Klemerang me a Moktek
Sel dosiik er a klemerang el kirel a tekoi er a klechelid, eng kired lousbech chedaol tekoi el chatter er tial siik.
A ocholt er chelechal taem a smodii a klemerang el kmo ng klemedengei er a teletelel a tekoi er chelechang, me a mle chelii, me a klukuk (Doctrine and Covenants 93:24). Tiaikid a bleketakl el omesodel a uldasou er a mo suobel me a “Telungalek: Chais el mo er a Beluulechad.”
Kid a kiei er a taem el tekoi a di beot er kid a metik. Engdi ng diak el ngii el rokui el tekoi a klemerang. Maltang e kid a oumerang aikel domdasou, engdi kired el mo kerekikl e mellomes sel dosiik a klemerang sel dolilt aikel teletael dousbech el losiik. Ng diak el kired el mo rau a rengud er a tekoi er a beluulechad malechub eng klisiich el kirel a klemerang. Ng kired el mo kerekikl el kirel a tekoi malechub eng omelekoi el medung er a merael a chisir el chad, merael a chisir chad er a klekool, malechub eng diak dodengei el tekoi er a internet. A dachelbai er a tal dauch a diak el dachelbai el kirel a klemerang er a bebil er a suobel.
Ng dirrek el kired el mo kerekikl er a klaumerang sel momdasou a moktek er ngkel ngii a omeskau a tekoi. Sei a uchul me a chedaol llechukl a mengelechel er kid el kirel a olai (mesa 2 Nephi 26:29). Alsekum sel uchul a tekoi a diak modengelii, eng diak el kirem loumerang a losaod.
Sel telbilem a kirel mo ultuil a tekoi el mengai er sel meral ngii a uchul tial suobel e diak a ngodech el cheleuid er ngii.
I.
Sel dosiik a klemerang el kirel a klechelid, eng kired lousbech a chedaol el teletael el ngii a usbechall er tial siik: nglunguuch, sioning er a Chedaol Reng, me a omesubel a chedaol llechukl me a tekingir a re profet er a chelechal taem. Ng blechoel mo mekngit a renguk sel krengesii a chad el louchais el mla mo diak a klaumerang er ngii e leng osisecheklel a beluulechad. A President Henry B. Eyring a miltik el kmo ngera uchul tial teletael sera ledung, “A mondelngir a diak lultuill er a ikel klaumodengei el tir a mla mes, ng bai ultuil er aikel ngii a dirkak el bo el ues.”
A tekoi er a science a ochotid er a ikel domekedong el kmo scientific el klemerang. Engdi tial “scientific el klemerang” a diak el cherrengelel a klengar. Tirkel diak losuub lokiu a omesuub me a klaumerang (mesa Doctrine and Covenants 88:118) a telekael a klaumodengei er tir el kirel a klemerang el tir a ouchais lokiu a tekoi er a science. Tiang a torbengii a telkelel a klemerang.
A President James E. Faust a dilung: “Tirkel mla [metecholb] a rulii a diak a ulebengelel klengar er tir el mo kikanai e le te osiik a omesubel a tekoi er a beluulechad. Kid a oumerang el kmo a Ikelesia er a Jesus Kristo er a Uriul-klebesei el Santo a obang a mui el ebangkelio er a Kristo, el ngii el ebangkelio a klou a ultutelel er a klemerang me a diak a ulebengelel klaumodengei.”
Kid a metik a klemerang me a deureng sel bo dodengei e meruul a klemerang el kired, belkul a klengar er a tech, e kede mor sel demad. Aikal klemerang a diak el sebeched el smuub lokiu a omesubel a tekoi er a beluulechad me a science.
II.
Chelechang e ak mo mengedecheduch el kirel a olutel a klemerang er a ebangkelio el ngii a klou a belkul er a osisecheklel a Ikelesia er a Jesus Kristo er a Uriul-klebesei el Santo. A kulengit me bom kerekikl lomtab aikal klemerang. El ngii a smaod a betok el kirel a osisechekled me a omeroled, el luldimukl er a bebil er a tekoi el ngii a dirkak bododengei.
Ngar ngii a Dios, el ngii a Chedam el betik a rengul er a delbengir tirkel rokui el mle kiei malechub e te mo kiei.
