Oupwe Apungano Ikenai Ion oupwe Angang Ngeni
Watten ach pwapwa esemuch a anongonong won ach finata ewe Kot mi manau me fiti I non An angang.
Emon chon non kachito Mary Poppins i emon sokkun chon tumunun semirit non England—nge mi wor an machik.1 A changeto non asapwan an epwe anisi ewe faminien Banks mi osukosuk, ekkewe ra nom non London non Imw nampa 17, won ewe an Cherry Tree. Wisan pwe epwe tumunu ekkewe semirit, Jane me Michael. Non pochokun nge kirekiroch, a poputa ne aitir nesen mi auchea non napanap mi fiti machik.
Jane me Michael ra murinono, nge Mary a finata pwe a tori fansoun epwene no senir. Non ewe sipai, chienan Mary we itan Bert, chon nimeti fanangen ekkei, a sotuni ne aukano seni an epwe no. A anini, “Nge ir semirit mi och, Mary.”
Mary a ponuweni, “Ita upwe pwan nometiw rer ika rese? Nge use tongeni anisir ika rese mut ngeniei, me ese wor emon mi kon weires ai upwe aiti nap seni ewe semirit a ekieki pwe mi sinei mettoch meinisin.”
Bert a eis, “Iwe met?”
Mary a ponuweni, “Iwe repwe fori ewe kinikin mwirin won pwisin ar.”2
Pwii me fefinei, usun Jane me Michael Banks, kich “semirit mi och” mi auchea sipwe kaeo. Semach won Nang a mochen anisi kich me afeiochu kich, nge sise kan soun mut ngeni I. Fan ekkoch, sia kan foffor usun ita kich mi sinei mettoch meinisin. Me mi pwan auchea ngeni kich sipwe fori “ewe kinikin mwirin” won pwisin ach. Ina pwata sia feito won fonufan seni ew manau me mwen fonufan, non nang. Ach “kinikin mwirin” wewen sipwe fini.
An Semach won Nang mochen ren an tumunu kich esap ren an Noun semirit repwe fori met mi pung; nge ren Noun semirit repwe finata ne fori met mi pung me ennetin winiti usun I. Ika A chok mochen pwe sipwe aneasochis, I epwe aea niffang ika niwinin tipis an epwe anisi ach mwokutukut.
Nge Kot ese pwapwaiti an Noun semirit repwe chok winiti “aramas rese ekiek” ekkewe ra kaeo me aneasochis, ekkewe resap nuunu won Noun chori me non ewe rumwen Selestian.3 Apw, Kot a mochen Noun semirit repwe marita non pekin ngun me fiti I non An angangen famini.
Kot a forata ew kokkot ren minne sipwe tongeni winiti chon muuni Muun we, ew aanen pwon mi emweni kich ach sipwe winiti usun I, angei ewe sokkun manau mi wor ren, me manau fochofoch non famini fan mesan.4 Ach finata a fen—me mi—auchea ngeni ei kokkot, ewe sia kaeo usun me mwen ei manau fonufan. Sia etiwa ewe kokkot me fini ne feito fonufan.
Ren ach sipwe aea nuku me kaeo ne aea ach pungun finata non pungoch, ew pwonupwonun monnuki a pwonueno ach ekiek, pwe sisap chechemeni an Kot kokkot. Me nukun ena pwonupwon, an Kot kewe popun resap pwonueta pokiten sisap murinono me winiti ennetin chon muuni a mochen sipwe winiti.
Ewe soufos Liai a apasa: “Ina minne, ewe Samon Kot a ngeni aramas ewe tufich pwe repwe foffor won pwisin ar. Ina minne, aramas resap tongeni pwisin foffor won ar tiwenon chok ika i epwe angei sossot seni emon ika ewe emon.”5 Non ew kinikinin auchea, ew pekin a fis me ren Jises Kraist, ewe Aemonun noun ewe Sam. Ewe pwan ew pekin a fis me ren Setan, Lucifer, ewe a mochen atano pungun finata me angei nemenem.6
Non Jises Kraist, mi wor emon chon peni kich ngeni ewe Sam.”7 Mwirin an awesano An we asoren fangeno, Jises “a feita ngeni nang … pwe epwe tingor seni ewe Sam an kewe pungun umoumoch minne a fen aea won ekkewe noun aramas.” Iwe, an angei ekkewe pungun umoumoch, “a peni ewe mwokutukut an ekkewe noun aramas.”8
An Jises Kraist peni kich ren ewe Sam fan asengesich esap och pekin ungeni. Jises Kraist, ewe a mutata mochenin epwe kuf ren mochenin ewe Sam,9 esap pesei och mettoch tiwenon chok met ewe Sam a mochen seni nepoputan. Meni Semach won Nang a emweira me tipew ngeni ach fetanoch.
