Chedam

Mla er a Brian K. Ashton

Ongeru el Counselor er a Sunday School General Presidency

A dersta er kid a ngarngii a techellel el mo uaia Chedam. A rolel tiang, eng kired el mengull er a Chedam el ngara ngklel a Ngalek.

Chelsel tial rokir klengar, er a bechik, ea Melinda, a melasm el mo kedung el mesiungel a Jesus Kristo. Engdi, sera lengeasek, e ngulmelchesuar el diak el klikiid loba beltkil a rengul a Chedam er a Babeluades me a klengeltengat eleng ngii mle cheleuid el kirel a teletelel a Rubak. A Melinda, millemolm el loltirakl a llechul a Dios altang mle mekngit a rengul. Sesei el rak ra mla memong, eng mlar ngii a okesiu el ngilsukii el mo ungil medengelii sel teletelel a Dios, luldimukl er a Beltkil a rengul el mo er a rengelekel me a omereng saul er Ngii el kirel a dechal a rengud el meruul a Urerel.

A Melinda a silodii el kmo tiang milkerang e ngosukii: “Ak ungil medengelii sel moktel a Rubak, e Ngii a olngeseu er kirel a klungioled, e Ngii a meskid a olisechakl me a okesiu el dousbech el lemuut el mo er Ngii. Ak ungil mesekak me a rebebil el ua Dios a lomes er kid. Ng sebechek el mo oungalek, e olsisechakl, e mesiou loba klou el beltik el reng e kekerei a dakt. Ak kumelchesiu er a budech me a klaumerang ra bai sebekreng e bekikl. Ak kumelchesiu a ngeseu e bai diak kumelchesiu a omelnguull. A klaumerang er ngak a bleketakl. Ak blechoel lomelchesiu er a dmolech el beltkil a rengul a Chedam.”

Sel ngar ngii a “melemalt luldasu el kirel a [Demad er a Babeluades] er a blekerdelel, cherungel, me a teletelel” a klou a belkul el kirel a ulsbechelel a klaumerang el mo nguu a diak a ulebengelel klengar. A melemalt klaumodengei el kirel a teletelel a Chedam er a Babeluades a sebechel ngodechii sel domes a teleteled me a rebebil e ngosukid el mo medengelii a klou beltkil a rengul a Dios el mo era rengelekel me a sel klemeriar reng er Ngii el mo ngosukid el mo uai Ngii. Sel cheleuid el ludasu el kirel a teletelel a Dios a sebechel rulid el lomdasu el kmo ngdiak el sebeched el lemuut el mo Obengkel.

A moktek er a chelechal sils a mo olisechakl a meklou a ultutelel olisechakl el kirel a Chedam el ngii a mo sebechel ngosukid, tokubets el mo tirkel loumedednger el kirel a beltkil a rengul a Dios el mo er tir, mebol lungil a klaumodengei el kirel a melemalt el teletelel a Dios e loumerang er Ngii, me a Ngelekel sechal, me a Moktel el mer kid rokui.

Klengar Ruchei er a Beluulechad

Chelsel sel klengar ruchei er a beluulechad, e a delbenged a milechell el mo er a chedam me a chedil er a Babeluades me kede mle kiei Lobengterir el telungalek. Te mle medengelkid, olsisechakl er kid, e oubeltik el reng el merkid. Kid a kmal mle soad el di mo uai a Chedam er a Babeluades. Maluaisei, bol doruul er tiang, ekid a mlo medengei el kmo ngkired el mo:

1. Nguu a bedenged er a tech;

2. E mo bechiil e mo er ngii a telungalek lokiu sel klisichel a omerenged er a priesthood; e

3. Mo ngmai a klaumodengei, klisiich, me a chedaol teletael.

Eleng ulsbechall, el kired el mo meruul aikal teletael, a Chedam a rireleii a moktel, me bol sebeched alsekum kid a remuul aikel kired el remuul el mo nguu a bedenged er a tech el ngii a di ngar el mo er a ulebongel e mo mekiis er a kodall; mo bechiil e mo er ngii a telungalek er tial klengar malechub, e tirkel mekedung el dimlak a techelir, er a uriul er a klengar er a tech; a mo oureor el mo cherungel; mebol luut el mo er a Chedam me a Chedil er a Babeluades e mo kiei Lobengterir me a telungalek er kid el mo er a diak ulebengelel klengar me a deureng.

A chedaol llechukl a omekedong er tiang el klou luldasu er a mo suobel. Kid a milreng a saul el kirel tial moktel mesera lochotii el merkid, e kede ululdiu loba deureng. A ta me a ta er kid a kilengei aikel teletael er tial moktel, luldimukl a okesiu me a olasm er a klengar er a tech el ngii a mo ngosukid el meruul a chedaol teletael.

