Ewe Pungun Iit ren ewe Mwichenfen

Seni Presiten Russel M. Nelson

Jises Kraist a emweni kich ach sipwe kori iten An we Mwichefen murin Itan pokiten ina An Mwichefen, a urono ren An pochokun.

Achengicheng Pwii me fefinei, non ei ningochun Sabbath sia pwapwa fengen pokiten ach chomongun feioch seni ewe Samon. Sia fokkun kinisou ren ami kapasen pwarata ren ewe niwinsefaniton ewe kapas allimen Jises Kraist, ren ami kewe angangen asorano ami owa fori pwe oupwe tongeni fetanno won An aanen pwon are niwin ngeni samach Kot won nang, me fori ami angangen aninis non An we Mwichefen.

Ikenai uwa mefi ai upwe kapas ngeni kemi usun ei auchean itenap. Non ekkewe wiik a no, Uwa wau ewe kapas usun pungun iten ei Mwichefen.¹ Uwa fori ei pokiten ewe Samon a pesei ngeni ai ekiek usun auchean ewe iit A opwungano ren an ei Mwichefen, ewe iit Ewe Mwichefenin Jises Kraist ren Aramas Mi Pin non Fansoun Soponon.²

Usun ita owa fen sinei, ponuwen ei porous me ngeni ewe ekesiwinin kokkotun emwenin³ mi nofit. Chommong souneng ra mwitir ekesiwini ewe iten ei mwichefen won ar kewe blogs me social media peich. Ekoch ra ekeieki pwata, ren met chommong mettoch afen fis won ei fonufan, a fokun auchea an epwe opwungu och metoch mi nikinikin kukun, ese kan namot. Me ekoch aramas ra apasa ese fich an epwe ekesiwin, pwata sipwe pwan sotuni? Upwe aweiwei pwata sia ekeiki usun namoten ei napanap. Nge aewin upwe akom affata met esappekin ei mettoch:

• Esap ew siwinin it.

• Esap ekesiwini ngeni ew minafo.

• Esap ekesiwinin nikinikin.

• Esap och metoch epwe chok ekesiwin nge sise ekieki.

• Me esap och metoch mi chok kukun ika ese namwot.

Nge, iei punguochun. Iei eu annuk seni ach we Samon. Joseph Smith ese eita ewe mwichefen an we niwinsefanito seni ii ; pwal esap feito me Mormon. Ewe Chon Amanau a pwisin a apasa, ewe mwichefen epwe iteni ewe Mwichefenin Jises Kraist ren Aramas Mi Pin non Fansoun Soponon.”⁴

Me akom, non ewe ier AD 34, ach ewe Samon mi manausefan a wau ew anonon kapasen aurour ngeni chon An we Mwichefen nupwen A churir me non America. Non ewe fansoun a apasa:

“Oupwe eita ewe mwichefen non itei. …

“Iwe ifa usun epwe ai mwichefen tiwenon chok ika epwe eiteit me non itei? Pun ika ew mwichefen epwe eiteit non iten Moses iwe epwe an Moses mwichefen; are ika epwe eiteit non iten emon mwan iwe epwe mwichefenin emon mwan; nge ika pwe epwe eiteit non itei iwe epwe ai mwichefen.”⁵

Pokiten ei wewe ewe iten ei mwichefen esap tongeni siwin. Nupwen ewe Chon Amanau a apasa met ewe iten An we Mwichefen epwe iteni, me a poputa an we toropwen pwon ren, “Pun an ewe mwichefen epwe eiteit,” a fokun wenechar. Me ika sia etiwa oruwen iit an epwe mwuti me fen awatenoi ekewe oruwen iit pwisin seni kich, iwe ii esap tipew ngeni.

Met namwoten ewe iit, ika kor mwochun? Nupwen sipwe kour mwochu iten ewe mwichefen, ren ewe “Mwichefenin LDS”, ika “Mwichefenin Mormon,” ika ewe “Mwichefenin Aramas mi Pin,” ewe auchean mettoch non ekkena it pwe ewe kaimwunon iten ach ewe Chon Amanaw. Ach sipwe tonano iten ach ewe Samon seni an ewe Samon we Mwichefen ina ew an setan win. Nupwen sia poutano iten ach we chon Amanau, sia pounuku met Jises Kraist a fen fori fan itach—pwan An we Aachasefan.

