Mo Obang a Ngklel a Jesus Kristo

Mla er a Elder Robert C. Gay

Er a Presidency er a Seventy

Bol blak a rengud el mo nguu a ngklel a Jesus Kristo—lokiu omes el uai Ngii, e mesiou el uai Ngii, e oumerang el kmo a krazia er Ngii a medeel kired.

Ak dirk millebedebek, er a tekingel a President Nelson el kirel ngklel a Ikelesia loba sel meral mla mocholt el ngklel, e ak mlo melbedebek osischeklel Osobel el mo er a re Nephites el kirel a ngklel a Ikelesia. Sera kunguiu a tekingel Osobel, eng mlo mechas a renguk er Ngii er a ledu er a rechad el kmo “ng kirir el mo nguu a ngklel a Kristo.” Tia rirellak el mo omdasu omerellek e di ngak loker ngak, “Ngak a kuba ngklel Osobel er a teletael el Ngii a soal?” Chelechal sils eng soak louchais a bebil er a uldasu el blak ngai el ngii a nger er a kerik.

A kot, e sel denguu a ngklel a Kristo eng belkul a kmo kede blak a rengud el lomes er a rechad el uaia Dios a lomes er tir. Nguangera uldesuel a Dios el kirir a rechedal? A Joseph Smith a dilu el kmo, “Ng uaisei el bebil er a rechad a merritel e oltuub er a rebebil el diak a chubechub er tir, eng di a Chedam er a Babeluades a omes er a rokir el cherrengelel a telungalek loba ulekerreu er a chedam me a beltikereng” le Beltkil a rengul [a] kmal dmolech.”

Sesei el rak ra memong er a klou lochedak a mlad. Ng mle meringel a klengar ngii. Ng dimlak el sal mesisiich el chedal a ikelesia. A bechil a chilitii ngii me a reteua el mekekerei el ngelekel. Sel kesus er a bol secher, e a rengelekel a mlara chelsel a delmerab lobengkel, e ak milsa klengeltengat me bol kellechakl omerollel muut el mo remei. Tiakid el taem e ak mlo melchesuar el kmo ak mle blechoel uaia di kumes er ngika lochedak er a ikel ringel le bla er ngii me tial diak el mesisiich er a ikelesia. Sera kngai chimak locha er a bebul a bdelul er sel kesus, e ak mlo melchesuar a mesisiich el ngerrellel a Chedaol Reng. A kmal mlo mui el medengei a klungiolel e mlo sebechek lomes er ngii el uaia Dios a lomes er ngii—el diak di el chad el mechitechut er a ebangkelio, ng dirrek el chad lultekangel el ngara chelsel a meringel el tekoi el ngak a dimlak ngarngii. Ak milsang el kmal ungil chedil, el diak el iior er a ringel le blarngii, eng milkurelterir a reteua el klebokel, e ungil ngalek. Ak milsang el sechelil e ulemes er a delemam e mlo kldemel ruriul er a lemad a demam.

Tiaikid lulebongel kesus lobengkel ochedak, e a kumera el kmo a Dios a uleker ngak, “Ng sebechem el mesang el kmo a rebek el chad el iliuekl er kau a chedaol chad?”

A Brigham Young a ulisechakl:

“Ng soak el mengelechel er kemiu a Resanto … elmo omes er a rebek el sechal me a redil er sel ngii a teletelir ng diak el sel osengem er tir.”

“Kede blechoel rongesii a chad el kmo—‘Ngkal chad a ngarngii a telmellel meng diak el sebechel Santo.’ … Kede rongesterir a rebebil el melius e oumulak … [malechub] eng diak longull er a Chedaol sils. … Lak morritel er tirka chad, le kau a diak modengelii a moktek er a Rubak el kirir. … [Ng bai,] bol klou a rengum el kirir.”

Ngarngii a ta er kemiu el sebechel mesa Osobel el mechikau me a berraod er kau el Ngii diak lesekau? A Osobel a ulemes er ngike el chad er a Samaria, me a rirebet er a laokreng, me a melai a teksir a rechad, me a chebedes, me a ngarngii a secherel a bdelul, me a remekngit el chad loba osisiu losengel. Kede rokui el ngelekel a Demal, e rokui el sebeched el mo suobel.

Ng sebechem el Mesang lobult el mo cheroid er a chad el lomdednger kirel a basio er ngii el ngara rengedel a Dios malechub eng ngidil chad el ngara ringelt? Ng diak el sebechek. Sel denguu er a osengel a Kristo, e a dersta el chad a kmal klou a ultutelir. Ng diak a chad mloterekokl er a uchelel el mo remiid. A diak a ulebengelel klengar a kmal sebechel mo er a rokui el chad.

