Lih Perien Silimen
Kitail me pein pwukoahki atail mour en tohnpadahk, oh e sohte—ma mie—pahsan mwoamwen en mehteikan wiewia ong kitail.
Riei lihakan, kempoakepahi kan, pwehn tapiada kapokon lap wet ki tiepene en lien sampah wia mehkot kesempwal oh lingan. Medewe, lih koaros, songesongen mour, tohn wehi tohto, oh arail lokaia wekpeseng ahpw miniminpene nan pwoson oh limpoak en atail Kaun Sises Krais.
Ni aht apwtehn tuhweng atail soukohp kempoake, Presiden Thomas S. Monson, oh e padahkiheng kiht uwen eh poakepoke Kauo. Oh I ese me Presiden Monson uhdahn kaping kalahnganiki amwail limpoak, amwail kapakap kan, oh amwail kin papah Kauno.
Keilahn aio pohn sahpw doh ehu mie lih perien silimen ehu kin kouson wasahu.
Me keieu laudo kin insensuwed. E sohte pereniki mwoamwen paliwere sang ni tumwe lel ni kaikai oh sang ni kilin paliwere lel ni sendin neh kan me sohte nohn mwahu. Ni eh kin lokaia, ah koasoi kan kin ekei ansou sohte sansal mwau oh aramas kin kouruhrki. Ma aramas kin lipahnede de sohte kin lukehieng mehkot, e kin nsensuwedla, kokohsang wasahu, oh rapahkihda wasahkis me e pahn kak esingek suwed ie oh medewe dahme karehda mour wia mehkot kansensuwed oh sohte kaperenki.
Lih keriemeno kin ahniki lingeringer. E kin medemedewe me ih me keieu loalokong, ahpw miehte me kin ale deng laud sang nan sikeng kan nan sukuhl. E kin wiahki me e kaperen, kaselel, kapwatapwat oh suwanawan. Ahpw ansou koaros, miehte me kin kaperen sang, kaselel sang, kapwatapwat sang oh suwanawan sang ih.
Liho saikinte kana nan mehkot, oh met e kin sohte kakehng. Kaidehn ih mwomwen mour en met!
Ekei ansou e kin pwisirek ong mehteikan oh likamwete e kin kalap mwadang en lingeringerkihda mehkot sohte lipilipil.
Met kahrehda sohte me kin pwungki de pereniki ih. Ekei ansou liho kin kehpene ngih kan, rokepene peh oh medewe, “Mour wet inenen sapahrek!”
A iet kesilimen en liho. Me sohte duwehte rieh kan me kin ahniki insensued oh lingeringer, lih menet kin--ahniki peren. Ahpw kaidehn pwehki e me loalokong, de kaselel de koahiek sang rie lih riemeno. Soh, aramas kin ekei ansou sohte kin pwungki ih. Ekei ansou irail kin kouruhrki mwomwen ah kin likou de dahme e kin nda. Ekei ansou irail kin lipahnede ih. Ahpw e sohte kin mweidehngete soahng pwukat en kedirepwehki ih.
Lih menet kin mwahuki koul. E sohte ngilamwahu, oh aramas kin kouruhrki, ahpw e sohte uhdihsang koul. Liho kin nda, “I sohte pahn mweidohng ekei aramas oh arail madamadau en kauhdi ie sang koul!”
Pwehki sang nieh kin wie kokoul kahredahr rie me keieu laudo kin insensued oh me keriauo kin lingeringer.
Sounpar kei dou powe, oh emen emen irail perienko ahpw kapelsalehdalahr.
The first sister, who discovered again and again that there was no shortage of disappointments in life, eventually died sad.
Me keriaun laudo, me kin kalap diar mehkot me e sapwungki, ahpw kapelsalehdalahrnan ah lingeringer.
Oh kesilimen en perieno me kokoul erein ah mour ki ah kehl koaros oh kin wie sinsirei ahpw kapelsalehdalahrnan ah pereperen.
Mehlel, mour sohte mengei, oh aramas sohte kin mengei oh duduwehte me pahn duwehte perien en nan soai pwoatet. Ahpw mehlel karasaras me duwehte mepwukat pahn kak padahkiheng kitail mehkot me pid pein kitail. Ma kumwail pahn duwehte kiht, kumwail pahn mwein kak kasawiada pein kumwail sang rehn emen, riemen de sang rehn perien silimen pwukat koaros. Na kitail song tehk mwau ia mwomwen emenemen irail.