A klsechal me a klredil a diak a ulebengelel. Sera uchei er a debechell el mer tial beluulechad, e kid rokui a mle kiei el sechal me a lechub e ng redil el delbenged a ulbengkel a Dios.
Kid a dirk rirengesii a rechad er a chelitakl el chilteklii a “Ak mo oltirakl er a Moktek ra Dios.” Sei a moktek el Dios a mla rullii el mo uchul e a rokui el delbengel a Rengelekel a sebecherir melemolm el mukeroul. Tial moktek a klou a belkul el mo er a ta me a ta er kid.
Ng okiu tial moktek, e a Dios a milebii tial beluulechad el basio el betik a rengul Rengelekel a sebecherir mo mechell el mer tial klengar el mo ngar ngii a bedengir e mo ngar ngii a techelir el mo mukeroul sel lolilt er a llemalt.
Mesel bo le ngar ngii a belkul, ea telbiil er a tech a mlo meruul lokiu a delongelel a ultok er a klisiich er a ungil me a mekngit. Ng kirel ngar ngii a ultok, el uaisei, ngkel Diablong, el ngii a mlodikel e leng ngulemtok, a sebechel mengesuseu e melasm er a rechad el meruul aikel ngii a omtok er sel moktek a Dios.
A moktek er a telbilel a Dios a mo mesterir a Rengelkel a techall el mo melilt er a diak a ulebengelel klengar. Tiang a di sebechel el dubech a di sel loruul a tekoi er a tech me a, uriul er a kodall, el milkedmokl er sel beluulechad er a delbenged.
Chelsel tial klengar er a tech, kid rokui a mo chelsechusem er a klengit sel doruul a mekngit el mlara cherarou, e mo mad er a tara klebesei. Kid a kilngei el kmo aikal olasm a mo uldimukl er tial moktek, e ultuil er a klaumerang el kmo a Dios el Demad a oterkeklii a Osobel. Ngkal Osobel, a Ngelekel Sechal, a mo olsobel er kid lokiu a okiis er a kodall el mo ngar ngii a klengar er a uriul er a kodall. A Osobel a dirrek el mo odersii a tngakireng el mo osebelid er a kngtid lokiu aikel omeruul el Ngii a mo meskid. Aikal omeruul a uldimukl er a klaumerang er a Kristo, ouchel a rengud er a kngtid, techolbechelid, sengk er a Chedaol Reng, me a bebil er a chedaol ruoll el meruul lokiu a klisichel a priesthood.
Sel klou luldasu el kirel a deureng er a Dios a cherrungel e tabesul er a delongelel a diak ulebengelel kerekeriil me a klechubechub el sebeched el ngmai lokiu a Tngakireng er a Jesus Kristo. Tiang a dirrek rullid el mo mengodech el mo oba beches el klengar.
A Dios loba beltikelreng a oldars a ngesuil el mera ta ma ta er kid. Kid a medengei el kmo ngokiu a sel Beltkil a rengul me a sel Tngakireng er a Ngelekel Sechal, “all a sebechir el mo suobel lokiu a otireklel a llach me a ruoll el ngar er a osisecheklel a ebangkelio er Ngii. (Articles of Faith 1:3; smisichii a belkul).
A Ikelesia er a Jesus Kristo er a Uriul-klebesei el Santo a lodengelii el kmo a telungalek a kmal klou a ututelel el mo er a Ikelesia. Eng di sel diak el sal lodengelii a kmo a telungalek a diak el dil kirel a deleuill er a tech. A diak a ulebengelel deleuill a klou a belkul el mo er a klaumerang er a ikelesia. “A telungalek a milchedaol er a Dios. Sel klou el moktek er a betik er a rengud Lulmeiob, e sel ngerchelel a olutel a Ikelesia er Ngii a mo olngeseu er a rengelekel a Dios el mo er sel rengedel a celestial. Tial klengeltengat el mlara Dios a di mo duubech lokiu a diak ulebengelel chelebechiil er a delongelel a sechal me redil (mesa Doctrine and Covenants 131:1–3). A Rubak a mla osisecheklid el kmo “a klsechal me a klredil a klou a ultutelel el teletelel a chad er a uchei er a lemei er a beluulechad, klengar er a tech, me a diak a ulebengelel teletelel me a telbilel.” Osisiu, Chelebechiil er a delongelel a sechal me a redil a klou a ututelel el mo er sel diak ulebengelel moktek a Dios.”
