Panagserbi nga addaan Bileg ken Turay ti Dios
Agserbitayto iti naganna, addaan bileg ken turayna, ken addaan naayat nga asina.
Ay-ayatek a kakabsatko, agyamanak iti kinapasnekyo iti Apo ken ti nasantuan nga aramidna. Pakaragsakak a makaduakayo. Kas baro nga Umuna a Panguluen, agyamankami iti kararagyo ken panagkagumaanyo. Agyamankami iti biagyo ken iti serbisioyo iti Apo. Ti kinapasnekyo iti pagrebbengan ken naayat a serbisioyo ket napateg iti callingyo kasta met kadakami iti callingmi. Iti unos ti serbisiok ditoy Simbaan, naadalko a di nasken no sadino man ti pagserbian. Ti kaskenan iti Apo ket no kasano nga agserbi ti tao.
Nalaus ti panagyamanko ken President Thomas S. Monson, a pagwadan kaniak iti nasurok a 50 a tawen. Ken dagiti mamagbagana, da President Henry B. Eyring ken President Dieter F. Uchtdorf, daydayawek unay ida. Agraemak kadakuada iti serbisioda iti Apo ken dagiti propetana. Agpada a nakaawat iti baro nga assignment dagitoy napasnek a katulongan.Ituloyda ti agserbi nga addaan regta ken panagkumit. Dayawen ken patpatgek ida.
Nakaskasdaaw a bendision ti agserbi iti pudno ken nabiag a Simbaan ti Apo nga addaan turay ken bilegna. Ti pannakaisubli ti priesthood ti Dios, agraman dagiti tulbek ti priesthood, manglukat iti maikari a Santo iti Ud-udina nga Aldaw ti kaindaklan iti amin a naespirituan a bendision. Nakitami dagita a bendision a maibukbok iti babbai, lallaki, ken ubbing iti intero a lubong.
Nakitami dagiti napudno a babbai a makaawat iti bileg a paset dagiti takemda ken iti endowment ken dadduma pay nga ordinansa iti templo. Ammo dagitoy a babbai ti umawag iti bileg ti langit a mangsaluad ken mangpapigsa kadagiti assawa ken annakda, ken dagiti patpatgenda. Dagitoy ti addaan naespirituan a pigsa a babbai a mangidaulo, mangisuro ken agserbi iti takemda iti bileg ken turay ti Dios!1 Agyamanak unay kadakuada!
Makitami pay ti napudno a lallaki nga agbiag a maikari iti pribilehioda kas addaan priesthood. Mangidaulo ken agserbida babaen ti sakripisio iti wagas ti Apo iti ayat, asi, ken anus. Bendisionan, iwanwan, saluadan, ken papigsaenda ti dadduma babaen ti bileg ti priesthood nga iggemda. Mangyegda iti milagro iti pagserbianda idinto a pagtalinaedenda a nasaluad ti bukodda a kallaysa ken pamilia. Liklikanda ti dakes ket isuda ti maingel nga elder iti Israel.2 Agyamanak unay kadakuada!
Ita, maibagak man ti pakaseknan? Daytoy: Adu dagiti kakabsattayo a lallaki ken babbai a di unay makaawat iti konsepto ti bileg ken turay ti priesthood. Agtignayda a kasla kaykayatda a pagustuan ti managimbubukod a tarigagayda ngem ti mangusar iti bileg ti Dios a mangbendision iti annakda.
Amkek nga adu kadagiti kakabsattayo ti di makaawat kadagiti pribilehio a para koma kadakuada.3 Kas pagarigan, adda dagiti kakabsattayo nga agtignay a kasla dida maawatan no ania ti priesthood ken no kasano koma nga usarenda daytoy.Mangtedak iti sumagmamano a pagarigan.
Itay nabiit, dinar-ayak ti miting ti sakramento a nangtedan iti nagan iti baro a maladaga ken bendision ti ama. Inubba ti ubing nga ama ti maladagana, inikkanna iti nagan, ket nangiruknoy iti napintas akararag. Ngem dina naikkan ti ubing iti bendision. Immawat ti maladaga iti nagan ngem awan bendision! Di ammo dayta nga elder ti pagdumaan ti kararag ken ti bendision ti priesthood. Addaan iti turay ken bilegna iti priesthood, nabendisionanna koma ti anakna, ngem saan. Napanunotko, “Nalibtawanna ti gundaway!”
