Mo Ungil Mengkar a Sib
A kureng me tirkel moldingel er tir a mo omes er kau el sechelirir e mo medengei el kmo, ngokiu kau, e ngar ngii a sebecheklir e ungil a rengerir.
Tal rak ra memong, e a chimo el ngalek e a Primary el blo kudengelii er a kngara Chile a uchul ak mlo klikmechur, “Alii,” ngii a milkingang, “Ngak a David. Ng sebechem el mo mengedecheduch el kirek er a klou el ongdibel?”
Se el bok chelellakl, e ak mo melebedebek el kirel tia el tekingel a David. Kid el rokui el soad el mo ngmai a chetengakl. Ng soad el ngar er ngii a ultuteled, e bo londengelkid a rechad, e mo melechesuar a beltik el reng.
Rodos me a Rodam, a derta er kemiu a ngar er ngii a ultuteliu. Ng osisiu me a lak omasech er kemiu er a klou el ongdibel, a Osobel a mengedelkau e betik a rengul er kau. Alsekum ke omdasou el kmo tia klemerang, ng di kirem el melebedebek el kmo Ngii a mla “[dosechau] er a cherreuel a [Chimal].”
Klemedengei el kmo a Osobel a betik a rengul er kid, e kede locha melebedebek el kmo, ng merekera e kede meral olecholt er a betkil a rengud el mo er Ngii?
A Osobel a uleker er a Petrus, “Ng betik a regum er ngak … ?”
A Petrus a ulnger,” Choi, e Rubak; ke medengei el kmo ng betik a renguk er kau. Ngii a melekinga er ngii, Momeka a sib er ngak.”
Sera luut loker ngii er a ongeru me a ongedei el taem, “Ng betik a rengm er ngak?” e Petrus a mlo mekngit a rengul eng di milketeklii a beltkil a rengul: “Rubak, kau a medengei a rokui el tekoi; kau a medengei el kmo ng betik a renguk er kau. Me a Jesus a dula er ngii, Momeka cheremek el sib.”
A Petrus ng dimlak el bla lochotii el kmo ng mera el betik a rengul el oltirakl er a Kristo? Er a se el taem er a lekot el mo kebetech er a kederang, ngii a di “mle mereched” el chemoit a ukedel e mo oltirakl er a Osobel. A Petrus el mo mera el chad er a omenged er a rechad. Ngii a di mla blak a rengul el oltirakl e obengkel a Osobel er a taem er a Osisecheklel e olengeseu el olisechakl er a rebebil el kirel a ebangkelio er a Jesus Kristo.
E ng di chelecha e a mla mekiis er a kodall el Rubak a mle medengei el kmo Ngii a mo diak el ngar bita er a Petrus, el olecholt er ngii el kmo ng mekerang e oingerang e ng mesiou. A le dibus a Osobel, a Petrus a ousbech el osiik a ulekrael er a Chedaol Reng, e melai a ocholt el di ngii, e dirrek el mo oba klaumerang me a blekeuelreng el mo meruul. Uldalem a osengel el kirel a sib er Ngii, a urungulel a Osobel a soal a Petrus a loruul aike el Ngii a meruul alsekum e ng Ngii a mla er tiang. Ng ulengit er a Petrus me ng mo mengkar a sib.
Tia el dirk mlo merek el Ongeua el Buil, e a President Russell M. Nelson a oldars er a osisiu el ongit el me er kid el mo omeka a sib er a Chedam el ngara chedaol el teletael e meruul er ngii el okiu a olisechakl.
El mo mera el kongei er tia el omengemedaol, e ng kired el mekdebechii se el reng er a mengkar a sib e mo medengei aike el ousbech a sib er a Rubak. Ng mekera e kid a mouaia mengkar a sib el Rubak a soal a bo doruul?
El uaisei el betok a kerid, e ng sebeched el obult el bedul a Osobel, Jesus Kristo—el ngii a Ungil el Mengkar a Sib. A Osobel lodengei e ulecherangel, te ngar er ngii a mengkerengir, te mle cheldull el ngara cheldellel a Dios.
Medengei e Ulecherangel
Se el dolasem el mo oltirakl a okesiul a Osobel, e ng kired, a kot, el medengei e omechur a sib er Ngii. Kid a mla metutk a keltukl el chad me a telungalek el doungerachel er tir me kid a mui el medengei el kmo a delbechelel a Rubak a ulecherangel e diak a chad el lobes er ngii. Ocherngal, a uaisei, el diak el belkul a chochur; ng belkul a meruul er a tang meng mo melechesuar er a beltkil a rengul a Osobel el okiu a chad el ngii a mesiou er Ngii. El okiu tia el teletael, e a rokui a sebechir el mo medengei el kmo a oubeltikelreng el Chedam er Babeluades a medengelterir.
Ak dirk mlo medengelii a ta el ngeasek el redil el ngii a miltutkl el mo olisechakl er a ta el odos el ngii a rekil a mle bekord el eim el rekil ngika el ngeasek el dil. Uldak, e tirka el terung a osisiu el mle sorir a tekoi er a chelitakl. Se el ta el oldingel ngika el ngeasek el redil, e te dmak el mengitakl, a olecholt aike el sorir. Te omekdubech er a klsechelei el ngii a omekngeltengat a klengar er tir el terung.
