Sipwe Nikitu
Ami mochenin aneasochis epwe napeno nupwen oua chechemeni me ekiek won met oua fen mefi non ekkei ru ran.
Pwi me fefinei achengicheng, nupwen sia asopano ei mwichenap non uruo, upwe chu ngeni kemi ne kinisou ngeni ewe Samon ren An emwen me mwokutukut. Ekkewe kon ra men murino me ra amemefi kich. Ekkewe porous rese chok aurouroch, nge ra pwan siwini manau!
Non mwich mi pin sia etiwa ew minafon Aewin Presetensi. Ruemon mwan murino ra fen kokko ngeni ewe Mwichen ekkewe Engon me Ruemon Aposel. Me wanimon minafon Meinap Unusen rapwan kokko.
Iei ew kon mi pin sia kan sani a achunapa ach foffor mi minafo, ach sossot, me wisach ne nikitu:
Sipwe nikitu non angangen ach Samon,
Pwe nesoponon sipwe angei ach feioch;
Pwe sipwe fifiu won ekkewe ketinasen pung,
Fan iten minne mi ennet.
Upwe pesei kemi ne kaeo ekkewe porousen ei mwichenap fan chommong—pwan anniwini—fansoun ekkewe wonu maram mwirin. Oupwe kutta aanen ami oupwe aea ekkei porous non ami pwinin famini, ami afanafanen kapas allim, ami kakapas ngeni ami famini me chiechiemi, me pwan ami aporous fengen me ekkewe resap chon ach ei mwichefen. Chommong aramas mi och repwe aponua ekkewe ennet ra aitikich non ei mwichenap nupwen sia awora non tong. Me ami mochenin aneasochis epew napeno nupwen oua chechemeni me ekiek won met oua fen mefi non ekkei ru ran.
Ei mwichenapen mwichefen a esina poputan eu minafon fansoun iamwiri. Ewe Samon a fen siwini ifa usun sipwe tumunufengeni kich. Fefinei me pwi—ekkwe chinnap me serafo—sipwe angang ngeni emon me emon non eu napanap minafo. Mwichen Elter epwe pochokununo pwe repwe efeiochu mwan, fefin, me semirit non unusen fonufan. Fefin seni ewe Relief Society repwe sopweno ar repwe iamwiri ekkoch fiti tong, me repwe mut ngeni ekkewe fopun ar repwe anisir ne fori wiser.
Am porous ngeni ewe fonufan mi mecheres me ennet: aua tingor ngeni meinisin noun Kot semirit won ir me ruepek ewe pwonupwon repwe feito ren ar Chon Amanau, angei ekkewe feiochun ewe tempel mi pin, me pwapwan nikut, me tufich ngeni manau esemuch.
Ach unusen nukuchar iei mi murino ngeni amuchunon fefeita ngeni ekkewe pwon mi pin sia fori me angang mi pin sia angei me non ewe imwen ewe Samon. Non ei fansoun mi wor 159 tempel mi fen foruta, nge mi pwan wor sia kauta iei. Sia mochen pwe ekkewe tempel repwe karap ngeni chon ewe Mwichefen. Iwe sia kinisou am aupwe pwarata pwe sipwe kauta pwan fisu tempel noni ekkei neni: Argentina; Bengaluru, India; Managua, Nicaragua; Cagayan de Oro, Philippines; Layton, Utah; Richmond, Virginia; me ew watten sopw ese mwo fat non Russia.
Pwi me fefinei, naman ach kauta ekkei tempel esap siwini manauom, nge om fansoun non ewe tempel epwe siwini manauom. Ren ena, ua afeiochu kemi ami oupwe esinna ekkewe mettoch oupwe poutano pwe oupwe tongeni awora watten fansoun non ewe tempel. Ua afeiochu ngeni kemi watten kinamwe me tong non imwemi me ew anonnonen mochenin tumunu nefinen ami famini esemuch. Ua afeiochu ngeni kemi watten nuku non ewe Samon Jises Kraist me ew watten tufich ne tapweno mwirin I ren wisach chon kuno mi ennet.
Ua afeiochu kemi ren ami oupwe apasa ami kapasen pwarata non pwaracho, usun ua fori iei, pwe sia angang non angang an Kot mi Napanap! Jises I ewe Kraist. Iei An Mwichefen, minne I a emweni me ren Noun chon anang mi kefinita. Ua ennetin pwarata, fiti ai tong ngeni emon me emon ami, non ewe it mi pin Jises Kraist, amen.