Urerel a Babier er a Mormon er a Bult
Kid a mengideb er a Israel er chelechal ulebongel el taem e meruul uaisei lobengkel a Babier er a Mormon, el tara kot el mesisiich el dongu er a bult.
Betok el chad er chelechal sils a melchedech el kirel a klemrang er a Dios me a deleuill er kid el mor Ngii. Betok a di sesei a lodengei malechub eng diak a lodengei el kirel a moktek er Ngii el kirel a deureng. Kmeed el okedei el rak ra memong, e a President Ezra Taft Benson a millekoi el kmo “klou er a rechad er a beluulechad … er chelechal sils a diak loumerang er a Osobel. Te melchedech el kirel a Cherellel, cherrungel el klengar Ngii, me a meral Okisel er a Kodall.”
Chelechal sils, e a ker a diak di lolutk el kirel Osobel ng dirrek el kirel a Ikelesia er Ngii el—Ikelesia er a Jesus Kristo er a Uriul-klebesei el Santo—el Ngii a ulutii lokiu a Profet Joseph Smith. Aikal ker a blechoel melutk el kirel a reksi, osisechakl, me a omeruul er a chelsel a Ikelesia er a Osobel.
A Babier er a Mormon a Ngosukid el Mukeroul er a Klaumerang
Sel Preach My Gospel, e kede menguiu el kmo: “Molatk el kmo a klemedengei er kid el kirel a [Chedam er a Babeluades me a moktek er Ngii er a deureng] a mei lokiu a reprofet er chelechal taem—el Joseph Smithme tirkel lulkiuellel—el tir a ngmai a ocholt er a Dios. A leuaisei, a kot el ker longer ngii a chad a kmo a Joseph Smith ng mle profet, e a chad a sebechel longer tial ker lokiu omengiuel me a nglunguuch el kirel a Babier er a Mormon.”
A klaumera er ngak er a chedaol okedongel a Profet Joseph Smith a mla mo mesisiich lokiu omesubek er a Babier er a Mormon: Tara Ouchais el kirel a Jesus Kristo. Ak mla meruul er sel ongtil a Moroni el mo “oker er a Dios, el Diak a Ulebengelel Chedam, el ngara ngklel a Kristo,” el mo medengelii a klemerang er a Babier er a Mormon. Ak sioning el medengei el kmo ng klemerang. Tial llomes a mla mei er ngak, e sebechel lekor kau, “lokiu a klisichel Chedaol Reng.”
Sel uchelel a Babier er a Mormon a kmo: “Tirkel nguu tial chedaol sioning [Babier er a Mormon] lokiu Chedaol Reng a dirrek el mo medengei lokiu osisiu el klisiich el kmo a Jesus Kristo a ngii Osobelel a beluuelchad, me a Joseph Smith a sioning el Kirel e profet er chelechal uriul klebesei, e a Ikelesia er a Jesus Kristo er a Uriul-klebesei el Santo a ngii a rengedel a Rubak el luueta el mechederoder er a beluuelchad, el kirel Ongeru Lemei a Mesiah.”
Sera kngeasek el misionari er a beluu er a Chile, e ak silubii a mesisich el suobel el kirel a bult lokiu a klisichel a Babier er a Mormon. A Mr. Gonzales a mle ngarbab a deruchellel er a kuk ikelesia er ngii el betook el rak. Ng betook lomesuub er a tekoi er a klechelid a bla lengarngii, e oba babilengel er a tekoi er a klechelid. Ng mle chemat er a duch me a klemedengei er ngii er a biblia. Ng mle bleketakl er kemam el kmo ngikal chad a semmong er a tekoi er a klechelid.
Ng mle ungil medengelterir a remisionari er a Ikelesia er a Jesus Kristo er a Uriul-klebesei el Santo le te ulemais er tial basio er tir ra Lima, Peru. Ng kmal mle soal mo kebetech lobengterir me losischekelterir er a Biblia.
A tara klebesei, el uaia le sengk el mlara babeluades, ngii a ulemdasou el uaisei, e a reteru el misionari a milsa er a rael e ulengit el mo omes er ngii er a blil e longuiu chedaol llechukl. Tia kmal mle soal tekoi! A nglunguchel a mla monger. Ng mocha, sebechel sumechekelterir tirkal ngeasek el buik. Ng dilu el kmo ng kmal ugnil a rengul a lemei er a blil e losaod chedaol llechukl.
Ng kmal ulereched a rengul el bol kebetech. Ng mle kldmokl lousbech er a Biblia el mo omtok a klaumerang er tir. Ng mle ansing el kmo a Biblia a mo meketakl e smaod a cheleuid er tir. Ng mocha sel kesus el bol kebetech, me a remisionari millengod er a chesmerel. Ng mle semeriar. Tia sel taem lulengiil er ngii.