Ak oureng el kmo tirke el tir a omolisechakl er tir a mo mesekemiu el sechelirir e mo melechesuar el kmo, ngar er kau, e te oba a kot me a melisiich a rengrir—chad el ngii a medengei a tekoi el chelbangel e olengeseu er tir er a urungulir me a tekoi el tir a sorir el kudmokl.
Ng diak el meketeket e ak ngiluu a ngerachel el mo olisechakl el mora ta el odos el ngak me a chelmengek el olisechakl a dimlak ki modengelii. Tia er a kungedecheduch el obengkel a Jess, el ngii a mle teruich me a elolem a rekil el chelmengek el olisechakl, e ngii a mle ouchais er a kmal ungil uldesuel, “Ng kired el mo medengelii.”
Aki di mle mereched el tibir el kmo a omelai el siasing er a medemam me a kedeb el omesodam el okiu a text a mle ungil el uchelel. Ak uldersii a dengua, e a Jess e metir a botang el nguu a siasing. A kot el mle techall er a osisecheklam a mle omelasem el kaukledem.
A kot el odngelam, e aki uleker er ngika el odos er kemam alsekum e ng mla er ngii a ngidi el ngerang el sebecham el osisebii er a nglungucham el oltechil. Ngii a mocha ouchais er kemam a ringel er ngii e kilengei el kmo ng sebecham el meluluuch el kirel. A klemerang er ngii me a klou el rengul a milkdebechii a mereched el reng er a klaubeltikelreng. Ng klebokel el techall el kulbedebek er ngii er a nglunguchek er a bek el sils.
Se el moluluuch, e ke mo melechesuar er a beltkil a rengul a Jesus Kristo el kirir tirke el tir a omolisechakl er tir. Momerk er tia el beltikelreng el obengterir. Ngera el ungil el rolel a ngar ngii el omeka er a sib er Ngii el ua molengeseu er tir el mo melecheuar er a Beltkil a Rengul—lokiu kau?
Mengkar
A ongeru el rolel el momekdubech er a reng er a mengkar a sib a mo mengkerengel a sib er Ngii. Kid el chedal a Ikelesia er a Uriul el klebesei el Santo, e ng sebeched el odubech, mengedechuul, mengituuk, e omekedechor a bekord el ngii di el ngerang. Kid a mereched el omtech a ngesou el okiu a uldars el chim me a lechub e ng belatong el cookies. E ng di ngar er ngii a bebil?
A sib er kid te medengei el kmo kid a mengkar er tir el oba a beltikelreng e remuul a omeruul el ngii a mo olengeseu?
Chelsel aMateus 25 eng kmo:
“Mei, kau el ngeltengat er a Chedam, bomnguu a renged el ngii a keldmokl el kirem … :
“E le ngak a ulsengerenger, e ke mileskak a tech: Ak mle meched a renguk, e ke mileskak a ilumel: Ak mle chad er a rael, e ng di ke ngilikak: …
“E tirke el melemalt bo longer er ngii, el kmo, Rubak sera kimesekau el songerenger, e ulemekra er kau? e meched a rengum, e milskau a imelem?
“Sera kimesekau el chad er a rael, e ngilikau?”
Rodam me a rodos, a klou ututelel el tekoi a milsekau. A remelemalt el chad a milsterir tirke el ousbech a ngesou e le te omes e omtab. Kid meng sebeched el mo beiusech a medad el mo olengeseu e mengelaod a reng, mengemedaol e omerrous el kirel a klungiolir a rebebil. E se el doruul, e kid me ng sebeched el mo nguu a omeketeklel a yaksok el ngara Mateus: “El okiu aike el blamruul el mora tang er tirka … , kau a mla rullii el me er ngak.”
A tara sechelei—el bo domekedong er ngii el John—a uluuchais el kmo ngera sebechel duubech se el sekum e kede mesa a diak el bleketakl el ngii a lousbech er ngii a tang: “A ta el odos el ngara ward er ngak a melasem el di ngii el melai er a klengar er ngii. Uriul er a eru el buil, ak miltik er ngii el kmo ng dimlak a ta el chad er a chelechad el mla mo duum er a bechil el mesaod el kirel tia el klou el olibesongel el omeruul. Oumekikngit el reng, ngak me ak dimlak. Merekong, e ak mocha oleker er a bechil el mo ousueleb. Ng mle merur el chad, e blechoel el di cheklemuk. E uaisei sera bocha kdu, ‘A bechim a millasem el melai er a klengar er ngii. Ng locha kmal mle oberaod er kau. Ng soam el mesaod el kirel?’ ngii a lilangel. A cheldechedechemam a mle oberaod e dmolech er a reng el ngii a milkdebechiii a ungil ta el reng me a klaumerang er a di mle chelsel a tela el bung.”
