Na iVola i Momani : Ena Vakaivei Beka Nomu Bula Kevaka e Sega?
Au vakadinadiinataka mai vu ni yaloqu taucoko na iVola i Momani vakataki koya ga e vakavulica vei keda me baleti Jisu Karisito kei na Nona kosipeli ena dua na ivakarau cakamana.
Ena 1986, au a sureti meu veivakavulici ena dua na ka bibi ena dua na univesiti mai Accra, Ghana. Au a sota e kea kei na vica na tamata dokai, oka kina e dua na tui ni yavusa mai Aferika. Ni keirau veitalanoa ni se bera na vuli, a vosa tikoga mai vei au na tui mai vua nona daunivosa, oti qai vakadewataka lesu noqu vosa. Au sauma vua na daunivosa, qai vakadewataka lesu o koya na noqu vosa vua na tui.
Ni oti noqu veivakavulici, a lako mai vakadodonu vei au na tui, ia ena gauna oqo sa sega na nona daunivosa. Au kidacalataka, ni vosa mai vaka-Valagi vei au, na vosa vaka-Valagi taucoko—nona vosa vaka-Valagi na Ranadi, meu vakuria!
E veilecayaki vakalailai na tui. “O cei sara mada o iko?” e taroga mai.
Au sauma, “O au e dua na iApositolo tabaki i Jisu Karisito.”
E taroga na tui, “Na cava e rawa ni o vakavulica vei au baleti Jisu Karisito?”
Au sauma ena dua na taro: “Meu taroga mada se cava o sa kila rawa tiko me baleti Koya?”
E rawa ni kilai ena nona sauma na tui ni o koya e dua na gonevuli vinaka ni iVolatabu ka dau lomana na Turaga.
Au qai taroga kevaka e kila na veiqaravi a vakayacora o Jisu Karisito vei ira na kai Amerika makawa?
Me vaka au a namaka, e sega.
Au vakamacalataka ni oti nona Vakamatei ena Kauveilatai na iVakabula kei na nona Tucake Tale, a lako mai vei ira na tamata e Amerika makawa, ka vakavulica kina na Nona kosipeli. A tauyavutaka Nona Lotu ka kerei ira na Nona tisaipeli me ra volaitukutukutaka toka na Nona veiqaravi vei ira.
“Na ivolatukutuku oya,” au tomana, “sai koya na ka keimami kila ni iVola i Momani. E dua tale na ivakadinadina kei Jisu Karisito. E ivolanikalou itokani ni iVola i Momani.”
Ena gauna oqo sa tekivu me taleitaka sara mai vakalevu na tui. Au vuki vua na peresitedi ni kaulotu keirau salavata tiko ka taroga kevaka e tiko e dua na nona iVola i Momani. A dreta mai nona katotuberi e dua.
Au cega ki na 3 Nifai wase 11, ka keirau wilika vata kei na tui na ivunau ni iVakabula vei ira na Nifai. Au mani solia vua na iVola i Momani oya. A vakaicili tawamudu tu ena noqu vakasama kei na yaloqu na nona vosa: “E rawa beka ni o solia vei au na daimani kei na rupi, ia e sega ni dua na ka e talei cake vei au mai na ikuri ni kilaka oqo baleta na Turaga o Jisu Karisito.”
Ni oti nona vakila na mana ni nona vosa na iVakabula ena 3 Nifai, a kaya kina na tui, “Kevaka au na saumaki mai ka lewena na Lotu, au na kauta mai kei au na noqu yavusa kece.”
“Isa, kemuni na Tui,” au sauma, “e sega ni dau vaqori. Na saumaki mai e ka ni tamata yadua. Na iVakabula a veiqaravi yadudua vei ira na Nifai. Era sa ciqoma na tamata yadua e dua na ivakadinadina bula kei na ivakadinadina ni kosipeli i Jisu Karisito.”
Kemuni na taciqu kei na ganequ, e vakaivei beka na talei ni iVola i Momani vei kemuni? Kevaka e soli vei kemuni na daimani se na rupi se na iVola i Momani, o cei o na digitaka? Ka dina, o cei sara mada e cecere cake na kena yaga vei iko?
Ena soqoni ena mataka ni Sigatabu ena koniferedi raraba ni Epereli 2017, a vakamasuti keda yadua kina o Peresitedi Thomas S. Monson “me da vulica ena masumasu ka vakasamataka vakatitobu na iVola i Momani e veisiga yadua.” E lewelevu era sa cakava nona vakamamasu na parofita.
Meu kaya mada ni sega ni dua vei keirau kei Riley yabaki walu e kila ni dua e tabaki keirau tiko. Raica ni wilika tiko o Riley na iVola i Momani ena veivuke ni dua na ivakatakilakila ni ivola “I Am a Child of God.”
