Ang Propeta sa Dios
Ang propeta dili tigpataliwala ninyo ug sa Manluluwas. Hinoon, mobarug siya tupad ninyo ug motudlo sa dalan paingon sa Manluluwas.
Idugang nako ang akong pag-abi-abi nila ni Elder Gerrit Gong ug Elder Ulisses Soares ngadto sa dili hitupngan nga panag-igsoonay sa Korum sa Napulog Duha.
Sa atong pagpaluyo ni Presidente Russell M. Nelson isip propeta sa Ginoo ug Presidente sa Ang Simbahan ni Jesukristo sa mga Santos sa Ulahing mga Adlaw, kabahin na kita sa usa ka balaanong gimando nga maligdong nga katiguman—maligdong tungod kay ang mga panghitabo sa miaging usa ka oras gipaabut na sa kalangitan sukad sa wala pa ang kalibutan. Si Ginoong Jesukristo, kinsa nagdumala sa Iyang buhat, mipresentar karon pinaagi ni Presidente Eyring sa Iyang propeta, sa Iyang dinihogan nga lider, ngari kanato, ang Iyang katawhan sa pakigsaad, nga nagtugot kanato nga mopakita diha sa kadaghanan sa atong kaandam nga mopaluyo kaniya ug mosunod sa iyang tambag.
Niadtong minilyon nga mga miyembro nga wala nato makauban dinhi sa Conference Center, gusto nakong mahibaloan ninyo nga ang Espiritu sa Ginoo niini nga building atol sa pagpaluyo ni Presidente Nelson mao gayud kon unsa ang inyong gilauman—puno sa gahum sa espiritu. Ang gimando sa langit kanato nga panagtigum dili lamang niini nga Conference Center apan sa tibuok kalibutan—sa mga chapel sa Asia, Africa, ug North America; sa mga panimalay sa Central ug South America ug Europa; sa giatupan nga mga hawanan diha sa Pasipiko ug sa mga isla sa kadagatan. Kini nga panagtigum anaa sa bisan asang bahin sa kalibutan nga maanaa kamo, bisan kon ang inyong koneksyon mao lamang ang audio sa inyong smartphone. Ang gipataas natong mga kamot wala giihap sa atong mga bishop, apan sigurado nga gihinumduman kini sa langit, sama sa atong pakigsaad ngadto sa Dios, ug ang atong aksyon girekord diha sa basahon sa kinabuhi.
Nagpili ang Ginoo og Iyang Propeta
Ang pagpili sa usa ka propeta gihimo Mismo sa Ginoo. Walay pagpangampanya, walay mga debate, walay pagtinguha alang sa posisyon, walay pagsupak, kawalay pagsalig, kalibug, o kagubot. Ako usab mopamatuod nga ang gahum sa langit nagauban kanamo didto sa taas nga lawak sa templo samtang mainampuon kaming nagliyok kang Presidente Nelson ug mibati sa dili ikalimud nga pagtugot sa Ginoo diha kaniya.
Ang pagkapili ni Presidente Nelson nga mosebisyo isip propeta sa Dios gihimo sa dugay nang panahon. Ang mga pulong sa Ginoo ngadto ni Jeremias magamit ngadto ni Presidente Nelson: “Sa wala pa ikaw buhata nako diha sa tiyan naila ko na ikaw; ug sa wala pa ikaw mogula sa tagoangkan gibalaan ko na ikaw, gitudlo ko ikaw nga manalagna alang sa mga nasud.” Tulo lamang ka tuig ang milabay, si Elder Nelson, sa edad nga 90, mao ang ikaupat sa seniority, nga dunay duha sa tulo ka senior nga mga Apostoles nga mas bata pa kay kaniya. Ang Ginoo, kinsa maoy nagkontrolar sa kinabuhi ug sa kamatayon, mipili sa Iyang propeta. Si Presidente Nelson, sa edad nga 93, anaa sa talagsaong kahimsug. Nanghinaut kita nga makauban nato siya sa laing dekada o duha, apan sa pagkakaron naningkamot mi nga agnihon siya nga mopalayo lang una sa mga ski slope.
Samtang gipaluyohan nato ang propeta isip dinihogan sa Ginoo, klaruhon nato nga ang Dios lamang ang atong gisimba, ang atong Langitnong Amahan, ug ang Iyang balaang Anak. Pinaagi kini sa mga maayo nga buhat, kalooy, ug grasya sa atong Manluluwas, nga si Jesukristo, nga usa ka adlaw makasulod na usab kita sa Ilang presensya.