An Kraist peni kich a, eu mettoch, a achema ngeni kich usun An we mwoni ach kewe tipis me ese wor emon epwe mitino seni an Kot we umoumoch.10 Ren ekkewe mi nuku non Jises Kraist, aier, paptais, me nikitu tori nesoponon—a anisi ngeni kich ach sipwe omusomus11—ewe Samon a omusa, echikara, me peni. Ii ach chon aninis, aurour, me emwen—epwe pwarata me apungano ach kewe omusomus ren Kot.12
Ren sokofesenin, Lucifer i emon chon eitengaw ika chon etipisi. John ewe Chon Pwarata a anapanapa an Lucifer we amuchunon kuf: Iwe ua rong ew mongungu wachemuk non nang a apasa, Iei amanau a wareto, me pochokun, me ewe muun ach Kot, me we manamanen an Kraist. Pwata? Pokiten ewe chon eitengawen pwich kewe a koturutiw, ewe a eitengawer me mwen ach Kot neran me nepwin. Iwe ra akkufu atewe ren chan ewe Appanen Siip, me ren kapasen pwarata.13
Lucifer i ei chon eitengaw. A kapasen ungeni kich me non ewe manau mwen fonufan, me a sopweno ne apungu kich me non ei manau. A kutta an epwe etekinakichitiw. A mochen sipwe mefi weires esemuch. I ewe a urenikich pwe sise naf, ewe a urenikich pwe sise nafoch, ewe a urenikich pwe ese wor pwaak sefan seni mwan. I ewe a unusen chon turunufas, ewe a aweiresikich nupwen sia weires.
Ika Lucifer a aiti emon semirit ne fetan me ewe semirit a turuno, i epwe puchor ngeni ewe semirit, efeiengawa , me ureni epwe wesino ne kaeo. An Lucifer kewe napanap repwe ngenikich tipemwaramwar me riaffou—fansoun meinisin. Ei semenapen chofona I ewe akkaewin chon awora mwaken14 me a angang nikatuputup ne atupano me aosukusuka kich, “pun i a kutta pwe aramas meinisin repwe pwan riaffou usun chok i.”15
Ika Kraist epwe aiti emon semirit ne fetan me ewe semirit a turuno, I epwe anisi ewe semirit ne uta me pesei ekkewe eipweipw mwirin.16 Kraist I ewe chon aninis me chon echipa. Aanan kewe ra wato pwapwa me epinukunuk—amuchunon me fansoun meinisin.
An Kot kokkot mi pachenong ourour ngeni kich, ekkewe sia aita ngenir annuk me non ekkewe pukefel. Ekkei annuk rese fis are kawor ar repwe chok aiti kich ne aneasochis. Ir mi fofongeni ach angei ekkewe napanapen Kot, ach niwiniti Semach won Nang, me angei pwapwa esemuch. Ach aneasochisi An annuk esap ew foffor mi tanechpwak; sia finata Kot me An we aan ngeni Imwach. Ewe tetten ngeni kich mi chok nonno ngeni Adam me Eve, ikewe “Kot a ngeni ir annuk, mwirin an a pwarano ngeni ir ewe kokkotun ngaseno.”17 Ina mwo Kot a mochen kich sipwe nom won ewe aanen pwon, A ngeni kich ewe sufonun finata.
Ennetin, Kot a mochen, esuku, ouroura pwe Noun semirit repwe pwisin finata. I esap echimwa kich. Seni ewe niffangen pungun finata, Kot a mut ngeni Noun kewe “repwe foffor ren pwisin ir nge resap foffor wor.”18 Pungun finata a mut ngeni kich sipwe finata ne nom won ewe aanen pwon, ika sisap. A mut ngeni kich sipwe su seni, ika sisap. Usun sisap echimw ne aneasochisi, sise tongeni echimw ne aneasonap. Ese wor emon a tongeni, me nukun ach etipew, asukicheno seni ewe aan. (Ei esap rukuno ngeni ekkewe ar pungun finata mi tano. Rese asukeno seni ewe aan. Ir mi feiengaw. Ra angei an Kot wewe, tong, me umoumoch.)