Sel ngerrelel Chedaol Reng el mei er ngak er a kngara bita er a dukellel ochedak, e ak silubii a klou a belkul suobel: sel domes er a rebebil loba Osengel, e kede mla kudmokl eru el tekoi—osebelir tirkel desterir el chad me a osebeled.

Ongerung, sel denguu a ngklel a Kristo, eng diak di bo dobang osengel a Dios, kede dirrek el kired el meruul a Urerel e mesiou el uaia Ngii er a losiou. Ked kiei lolab aikel erul meklou el llach, e kongei er a soal a Dios, e mengideb er a Israel, e mo “llomes el mo er a rechad.” Kede ngmai e oltirakl a telbiil me a chedaol ruoll er a mla moluut el Ikelesia er Ngii. Sel bo doruul uaisei, e a Dios a mo meskid a klisiich el mo klengeltengat el mei er kid, telungalek er kid, me a klengar er a rebebil. Ka moker kau, “Ngarngii a kudengelii el chad el diak lousbech a klisiich er a babeluades er a klengar tir?”

A Dios a mo remuul ongasireng el tekoi er a klengar kid sel dongikiid er kid. Kede mengikiid er kid sel dongikiid a rengud. Kede mengikiid a rengud sel dorrenges er Ngii, douchel a rengud er a kngtid, e dobult, e doubeltikereng el uai Ngii er a loubeltikereng. A Osobel a uleker, “Le kau di moubeltikereng el mo tirkel loubeltikereng er kau, e ngera lomeksullem a bomnguu?”

Ak dirk silubii a teletael el dilubech er a klengar er a Elder James E. Talmage el rirellak el mo chelellakl e omtab el kmo ak mekerang e oubeltikereng e mesiou er tirkel ngara bita er ngak. Sera lengeasek el sensei, ruchei er a le bo le Apsotol er sel meringel el taem er a bekoiuiull rakt er a 1892, e a Elder Talmage a mlo medengelii a tal telungalek, el diak el chedal a Ikelesia, el kiliei er bita er ngii, el mlo smecher er tial rakt. Ng dimlak a chad el soal mo er tial blai leng mle kengaol tial rakt el bekoiuiull. Eng di, a Elder Talmage, a mirrael el mo er tial blai. Ng miltik er a reteua el ngalek: a eru rekil mla mad el cheloit er a ulaol, me a eim a rekil me a teruich a rekil el kmal ngara klou el ringel, me a kmal mechitecheto bedengel el teruich me a edei a rekil. A rechad er a blirir a mlara ringel me a klengitelreng el dikea klisichel a bedengir.

A Elder Talmage a mililii a mla mad me a re dirk chad, e rikii tial blai, e otobed a ikal kikiongel el bail, e sueseb aikal kikiongel ulech. Ng milngedmokl el tal sils e lilut el mong er a tutau er a bol kukuk. Ngkal teruich a rekil a mlad er sel kesus. Ng kilderii e mle klsool er ngikal eim a rekil. Ng ulemudech a rasech meng di mlo kikiongel a medal me a bilel a Elder Talmage. Ng milluches el kmo, “Ng dimlak el sebechek el nguu el mecherei er eou, meng di mle klsool er ngii eng mad er a chimal. Ngulngeseu el melakl er tirkal tedei el ngalek e kildmeklii a teletael me a kall me a bail a mlo er tirkal ngara chelebuul er a klengitelreng el telungalek. Sera le bo rei, e a Brother Talmage a chiloit aikal bilel, e millecholb a kar lomekeuad a baiking, e mlo cheroid er a telungalek er ngii, e mlo telkib el smecher er tial rakt.

Betok el klengar el iliuekl er kid a ngara ringel. A Resanto a nguu a ngklel a Osobel sel bo lolngeseu el mo er a rokui el chad el diak el iior er a kmo te ngerang—le sel bo doruul uaisei e kede osobel a klengar.

A ulebongel, a kuumera el kmo sel bo denguu a Ngklel eng kired loumera er Ngii. A miting el kblarngii er a tal mle Sandei, e a tal ngeasek el dil a uleker tiakid el tekoi: “Ng dirk mlodiak dak ngak me a sechelik el sechal, e ngii a millilt el mo cheroid er a Ikelesia. Ng dmu er ngak el kmo ng kmal ungila rengul er chelechang. Ng mekera sebechel uaisei?”