Nganong Mosunod man Kita sa Propeta
Apan si Jesus nagtudlo usab og importante nga kamatuoran mahitungod sa mga sulugoon nga Iyang gipadala kanato. “Ang magadawat kaninyo,” miingon Siya, “magadawat kanako, ug ang magadawat kanako magadawat sa nagpadala kanako.”
Ang labing importante nga tahas sa propeta sa Ginoo mao ang pagtudlo kanato bahin sa Manluluwas ug ang paggiya kanato ngadto Kaniya.
Adunay daghang lohikal nga mga rason nga mosunod kang Presidente Russell M. Nelson. Bisan kadtong dili sakop sa atong tinuohan motawag kaniya nga maantigo gayud. Usa siya ka medikal doktor sa edad nga 22, usa ka tinahud nga tig-opera sa kasingkasing, ug inila nga pioneer sa kalamboan sa open-heart surgery.
Ang kadaghanan miila sa iyang kaalam ug paghukom: siyam ka dekada nga nagkat-on mahitungod sa kinabuhi ug kamatayon, nagpakabuhi nga walay kahakog, naghigugma ug nagtudlo sa mga anak sa Dios sa matag dapit sa kalibutan, ug ang makapahamtong nga mga kasinatian sa pagbaton og 10 ka anak, 57 ka apo, ug 118 ka apo sa tuhod (kining katapusang numero kanunayng mausab; usa ka apo sa tuhod ang natawo niining lang milabayng Miyerkules).
Kadtong mas nakaila kaniya mosulti bahin ni Presidente Nelson nga miatubang sa mga kalisdanan sa kinabuhi uban sa hugot nga pagtuo ug kaisug. Sa dihang ang kanser mikutlo sa kinabuhi sa iyang 37 anyos nga anak nga babaye, nga si Emily, nga mibiya sa mahigugmaong bana ug lima ka gagmayng anak, nakadungog ko niya nga miingon, “Ako ang iyang amahan, usa ka medikal doktor, ug usa ka Apostol ni Ginoong Jesukristo, apan kinahanglan kong moyuko sa akong ulo ug moila, ‘Dili akong pagbuot apan ang imong pagbuot maoy matuman.’”
Ang Magbalantay sa Tore
Bisan kon gidayeg nato kining tanang halangdon nga mga kinaiya, nganong sundon man nato si Presidente Nelson? Nganong sundon man nato ang propeta? Tungod kay gitawag siya ni Ginoong Jesukristo ug misangon kaniya isip ang Iyang magbalantay sa tore.
Ang Carcassonne usa ka talagsaong siyudad nga giparilan didto sa France nga nagbarug sukad pa sa tunga-tungang kapanahunan. Tag-as nga mga tore ang nagbuntaog nga gipanalipdan niining mga paril, gitukod alang sa mga magbalantay nga magbarug niadtong mga tore sa adlaw ug gabii, nga kanunayng magtan-aw sa unahan alang sa kaaway. Kon makakita ang magbalantay og kaaway nga nagsingabut, ang iyang tingog sa pagpasidaan manalipod sa katawhan sa Carcassonne gikan sa taliabut nga kakuyaw nga wala nila makita.
Ang propeta usa ka magbalantay sa tore, nga manalipod kanato gikan sa espiritwal nga mga kakuyaw nga mahimong dili nato makita.
Ang Ginoo namulong ngadto ni Ezequiel, “Gibutang ko ikaw nga usa ka magbalantay alang sa balay sa Israel; tungod niini patalinghugi ang pulong [gikan] sa akong ba-ba, ug ihatag kanila ang pasidaan gikan kanako.”
Kanunay kitang maghisgot sa atong panginahanglan nga mosunod sa propeta, apan ikonsiderar ang bug-at nga palas-anon nga gibutang sa Ginoo diha sa Iyang propeta: “Kon ikaw dili mosulti sa pagpasidaan sa tawong dautan … , [ug] kanang tawo nga dautan … mamatay gayud diha sa iyang kasal-anan; … ang iyang dugo panilngon ko diha sa imong kamot.”
Usa ka Mas Dakong Personal nga Pagsaksi
Atong gihangup si Presidente Nelson sama sa ato untang paghangup kang Pedro o Moises kon nabuhi pa kita sa ilang panahon. Gisultihan sa Dios si Moises, “Ako magauban sa imong ba-ba, ug magatudlo kanimo kong unsa ang imong igasulti.” Maminaw kita sa propeta sa Ginoo uban sa hugot nga pagtuo nga ang iyang mga pulong “gikan sa kaugalingon nga ba-ba [sa Ginoo].”