Sel ulebongel, a beltkil a rengul a Dios a kmal klou, me tirkel dersta el sorir mo er a klengit, Ngii a mla kudmeklii sel bekesel a ochil el mo er a rokui el Rengelekel. “A rokui el Rengelekel a uldimukl er tirke el tir a mla mad. Kid a meruul a chedaol ruoll el kirir el omtechei er tir er a templo er kid. A moktek er a Ikelesia er a Jesus Kristo a mo ngosuterir a rengelekel a Dios el mo nguu sel kot el ngarbab el klebkall, el ngii a diak a ulebengelel klengar. Tirkel diak el ngar ngii a rengrir malechub eng diak el sebechir, a Dios a mla kudmeklii sel klebkall engdi ngarsel ngariou el rengedel.
Ngidil chad el medengei aikel diak ulebengelel klemerang a sebechel medengei el kmo ngera uchul ma rechad er a Ikelesia er a Jesus Kristo er a Uriul-klebesei el Santo a omdasu el uaisei e meruul aikel loruul.
III.
Chelechang eak mo mesaod aikel ngerachel er aikal diak a ulbengelel klemerang el ngii a di sebeched el mo medengei el okiu a di ta el llemesel a telbilel a Dios.
Kot, kid a mengull er a techall el chad a sebechel melilt. Te betok el chad a ungil medengei el kmo a Ikelesia a meringel loureor me bol ngar ngii a imokl er a klechelid er a beluu er a Merikel me a beluulechad. Aikal lureor a diak dil bora ikel soal a rengud, ng dirrek el kirel a moktek er a Dios, el mo olngeseu er a rokui rengelkel a Dios mel dil tir el melilt.
Ongerung, Kid a re missionari. Bebil er a taem te oker kid el kmo ngera uchul mekede oldurokl er a re missionari el mora bek el beluu, el dirrek el ngar rengii a re Kristiano er ngii. Kede dirrek monger er a osisiu el ker el kmo ngera uchul mekede mengoit a million dollars el lolngeseu er tirkel chad el diak el chad er Ikelesia e ngera uchul meng diak duldimukl er tiang el lurelel a missionari. Aikal erung lureor a uaisei ele kid a omdasu el kmo a rokui el chad a rengelekel a Dios—el rodam e rodos er kid—meng soad el merous aikel klungiaol er a teletael er a chedaol me a tech el mora rokui el chad.
Ongedei, A klengar kid er tia el beluulechad a chedaol. Sel blakereng er kid loltirakl er a moktek er a Dios a uchul e kede omtok a reletael er a omelecheb me a omekeuad er a chad el ngara ringel malechub eng diak el mukar el rakt.
Ongeuang, te ngar er ngii a rebebil el kora rau a rengrir el kirel a ultebengel a Ikelesia el kirel a chelebechiil me a rengalek. A klaumedengei er kid el kirel a sel klou el luldasu er a deureng er a Dios a mengerchir er kid el mo omtok aika el ongetikaik el ngar er ngii er chelecha el taem er a buai, politics me a kerkeriil, el ngii a mengodech a teletelel a chebechiil el ngii a uchul a rau el reng e melodech a teletelel a klsechal me a klredil. Kid a medengei el kmo a deleuill, teletelel a chad, me a urelel a sechal me a redil a klou a ututelel el mo rulii sel moktek er a Dios.
Ongeim, kid a dirrek ngar ngii a ngodech el luldesued el kirel a rengalek. Kede omtab el kmo a cherellel ma ulkurulel a rengalek a tebechedel sel moktek er a Dios, el ngii oldeu e mekull el ngerachel el mo er tirkel sebecherir meruul er ngii. Kid a oumerang el kmo aikel mekreos el klokled er a beluulechad me a babeluades a rengelked me a telungalek er kid. Maluaisei, eng kired lolisechakl e mengesebechakl aikel olisechakl me a omeruul el locholt a ungil teletael el kirel a ulekurulel me a deureng er a rengalek—el rokui el rengalek.