Me Ale Kalokolok
Me keieu laudo kin wiahki me e kin ale kalokolok pen dahme mehteikan kin wia.1 Likamwete mehkoaros me kin wiawiong ih kin kahrehiong ah nsensuwed. Sang ni mwomwen wiepen mour pwukat, e kiengehr en mehteikan kehl en kaunda mwomwen ah pepehm oh wiewia. Ni atail kin wia met, kitail kin mwekidkihda ahng en madamadau kan –oh nan mwehi wet me diren mehn kapehse tohto mie, ahng pwukat me inenen uk duwehte angin melimel.
Riei lih akan, ia kahrepen amwail en mweidala amwail insenamwau ong emen tohrohr, de pwihn en aramas ehu me sohte nohn nsenohkin kumwail—de amwail nsenamwahu?
Ma kumwail kin iang katapaniki dahme ekei aramas kin ndahkin kumwail, iet me I kak sawaski: tamataman ihs kumwail. Tamataman me kumwail wia tohn tehnpas en wehin Koht, sapwellimen Nohno/Pahpa en Nanleng serepein kan, me kin kakaun sampah unsek
Kumwail wia kedeudoken Koht. Kumwail sohsohki kisakis kesempwal kei me poasonda ni ngehn kei me kepikpikda oh me keirda nan erein ansou me kumwail mihmi nan mour mwohn mour wet. Kumwail wia seri en Sahm me ketiket Nanleng, Kaun en Mehkoaros, Ih me ketin kapikada sampah, koasonehdi usuh kan pahn lahng, oh koasonehdieng ehu ehu sampah kan nan deuwarail kan nan lahng kan.
Kumwail patpato nin Limeh kan.
Limeh mwahu kan.
Limeh limpoak kan.
Limeh insenoh kan.
Oh sohte mehkot me emen aramas kak ndahkin kumwail kak wekidala mepwukat. Arail koasoi kan sohte kak pahrekiong dahme Koht mahsanihkin kumwail.
Kumwail wia Sapwellime seri kesempwal.
E ketin poakoahng kumwail.
Detehn kumwail pwupwidi, detehn kumwail sohpeisang Ih, Koht ketin poakoahng kumwail. Ma kumwail medemedewe me kumwail salongala, lekidekla, de manoknokla—dehr masak. Soun silepen sihpw Mwahuo pahn diar kumwail. E pahn pwok kumwailda pohn pwopwe. Oh E pahn ketin kapwureikumwaila ni ihmwamwailko.2
Riei lih akan, menlau loalehdi me mehlel sarawi pwukat nan amwail mohngiong kan. Oh kumwail pahn diarada me kahrepe tohto me karehda kumwail sohte pahn kin insensuedki, pwe mie kahrepe soutuk ehu me kumwail anahne koadoahke.
Sounkomour en sampah me diren limpoak ketikidahr Sapwellime ieias pwe kumwail en kak pilada kumwail en ahneki mour wet. Kumwail aledahr Mware; kumwail wia Sapwellime tohnpadahk kei. Oh pwehki Ih, kumwail kak ale mour soutuk.
Me Kailoko
Keriemen en lihoko kin mwehlehng sampah. Duwehte rie serepein me kin kalap insensuedo, liho pepehm me kahpwal akan me e ahniki nan ah mour aramas me kahrehda. E keinahki ah peneinei, kempoakepah kan, ah kaun oh ienge tohn doadoahk kan, pwolihs, mehn mpe, kaun en Mwomwohdiso kan, kapwat en mwehiet kan, mwekmwekid en usuh kan, oh mehlel ansou en pai suwed kan. Oh e kin uhwong mepwukat koaros.
E sohte kin medewehieng me e wia aramas sakanakan men. Pwe e medemedewehte me e kin uhkihda ah pwuhng. E kamehlelehte me aramas koaros wie mwekmwekidki arail mehwo, mwomwehda oh kailok. Ahpw dene ah wiewia kan poahsonki me mwahu—pahrek, wahu oh limpoak.