Klengar er a Beluulechad

Chelsel tial klengar er a tech, ea Chedam er a Babeluades a meskid a teletael el dousbech ngosukid el ngoriakl er a Moktel. A Chedam milchelii a Jesus Kristo el ngar ngii a bedengel e ulngeseu er Ngii loba chedaol ngeseu el mo meruul er a Urelel er tial beluulechad. A Chedam er a Babeluades a dirrek lolngeseu er ta ma ta er kid alsekum eng blak a rengud el mo oltirakl a Llechul. A Chedam a meskid a techeled el melilt. A klengar er kid a ngara cheruel a Chimal, e medengei a “sils er kid” e diak “ngariou lulecherangel.” Ngii olterekokl el kmo a rokui el tekoi a oureor el kirel a ungil el mo er tirkel betik a rengrir er Ngii.

Ng Chedam er a Babeluades el ngii a omeskid a keled er a bek el sils, el luldimukl er a kall el dongang me a klisiich el dousbech el mo oltirakl a Llechul. A Chedam a oldars a ungil sengk. Ngii a orenges e onger a nglunguuched. A Chedam er a Babeluades a osebelid er a cherarou sel kid a mecherei meng ngosukid. Ngii a lemangel el kired sel dengara ringel. Maluaisei, ea rokui el klengeltengat er kid a mlara Chedam el mei.

A Chedam er a Babeluades a mengetikaik er kid e meskid a okesiu el dousbech lultuil er a klisiched, klechitechut, me a dolilt mebol sebeched el meruul a ungil. A Chedam mellach er kid sel lulsbechall eleng Betik a rengul er kid. Ngii a “Chad er a Omellach,” el mellach er kid alsekum kid a olengit er Ngii.

Ngii el Chedam er a Babeluades a oldurokl er a ngelsuil me a sengk er a Chedaol Reng el mera chelsel a klengar er kid. Ngokiu a sengk er a Chedaol Reng, ea klebkall—malechub eng llomeserreng, llomes, me a klisiich—er a Chedam a sebechel lobengked. Alsekum meng blak a rengud melisiich er a llomes me a klemerang dil mereko a osengem el di bedul a klebkellel a Dios, ea Chedam er a Babeluades a mo odureklii a Chedaol Reng er a Yaksok el mo merenged er kid el mo er a diak ulebengelel klengar e mo ochotii a Medal merkid—el alta tial klengar chelechang malechub eng sel mei el klengar.

Klengar Ruriul er a Kodall

Sel beluulechad er a uriul er a kodall, ea Chedam er a Babeluades a melemolm loldurok er a Chedaol Reng me a re missionari el mo er tirkel lousbech er a ebangkelio. Ngii a onger a nglunguuch e olngeseu er tirkel tir ousbech a chedaol ruoll el meruul kirir.

A Chedam a ulkisii a Jesus Kristo e Milsang a klisiich el kirel a Okiis er a Kodall, el ngii a belkul a kmo bedenged a di ngar el mora ulebongel. Sel Ngebetel a Klengit er a Osobel me a Okiis er a Kodall a ngosukid el lemuut el mo er a Chedam, ea Jesus Kristo a mo oukerkeriil er kid.

Tirkel lultuil er a “omerellel, me a kle chelbechub er ngii, me a ngesuil a Edaol Messiah” a bedengir a mo mengebkall el uai a Chedam e mo kiei Lobengkel “er a diak a ulebengelel deuelreng.” Ngarsei, ea Chedam a mo smuld a rokui el chiuosech er a medad e ngosukid el melemolm era omeroled el mo uai Ngii.

Ng bleketakl, el Chedam er a Babeluades a blechoel lolngeseu er kid.

Teletelel a Chedam

Sel bo deuai a Chedam, eng kired el mo meruul aikel teletelel a Chedam. Aikel cherungel el teletelel a Chedam a uldimukl er a ikaikid:

• A Chedam a “Diak a uchelel e diak a Ulebengelel.”

• Ngii a chubechub, ungil a blekerdelel, outekangel er a ringel, e soal kid a ngmai a ungil klungiaol.

• Chedam er a Babeluades a beltik el reng.

• Ngii oltirakl a yaksok er Ngii.

• Ngii a diak el mengodech.

• Ngii a diak loumulak.

• A Chedam a di osisiu a rengul el mo er a rebek el chad.

• Ngii a medengei a rokui el tekoi—er a chelii, chelechal taem, me a ngarmedal taem—el mlara uchelel.