A Osobel a ulenger tial ker er a le du er a re Nephites el kmo, “Alsekum a [klengar kemiu] a diak el delalm er a ebangkelio er ngak, e delalm er a urerel a chad, malechub a urerel a diablong, e a kmal dmu er kemiu el kmo [komo] ngara deureng er a [ureriu] el telkib el taem, e sola mo e ra ulebongel.” Ng kmal diak a kemanget el deureng er a ikrel ebangkelio er a Jesus Kristo.

Chelsel tiaikid el miting e ak mlo omdasu el kirir a rebetok el ungil chad el kudengelterir el ngara klou el ringel me a llach el ngii a kmal meringel er tir. E di ngak loker ngak, “Ngera dirrek el bol du Osobel el mo er tir?” A kumera el kmo Ngii a mo oker, “Ko moumera er ngak?” Ngii a dilu, er ngike elredil, mlarngii a secherel kmo, “A klaumera er kau a mla rullau el mo ungil, morael el ngara budech.”

A tara kmal soak el bades er a chedaol llechukl a ngara Johanes 4:4, el kmo, “Ng mle kirel mo chengelakl er beluu er a Samaria.”

Ngera uchul meng kmal soak tial bades? A mera er ngii a Jesus a dimlak el kirel mo er a Samaria. Sel taem e a re Jews a dimlak el sorir a rechad er a Samaria me te di merael er a tkul a beluu er a Samaria. Eng di a Jesus a millilt el mong el mle soal louchais er a rokui el chad el kmo Ngii a metib el Mesiah. Tiaikid a uchul, e Ngii a dimlak di lolilt er tirkal chad, ng dirrek el ngileltii a redil—el diak kuk di el tara redil ng redil el ngara klengit—el seikid el taem ea rechad omes er ngii el kmal diak a ultutelel. A kumera el kmo a Jesus a miruul er tiang me a dersta er kid bododengei el kmo a beltkil a Rengul a lmuut el ngarbab er a dekted, mekngit el kse er kid, rraureng er kid, ongetikaik el mei er kid, me a kngtid, me a telemall el telungalek er kid, sebekreng er kid, sechered, chelbuled, mekngit lomeruul el mla mei er kid, chelitechetul a rengud, me a klsabisi el dengarngii. Ngii a soal a bododengei el rokui el kmo ng diak a tal chad el Ngii a diak lomekungil er ngii e lebsa diak a ulebengelel deureng.

A krasia er ngii a kmal medeel. Ngii a mlo chemau a rokui el tekoi. A klisichel a Tngakireng er Ngii a klisiich el ngaruchei er a ringel er a klengar. A klumech er ngkel redil el mlara chido a kmo Ngii a medengei teletael er a klengar kid e kid a blechoel sebeched el merael Lobengkel el diak el iior er a kmo kede techang. Meng osisiu el tekoi el mo er ngike el redil e dirrek el mei er kid, e Ngii a kmo, “Ngike el melim er a ralm el kbsang a diak luut el mo meched a rengul; ng bai [mo klou] el omeuachel el ralm, el merael bedul a diak a ulebengelel klengar.”

Ngii di el rael er a klengar e ngera me kobult el mo cheroid er a Osobel el ngii olab a rokui el klisiich el mo sobecheklau? Ngii di el ngera el kirem rullii el mo oumera e Ngii a kmal ungil. Kemiu a rodam me a rodos er ngak, bo dolilt el mo mengisois er a klaumera er kid er Chedam er a Babeluades me a Osobeled, el Jesus Kristo.

A Ikelesia er a Jesus Kristo er a Uriul-klebesei el Santo a ngii a Ikelesia er a Osobel. Kid a ulekrael er a Kristo lokiu a meral profet. Nglunguchek me bol blak a rengud el mo nguu a ngklel a Jesus Kristo—el mo obang Osengel, e mesiou el uai Ngii, e oumerang el kmo a krasia er Ngii a medeel el sobecheklid el mo remei er a diak a ulebengelel deureng. El ngara ngklel a Jesus Kristo, amen.

Uleklatk

1. Mesa 3 Nephi 27:3–8.

2. Mesa 3 Nephi 27:5–6; dirrek el mesa Doctrine and Covenants 20:77 20:77 me a telbiil er a sakrament.

3. Mesa Dallin H. Oaks, His Holy Name (1998) er a mui el omesodel a denguu a ngklel e bo desioning er a ngklel a Jesus Kristo.