Paisuwed pwe en lihmenet ah madmadau me inenen rek mehlel. Met sansaldahsang ni ropirop ehu me wiawi ong pwihn riau me kin kalap uhpene. Aramas me wia ropirop wet kapeidekih mehn Palisdain oh mehn Israel kan nan Midel Ihs oh Ripopliken oh Demokrahd kan nan US. Irail diarada me “ehu ehu palihko kamehlele me arail mwekid poahsondahsang pohn limpoak kaidehn kailok, ahpw ni ansou me irail kalelepak dahme irail wie pingipingki, [irail] keinahki [pwihn teio] me kailok me wia kehlepen arail mwekid.” 3
Met wehwehki me ehu ehu pali medemedewe me irail me mwahu—pahrek, kadek oh mehlel. Dene pali teio me wia “aramas sakanakan kei”—sawehwe, likamw, oh suwed.
Nan pahr me I ipwidi, sampah duhla nan pingiping oh mahuwen laud ehu me kahrehda kahpwal laud ong sampah pwon. Ahi wehio me kahrehda mahwen wet—sang pwihn en aramas ekei—aramas kei me wiahki mehteikan aramas suwed kei oh kakairada kailok ong irail.
Irail kakunpene irail kan me irail sohte pwungki. Irail kanameneki oh kamwamwahlih iraila. Irail wiahkin irail aramas mwahl kei—de kaidehn aramas kei. Ni ansou me kumwail kin kamwamwahliala ekei aramas, kumwail kakehr doadoahngki lepin koasoi oh wiewia suwed akan me pahn uhwongada irail.
I kin rereki ni ahi kin medewe dahme wiawi ansouo nan wehin Sehmen.
Ni ansou me emen aramas sohte kin pwungki atail pali, e kin mengeieng kitail en medewehieng me mie mehkot sapwung rehrail. Oh sang ni mwo e mengei en kasawiada arail koasoi oh wiewia suwed akan.
Mehlel, kitail anahne uhki mehkot me pwung ansou koaros, oh mie ansou me kitail anahne ngil laudkihda atail madmadau. Ahpw ma kitail wia met ni atail lingeringer de kailok—ni atail uhwongada ekei pwehn kamedeke, kanameneki de kameleilei iraildi—dahme kitail wiaho kakete keid ni ahl sapwung.
Dahme Sounkomouro padahngki?
“I ndaiong kumwail met, kumwail poakohng amwail imwintihti kan, kapaiada irail me kin keria kumwail, wiewia mwau ong irail me kin kailongkin kumwail, oh kapakapki irail me kin kalokei kumwail;
“Pwe kumwail en wiahla sapwellimen Sahm me ketiket nanleng.”4
Met iei elen Sounkomouro. Met iei tepin mwekid me pahn kasorehla wiewiah kan me kin kahrehda lingeringer, kailok, liaktohrohr, oh pingiping nan sampah.
“Ehi,” kumwail kak nda, “I pahn kak poakehng ahi imwintihtih kan—ma irail pahn pil poakehng ie.”
Ahpw met sohte katepe, de da? Kitail pein pwukoahki atail mour en tohnpadahk, oh e tikitik—ma mehkot—wia nin duwen me mehteikan kin wiahieng kitail. Kitail kin kasik me irail pahn kadek lamalam oh kadek ong kitail, ahpw atail poakehngirail sohte anahne pahsan arail madamadau ongkitail..
Ele atail pahn poakehng atail imwintihti kan kak kahrehda arail pahn men wiahla aramas mwahu. Ele e sohte pahn wekila. Ahpw met sohte kasohrehla atail men idawehn Sises Krais.
Eri ni atail wia tohn Mwomwohdiso en Sises Krais, kitail pahn poakehng atail imwintihti kan.
Kitail pahn powehdi lingeringer de kailok.
Kitail pahn kadirehkihla limpoak nan atail mongiong kan ong sapwellimen Koht seri kan.