E dua na ka mana e dau yaco ni segata e dua na luve ni Kalou me kila e levu cake na ka me baleti Koya kei na Luvena Daulomani. E sega tale ni dua na vanua e vakavulici kina vakamatata ena qaqa na dina eso oqori me vaka na iVola i Momani.
Me tekivu mai nona veibolei o Peresitedi Monson ena ono na vula sa oti, au sa tovolea meu muria nona ivakasala. Ena maliwa ni veika tale eso, au sa tuva toka na veika ebaleta na iVola i Momani, na veika e vakadeitaka,na veika e saqata,na veika e vakataucokotaka,na veika e vakamatatataka,kei na veika e vakatakila. Niu tirova na iVola i Momani ena iloilo eso oya sa dua na cakacaka vakavure vuku ka veivakauqeti! Au vakatura vei kemuni yadua.
Ena ono na vula sa oti oqo, au sureta talega eso na ilawalawa duidui—okati kina o ira na Veitacini iLiuliu ena Kuoramu ni Le Tinikarua, daukaulotu mai Chile, kei ira na peresitedi ni Kaulotu kei ira na watidra era soqoni mai Argentina—me veivosakitaka e tolu na taro veiwekani kau na vakauqeti kemuni mo ni vakasamataka nikua:
Matai, ena vakaivei beka nomu bula kevaka e sega na iVola i Momani Karua, nacava beka o na sega ni kila? Kei na ikatolu, na cava ena sega vei iko?
Na isaunitaro bulabua mai vei ira na ilawalawa oqo e lako vakadodonu sara mai yalodra. Oqo e vica na ka era a tukuna mai.
Ke sega na iVola i Momani, au na veilecayaki me baleta na iduidui ni ivakavuvuli kei na vakasama baleta e vuqana ka Au na vaka tu ga ena gauna au se bera ni kunea kina na Lotu, niu se vakasaqara voli na kilaka, vakabauta kei na inuinui.”
E dua tale e kaya: “Au na sega beka ni kila na itavi e rawa ni qarava na Yalo Tabu ena noqu bula.”
E dua tale: “Ena sega ni matata sara vei au na noqu inaki e vuravura!”
E dua tale na saumitaro mai e kaya: “Au na sega beka ni kila ni da na toso tikoga ni oti na bula oqo. Ena vuku ni iVola i Momani, au kila ni tiko dina na bula ni oti na mate. Sai koya oqori na ituvuki ni noda cakacaka.”
Na iotioti ni vakasama oqo e vakavuna noqu vakasamataka lesu na noqu bula ena vicavata na yabaki sa oti niu se dua na vuniwai vou ni veisele. E dua na itavi dredre e dau colata e dua na dauveisele, ni yaco mai na kena gauna, sai koya me tukuna vei ira na matavuvale ni sa takali e dua na daulomani. Ena dua na valenibula au a cakacaka kina, a tara e dua na rumu sosovauvau na lalaga me baleta vakatabakidua na kena tukuni vei ira na matavuvale na itukutuku vakaoya. E kea, era vakacevuya kina eso na nodra rarawa ena nodra cumuta na lalaga sosovauvau oya. Au dau gadreva meu vakavulica vei ira oqori ni mate, e dina ni dau dredre vei ira na daulomani era bula tiko, sa dua na tiki yaga sara ni tawamate rawa. Na mate ena rawa kina vei keda me da toro yani ki na vuravura ka tarava.
E dua tale a saumitaro mai e kaya: “A sega tu ni dua noqu bula me yacova niu sa qai wilika na iVola i Momani. Dina ga niu a masu ka lako ki na noqu lotu ena noqu bula taucoko, na iVola i Momani a vukei au me veitaratara dina kei na Tamaqu Vakalomalagi ena imatai ni gauna.”
E dua tale e kaya: “Ke sega na iVola i Momani, au na sega beka ni kila ni a sega ni vakararawataki walega na iVakabula ena vuku ni noqu ivalavala ca, ia e rawa talega Vua me vakabula noqu mosi kei na noqu rarawa.”
Kei na dua tale: “Keu a sega beka ni kila ni ra tu na parofita me ra liutaki keda.”
Ni da dau luvuci keda wasoma ena dina ni iVola i Momani e rawa ni vakayaco veisau ki na noda bula. E dua na makubui keirau goneyalewa daukaulotu, o Sister Olivia Nelson, a yalataka vua e dua e vakadikeva tiko na Lotu ni kevaka e wilika na iVola i Momani e veisiga, ena vinaka cake na kena maka ena veitarogi ni univesiti. A kitaka vakakina, ka vakakina na maka.
