene oh kapakapki mehtei kan. Ihme kahrehda sounkaweid kan kin kaweidki neirail me pwulopwul kan en kapwaiada kaweid kan sang rehn Preseden Monson, onopki Pwuken Mormon oh momourki. Wah sohte pahn kohsang rehn soun kaweid kan ar pekpek, ahpw e pahn kohsang en pwulopwul ko ar pahn mwekidki pwoson. Ni ahnsou me re mwekidki pwoson oh tounmeteikihla pein irail, mohngiongarail kan wekila kahrehiong ar pehm limpoak en Koht.
Ahpw, atail mohngiong kan, pahn wekilahte ma kitail ideidawehnte kaweid en soukohpo. Ma kitail song en uhdi ansou kis oh pil pwurehng, wekideklahu pahn sohla.
Souleng en Imwin Rahn-akan kin kakairada arail pwoson sang ni wadek Pwuken Mormon ni eh wia mahsen en Koht, oh kopwurpwurdohn kih kan en prihsduhdo nan Sapwellime Mwomwohdiso mehlelo. Atail kadehde kin lalaudla kin kahrehiong kitail komwad oh nsenohki Sapwellimen Kauno serih kan koaros. Ahpw kasongsong oh pwukoah kan pahn wie lalaudla.
Kitail sohte kak kilang soahng kan mwohtail, ahpw kitail kilangehr kilel sansalo. Kitail esehier me ni imwin rahn akan sampah pahn pingada. Kitail esehier me rotorot en kahpwal pahn kohdo, Kauno pahn kaweid Sapwellime Souleng en Imwin Rahn-akan en wahwei rongamwahu en Sises Krais ong wehi koaros, peneinei kan, lokaia koaros, oh aramas koaros. Oh kitail esehier me Sapwellimen Kauno tohnpadahk mehlel men pahn warohng oh kaunopada en alehda Ih ni ansou me E pahn pwurehng ketdo. Kitail sohte anahne masepwehk.
Eri, wen laud en atail ahniki pwoson oh dengang nan atail mohngiong kan, Kauno pil kasik soahng laud sang kitail—oh sang ehu dih lel ehu dih mwuritail. Irail pahn anahne kehlail oh komwad pwe irail pahn wia mehkot laud oh apwal sang dahme kitail wiahier. Oh irail pahn sohpai lalaudlahn soahng suwed kan sang rehn imwintihti en palingenitail kan.
Ahl en kekeirda ni atail kohkohwei mwohtail kohsang rehn Kauno: “Kilengdohngie ni madamadau; dehr peikasal, dehr masak” (D&C 6:36). Preseden Monson padahkiong kitail ia mwomwen atail pahn wia. Kitail uhdahn pahn medewe oh alasang Pwuken Mormon oh mahsen en soukohp. Kitail anahne kapakap ni ngidingid pwe kitail en kak ale kisakis en limpooak unseko, limpoak unsek en Krais (tehk Moroni 7:47–48). Pohnangin mepwukat koaros iei en nannantihla oh sohte udihsang idawehn kaweid en soukohp.
Ansou me ahlo kihn apwal, kitail kak koapwoaroapwoarki Sapwellimen Kauno inou—inou me Preseden Monson katamankin kitail ni ansou me e koasoaia mahsen akan en Sises Krais: “Irail kan me aleiukada, I pahn pil aleirailda, oh I pahn tiengla mwohmw. I pahn mih ni palimwaun oh pali meing, oh Ngehni pahn mihmi nan ahmw mohngiong, oh nei tohnleng kan pahn kapil kumwail pene pwe irail en pwok kumwail da” (D&C 84:88).
I kadehde me Kauno kin ketla mwohmwail ansou koaros me kumwail ieiang Sapwellime seiloak. Ekei pak kumwail me pahn wia tohnleng me pekederdohsang rehn Kauno pwe en sewese mehteikan. Ekei pak e kak kowe me tohnleng kan kapil pene pwe irail en seweseiukada. Ahpw ansou koaros Sapwellime Ngehno pahn ketiket nan ahmwail mohngiong. Me duwehte inou kan me wiawihda nan ansou en kamadipw sarawi koaros. Ihte me ke pahn wia kapwaiada Sapwellime kosonned akan.
Rahn kaselel kan ong wein Koht pohn sampah mihmi mwohtail. Wiewia mwahu kin kakehlailiala atail pwoson Sises Krais, duwehte me wiawi nan mwein Joseph Smitho. Pwoson kin kalapw kaluhsih masak, Sawas pene kin wiahda ehupene. Oh amwail kapakapki irail kan me anahne sawas Samatail Nanleng kin ketin koaronge oh sapeng. E sohte kin ketin lisoi E pil sohte kin meirla
I kiong kumwail ahi kadehde me Koht Sahm ieias men kumwail en pwurala Reh. Ih Mwomwohdiso mehlel en Sises Kraiso met. E mwahngih ihs kumwail, E poakohng kumwail, oh E kin ketin mahmasanih kumwail. E ketin tomwkihla dipamwail kan oh dipen Sapwellimen Sahm Nanleng seri koaros. Idawehn Ih nan amwail mour oh ni amwail papah mehteikan ihte ahl en kolahng mour soutuk.
I kiong kumwail ahi kadehde me Koht Sahm ieias men kumwail en pwurala Reh. Ih Mwomwohdiso mehlel en Sises Kraiso met. E mwahngih ihs kumwail, E poakohng kumwail, oh E kin ketin mahmasanih kumwail. E ketin tomwkihla dipamwail kan oh dipen Sapwellimen Sahm Nanleng seri koaros. Idawehn Ih nan amwail mour oh ni amwail papah mehteikan ihte ahl en kolahng mour soutuk.