Nupwen sia rikino seni ewe aan, Kot a netipengaw pokiten I mi sinei pwe epwe ennetin, emwenikich ngeni kisinon pwapwa me poutunon ekkewe feioch. Non ekkewe pukefel, ach no seni ewe aan a wewe ngeni tipis, me pungun a wato kukkununon pwapwa me poutunon ekkewe feioch a iteni niwinin tipis. Ren ei nikinik, Kot ese etipisi kich; niwinin tipis ina pungun ach finata, esap An.
Nupwen sia kuna pwe sia rikino seni ewe aan, sia tongeni nom seni, are pokiten ewe Achasefanin Jises Kraist, sia tongeni finata ne niwin sefan me tota sefan. Non ekkewe pukefel, ewe mwokutukutun finata ne siwin me niwin ngeni ewe aan a iteni aier. Ach sisap aier a wewen pwe sia finata ne aukano kich seni ekkewe feioch Kot a mochen ngenikich. Ika “sisap mochen pwapwaiti ita met minne [kich] sipwe fen angei,” iwe sipwe “niwiniti ew neni ikewe sia tongeni pwapwaiti met [sia] mochen angei”19—ina ach finata, esap an Kot.
Ina mwo ika mi nakatam ach sia fen rikino seni ewe aan ika ifa towawen ach no fetan, ewe fansoun sia finata ne siwin, Kot a anisi kich ne niwin.20 Seni an Kot kuna, ren ennetin aier me nikitu fiti tipepos non Kraist, nupwen sia niwin ngeni ewe aan, epwe usun ita sise fen rikino.21 Ewe Chon Amanau a moni niwinin ach tipis me angasakicheno seni ewe kisino non pwapwa me feioch. Ei a iteni omusomus me non ekkewe pukefel. Mwirin papatais, chon mwichefen meinisin repwe miit seni ewe aan—ekkoch neich sipwe tur—seni. Ina minne, ach aea nuku non Jises Kraist, aier, angei aninis seni I, me ach museno, resap chok fis fan ew nge non unusen manauach, repwe fifis mwirin ew me ew. Iei usun ach sipwe “nikitu tori nesoponon.”22
Mi auchea sipwe finata ion sipwe angang ngeni.23Watten ach pwapwa esemuch a anongonong won ach finata ewe Kot mi manau me fiti I non An angang. Nupwen sia achocho ne “fori kinikin mwirin” won pwisin ach, sia kaeo ne aea ach pungun finata non pungoch. Usun ruemon Presetenin Fin Anisi Unus akkom ra apasa, sisap usun “monukon ra mochen emon epwe afanir me apungur fansoun meinisin.”24 Apw, Kot a mochen sipwe winiti mwan me fefin me sia tongeni pwisin nemeni kich.
Ach finata ne tapweno mwirin an ewe Sam we kokkot ina ewe chok aan sia tongeni winiti chon muuni Muun we, ina atun A tongeni nuku ach sisap eis met mi ungeni An mochen.25 Nge mi auchea sipwe chemeni pwe “ese wor emon mi kon weires ai upwe aiti nap seni ewe semirit a ekieki pwe mi sinei mettoch meinisin.” Iwe mi auchea sipwe tipemecheres ne kaeo non aanen ewe Samon me ren ewe Samon me Noun chon angang. Sipwe nuku pwe kich noun Semach me Inach non nang me mi auchea “sipwe kaeo” me sinei pwe “won pwisin ach” esap wewen “anamon.”26
Usun met ewe soufos Jacob a apasa non ewe Puken Morn, Ua fiti ii ne apasa:
“Iei minne, apwapwai netipemi, me chechemeni pwe ami oua ngaseno ne foffor ren pwisin ami—ne finata ewe aanen mano esemuch ika ewe aanen manau esemuch.
Ina minne, ami pwi achengicheng [me fefinei], siwini nonnomun inisimi ngeni netipen Kot, me esap netipen ewe tefin … ; iwe chechemeni, mwirin ami oua siwini nonnomun inisimi ngeni Kot, pwe epwe chok me ren me seni ewe chenin Kot ami oupwe manau.”27
Iwe, finata nuku non Kraist; finata aier; finata ami oupwe papatais me angei ewe Ngun mi Fel; finata ne achocho ne amonata me angei ewe sacrament non nimenimoch; finata ne fori pwon mi pin non ewe tempel; me finata ne angang ngeni ewe Kot mi manau me Noun kewe. Ach finata a esenipato kich ion me ion sipwe winiti.
Ua asopwano ren unusen an Jacob we efeioch: “Ina minne, amo Kot epwe amanaua kemi seni … mano esemuch me ren ewe manamanen ewe achasefan, pwe oupwe tongeni ketiwenong non ewe muun Kot.”28 Non iten Jises Kraist, amen.