Uchelel a Cheldecheduch
Ng mla mo temel a Ikelesia el Ikelesia lultuil ra blai, el nguu a ngeseu ra ikel mekedmokl ra chelsel a branch, ward me a stake.
Rodam me a rodos, aki mle madeltmuil el kirel tial ongdibel lobengkemiu er chelechal October el klou ongdibel er a Ikelesia. Mekekeald el sus er kemam leko ra dersta er kemiu. Aki mui ra omereng el saul er a ngelsumiu ra nglunguchiu. Aki omelchesiu a klisichel. Kom mesulang!
Aki mereng a saul er a blakelreng er kemiu el meruul loltirakl osisechakl el mildung ra klou longdibel ra elolem el buil ra mla memong. A roungerachel a Stake ra beluulechad el rokir a mla siik a ocholt el kirel a lmuut el omengederoder ra elders quorum. A rechedal tial quorums ma rodos ra Relief Society a blak a rengrir el mesiou ra rodam ma rodos lokiu a ngarbab, e chedaol teletael. A ki mukrael lokiu a klungioliu ma ngarbab el blak el reng loba beltikelreng ra Osobel el mora telungalek er kemiu, retonari, ma resechelimiu e mesiou er tir el di uai Ngii.
Sera ongdibel ra April, e a Sister Nelson me a ngak a mla omes ra rechedad er a eua el meklou el beluu me a iungs. Er a Jerusalem el mora Harare, e ngara Winnipeg el mora Bangkok, e ak mla mes a mesisiich el klaumera er kemiu ma mesisiich el cholechotel.
Aki meral dmeu a rengmam ra rengeasek el mla meteloi er a cheldellel a rengeasek er a Rubak el mo olngeseu el mengedibel ra bereberiid el Israel. Aki oureng a suliu! Me sel molemolem el oltirakl er a ongtik el mildung er sel ongdibel ra rengeasek er a belulechad, e kemiu a okiu a meral teletelel el kemam a mo oltirakl. E meral klou a blam relii kemiu a rengeasek!
Aika el mla mo merek el rak, e kemam el ngara chelechad ra Ikelesia a mla ouedikel kirel a klou a belkul ker: ng mekera doba ebangkelio er sel betengel mechelings, ma chedaol reuoll el kirel a diak a ulebengelel, el mora rokui el ngelekel a Dios?
Sel de Uriul-klebesei el Santo, e kede mla mo smau lomdasu er a “ikelesia” el ngii a ngar ngii ra chelsel a blil a omengull, e a olengeseu er ngii aikel dubech er a blai. Ng kired el ngodechii tial teletael. Ng mla mo temel a Ikelesia el Ikelesia lultuil ra blai, el nguu a ngeseu ra ikel mekedmokl ra chelsel a branch, ward me a stake.
Ma Ikelesia lolemolem loberk ra beluulechad, ea rebetok el chedad a kiei er a basio el diak a ikelesia er ngii—e locha diak le borngii ra ngarmedad. Ak dobedebekii a telungalek el, tiaikid a mle uchul, e te mle kirir el di meruul ra misang ra blirir. A kuleker ra chedil el kmo ng soal tial mora ikelesia er a blil. E ngulenger, “Ng meral soak! A bechik a mla mo melekoi a ungil tekoi ra blai er chelechang, sel lodengei el kmo ng mo mengedaol a chedaol belsoil ra bek el Sandei.”
Sel meketeketang el moktek ra Ikelesia a mo olngeseu ra rokui el chedal el mo melisiich a klaumerang er tir ra Rubak er kid el Jesus Kristo ma Tngakireng er Ngii, e mo olngeseu er tir el meruul e oltirakl a telbiil lobengkel a Dios, e mo melisiich e merenged ra telungalek er tir. Chelechal meringel a beluulechad, e tia diak le beot. A cherarou a orreched el melisiich a kodil er a klaumerang me a kid me a telungalek er kid. Sel mo mesisiich er a chedaol tekoi, e kede ousbech aikel mo melisiich er kid me a oureor el uldasu. Me ng uaisei, e ng soad el oterekokl a selmechokl el tetetael el ngii a melemolem el melisiich er a rechedad me a telungalek er tir.
Mla mo betok el rak, el remerredel ra Ikelesia a oureor el kirel a uldak el suobel el mo melisiich a telungaek ma derta el chad lokui a ultuil-ra blai me a olngeseu ra-Ikelesa luldasu el kirel omesubel a suobel, melisiich a klaumerang, e oldubech e melisiich ra chad er a omengull er ngii. A ureram er a ikal dirk mlo merek el rak el mo kullii a Chedaol Sils—el bo de semeriar er ngii meng olangch er kid el mora Dios er a beltkil a rengud el mo er Ngii—e kid a mengai el moungil lokiu a ikal lomesemechokl el ki bo mouchais er chelechang.
Chelechal tutau ea ki mo ouchais ra ungil e tabesul me a sel mo melemosem a osisechekel a ebangkelio ra blai ma Ikelesia. Kid a di kid loungerachel ra chedaol ulekeruled. A chedaol llechukl a meketeklii el chedam ma chedil a ngerchelir el mo oslisechakl a suobel el mora rengelekir. E ngii a ngerchelel a ikelesia el mo olngeseu er a bek el chad ra chedaol el bleketakl el moktek el mo mengisois a klemedengei er a chad el kirel a ebangkelio.
A Elder Quentin L. Cook er chelechang a mo ouchais a ikal lomesemechokl. A rokui el chedal a Council er a Kot el Presidency me a Chelechad er a Teruich me a Terung el Apostol a dmak el oldubech a ikal tekoi. A ki mui louchais er a ulekrael el mlara Rubak el ngar ngii a relii er a omengedmeklel tial uldasu me a teletelel el Elder Cook a mo meskid.
Rodam ma rodos, ak medengei el kmo a Dios a ngar! A Jesus a Kristo! Tiang a Ikelesia er Ngii e Ngii a omekrael lokiu a ulaoch ma ocholt el mora ngariou a rengrir el mesiungel. A kuuchias el ngara ngklel a Jesus Kristo, amen.