4. Mesa Mosiah 5:2–3. A tara tebedechel sel klou el ngeldechel a rengir a rechedal a King Benjamin el tir a ngiluu a ngklel a Kristo a ulebok osengir el “miles a meklou el tekoi.” Tirkel mo nguu a rengedel a celestial a tirkel chad “lomes er sel ngii a teletelel” (Doctrine and Covenants 76:94).

5. Teachings of Presidents of the Church: Joseph Smith (2007), 39.

6. Brigham Young, er a Journal of Discourses, 8:37.

7. Discourses of Brigham Young, sel. John A. Widtsoe (1954), 278.

8. Mesa 3 Nephi 17:7.

9. Mesa John 3:14–17; Acts 10:34; 1 Nephi 17:35; 2 Nephi 26:33; Doctrine and Covenants 50:41–42; Moses 1:39. Elder D. Todd Christofferson a ulsisechakl: “Kede oba klaumerang e ouchais ra Tngakireng er a Jesus Kristo, e sel mo ulebongel, eng mo klungiaol el mo er tirkel rokui lobult el mo er Ngii. Ng diak a chad el mla moterekokl el mo nguu a ngariou er a ikel rokui lolab a Chedam el kirir a Rengelekel” (“Why Marriage, Why Family,” Liahona, May 2015, 52).

10. Mesa Mateus 5:14–16; 22:35–40; Mosiah 3:19; Doctrine and Covenants 50:13–14; 133:5; dirrek el mesa Russell M. Nelson, “The Gathering of Scattered Israel,” Liahona, Nov. 2006, 79–81.

11. Mesa Leviticus 18:4; 2 Nephi 31:5–12; Doctrine and Covenants 1:12–16; 136:4; Articles of Faith 1:3–4.

12. Mesa Doctrine and Covenants 84:20–21; 110:9.

13. Mesa Joshua 3:5; Doctrine and Covenants 43:16; dirrek el mesa John 17:19. A Osobel a milngikiid er Ngii el mo oba klisiich lomekngeltengat er kid.

14. Mesa Helaman 3:35; Doctrine and Covenants 12:6–9; 88:74.

15. Mesa Joseph Smith—History 1:17, kot el llach el Dios a milsa Prophet Joseph Smith; dirrek el mesa 2 Nephi 9:29; 3 Nephi 28:34.

16. Mesa Markus 1:15; Rellir 3:19; Alma 5:33; 42:22–23; Doctrine and Covenants 19:4–20. Dirrek el momtab aikal eru el tekoi el kirel a klengit. Kot, Hugh Nibley meluches: “A klengit a diak a belkul. Ke meruul er a tara tekoi e bai kirem el kuk meruul er a chimong el ungil leng sebechem” (Approaching Zion, ed. Don E. Norton [1989], 66). Delal a John Wesley, er a Susanna Wesley milluches el mora ngelekel: “Mnguu tial llach. Ngii di el ngerang el oitechetur a moktek er kau, a tomelli a uldesuem er a tekoi, e tomellii osengem el bedul a Dios, e choridau er a chedaol tekoi; …ngii di el ngerang el rullii a bedengem … el mo mesisiich er a uldesuem; tiang a klengit, el diak el belkul a kmo ng kora ungil teletael” (Susanna Wesley: The Complete Writings, ed. Charles Wallace Jr. [1997], 109).

17. Mesa Lukas 22:32; 3 Nephi 9:11, 20.

18. Mesa Johanes 13:2–15, 34. Sel kesus ra Tngakireng er Ngii, e a Osobel a mirisou ochil a tara rechedal lulterur, ma tang el oleko ng dimlak lodengelii, ma rebebil el iliit a mederir ra ikel taem el Ngii a kmal ousbech er tir. Ng ulsisechakl, “Beches el llach el kbeskemiu me komo kaubeltikereng el uai ngak el betik a renguk er kemiu.”

19. Matthew 5:46.

20. Mesa John R. Talmage, The Talmage Story: Life of James E. Talmage—Educator, Scientist, Apostle (1972), 112–14.

21. Mesa Alma 10:22–23; 62:40.

22. 3 Nephi 27:11.

23. Chelsel a Mateus 11:28, 30, a Rubak a kmo: “Mei er ngak, kemiu el chellungel a berraod, ak mo meskemiu a ulengull. … Le berraod er ngak a beot, e kebekakl.” Dirrek el momes er a 2 Corinthians 12:7–9: El Paulus a mesaod ra ringel el kmal mesisiich el uaia “techodulik el melund ra bedenged,” el ngii a miluluuch mel bol cheroid. A Kristo a dilu e rengii el kmo, “A krasia er ngak a medeel el kirem: le klisichek mecherrungel llokiu a chelitechut.” Dirrek el mesa Ether 12:27.