Kitail pahn kapaiada mehteikan oh kalohk ong irail—mehlel irail me ele kin “doadoahngkin [kitail] oh kalokei [kitail].” 5
Tohnpadahk Mehlelo
Kesilimen en perieno duwehte tohpadahk mehlel men en Sises Krais. Liho wia mehkot me inenen apwal en wiawi—e liki Koht itarete aramas kin kouruhrki oh kamwamwahli. E kolokolete ah pwoson oh koapworopwor, itarete aramas akan arail kin kepitki oh kouruhrki. E ahneki popohl, kaidehn pwehki e ahneki mour mwahu ahpw pwehki liho poahsonkihda popohl.
Kitail pahn undahn diar kaupatail nan mour wet. Pwehki uwen dir en kahrepe kan me kin kaluwetei kitail, ia mwoamwen atail kak tengetengedi oh diar popohl me inoupe mie ong me pwoson kan?
I kamehlele me pasapengpe kak dierek nan en soukohpo ouraman sounpar kid kei samwalahr. Soukohpo adaneki Lihai, oh ah ouramano ntingdi nan Pwuken Mormon kesempwal oh lingano.
Nan ah ouramano, Lihai kilangada mohs laud ehu me tuhke kaselel lingan pwoat poadada loale. E pil kilangada kiden aramas kei me alialu kolahng ni tuhkeho. Irail men song wahn tuhke kaselelo. Irail kamehlele me e pahn kieng irail popohl kouwahlap oh meleilei poatoapoat.
Mie ahl tehtikitik pwoat me kolahng ni tuhkeho, oh mie sahl mete pwoat limwahn ahlo me aramas akan kin kol pwe ren kak kekeid pohn ahlo. Ahpw pil mie wasa rotorot ehu me karotongala ahlo oh tuhkeo. Ahpw ele me nohn keper iei ngilen kouruhr oh kepit me kin wiewiawi sang nan ihmw laud oh tehlap ehu me karanihte wasao. Pwuriamweikihla pwe ekei aramas me lelehr ni tuhkeo oh soangehr wahn tuhke kaselelo namenekda sang ni ngilen kepit me wiewiawiho oh pwurasang ni tuhkeo. 6
Irail tepda peikasalki lingan en tuhkeho nan arail madmadau. Irail tepda ahniki kilelen peidek ong dahme irail lelehngo.
Mwein irail medewe me ma irail pwurasang ni tuhkeho, arail mour pahn mengei. Mwein solahr me pahn kepitki oh kouruhrkin irail.
Oh mehlel, aramas me wie kepkepitkin irailko mwoamwen wia aramas nsenamwahu kei oh pereperen. Eri, ma irail pwurasang ni tuhkeho, irail pahn kak patehng aramas akan me mihmi nan ihmw laud oh tehlapo oh kepkepingahkin irail arail pilipil mwahu oh loalokong.
Weweidte pohn Ahlo
Riei lihoko, kempoakepai kan, ma kumwail apwaliki koledi teng sahl meteo oh alulahng mour soutuk; ma en mehteikan arail kouruhur oh kepit pahn kahrehieng amwail pweiekla; ma kumwail ahniki kahpwal sang peidek kan me saikinte pasapengla de padahk me kumwail saikinte wehwekihla kan; ma kumwail kin nsensuwedla pwehki amwail katoutou kan, I kangoangei kumwail en kin tamataman en Lihai ah ouramano.
Weweidte pohn ahlo.
Kaleke kadarala sahl meteo—mahsen en Koht.
Oh ma mehmen song en kanamenekih kumwail pwehki amwail poakehng Koht, kumwail dehr rong irail.
Dehr manokehla me kumwail wia seri en Koht; kapai tohto miehier; ma kumwail kak esehla Kupwure, kumwail pahn pwurehng kousonla Reh! 7
Inou kan en kepinga oh patehngala sampah me keseulikilik, likamw oh sohte katepe douluhl. Sapwellimen Koht inou kan, me mehlel oh kaperen—met oh kohkohlahte
I lukei kumwail en kesempwaliki mehlel palien lamalam oh pwoson. Sohte mehkot me kin dierek nan ihmw laud oh tehlapo me kak pahrekiong wahn rongamwahu en Sises Krais.
Mehlel, “soahng kan me aramas saikinte kilang de rong, soahng kan me aramas saikinte lemehda en kak wiawi, iei me Koht ketin kaunopadahng irail kan me kin poakohng ih.”8
I pein diaradahr me ahl en tohnpadahk en rongamwahu en Sises Krais iei ih me wia ahl ong popohl. Iehi ih me wia ahl ong meleilei. Iehi ih me wia ahl ong me mehlel.