Mangtedak iti sabali pay a pagarigan. Ammomi ti kakabsat a nang-set apart iti kakabsat a babbai kas lider ken teacher iti Primary, Young Women, ken Relief Society ngem napaayda a bendisionan ida iti bileg a mangipatungpal iti callingda. Nangtedda laeng iti balakad ken pangiturong. Nakitami ti maikari nga ama a napaay a mangted iti priesthood blessing iti asawa ken annakna idinto a dayta mismo ti kasapulanda. Naisublin ti bileg ti priesthood ditoy daga, ngem adu a kabsat a lallaki ken babbai nga agpadpadas iti nakaro a pannubok ti di umaw-awat iti pudno a priesthood blessing. Anian a trahedia! Ti trahedia a maikkattayo.
Kakabsat, iggemtayo ti nasantuan a priesthood ti Dios! Addaantayo iti turayna a mangbendision iti taona. Panunoten ti impanamnama ti Apo kadatayo idi kunana, “Asino man a bendisionanyo bendisionakto.”4 Daytoy ti gundawaytayo nga agtignay iti nagan ni Jesucristo a mangbendision iti annak ti Dios maibatay iti pagayatanna kadakuada. Stake president ken bishop, penkenyo maawatan ti tunggal miembro ti korum no kasano ti mangted iti priesthood blessing—agraman ti bukod a pannakaikari ken naespirituan a panagsagana a kasapulan iti naan-anay a yaawag iti bileg ti Dios .5
Iti amin a kakabsat nga addaan iti priesthood, awisenkayo a mangparegta kadagiti miembro nga agtungpal iti katulaganda, agayuno ken agkararag, agadal iti scripture, agdayaw iti templo, ken agserbi a sipapammati kas tattao ti Dios. Matulongtayo ti amin a kumita a sipapammati a ti kinatulnog ken kinalinteg ti mangyasideg ida ken Jesucristo, mangparag-o kadakuada iti panangkadkadua ti Espiritu Santo, ken mangpadas iti rag-o ti biag!
Sagudayen ti pudno ken nabiag a Simbaan ti Apo ti kanayon a naurnos, ken naiwanwan a panangipamaysa nga agserbi kadagiti annak ti Dios ken ti pamiliada.6 Gapu ta Simbaanna daytoy, agserbitayto kas katulonganna iti maysa, kas iti inaramidna.7 Agserbitayto iti naganna, addaan bileg ken turayna, ken addaan naayat nga asina.
Nasurok a 60 tawen napalabasen ti padasko iti Boston ti nangisuro kaniak no kasano ti kabileg ti gundaway ti panagserbi iti sangunsango. Maysaak idi a resident surgeon iti Massachusetts General Hospital—trabahok inaldaw, tunggal sabali a rabii, ken agsinnublat nga udi ti lawas. Bassit ti orasko iti asawak, iti uppat nga annakmi, ken iti Simbaan. Nupay kasta, imbaonnak ti branch presidentmi a mangbisita iti balay da Wilbur ken Leonora Coxa mangnamnama a mapagsubli ni Brother Cox iti panagaktibo iti Simbaan. Nailantipda ken Leonora iti templo.8 Ngem saan a dimmar-ay ni Wilbur iti adu a tawen.
Napankami iti kaduak iti pagtaenganda. Idi makastrekkami, naayat a sinarabonakami ni Sister Cox,9 ngem napan ni Brother Cox iti sabali a siled ket inrikepna ti ridaw.
Napanak iti nairikep a ridaw ket nagtuktokak. Kalpasan ti kanito, nangngegko ti “Sumrekka.” Linuktak ti ridaw tapno makitak ni Brother Cox a nakatugaw iti abay ti naurnos a ramramit ti radio. Iti dayta a bassit a kuarto, nagsindi iti tabako. Nalawag a di unay naragsak iti isasarungkarko.
Kinitak ti siled a masmasdaaw ket kinunak, “Brother Cox, kayatko ti agsursuro iti ad-adu pay maipapan iti radio. wenno “Di la mabalin nga isuronak?” Ladingitek diak unay makapagbayag, ngem agsubliakto iti sabali nga aldaw?”