• A Chedam er a Babeluades a kot el mellomes a rengul er kid rokui.

• A Chedam olab rokui el klisiich ea ikel rokui soal a Rengul meruul.

Rodam me a rodos, kid a sebeched loumerang e ultuil er a Chedam. Ele Ngii a ngar ngii a diak ulebengelel moktel, a Chedam er a Babeluades a sebechel mes a tekoi el ngii diak el sebeched el mes. Sel deureng er Ngii, urelel, me a klebkellel a mo rulii meng diak demad e mo suobel. A rokui el Ngii a meruul a mo klungioled. Ngii “soal [kid] bo denguu a diak ulebengelel deureng.” E Ngii “a diak le soal [kid] a mo chemau a ringel dilmere kmo ngar ngii a usbechelel el mo er a klungioled malechub eng tirkel betik a [rengud] er tir.” Maluaisei, Ngii a blak a rengul lolngeseu er kid mede ngosechakl, e diak loukerkeriil malechub e loltuub er kid.

Mouai a Chedam

Sel delbenged el ngelekel a Dios el sechal me a redil, ea dersta er kid a ngar ngii a klisichel el mouai a Chedam. Sel bo doruul er tiang, eng kired el meluluuch el mo er a Chedam loba ngklel ngelekel Sechal. Kid a melasm el meruul er tiang el mo mekedung loltirakl a soal a Chedam, el di uai a Osobel a milruul er ngii, e melemolm el ouchel a kengtid. Mesel doruul aikal teletael, e kede mo “nguu a krasia” dil merekmo mouai a Chedam e mo olab a “blekerdelel, el cherungel, me a teletelel.”

Ka momtab a klekakerous er a delongelel a klechad er kid me a Chedam er a Babeluades, meng sei a uchul ea rebebil omdasu el kmo meringel er tir a mouai a Chedam. Engdi, a chedaol llechukl a bleketakl. Alsekum koba klaumerang el mo er a Kristo, e osiik er a krasia er aDios loba keldung, e mocha sebechem el mouai a Chedam. Ng mo ungil a renguk sel kudengei el kmo tirkel melasm el mo mekedung a mo “nguu a krasia” e mo sebecherir el mo “nguu a llomesel.” Kid a diak, dilkid el sebeched el mo uai a Chedam. Tiang, mo er ngii lokiu a sengk er a krasia, a lebebil eng meklou engdi blechoel mekerei el chelisois er a bebul a ta me ta el di merekmo mouai Ngii. Eng di, rodam me a rodos, tiang a mei!

Ak siotai er kau el mo oumerang el kmo a Chedam er a Babeluades a medengei el kmo mekerang e mo osebelau; mosiik er Ngii ra bek el sils, lolengit a ngesuil; e moutekangel di merael mo ruchei loba klaumerang er a Kristo altang diak molechesuar er a beltkil a rengul a Dios.

Ng kmal betok a diak dodengei el kirel a mouai a Chedam. Engdi soak louchais el kmo sel dolasm el mouai a Chedam a kmal ngar ngii a ultutelel sel de chuarm el kirel. A ringel dechau er tial klechad, el diak el belkuu a kmo ua ngera klungel, a kmal mekerei sel dongaisisiu er ngii er a klou el deureng, ungilreng, me a beltik el reng el bo denguu el ngara medal a Dios. Alsekum meringel er kau a oumerang el kmo kmal klou a ultutelel bom chuarm er aikel kirem el meruul, ea Osobel a dilung el kmo, “kid a diak dodengei aikel meklou el klengeltengat el Chedam a mla kudmokl el merkid. Kid a diak el sebeched el medengei a rokui el tekoi er a chelechal taem engdi ng sebeched elmo ungil a rengud eleng Ngii a mo mengetikaik er kid. .”

Ak ouchais el kmo a Demad er a Babeluades a betik a rengul er kau e soalkau a om lemuut el mo kiei Lobengkel. Loba ngklel a Jesus Kristo, amen.

Uleklatk

1. Babier a lobang ngkel milluches; dirrek mesa D. Melinda Ashton, “Fear Not, Only Believe” (Brigham Young University Women’s Conference, Apr. 28, 2016), byutv.org.

2. Lectures on Faith (1985), 38.

3. Mesa “The Family: A Proclamation to the World,” Liahona, May 2017, 145; “Mother in Heaven,” Gospel Topics, topics.lds.org.

4. A Apostol Paulus a millekoi el kmo kid a mle medengelii a Chedam me a rengud a oureng loleker ngii elAbba, el belkul a kmo “Chedam,” el tekoi el melutk el kirel a chad el kid a kmal medengelii (mesa Rom 8:15).