Kopwe nenengeni usun chok An nengeni: Manaw me mwen ei fonufan ii Siowa, Koten ewe Testemen Nom. Fan ourouren Saman we , pwe I ewe Chon Fori ei fonufan me pwan ekoch fonufan.⁶ A fini pwe epwe fori met mochenin Saman we me fori metoch meinisin fan iten noun Kot kewe aramas ese wor emon a tongeni fori! A etekisonatiw me feito fonufan usun noun ewe Samon Anamon non pekin aion me I a weri turunufas, ra pwan otofa I, ra wichi, iwe repwe nieno. Non ewe Ataken Gethemane, Ach we Chon Amanau a wata won pwisin I iteitan metek meinisin, iteitan tipis meinisin, me riaffou meinisin en me ngang me aramas meinisn mi manau akkom me ekkewe repwe eto me manaw won ei fonufan repwe wesen weri. Pokiten ewe weires me riafou, A pu seni cha.⁷ Ekkei riafou me weires meinisin ra napeno nupwen nupwen a mano won ewe irapenges won Calavary.

Seni ei aweiresin kaeo me An we Manausefan— An we Achasefan esemuch—me A ngeni kich meinsin manaw ese much, me angasano kich meinisin seni tipis, nge anonga won ika pwe sia aier.

Mwirin an ewe Samon Manausefanita me manon Noun kewe Chon Kuno, ewe fonufan a uruno ren rochopwak non ngeroun ier. Iwe non ewe ier 1820, Kot ewe Sam me ewe Nau, Jises Kraist, ra pwa ngeni ewe Soufous Joseph Smith me seni ena atun a fis Aniwinsefaninton An ewe Samon we Mwichefen.

Murin meinisin A nikitu ngeni —me murin An a fori ekei fan iten kich aramas, Uwa tepereni ren ai niamam ren ach sia etiwa nge sise weweiti met a fen fis non An ewe Samon we Aniwinsefaniton Mwichefen a eiteit ngeni ekoch iit, ew me ew neir rese chiwen eita ngeni iten Jises Kraist ewe mi pin.

Iteiten Raninifen nupwen sia nimenioch ach sipwe angei ewe sakramen, sia achemasefani ach kewe pwon ngeni Samach won Nang pwe sia wata woch iten Noun we, Jises Kraist.⁸ Sia pwon pwe sipwe tapweno murin I, me aier, aneasosichi An kewe annuk, me sipwe chechemi I fansoun meinisin.

Nupwen sia eimwunau Itan we seni An we Mwichefen, sise tonau I an epwe emon chon nemeni ionapen manawach.

Ach wata iten ach we Chon Amanaw woch a pwan wewen pwe sipwe chon aninis ngeni ekoch—seni ach fofor me ach kapas—pwe Jises i ewe Kraist. Met Sia nuokus ach sipwe enetipengawa ekoch ar ra kor ngeni kich “Mormon” me sia kuf ne peni ach ewe Chon Amanau, ach sipwe uta fan asengesen ii fan iten ewe iit mine An ewe Mwichefen a iteni?

Ika kich aramas me an emon me emon mochen pwe sipwe tongeni aea ewe pochokunen ewe Achesefan an Jises Kraist —an epwe nimeti me echikara kich, opwochokuna me anapano kich, me soponon sipwe ne fefeita ren— Sipwe afataochu pwe I ewe popunapen ena manaman. Sipwe poputa ne kori iten An we Mwichefen ewe iit a fen eita ngeni.

Pwe napengeni chon ei fonufan, An ewe Samon Mwichefen a iteni “ Mwichefein Mormon”. Nge pwe kich chon an ewe Samol Mwichefen sia sinei ion ewe a uta asen mokuran: pwisin Jises Kraist. Chiwenon chok, chommong ra rong ewe iit Mormon ra ekieki pwe sa fen ngeni Mormon. Nge ese pung! Sia epini me oucheani ekewe amwararen soufosun America.⁹ Nge esap kich noun Mormon chon kuno. Kich noun ewe Samon chon kuno.

Kukuto chok non ekewe ran ewe aniwinsefaniton ei Mwichefen, ewe kapas urumot usun ewe Mwichefenin Mormon me Mormons¹⁰ a aa usun ew iit— usun ew itengawen iit, ese eoch iit — me for an epwe opano an Kot pochokun ren ewe Aniwininsefaniton ewe Mwichefen Jises Kraist non ekei fansoun soponon.¹¹

Pwii me fefiei, a fokun chomong sokopaten anini ika tipengaw won ei fonufan usun ewe pungun iten ei mwichefen. Pokiten ei minafon fonufan ian sia nomw non, sia tongeni kuta ekkewe metoch sia mochen sinei me a chok mutir ponuwan—me pwan pachonong ach kuta porousen an ewe Samon ewe Mwichefen chon opungu ra era pwe ewe pungun itan non ekei fansoun ese fich. Ekoch ra mefi pokiten sia kan itefouno usun “Mormon” me usun ewe “Mwichefenin Mormon,” sipwene chok fitano.