Kemuuni na taciqu kei na ganequ, Au vakadinadinataka ni vosa dina ni Kalou na iVola i Momani. E tu kina na isau ni taro bibi duadua ni bula. E vakavuvulitaka na ivunau i Karisito. E vakarabailevutaka ka vakamatatataka e vuqa na dina “rawarawa ka talei” era a yali ena veisenijiuri ni gauna kei na vuqa na vakavakadewa e curuma mai na iVolatabu.
Na iVola i Momani e vakarautaka na kilaka taucoko ka vakadonui duadua ni Veisorovaki i Jisu Karisito e rawa ni kunei ena veivanua cava ga. E vakavuvulitaka na ibalebale dina ni sucu tale. Eda vulica mai na iVola i Momani na vakasoqoni vata kei Isireli. Eda kila na vuna eda tiko kina qo e vuravura. Oqo kei na veidina tale eso era mana ka vakauqeti vakaukauwa cake ena iVola i Momani. Na mana taucoko ni kosipeli i JIsu Karisito e tu ena iVola i Momani. Cegu.
Na iVola i Momani e vakararamataka na nona veivakavulici na iVakavuvuli ka vakavotuya mai na ivadi ni vunica. E vakavuvulitaka na iVola i Momani na ivunau dina me vakacala na ivakavuvuli lasu vakalotu—me vaka na ivalavala cala ni nodra papitaiso na gonelalai. Na iVola i Momani e solia na inaki ni bula ena kena vakauqeti keda me vakananumi vakatitobu ni rawa ni yaco na bula tawamudu kei na “marau tawayalani.” Na iVola i Momani e vorovorolaka na vakabauta lasu ni rawa ni kune na marau ena ivalavala ca vakakina ni ka duadua ga e gadrevi me da lesu tale kina ena iserau ni Kalou na vinaka ni tamata yadudua. E vakawabokotaka na vakasama lasu ni sa yaco ga ena iVolatabu na ivakatakila ka sa dregati tu nikua na lomalagi.
Niu vakasamataka na iVola i Momani, au vakabauta na kaukauwa ni vosa. Niu vakasamataka na iVola i Momani, au nanuma na vosa mana. Na dina ena iVola i Momani e tu kina namana ni veivakabulai, veivakalesui, veivakaukauwataki, veivaqaqacotaki, veivakacegui, ka vakamarautaka na yaloda.
Kemuni na taciqu kei na ganequ, au yalataka ena nomuni vulica ena masumasu na iVola i Momani e veisigao ni na dau vakatauca na lewa vinaka cake e veisiga Au yalataka ena nomuni vakasamataka vakatitobu na veika o ni vulica, ena tadolavi na katubaleka ni lomalagi, o na ciqoma na isau ni nomu taro kei na idusidusi ena nomu bula. Au yalataka ena nomu dromuci iko ena iVola i Momani e veisiga, ena rawa ni o cula ena itatarovi mai na ca ni siga oya, okati kina na mate veitauvi sa veivesuki voli ni iyaloyalo ca kei na so tale na itovo veivakabobulataki ivakanunu ni vakasama.
Niu rogoca ni kaya e dua na tamata, oka kina o au, “Au kila ni dina na iVola i Momani,” Au dau via kacivaka yani, “Totoka qori, ia se bera ni rauta!” Eda gadreva me da vakila vakatitobu ena lomadonu ni utoda, ni iVola i Momani esega ni dua na kena veiba ni vosa ni Kalou. E dodonu me da vakila vakatitobu sara me da kakua kina ni via bula ena dua mada ga na siga ni sega. Au na moica beka vakalailai na vosa nei Peresitedi Brigham Young ena nona kaya, “Au diva me tu vei au na domo ni kurukuru e vitu meu vakayadrati ira na tamata” ki na dina kei na mana ni iVola i Momani.
Eda gadreva me da vaka na daukaulotu gone oqo ka veiqaravi voli e Iurope a vakila vakatitobu na dina ni iVola i Momani me cicivaka kina e dua na ilavelave ni ivolatukutuku tabu oqo vua e dua na turaga ena rara ni gade erau se qai raica kei na nona itokani.
Au vakadinadinataka ni o Josefa Simici na parofita ni gauna oya kei na gauna oqo ni iotioti ni itabagauna oqo. Sai koya, ena isolisoli kei na kaukauwa ni Kalou, a vakadewataka na ivola tabu oqo. Sai koya na ivola oqo ena veivuke ena vakarautaki ni vuravura me baleta nona Lesu tale mai na Turaga.