E a ulebongel, e kid a ngelekel a Chedam er a Babeluades, e mla osisecheklid el kmo a klsechal me a klredil, chelebechiil er a delongelel a sechal me a redil, me a cheroll me a omekeroul er a rengalek a klou a ututelel er sel klou el ludasu er a deureng er Ngii. Aikel derucheled er aikal olisechakl a uchul a ultok el mera Ikelesia. Kid a medengei el kmo ngdi uaisei. A ultok a tebechedel a moktek er Ngii, ea Diablong a blak a rengul melemall er sel ngii a kot el klou a belkul el mo er a moktek er a Dios. Ngii soal melemall er a urelel a Dios. Sel kot el teletael lousbech er ngii a diak lekengei er sel chedaol klisichel a Osobel, e merob er sel urelel a Tngakireng er a Jesus Kristo, ngdiak a belkul a ouchel el reng, a ocholt a diak el merang, e mo oumondai a ngerchelel a chad. Ngii a dirrek el meruul a rau el reng el kirel teletelel a klsechal me a klredil, e melemall a chelebechiil, e merob a cheroll (tokubets el mo er tirkel chedam me a chedil el mo omekeroul er a rengalek loba klemerang).
IV.
A urerel a Rubak a melemolm el merael bedul uchei altang ngar ngii a omtok er kid engdi blak a rengud el mo kiei loba osisecheklel a olutel a Ikelesia er a Jesus Kristo. Mo er tirkel mla mo mechitechut a rengrir el oltirakl er a ultok, ng soak louchais a edei el tekoi el mo ngosukau.
Bo momtab a osisecheklel a ouchel el reng a milruul lokiu sel klisichel a Tngakireng er a Jesus Kristo. A Elder Neal A. Maxwell a ulengit, lak bom teloi er tirkel “tir a melasm el mo mengodech er a Ikelesia e bai diak lomult a rengrir.”
El uaia tekingel a Elder Jeffrey R. Holland:
“Moreked aikel kau a medengei e bom mesisiich mo lemuut sel bo er ngii a bebil er a klaumodengei. …
“… Chelsel tial Ikelesia, aikel dodengei a lemuut el meklou a belkul er a aikel tekoi el diak dodengei el kirel.”
Bol ngar ngii a klaumerang er kau er a Rubak el Jesus Kristo, el ngii a kot el osisecheklel a ebangkelio.
A ulebongel, mosiik a ngeseu. Kid a ngar ngii a meredeled el betik a rengul er kau e osiik a chedaol ngeseu el mo ngosukau. Ng betok a debo er ngii e melai a ngeseu el debetik er sel LDS.org me a bebil er a olengeseu el kirel a omesubel a ebangkelio er a blai. Kede dirrek el ngar er ngii a olisechakl el rodam me a rodos el mla mukedong el mo olngeseu.
A betik a rengul Demad er a Babeluades me a Rubak, el Jesus Kristo, a sorir a bo doba deureng el ngii a moktek er tial blebeled. Sel deureng er a rengelekel a Dios a diak a ulebengelel klengar, el ngii sebeched el nguu sel blak a rengud loltirakl er a profet er kid, el President Russell M. Nelson, a blechoel lomekedong er ngii “el chedaol rael.” Tiakid sel dilung er sel kot el cheldechedechal el President er a Ikelesia: “Moltirakl er sel chedaol rael. Sel rengum el mo oltirakl er a Osobel el meruul a chedaol telbiil Lobengkel e oltirakl a chedaol telbiil a mo remuul a techall el ikel rokui el chedaol klengeltengat me a omeruul a mo sebechel mo er a resechal, redil, ma rengalek er a bek el basio.”
Ak kmal louchais el kmo a tekoi el bla kdung a klemerang, e mekedmokl lokiu osisechaklel me a Tngakireng er a Jesus Kristo, el ngii a uchul e a rokui el tekoi el ngara chelsel a moktek er a Dios, el Diak a Ulebengelel Chedam a sebechel mekedmokl. El ngara ngklel a Jesus Kristo, amen.