A John a liluut el melekoi, “Ak omdasu el kmo a omerrelled a blechoel el di melai a brownies er a bai diak dolasem el kmo kede mekerang e merael el mo er se el omeruul el oba klaumerang me a beltikelreng.”
A sib er kid a locha ngara ringel, uriid, me a lechub e te mla tuobed; e kid el mengkar a sib, kid a sebeched el mo teloi er tirke el kot el mo mes aike el ngii a lousbech. Ng sebeched el orrenges e oubeltikelreng el diak dorritel e dirrek el odars a tekoi el loureng a reng e olengeseu el oba oterkel a omerolel a Chedaol Reng.
Rodos me a rodam, a beluulechad a olsingch e ngara deureng le ikel bekokeuii lomeruul el moruul a uchul. Sel mosiik a ulekrael er a Dios el kmo kemekera mochotii a beltkil a Rengul e mes aikel usbechellir tirkel moldingel er tir, e a medam a mo obok. A chedaol odngeliu a meskemiu a chedaol ulekrael. Ng sebechiu mo ulserechakl a rengmiu lultuil er a chedaol ulekrael.
Mo Kldibel er a Rengedel a Dios
Ongedei, e ng soad a sib er kid bo lecheldull el ngara cheldellel a Dios. Omeruul er tiang, e ng kired el omtab el kmo te kirel ker a sib er kid er a rael er a telbiil. Ng chedaol a techelled el mo dengei a rengrir e ngoiteterir el mo ra Osobel.
A Sister Josivini er a Fiji a mle meringel er ngii a omes er a rolel el melemolem er tia el rael—mera el uaisei. A sechelil a milsa el kmo a Josivini a mle meringel er ngii a omes a chedaol llechukl el rirellii me ng diak el sa el sebechel el menguiu. Ngii a milsa a Josivini a glass er ngii er a omenguiu me a mengerkard el bibrurek el olechesel el mo meluches er aike el rokui el ngklel a Jesus Kristo el medung er a chelsel a Babier er a Mormon. Tia el milekdubech el kekerei el urungulel a reng el mo olisechakl el olengeseu el okiu a omesubel a chedaol llechul a milkera el mo uchul e a Josivini a mlo ketengel mora templo ruriul er a lluich me a eai el rak ra lemetecholb.
El diak el ior er a kmo a sib er kid a mesisiich me a lechub e te mechitechut, ngara deu el reng me a lechub e ng klengit el reng, ng sebeched el rullii me ng diak a chad el di ngii el tang el merael. Ng sebeched el oubeltikelreng el mo er tir er a ngidi el basio lengar er ngii el okiu a reng e odars a ngelsuid me a tekoi er a olisiich el mo er sel el merael el mei el blekekled. Se el doluluuch el dosiik el mo medengei a rengrir, ak olecholt er a klaumerang er ngak el kmo a Chedam er Babeluades a mo mengetikaik er kid me a Chedaol Reng er Ngii a mo obengked. Ngar er ngii a techelled el mo “anghel el meliuekl er [tir]” e Ngii bo lorael er mederir.
A Dios a siotai er kid el mo omeka a sib er Ngii, e mo oungerachel er a cheldellir a roltirakl er Ngii el di uai Ngii. Ngii a siotai er kid el mo mengkar a sib er a bek el beluu, me a bek el basio. (Ng uaisei, e Elder Uchtdorf, ng betik a rengud e ousbech a German shepherds.) E Urungulel el soal a rengeasek el Rechedal el mo teloi er tia el omeruul.
A rengeasek a sebechir el mo tara kmal el mesisiich el mengkar a sib. Te uaisei, el ua ike el bla ldung a President Russell M. Nelson, “ngara delongelir a rekot el ungil el Rubak a mla oldurokl el me er tial el beluulechad.” Tir a kot el “ngellitel el reng,” el “kot el ulsemuul ometechei er kid,” el tir a oltirakl er a Osobel. Ng sebechem el melebedebek er se el klisiich el remengkar a sib a mo obang se el lomtebechel a sib er Ngii? Sel dobengterir tirkal ngeasek loldingel, e ked emes ongasireng el tekoi.
Rengeasek el sechal me a redil, aki ousbech er kemiu! Alsekum kemiu a diak a ngercheliu el olisechakl, bo mongedecheduch er a Chelechad er a Rolngeseu me a merredelel a chelechad er a elders. Te mo dmeu a rengrir el kirel a klemeriar el reng er kemiu el mo uchul e a rebebil er a sib er Ngii a mo medengei el kmo te medengei el kirir e ulecherangel, ngar er ngii a mengkerngir, e cheldull er a cheldellel a Dios.
Se el mei se el sils el kid a mo outubareuach er a ochil betik er a rengud el Osobeled, el mla omekerould er a cheldellel a sib er Ngii, ak meluluuch el kmo ng mo sebeched el onger el ua nger er a Petrus: “Choi, e Rubak; ke medengei el kmo ng betik a renguk er kau.” Tirka, el Cheremem el sib, a ngara beltikereng, e selbechakl, e ulderuul. El ngara ngklel a Jesus Kristo, amen,