Au vakadinadinataka ni o Jisu Karisito na Luvena bula dina na noda Kalou bula. O Koya na noda iVakabula, noda Dauveisereki, noda iVakaraitaki cecere, ka noda Dautataro vei Tamana. Sai koya na Mesaia a yalataki tu, na Mesaia a mai bula vakayago, ka na Mesaia ni milenieli. Au vakadinadiinataka mai vu ni yaloqu taucoko na iVola i Momani vakataki koya ga e vakavulica vei keda me baleti Jisu Karisito kei na Nona kosipeli ena dua na ivakarau cakamana.
Au kila ni o Peresitedi Thomas S. Monson na parofita ni Kalou e vuravura nikua. Au lomani koya ka tokoni koya mai vuniyaloqu. Au vakadinadinataka, ena yaca i Jisu Karisito, emeni.
Lisi ni nei Peresitedi Nelson na iVola i Momani
Na iVola i Momani e:
-
E Dua Tale na iVakadinadina kei Jisu Karisito. O ira kece era volavola kina--Nifai, Jekope, Momani, Moronai--kei na kena dauvakadewa vosa, Josefa Simici, era ivakadinadina kecee mata ni Turaga.
-
E dua na ivolatukutuku ni Nona veiqaravi vei ira na tamata mai Amerika makawa.
-
Dina, me vaka e vakadinadinataka na Turaga sara ga vakataki Koya.
Na iVola i Momani vakadeitaka:
-
Na kedrau ivakatakilakila yadua na Tamada Vakalomalagi kei na Luvena Lomani, o Jisu Karisito.
-
Na gadrevi ni Lutu i Atama kei na yalomatua nei Ivi, me rawa ni reki na tamata.
Na iVola i Momani e saqata na vakasama:
-
E yaco ga ena iVolatabu na ivakatakila.
-
Era gadreva na gonelalai me ra papitaiso.
-
E rawa ni kune na marau ena ivalavala ca.
-
Na vinaka ni tamata yadua sa na rawati kina na bula vakacerecerei (cakacaka vakalotu kei na veiyalayalati e gadrevi).
-
Na Lutu nei Atama sa vakadukadukalitaka na kawatamata ena “ivalavala ca taumada.”
Na iVola i Momani e vakataucokotaka na parofisaitaki tu mai vakaivolatabu ni:
-
Era na rogoca na Domona “eso tale na sipi”
-
Ena cakava na Kalou “e dua na cakacaka talei ka veivakurabuitaki,” ena vosa mai “na kuvu ni soso.”
-
Ena yaco me duabau na “ititoko nei Juta” kei na “ititoko nei Jekope”
-
Ena vakasoqoni vata ko Isireli sa veiseyaki tu “ena veigauna e muri oqo”
-
Na nodra ivotavota vakawa ni vanua na kawa i Josefa na iwasewase vaka-Amerika.
Na iVola i Momani e vakamatatataka na vakasama baleta:
-
Noda bula taumada.
-
Mate E dua na tiki yaga sara ni nona ituvatuva cecere ni veivakabulai na Kalou.
-
Na bula ni sa oti na bula oqo e tekivu e parataisi.
-
Na vakaturi cake ni yago, duavata kei na kena yalo, sa yaco me tamata tawamate rawa.
-
Na noda lewai mai vua na Turaga ena vakatau ena noda ivalavala kei na gagadre ni yaloda.
-
Na ivakarau e vakayacori kina vakadodonu na cakacaka vakalotu: me vakaoqo, papitaiso, sakaramede, soli ni Yalo Tabu.
-
Na Veisorovaki nei Jisu Karisito
-
Na Tucaketale.
-
Na itavi bibi ni agilosi.
-
Na ivakarau tawamudu ni matabete.
-
Na ivakarau e vakayarayarataki vakaukauwa cake kina na itovo vakatamata mai na mana ni vosa ka sega ena mana ni iseleiwau.
Na ivola i Momani e vakatakila mai na itukutuku a dau kilai tu e liu
-
Sa vakayacori tu na papitaiso ni se bera ni sucu o Jisu Karisito.
-
A tara ka vakayagataki na valetabu mai vei ira na tamata e Amerika makawa.
-
O Josefa, na ika 11 ni luvei Isireli, a sa raica rawa na itavi vakaparofita nei Josefa Simici
-
O Nifai (600-592 B.K.) a sa raica rawa na kena kunei ka vakamatanitutaki o Amerika.
-
Sa yali na veitikina matata ka talei sara mai na iVolatabu.
-
Sa soli ki na tamata yadua na rarama i Karisito.
-
Na bibi ni galala ni tamata yadua kei na gadrevi ni veibasai ena ka kecega.
-
iVakasala ni qaqarauni baleta na “isoqosoqo vuni.”