5. Mesa Doctrine and Covenants 130:22.

6. Mesa Doctrine and Covenants 132:19–20.

7. Mesa Mateus 5:48; dirrek el mesa 2 Petrus 1:3–8.

8. Aikel teletael a uldimukl er a oreked aikel kot el klokled (mesa Abraham 3:26) e sel klengar er a tech el ngar ngii a klaumerang er a Jesus Kristo me a Tngakireng er Ngii, ouchel a kengtid, e mo metecholb el mo dulb lokiu ngkel chad loba a klisichel a preisthood e ra Dios, e mo nguu a sengk er a Chedaol Reng, e melemolm el mo er a ulebongel (mesa 3 Nephi 27:16–20).

9. A President Dallin H. Oaks a ulsisechakl: “A rebebil lorenges er tial cheldecheduch a locha melekoi el kmo, ‘Engdi ngak ak mekerang?’ Kid a medengei el kmo betok el klikiid e ungil Uriul-klebesei el Santo a diak a ungil luldasu er a techall maikel meklou a belkul teletael el kirel a omkurulir. Mesobil, diak a rengelekir, kodall, me a delort el chelebechiil a teletael el tomer aikel uldasu el kirel meruul er a yaksok el klengeltengat. … Engdi aikal teletael el tomer a di telkib el taem el ngar ngii. A Rubak a mle yaksok el kmo sel diak a ulebengelel klengar eng diak a klengeltengat el bol tomer el mora rengelekel sechal me a redil el tir a oltirakl a llechul, e meruul a chedaol telbiil, e semeriar meruul a llemalt(“The Great Plan of Happiness,” Ensign, Nov. 1993, 75).

10. Mesa Mosiah 2:41.

11. Mesa Alma 42:5; tiang a dirrek lomekedong er ngii el moktel a ngebetel a klengit (mesa, okesiu, Jacob 6:8) me a klou luldasu er a deuelreng (mesa Alma 42:8, 16).

12. Mesa Job 38:4–7.

13. Mesang, tial okesiu, Hebru 5:8; 12:11; Ether 12:27. Me a kot, a bebil er a olasm el dechau er tial klengar sel doba telekael el klaumodengei a uai le tomer er kid er sel soad el mo melai er ngii el klengeltengat e blel yaksok er ngii. Malta aikal teletael a kaibebitokl, a Dios a mo meskid a rokui el klengeltengat el blel yaksok alsekum me kede mekedung.

14. Mesa Lukas 1:31–35; Johanes 1:14; 1 Nephi 11:18–21; Guide to the Scriptures, “Jesus Christ,” scriptures.lds.org.

15. Mesa Doctrine and Covenants 93:4–5, 16–17, 19–20.

16. Mesa Moses 7:32.

17. Mesa Doctrine and Covenants 122:9.

18. Mesa Rom 8:28.

19. Mesa Mateus 6:11.

20. Mesa N. Eldon Tanner, “The Importance of Prayer,” Ensign, May 1974, 50–53.

21. Mesa Lukas 11:10–13; Jakobus 1:17.

22. Mesa Lukas 11:5–10; Joseph Smith Translation, Luke 11:5–6 (er a Lukas 11:5, footnote a); 3 Nephi 13:6.

23. Mesa Mateus 6:13.

24. Mesa Moses 7:31–40.

25. Mesa Jakobus 1:17.

26. Mesa Johanes 15:1–2; Doctrine and Covenants 122:6–7.

27. Mesa Hebu 12:5–11; Doctrine and Covenants 95:1.

28. Moses 7:35.

29. Mesa Alma 37:12, 37.

30. Mesa John 14:26; 2 Nephi 31:12.

31. Mesa Johanes 17:21–23, 26; Doctrine and Covenants 93:36.

32. Mesa Doctrine and Covenants 76:53; 88:67–68.

33. Mesa 1 Peter 4:6. Elder Melvin J. Ballard, a mengedecheduch el kmo ngera uchul me a chad el ngii a tilchelbii el mo chad er a Ikelesia, a dilu, “Ng mlocholt er ngak el kmo a uchelel el mlara rebeluu era redeleb a mla kongei er a ebangkelio el betok el rak er a mla memong e miluluuch el kmo rebebil er a rechedal a telungalek er tir el ngara beluulechad a mo remuul a chedaol ruoll el kirir, me a nglunguchir a mlorenges, me a Rubak a milngetikaik er a re missionari el mor a blil ngkal chad” (er a Melvin R. Ballard, Melvin J. Ballard, Crusader for Righteousness [1966], 250).