I kadehde me sang ni kisakis oh manaman en Ngehn Sarawio, kumwail kak esehla mepwukat.
Eri ahpw met, ma ahlo wia ahl apwal ong kumwail, I koapworopworiki me kumwail pahn kak diar sawas oh kehlail sang palihkan nan Mwomwohdisot—Praimeri, Pwihn en Peinakapw oh Pwihn en Sawas en Lih. Pali pwukat wia wasahn audaud kei pohn ahlo, wasa kumwail kak kalaude amwail koapwoaroapwoar oh pwoson nan seilok wet. Pali pwukat wia wasahn ruk kei, me kumwail kak patehng oh ale kakehlail sang riamwail lih oh tohnpadahk kan.
Dahme kumwail sukuhlkihda nan Praimeri kin kaunop kumwailda ong padahk mehlel teikan me kumwail kin kaskuhlki ni ansou me kumwail pahn kesepwildahng peinakapw. Mour en tohnpadahk me kumwail keid ie nan Pwihn en Peinakapw kan kin kahluwai kumwail lang euhpene oh wiahla perien ehu nan Pwihn en Sawas en Lih. Sang ni ehu ehu kahk me kumwail wia nan ahlo, kumwail kin ale ansou mwahu en kasalehda amwail limpoak ong mehteikan sang ni amwail pwoson, kin poakehng, limpoak mehlel, mwakelekel oh papah irail.
Pilada elen mour en tohnpadahk wet pahn kahlwalahng popohl oh meleilei mwuledek.
E sohte pahn mengei. E pahn anahne amwail kak koaros—amwail loalokong, marain, pwoson, wahu, kehlail, ngihtehte oh limpoak unsek. Ahpw ehu rahn kumwail pahn katamanda mehkoaros me kumwail wiahier, oh kumwail pahn kaping kalahnganki amwail kehlail tengetengedi nan dahme kumail kamehlele oh sohte pweieksang nan ahlo.
Wenla Mwowe
E pahn mie soahng tohto nan amwail mour me pein kumwail pahn sohte kakehng. Ahpw ni imwilau, kumwail ahneki manaman en pilada wasa kumwail pahn lel ie oh soangen kemwekid tohto kan me kumwail pahn lelehng pohn ahlo. Kaidehn amwail koahiek ahpw amwail pilipil me pahn kaweidada amwail mour.9
Kumwail dehr mweidehng dahme wiawi ong kumwail en kansensuwedih kumwailla.
Kumwail sohte kak mweidehng irail en kelingeringerih kummwailda.
Kumwail kak pereniki amwail wia sapwellimen Koht lihkei. Kummwail kak diar peren oh popohl sang ni kalahngan en Koht oh limpoak en Sises Krais.
Kumwail kak wie pereperen.
I kangoangei kumwail en audauwudkihda kaping kalahngan en kamwau soutuk kan en Koht. Riei lih akan, kumwail kak wia met! I kapakapki ni limpoak unsek me kumwail pahn pilada en wenla mwowe ong ni tuhkehn komouro. I kapakapki me kumwail pahn pilada kumwail en wiahkihla amwail mour en wia dipwisoun kaping kalahngan, popohlki limpoak en Koht oh kamwahu kan me Sapwellime Mwomwohdiso oh rongamwahu en Sises Krais kak wadohng sampah.
Padahk me pid mour en tohnpadahk mehlelo ele sohte ngilamwahu de pil ngil laud ong ekei. Iei me kin wiewiawi sangete ni tapio.
Ahpw ong Samatail Nanleng, oh ong irail kan me kin poakehng oh wauneki Ih, iei koul me keieu kesempwal oh lingan—koul en limpoak en komour mwuledek oh papah ong Koht oh aramas akan. 10
I pwilikihdieng kumwail ahi kapai ni ei wia emen Wahnparon en Kauno me kumwail pahn diar kehlail oh eimah pwehn pereniki doadoahk ni amwail wia sapwellimen Koht lihkei oh weweid ehu ehu rahn pohn ahl kaperen en mour en tohnpadahk men. Ni mwahr sarawi en Sises Krais, amen.