Usa ba kini ka pagtuo nga wala hunahunaa? Dili, dili kini mao. Matag usa kanato adunay espiritwal nga pagsaksi bahin sa katinuod sa Pagpahiuli sa ebanghelyo ni Jesukristo. Pinaagi sa atong kaugalingong kabubut-on ug pagpili, gipataas nato ang atong kamot karong buntaga, nga namahayag sa atong tinguha nga mopaluyo sa propeta sa Ginoo pinaagi sa atong “pagsalig, hugot nga pagtuo, ug [mga] pag-ampo” ug sa pagsunod sa iyang tambag. Kita adunay pribilehiyo isip mga Santos sa Ulahing mga Adlaw nga makadawat og personal nga pagsaksi nga ang tawag ni Presidente Nelson gikan sa Dios. Samtang ang akong asawa, si Kathy, personal nga nakaila ni Presidente Nelson sulod sa dul-an sa tulo ka dekada ug walay kwestyon mahitungod sa iyang balaang katungdanan, sa pag-set apart kaniya, nagsugod siya sa pagbasa sa tanan niyang mga pakigpulong sa kinatibuk-ang komperensya sa miaging 34 ka tuig, nga nag-ampo alang sa mas lawom nga kasiguroan sa iyang propetikanhong tahas. Mosaad ko kaninyo nga kining mas dakong pagsaksi moabut kaninyo samtang mapainubsanon ug takus kamong magtinguha niini.
Nganong andam man kaayo kitang mosunod sa tingog sa atong propeta? Alang niadtong makugihong nagtinguha og kinabuhing dayon, ang tingog sa propeta nagdala og espiritwal nga kaluwasan sa gubot kaayo nga panahon.
Nagpuyo kita sa usa ka planeta nga daghang tingog ang nanawagan. Ang internet, ang atong mga smartphone, ang atong labihan ka daghang kapilian nga mga kalingawan nga ang tanan gustong mokuha sa atong pagtagad ug moimpluwensya kanato, nanghinaut nga mopalit kita sa ilang mga produkto ug mopahiangay sa ilang mga sumbanan.
Ang daw walay katapusang impormasyon ug opinyon mopahinumdom kanato sa mga pasidaan sa kasulatan bahin sa “igatuya-tuya ug igaliyok-liyok,” “ginahandos sa hangin,” ug naimpluwensya sa “lipat-lipat” niadtong kinsa “batid sa pagmugnag kasaypanan.”
Ang pag-angkla sa atong kalag ngadto kang Ginoong Jesukristo nagkinahanglan nga maminaw niadtong Iyang gipadala. Ang pagsunod sa propeta niining gubot nga kalibutan susama sa giputos sa usa ka komportable, init nga habul sa usa ka labihan ka tugnaw nga adlaw.
Nagpuyo kita sa usa ka kalibutan nga puno sa pangatarungan, debate, argumento, lohika, ug pagpasabut. Ang mangutana og, “Ngano man?” positibo sa daghan kaayong aspeto sa atong kinabuhi, motugot sa gahum sa atong salabutan sa paggiya og daghang kapilian ug mga desisyon nga atong atubangon matag adlaw.
Apan ang tingog sa Ginoo kasagaran moabut nga walay pagpasabut. Dugay na kaayo sa wala pa ang academics magtuon sa epekto sa pagkadili matinud-anon [infidelity] ngadto sa misalig nga mga kapikas ug mga anak, ang Ginoo namahayag, “Dili ka magpanapaw.” Gawas sa pagsalig sa kaugalingong salabutan lamang, atong hatagan og bili ang gasa sa Espiritu Santo.
Ayaw Katingala
Ang tingog sa propeta, samtang mabinationg gipamulong, kasagaran mahimong usa ka tingog nga manawagan kanato nga mag-usab, nga maghinulsol, ug mobalik ngadto sa Ginoo. Kon ang pagkorihir gikinahanglan, dili nato langayon. Ug ayaw kaalarma kon ang tingog sa propeta bahin sa pagpasidaan mosupak sa popular nga mga opinyon sa atong panahon. Ang pagbiay-biay sa nasuko nga mga dili tumutuo kanunayng isalibay sa higayon nga magsugod na sa pagsulti ang propeta. Samtang magpaubos kamo sa pagsunod sa tambag sa propeta sa Ginoo, mosaad ko kaninyo og dugang nga panalangin sa kaluwasan ug kalinaw.