Ng milkengii a chesimer el dilu er tirkal misionari el me tmuu. A ta er tirkal misionari a uldersii er ngii a melemau a bedengel hong e ulechotii a klaumera er ngii el kmo klemerang e olab a tekingel a Dios. Ngika el ongeru el misionari a dilchelii tial mesisiich el klaumerang el kirel tial hong, louchais el kmo ng mla moiuiid lokiu a profet er a Dios el ngklel a Joseph Smith e tial hong olisechakl el kirel a Kristo. Tirkal misionari a ulelngit el merael.
A Mr. Gonzales dimlak el soal tial teletael. E ng di ng milkengii tial hong e mocha omes a bek el llel. Ng chiliuii sel kot el llel. E milnguiu a bek el llel tial hong e di milnguiu el mocha iieta sils el mo bol kukuk. Ng chiliuii tial rokir el hong e mlo medengei el kmo ng klemerang. Ng mlo medengei el kmo ng kirel mekerang. Ng ulemekedong er tirkal misionari, e mlo mesuub, e mlo ikrii a klengar lulebang e mlo chedal a Ikelesia er a Jesus Kristo er a Uriul-klebesei el Santo.
Ngika el ungil chad a mle sensei er ngak er a MTC er a Provo, Utah. A cheldechedechal a beltel a Brother Gonzales me a klisichel a Babier er a Mormon a kmal mle klou a lengedechii er ngak.
Sera kerd er a Chile, e a merredel er a mission, el President Royden J. Glade, a millekoi er kemam el mo menguiu er a chisel a klaumera er a Profet Joseph Smith el llechukl er a Joseph Smith—History er a bek el sandei. Ng ulisechakl er kemam el kmo a chisel a klaumera er a Kot el Ues a ulech er a klaumerang er a ebangkelio me a klaumera er kid er a Babier er a Mormon.
Ng mlo blak a renguk er tial ongit. Ak mla menguiu el kirel a Kot el Ues; e mla menguiu er a Babier er a Mormon. AK mla meluluuch el uaia tekingel a Moroni e olengit er a “Dios, el Diak a Ulebengelel Chedam, el ngara ngklel a Kristo” el kirel a klemrang er a Babier er a Mormon. A kuchais er chelechal sils el kmo ak medengei el uase a Babier er a Mormon, el uaikel tekingel a Profet Joseph Smith el kmo, a “kot el bleketakl el hong el ngara beluulechad, e dodai er a klechelid er kid, ea chad a [sebechel] mo kmeed er a Dios a longuiu osisechakl, el ngara chelsel tial hong.” A Profet Joseph a dirrek el millekoi el kmo: “A decheridii a Babier er a Mormon me a ocholt, e ng dechor er a ngerang a klechelid er kid? Ng diak a ngerang.”
Beltel a Chad
Se bo dungil mengedei el kmo kede kmal techang me a moktek er a Babier er a Mormon, e a belted a mo dmolech e mo mesisiich. Ke de mo mesisiich er a blakereng er kid loltirakl a telbiil el bla deruul lobengkel a Dios.
A kmal moktek er a Babier er a Mormon a mengideb er a Israel. Tial omengideb a mesterir a techall a rengelekl a Dios el sosieb er a rolel a telbiil, e a loltirakl aikal telbiil, e te lmuut el mora rengedel a Chedam. Sel dolisechakl el kirel ouchel reng e dolecholb er a robult, e kid a mengideb er a Israel.
A Babier er a Mormon a ngarngii a 108 el tekoi el kirel a blai er a Israel. Sel uchelel a Babier er a Mormon, e a Nephi a ulisechakl el kmo, “Le sel kmal moktek er ngak a mo mengesuseu er a rechad el mei er a Dios er a Abraham, Dios er a Isaac, me a Dios er a Jacob, me bol sobel.” A Dios er a Abraham, Isaac, me a Jacob a Jesus Kristo, el Dios er a Chuodel Renged. Kede mo suobel sel sekum e kede mei er a Kristo lokiu ebangkleio er Ngii.
A uriul, e a Nephi a milluches el kmo:
“Oi, a demak meng dirrek el betook el tekoi a ledilung el kirel a Gentiles, me a blai er a Israel, el kmo kede mengaisisu er tir el mora olive tree, el rechelel a mo metuk e mo berberiid er a beluulechad el rokir. …
“Uriul er a lobriid a blai er a Israel e te mo mekideb el muut el mo ngara chimol basio; malechub eng, sebeched el kmo, uriul er a Gentiles a lenguu a cherrengelel Ebangkelio, e a rechelel a olive tree, malechub tirkel rasech er a blai er a Israel, a mo soiseb, malechub e te nguu a llomes el kirel a meral Mesiah, el Rubak er tir e Osobelir.”