34. Mesa Mormon 7:5–6; dirrek el mesa John 5:21, 26; 1 Korint 6:14; 2 Nephi 9:11–12; Alma 40:2–3; 3 Nephi 27:14.

35. Mesa John 5:22; Jacob 6:9; Alma 11:44; Helaman 14:15–18. A Tngakireng er a Kristo a mlo mesisiich er a Rebetel a Adam, luldimukl er a kodall er a tech me a reng, el ngii teblong a kired el mo mesisiich mebol sebeched el lemuut el mo er a Chedam er a Babeluades. Tirkel mla ouchel a kngterir a mo obengkel a Chedam me a Ngelekel Sechal el mo cherechar. Engdi, tirkel dimlak louchel a kngterir a mo chemau a ringelel a ongerul kodall, el ngii uchul aikel mle kengterir (mesa Helaman 14:15–18).

36. 2 Nephi 2:8.

37. Mesa Doctrine and Covenants 76:56; 88:28–29.

38. Mosiah 2:41.

39. Mesa Ocholt 7:17.

40. Mesa Moses 7:30. A Chedam er a Babeluades a melemolm lomes e olngeseu tirkel ngar sel rengedel a terrestrial lokiu sel lurelel a Jesus Kristo ma rebebil tirkel ngara celestial (mesa Doctrine and Covenants 76:77, 87) e tirkel ngara rengedel a telestial lokiu a urelel a Chedaol Reng me a reanghel (mesa Doctrine and Covenants 76:86, 88).

41. Moses 7:35; dirrek el mesa Psalm 90:2.

42. Mesa Psalm 103:6–8; Lukas 6:36; Moses 7:30.

43. Mesa 1 Johanes 4:16.

44. Mesa Doctrine and Covenants 84:40.

45. Mesa Jakobus 1:17.

46. Mesa Numbers 23:19.

47. Mesa Rellir 10:34–35.

48. Mesa 1 Nephi 9:6; Doctrine and Covenants 130:7.

49. A Dictionary.com a ochotii a belkul a llomes el “omesuub, olecholt a belkul, medengei, me a osisiu el omeruul er a uldasu; kldachelbai el medengelii a klemerang, deleuill, klemerang el tekoi, belkul, etc.” me a “klaumodengei.”

50. Mesa Abraham 3:19. A Jesus Kristo a oba krasia, e cherrungel e dirrek el kot el mellomes er kid rokui.

51. Mesa Ocholt 21:22.

52. Mesa Abraham 3:17.

53. Mesa Moses 1:39.

54. Richard G. Scott, “Trust in the Lord,” Ensign, Nov. 1995, 17.

55. Richard G. Scott, “Trust in the Lord,” 17.

56. Mesa Johanes 5:22; Moses 1:39. Ng Diablong me kid el chad el di kid el melemal er kid (mesa Ocholt 12:10; Alma 12:14).

57. Mesa Johanes 4:23; Doctrine and Covenants 18:40; 20:29.

58. Mesa 3 Nephi 11:11; Doctrine and Covenants 93:11–19.

59. A ouchel reng a teletael el kid a mengodech er a blekerdeled meng sebeched el mo uaia Dios. Seikid, eng kired el melemolem el ouchel a rengud, ng diak di douche a rengud sel “derelii a mekngit.”

60. Mesa Doctrine and Covenants 93:19–20.

61. Lectures on Faith, 38; dirrek el mesa Moroni 7:48; 10:32–33; Doctrine and Covenants 76:56, 94–95; 84:33–38.

62. Mesa Doctrine and Covenants 93:20; smisichii a belkul.

63. Mesa Moroni 10:32–33; Doctrine and Covenants 76:69, 94–95.

64. Ngerang uchel meng diak el sebechel a Dios louchais a lemuut el teletael el kirel a mouai Ngii? Ngak a meral diak kudengei aikel rokui luchul. Engdi ngar ngii a teblong el ngak a medengei. A kot a uasei ngar ngii a bebil er a tekoi el diak dungil lomtab er tial klengar (mesa Doctrine and Covenants 78:17). Nglocha di osisiu mesel molasm el mesaod er a internet el mo er a chad el kiei er a Middle Ages. A delcherul me a blekul a diak el bleketakl. Ea ongerung e sel sengk er a krasia a blechoel merkid eleng kid a kired el mo bekikl e ngara ringel el diak dodengei.

65. Aikel ringel el doruul a mo ngar ngii a ultutelel el mo ngosukid el mo cherungel (mesa Joseph Smith Translation, Hebru 11:40 [er a Hebru 11:40, footnote a]).

66. Mesa Rom 8:18.

67. Mesa Doctrine and Covenants 78:17–18.