Ika pwe och metochun aporous usun met forien poun aramas, ekewe anini epwe win. Nge seni ei wewe iwe sipwe kun ngeni ewe minne An ei Mwichefel akom nge esap an aramas. Ika pwe sipwe engino me ika sipwe fori wisach, ewe Samon epwe emweni kich non ei auchean angang. Pun kich sia sinei pwe ewe Samon epwe anisi ion a aneasosich, usun chok a anisi Nifai ne fori wisan ne ouweta ewe siipw a sai won ewe mataw.¹²

Sia mochen sipwe aneasosich me engino non ach opwungu ekei mwanino. Wisen media pwe epwe weweiti an epwe ponuweni ach tingor.

Non ekewe mwichenapen mwichefen a fen no, Elter Benjamín De Hoyos a kapas usun ei wewe. A apasa:

“Non ekoch ier a no nupwen uwa chok angang non ewe office ren ewe public affairs ren ewe Mwichefan non Mexico, [chienei we me ngang] aiwa fiti ewe aporous won reitio… [Emon me nein ekewe chon emwenin ewe prokram] a eisini [kem], ‘pwata ewe Mwichefen a fokun tam itan? …’

“Chienei we me ngang aiwa emenimen ren ewe kapas eis iwe aiwa sopweno ne awewei ika pwata ewe iten ei Mwichefen ese kefinita me ren aramas. A pwisin kefinita seni ewe Chon amanau… ewe chon emwenin ewe prokram a mitir ponuweni non sufon, ‘Aiwa pwan apasa sefani non am chen me pwapwa.’”¹³

Ewe report a awora ew wewe. Ew seni ew, ach fofor emon me emon ren ach sipwe opwungu ekewe mi mwan a fen ketiw seni chommong ier.¹⁴ Ekoch chon won ei fonufan ika resap fiti kich ne kori itach ngeni ewe pungun iit. Nge ese pung ach sipwe netipengaw ika napengeni chon won ei fonufan ra kor ngeni kich ewe iit ese pung ika sia pwan chok fori usun chok ir.

Ach we pekin emwenin manau mi forsefan a fokun weweoch. A apasa: “Non ewe aewin sopun, ewe wesen iten ewe Mwichefen: Ewe Mwichefenin Jises Kraist ren Aramas Mi Pin non Fansoun Soponon.’ Ika pwe epwe wor mochun ren pekin eiteit iwe sipwe opochokuna ne era ‘ewe Mwichefen’ ika ‘ewe Mwichefenin Jises Kraist’. Ewe eniwininsefaniton ewe mwichefenin Jises Kraist’ mi pwan punguno pwe sipwe era.”¹⁵

Ika emon a eis, “En emon Mormon?” en mi tongeni era, “Ika pwe ke eis ika ngang seni ewe Mwichefenin Jiese Kraist ren Aramas mi Pin non Fansoun Soponon, ewer!”

Ika emon a eis, “En chon ewe Aramas mi Pin?”¹⁶ kopwe ponuweni, “Ewer ngang emon. Uwa nuku non Jises Kraist me ngang emon chon an ewe aniwininsefaniton Mwichefen.”

Pwii me fefinei, Uwa pwon ngeni kemi pwe ika sipwe achocho ngeni wisach ach sipwe opwungu ewe iten An ewe Samon ei Mwichefen, I ewe a eto me An manaman me feioch epwe etiw ren mokuran ekewe Aramas Pin,¹⁷ non ew an sise mwo kuna. Sipwe angei mirit me pochokun seni Kot pwe ren an epwe anisi kich ngeni feiochun ewe aniwininsefaniton ewe kapas animen Jises Kraist ngeni meinisin fonu, cho, me aramas me amwonata ei fonufan ngeni ewe Oruwen Wareto an ewe Samon.

Iwe, ifa itan? Nupwen epwe sipwe kori iten An ewe Samon ewe Mwichefen, ponuwan epwe “Metoch meinisin!” Jises Kraist a emweni kich ach sipwe kori iten An we Mwichefen murin itan pokiten ina An Mwichefen, a urono ren An pochokun.