Osisiu, sel ulebongel er a Babier er a Mormon, e a profet Moroni omeklatk er kid el kirel a telbiled el kmo, “Mereko e lak el rrau a rengum, me bol sebechel aikel telbilel a Diak a Ulebengelel Chedam el bla ruul kirem, Kau el blai er a Israel, bol mekedmokl.”
Telbilel a Diak a Ulebengelel Chedam
Ngera telbilel a “Diak a Ulebengelel Chedam” losaod er ngii a Moroni? Kede menguiu er a hong er a Abraham el kmo:
“A ngklek a Jehovah e medengelii a ulebongel er a uchelel, me a chimak a mo oberk lekor kemiu.
“Ak mo rullemiu el mo obdois el beluu, e omekngeltengat er kemiu er a kmal betook, me a ngklek a mo oberk er a rokui el beluu, e kau a mo uchul a klengeltengat el mora rengelekel el merael mei, le te mo chellungel er tial ureor e oba Priesthood el mora rokui el beluu.”
A President Russell M. Nelson a mla olisechakl er a dirk mlo merek el miting el kmo “tiaikid a meral uriul klebesei, e a Rubak a orreched er a Urerel el mengideb er a blai er a Israel. Tial omengideb a kmal klou a ultutelel el ureor el ngarngii er a beluulechad er chelechal taem. Ng diak a ngera el mengaisisu er ngii, ng diak a ngaruchei el klou a ultutelel, ng diak a ngera el mo mengaisisiu er a klebekelel. E a omolilt el mo meruul er ngii, malechub eng soam, eng kmal klou a omrellii. Ng sebechem el mo klou el tebechedel a kmo ngera, el kmal klebokel, e meang!
“Sel dosaod el kirel omengideb, e kede mesaod er tial klemerang el tekoi: dersta me a dersta el ngelekel a Chedam er a Babeluades, er a ikal eru el blai, a kirir el rongesii a klemechel a mla moluut el ebangkelio er a Jesus Kristo. E tir a di tir el melib el kmo ng sorir el muut el mo medengei a betook.”
Tiaikid a doruul er ngii a rechedal a Ikelesia er a Jesus Kristo er a Uriul-klebesei el Santo: kid osiik el mo rulii a beluulechad el mo medengelii—e obult el mo er a—ebangkelio er a Jesus Kristo. Kid e a remengideb el chad er a “uriul-klebesei.” A moktek er kid a bleketakl. Rodam me a rodos, bo loberk a chised el uai tirkel mla nguu a yaksok er a Moroni loiia er a rengrir, e doluluuch e dengai a nger el mo medengei el kmo a Babier er a Mormon a klemrang, e domerk er tial klemedengei el mora rebebil lokiu omelekoi, e sel ngaruchei, a okiu omeruul.
Urerel a Babier er a Mormon er a Bult
A Babier er a Mormon a oba cherrengelel ebangkelio er a Jesus Kristo. Ng ngoikid el mora telbiil lobengkel a Chedam, el sel sekum e kede oltirakl e ked e mo nguu a kot el ngarbab el sengk er Ngii—el ngii a diak a ulebengelel klengar. A Babier er a Mormon a dodai er a bult el mora rokui el sechal me a redil ngelekel a Chedam.
Ak lmuut el dmu tekingel a President Nelson: “Sel monguiu … er a Babier er a Mormon er a bek el sils, e kom suub osisechakl el kirel omengideb, klemrang el kirel a Jesus Kristo, Tngakireng er Ngii, me a cherrengelel ebangkelio er Ngii el ngara Biblia. A Babier er a Mormon a ngii a mengideb er a Israel. A mera er ngii, ea lak a Babier er a Mormon, e a telbiil kirel omengideb er a Israel a diak bol taut.”
Msall e kungesimer el dmu tekingel Osobel er a lolisechakl er a re Nephites el kirel a yaksok el klengeltengat: “Kemiu a rengelekel a re profet; e chad er a blai er a Israel; el ngalek er a telbiil el Chedam a rirelii lobengterir a rucheliu, el dilu er a Abraham el kmo: Ngokiu a klengelekelem e a rokui el chad er a beluulechad a mo ngeltengat.”
A kuchais el kmo kid a sechal me a redil ngelekel a Dios, el resechel a Abraham, er a blai er a Israel. Kid a mengideb er a Israel er chelechal ulebongel taem loba Babier er a Mormon—el hong, lobengkel a Chedaol Reng er a Rubak, eng kot el mesisiich el dongu lomult. Kede ulekrael er a profet er a Dios, el President Russell M. Nelson, el ngii a bdelul omengideb er a Israel er chelechal sils. A Babier er a Mormon a klemerang. Ng mla ngodechii a klengar ngak. Ak yaksok, el uaia Moroni me tirkel betook el profet er a irechar, el kmo ng sebechel ngodechii a klengar kau. El ngara ngklel a Jesus Kristo, amen.