Saan a nakasungbat a dagus ngem nagwen met laeng. Dayta ti rugi ti nagbalin a nakaskasdaaw a panaggayyem. Nagsubliak ken sinuruannak. Nangrugi nga inayat ken dinayawko. Iti masansan a panagbisitak, nakita ti kinaimbag daytoy a tao. Nagbalin a nasingedkami nga aggayyem, kasta met dagiti ay-ayatenmi a kasimpungalanmi. Iti panaglabas ti panawen, immakar ti pamiliak iti adayo. Intuloy dagiti lokal a lider ti nangaywan iti pamilia a Cox.10
Agarup walo a tawen kalpasan dayta umuna a panagbisita, nabukel ti Boston Stake.11 Mapugtuanyo kadi no asino ti immuna a stake president? Wen! Brother Cox! Kalpasan ti adu a tawen, nagserbi a mission president ken temple president.
Kalpasan dagiti tawen, kas miembro ti Korum ti Sangapulo-ket-dua, nadutokanak a mangbukel iti baro a stake iti Sanpete County, Utah. Bayat dagiti gagangay nga interbyu, nasdaawak a nakakita manen iti patpatgek a gayyemko a ni Brother Cox. Natignayak a mangawag kenkuana kas baro a stake patriarch. Kalpasan nga inordenak, naginnarakupkami ket nagsangit. Nasdaaw dagiti tao iti siled no apay agsangsangit dagitoy dua a lallakay. Ngem ammomi. Ammo ni Sister Cox. Nagsangitkami gapu iti rag-o! Nalagipmi ti di nakappapati a panagdaliasat ti ayat ken panagbabawi a nagrugi nasurok 30 tawen ti naglabas, iti sardam iti balayda.
Saan a naggibus dita ti estoria. Dimmakkel ti pamilia da Brother ken Sister Cox a mairaman ti 3 nga annak, 20 nga appoko, and 54 nga appoko iti tumeng. Mainayon iti dayta ti ginasgasut a misionario, adu a rinibribu pay iti templo, ken ginasgasut pay nga immawat iti patriarchal blessing iti ima ni Wilbur Cox. Ti impluensiada ken Leonora agtultuloyto a mangaring iti adu a henerasion iti intero a lubong.
Mapasamak dagiti padas kas kada Wilbur ken Leonora Cox iti linawas—sapay iti inaldaw—iti uneg ditoy Simbaan. Ipatungpal dagiti napasnek a katulongan ti Apo Jesucristo ti aramidna, babaen ti bileg ken turayna.
Kakabsat, adda dagiti ridaw a maluktantayo, priesthood blessing a maitedtayo, puspuso a mapaimbagtayo, dagensen a mabaklaytayo, pammaneknek a mapapigsatayo, biag a maispaltayo, rag-o a mayegtayo iti pagtaengan dagiti Santo iti Ud-udina nga Aldaw—gapu ta addaantayo iti priesthood ti Dios. Datayo ti lallaki a “naawagan ken naisagana manipud iti pamuon ti lubong a maibatay iti pasakbay a pannakaammo ti Dios, a pakaammuan iti aglaplapusanan a pammati[tayo],” a mangaramid iti daytoy.12
Ita a sardam awisenkayo a makipagtakder kaniak iti naindaklan nga agnanayon a panagkikinnabsattayo. No yawagko ti priesthood officeyo, tumakderkayo ket agtalinaed a nakatakder. Dagiti deacon, tumakderkayo! Dagiti teacher, tumakderkayo! Dagiti priest! Dagiti bishop! Dagiti elder! Dagiti high priest! Dagiti patriarch! Dagiti Pitupulo! Dagiti Apostol!
Ita, kakabsat, agtalinaedkayo a nakatakder ket makipagkantatayo iti korotayo iti amin a tallo a berso ti “Rise Up, O Men of God”?13 Bayat panagkantayo, panunotenyo ti pagrebbenganyo kas maingel a buyot ti Dios a tumulong a mangisagana iti lubong iti Maikadua a Yaay ti Apo. Daytoy ti pagrebbengantayo. Daytoy ti pribilehiotayo. Paneknekak iti nagan ni Jesucristo, amen.