Ngang mi sinei pwe Kot mi manaw. Jises inai ewe Kraist. Me a emweni An ei Mwichefen ikenai. Uwa apasa ekei non itan we mi pin Jises Kraist, amen.

Esinesin

1. “Ewe Samon a pwar ngeni ei ewe auchean ewe iit a pwar ngeni an we mwichefen, ewe iit Ewe Mwichefenin Jises Kraist ren Aramas Mi Pin Non Fansoun Soponon. A wor kokoch ach me sipwe fori pwe sipwe fori pwe kich sipwe nom non an we mwu. Kukuton chok ekei week, ekewe chon emwenin ei mwichefen me ekoch wisen cho ra poputa. Ekoch pwan ekoch auchean porous epwe kotou non ekei maram” (Russell  M. Nelson “Iten ewe Mwichefen” [official statement, Aug.16, 2018], mormonnewsroom.org).

2. Presetenin ewe Mwichefen akkom ra fen pwan tingor. Ren awewe, Preseten George Albert Smith a paasa: “Ousap etipengawa ewe Samon ren ami eita ngeni ei ewe Mwichefenin Mormon. Ese eita ngeni ewe Mwichefenin Mormon” (non Conference Report, Apr. 1948, 160).

3. Nengeni “Style Guide—The Name of the Church,” mormonnewsroom.org.

4. Nengeni Doctrine and Covenants 115:4.

5. 3 Nifai 27:7–8.

6. Nengeni Moses 1:33.

7. Nengeni Doctrine and Covenants 19:18.

8. Nengeni Moronai 4:3; Doctrine and Covenants 20:37, 77.

9. Mormon ii emon me nein ekewe chon makei ewe Puken Mormon, ekewe ekoch Nifai, Jacob, me Moronai. Ir meinisin ra kuna ewe Samon, usun chok pwan auchean chiaku, ewe Soufos Joseph Smith

10. Ika ewe kapas Mormonites apwan ew kapas a rapwan nounou (nengeni History of the Church, 2:62–63, 126).

11. Ekoch pwan iit rapwan nomw non ewe fansoun Testamen Sofo. Non ewe fansoun Chon Kuno Paul a tori sosot mwemwen Felix, Paul a apasa “ Omw kopwe emon meinapen ekewe cho an Nazares” ( Foffor 24:5). Usun ewe kapas “ren ekewe Nazarenes,” emon chon emwen a makei: “iei ewe wesen iit a katou ngeni ekewe souneng usun ach apasa. Ra iteni ei pokiten Jises ii chon Nazareth” (Albert Barnes, Notes, Explanatory and Practical, on the Acts of the Apostles [1937], 313).

    Apwan non ngeni, emon pwan chon porous a apasa : “Usun ach we Samon a fen kor ngeni ‘chon Nazarene’ (Matt. xxvi. 71), iwe ekkewe chon Jew ra kefininata pwe noun chon kuno ‘Nazarens.’ Ar resap era pwe ir souneng, i.e. ekewe chon kunon ewe Mesaiah” (The Pulpit Commentary: The Acts of the Apostles, ed. H. D. M. Spence and Joseph S. Exell [1884], 2:231).

    Pwan chok nono ngeni Elter Neal A. Maxwell a kaeo: “Seni ekewe uruwon ekewe puk fen, sia kuna ra okukunano an ewe soufou kapas ngenir ar epwe kor ngenir ar repwe okukunanarono. Rese ketiw me ren ekewe remi chok nono ngenir me non mwu. Murin iwe ekewe souneng me akom ra chok iteni ‘ekewe chon Nazarenes.’ (Foffor 24:5.)” (“Out of Obscurity,” Ensign, Nov. 1984, 10).

12. Nengeni 1 Nifai 18:1–2.

13. Benjamín De Hoyos, “Called to Be Saints,” Liahona, May 2011, 106.

14. Ese wor ach pochokun ren met ekoch aramas repwe kori kich, a wor ach pochokun ngeni ifa usun ach epwe eita kich ngeni. Ifa usun ach sipwe mochen ekoch pinini ne kori kich ngeni ewe pungun iiten ewe mwichefel nge kich sise opwonuweta?

15. “Style Guide—The Name of the Church,” mormonnewsroom.org.

16. Ewe iit aramas pin a kapas usun fan chommong non ewe Paipen. Noun Paul toropwe ngeni ekewe Ephesians, ren awewe, a nounou ewe fos aramas pin fan ew non ekewe sopun. Emon aramas pin a emon aramas a nuku non Jises Kraist me achocho ne tapwono mwirin ii.

17. Nengeni Doctrine and Covenants 121:33.