Ayaw katingala kon usahay ang inyong personal nga mga panglantaw dili kanunay nga mahiangay sa mga pagtulun-an sa propeta sa Ginoo. Mga gutlo kini sa pagkat-on, sa pagpaubos, kon moluhod kita aron mag-ampo. Matinud-anon kitang magpadayon, nga mosalig sa Dios, nga nasayud nga moabut ang panahon nga makadawat kita og dugang nga espiritwal nga katin-awan gikan sa atong Langitnong Amahan. Usa ka propeta ang mihulagway sa dili ikatandi nga gasa sa Manluluwas isip “ang kabubut-on sa Anak ingon nga gituhop ngadto sa kabubut-on sa Amahan.” Ang pagtugyan sa atong kabubut-on ngadto sa kabubut-on sa Dios, sa tinuod, dili man gayud pagtugyan apan ang sinugdanan sa usa ka mahimayaong kadaugan.
Ang uban masobrahan sa pag-analisar sa mga pulong sa propeta, manlimbasug sa pagtino kon unsa ang iyang propetikanhong tingog ug unsa ang iyang personal nga opinyon.
Niadtong 1982, duha ka tuig sa wala pa matawag isip General Authority, si Brother Russell M. Nelson miingon: “Wala gyud ko mangutana sa akong kaugalingon, ‘Kanus-a man mamulong ang propeta isip usa ka propeta ug kanus-a man siya mamulong nga dili usa ka propeta?’ Ang akong kinaiya mao, ‘Unsaon man nako aron mas mahisama kaniya?’” Midugang siya, “Ang akong [pilosopiya mao] ang paghunong sa pagkwestyon kon ang pamahayag sa propeta doktrina ba o dili ug mag-focus lang sa pagsunod niini.” Mao kini kon giunsa sa usa ka mapaubsanon ug espiritwal nga tawo pagpili nga mohan-ay sa iyang kinabuhi. Karon, 36 ka tuig ang milabay, siya na ang propeta sa Ginoo.
Ang Paglambo sa Imong Pagtuo sa Manluluwas
Sa akong personal nga kinabuhi, akong nabantayan nga samtang mainampuon kong nagtuon sa mga pulong sa propeta sa Dios ug sa mainampingon, uban sa pagpailub, sa espiritwal nga paagi mipahiangay sa akong kabubut-on ngadto sa iyang dinasig nga mga pagtulun-an, ang akong pagtuo diha ni Ginoong Jesukristo kanunay nga milambo. Kon mopili kita sa pagbaliwala sa iyang tambag ug motino nga mas nasayud kita, ang atong pagtuo mag-antus ug ang atong mahangturong panglantaw dili na klaro. Mosaad ko kaninyo nga kon magpabilin mo nga determinado sa pagsunod sa propeta, ang inyong pagtuo sa Manluluwas molambo.
Miingon ang Manluluwas, “Ang tanan nga mga propeta … nagpamatuod kanako.”
Ang propeta dili tigpataliwala ninyo ug sa Manluluwas. Hinoon, mobarug siya tupad ninyo ug motudlo sa dalan paingon sa Manluluwas. Ang labing mahinungdanon nga responsibilidad ug labing bililhon nga gasa sa propeta ngari kanato mao ang iyang tinuod nga pagsaksi, ang iyang sigurado nga kahibalo, nga si Jesus mao ang Kristo. Sama ni Pedro sa karaan, ang atong propeta namahayag, “[Siya] mao ang Kristo, ang Anak sa Dios nga buhi.”
Sa umaabut nga adlaw, nga magtan-aw og balik sa atong pagkamortal, magmaya kita nga nakalakaw kita dinhi sa yuta sa panahon sa usa ka buhi nga propeta. Nianang adlawa, ako nag-ampo nga kita makahimo sa pag-ingon:
Kita naminaw kaniya.
Kita mituo kaniya.
Kita nagtuon sa iyang mga pulong uban sa pagpailub ug hugot nga pagtuo.
Kita nag-ampo alang kaniya.
Kita nagbarug uban kaniya.
Kita mapaubsanon nga misunod kaniya.
Kita nahigugma kaniya.
Akong ibilin ang akong maligdong nga pagsaksi nga si Jesus mao ang Kristo, ang atong Manluluwas ug Manunubos, ug nga si Presidente Russell M. Nelson mao ang Iyang dinihugan nga propeta dinhi sa yuta. Sa pangalan ni Jesukristo, amen.