24. Mesa Mosiah 7:33; 29:20; Helaman 12:1; Doctrine and Covenants 124:87.

25. Mesa Luke 8:43–48; Mark 5:25–34. Ngkel redil ngarngii a secherel a kmal lousbech a ngesou e dimlak lodengei el uase ngmekerang. Ng mle smecher el teruich me a eru el rak, e mla chemoit a rokui er ngii er a ukeruul, e di merael mo smecher. Me rechedal me a telungalek er ngii a uldikii, meng mirrael er a delongelir a rechad el mora bita ra Osobel. Ng mle cherrungel a klaumera er ngii er a Oosbel, e Ngii a milchesuar el rirtechii a rsel a Bilel. Ngokiu tial klaumerang e Ngii a di mle mereched el omekungil er ngii. E Ngii a uleker ngii el “rungalek.” Ngii a dikea el ngodech el chad ng mla mo chedal a telungalek er a Dios. A ukeruul el mlorngii a mlora bedengel, klechad er ngii, rengul. A ringel a sebechel melemolem el kemanget el taem, eng di a yaksok er Ngii a merang e cherrungel.

26. Mesa Lukas 4:21; John 4:6–26. Ng Lukas, ng diak el Johanes, a melluches el kirel aikel sils er a urerel a Jesus, Ngii a mlora ikelesia er Ngii er a Nazareth, e milnguiu ra Isaiah lomlaoch el kirel a Mesiah, e millekoi el km o, “Chelechal sils e tial bades a mla mekedmokl.” Tiaikid a kot el llechukl el taem el Osobel a mesaod el Kirel el kmo ng Mesiah. Eng di, sel chido er a Jacob, e a Johanes a meluches el kmo a kot el taem el Jesus a millekoi el kmo Ngii a Mesiah er a buai. Tiaikid, e a rechad ra Samaria a dimlak lomdasu er tir el kmo te Jews, e a Jesus a dirrek el ulisechakl el kmo a ebangkelio er Ngii a mo ra rokui, a re Jew me a re Gentile. Tial tekoi a dilubech er sel ‘ongelolem el sikang,” malechub eng sueleb, el beluuelchad a mellomes er a dichel a sils. A chido er a Jacob a dirrek el ngara rois el kmeed er a basio el rechad er a Israel er a ngaramong a miruul a telbiil lobengkel a Rubak ruriul er a lesiseb er a beluu er a telbiil. Ngodech el tekoi, le bita er tial rois a di medidirt el ked e a kuk bitang a klou el omeuachel er a ralm.

27. A Elder Neal A. Maxwell a ulsisechakl: “Sel dengar ringel e kede melchedech el kmo ngarngii a dirk sebechek lodars, ng sebeched el mo medengei el kmo a Dios, el ngii a kmal ungil medengelkid, a ngilikid el mei el mo ungil. Ng diak a chad el mloterekokl el mo remiid malechub eng mekngit. … Sel desal mo omelchesiu loberaod, e bo dolatk el kmo a Dios a diak el sebechel mo omekberaod er kid” (“Meeting the Challenges of Today” [Brigham Young University devotional, Oct. 10, 1978], 9, speeches.byu.edu).

28. A President Russell M. Nelson a ulisechakl:

    “A tara klebesei, e kemo dechor medal Osobel. Ng kmal mo mechas a rengum me kemo lmangel el soam el mora Rengedel. Kemo osiik a tekoi el mo mereng a Sulel el kirel a kngtim, e ousubes er kau ra mekngit el blekerdelem el mora rebebil, e omekungil er kau ra telemall me a diak lungil lomeruul er a klengar.

    “Kemo mereng a sulel el melisiich er kau el remuul a meklou el tekoi, e mult a chelitechetum el mo klisichem, e uchul eng sebechem el muut el mo kiei Lobengkel ma telungalek er kau el mora ulebongel. A kelchad er Ngii, Tngakireng er Ngii, me a Blekerdelel a mo klemrang el mei er kau” (“Prophets, Leadership, and Divine Law” [worldwide devotional for young adults, Jan. 8, 2017], broadcasts.lds.org).

29. Mesa Isaiah 53:3–5; Alma 7:11–13; Doctrine and Covenants 122:5–9.

30. Mesa Joseph Smith—History 1:17; Elaine S. Dalton, “He Knows You by Name,” Liahona, May 2005, 109–11.

31. Johanes 4:14.