Ng Soam El mo Ungil Mecherungel?
Leng sel Tngakireng ra Jesus Kristo, e alsekum kede melilt el mo ouchel el mult a rengud el mui el mo ra Osobel, Ngii a mo churungel a reng er kid.
Sesel buil ra lomuchel a mission er ngii, e a kot el kekerei el ngelekam el sechal ma kldemel a mirrekiu omesubir er sera ngelekek bo lomelechesiu ra ringel ra bdelul. Ngulmelchesiu el ngodech; a kot eng mlo diak lolchesuar ra bital chimal, e mocha mad a ural. A bital otengel a robetang. E meringel rengii el mengedecheduch. Ng medengei el kmo ngarngii a mla mekesakl re ngii. A dimlak lodengelii a kmo ng mla meloched a kldei el ngurd ra bdelul. Ng mlo medakt er a bolak lolchesuar a bedengel. Sel rechedel a chad el mukar sel meloched a klou a relii ra rechedel mo ungil. A kldemel a mle mereched lolengeseu. Uriul ra lomekedong ra 911 eng milsang a klengeltengat. Ng meral ongaisreng, le ambulance a di mle cheroid er tir ra eim el bung.
Uriul ra ngelekam ra le mengai el mora ospitar, e a rechad ra ukeruul a mle mereched el mesa teletael el tir a kirir mkerur a ngelekam mel semecheklii tial chelitechut el mla morngii. Engdi, alsekum e a ngelekam a dimlak el meloched, e tial kar a bai mo tomelii, el mo merael a rasech er noh ra btelul. A ngelekam a kirel melilt. Ng millilt el kongei me lukerur er sel kar. Me a lorael el mocha mesisiich e leng mekedekudem el ngara ukeruul el mlo melai a buil, e a ngelekam a luetang el mora mission e rirekir a mission er ngii, ruriul ra bolungil a ikel telmellel a btelul.
A Demad ra Babeluades a mui ra klisiich e medengei a rokui. Ngii a medengei a ongarem el de ngarngii. Ngii a medengei a ringel el de ngarngii e lokiu a secher, rakt, cheluodel, aksident, malechub eng chetiteuokel el cheroll. Ngii a medengei a mengurusii a uldesued el mengai er a blekikl el reng, ng di kid el tang, ng klengit el reng, malechub eng secher ra btelud. Ngii a medengelterir a re mla chouarm ra chelebirukel malechub eng ongarem. Ngii a medengei a chelitechetud ma soad ma ngibesereng el de chelbangel.
Chelsel tial klengar e ke de mo soiseb er a omelilt el mo medengei alsekum e kede mo melilt ra ungil ra kuk mekngit. E tirkel lotirakl a llechul, tir a mo kiei lobengkel ngar sel diak a ulebengelel deurreng.” Mesel mo ngosukid el mo uai Ngii, a Demad ra Babeluades a ngilai a rokui el klisiich ma llomes el msa Ngelekel ra, Jesus Kristo. Ng diak a tekoi ra bedenged, ng reng, malechub eng secher el Kristo a diak el sebechel el churengelii.
Sel taem ra lolsisechakl a Osobel, eng bleketakl ra chedaol llechukl ra betok longasireng el tekoi el Jesus Kristo a ulesbech ra chedaol el klisichel el melisiich er tirkel chilarm a bedengir.
A Ebangkelio ra Johanes a meketeklii a cheldechedechal a tal chad lultekau ra meringel el rakt el lokedei ma eai el rrak.
“Sera Jesus ra lesang el mechiuaiu, eng mle medengei el kmo ng meketeket ra le uaisei, meng dilu er ngii, Ng soam el mo ungil ra rektem?”
Me ngkal itechut el chad a dilu el kmo ng diak a chad el ngarngii el ngosuir sel lousbech a ngeseu.
“A Jesus a dilu er ngii, Bekiis, mnguu a dukelem e morael.
“Ng di mle mereched ngii el chad el mecherungel, e ngiluu a dukelel, e milrael.”
A kulengit me momtab er sel klekakerous e ra klemengetel a taem el charm ngkal chad el di ngii—okedei ma eai el rak—ma rechedel ra le mecherungel er a bo lultuir ra Osobel. Ng milcherungel el di mle “mereched.”
E a tara teletael, a redil el di mirrael a rasech ra bedengel lluich ma erul rak, el “di cheloit [a] ududel ra re toktang, … a mlo rullel, e rirtechii a rsel a bilel; e di mle mereched a merael rasech er a bedengel [milterob]. …
“Ma Jesus a dilu el kmo, Ngarngii a rirtechii a bilek: lek melchesuar ra klisichek el tilobed er ngak.
“Meng ngkal redil ra lomes el kmong chemotang, eng … millekoi el mo er ngii ra mederir a rokui el chad … el kmong mlekerang e mecherungel el di mle mereched.”
Sera temel mesiou, e a Kristo a ulsisechakl el kmo Ngii a oba klisiich lomekungil a bedenged. Kid a diak el sebeched el metebechelii a temel sel Kristo a mengerrungel a secherel a bedenged sel dubech. A mo mengerrungel a morngii e loltirakl ra soal ma llemesel. Ngara chedaol llechukl, e a re bebil a chouarm el mo melai a rrak, ma rebebil a tial klengar er tir el rokir. A rektel a bedenged a sebechel ngosukid e mengai el smisichid el mo ultuil ra Dios. Engdi sel de becherei a Kristo mel siseb, e Ngii a blechoel melisiich er kid ra reng me kede mengai el mo sebeched loltekau a chellengeled.
Sel lulebongel, e kede medengei el bek el ringel ra bedenged, secher, malechub eng telemall a mo mecherungel er sel Okisel a Kodall. Sei e a sengk el mora chad lokiu a Tngakireng ra Jesus Kristo.
A Jesus Kristo a sebechel mengerrungel a lmuut el betok ra kuk di bedenged. Ngii a sebechel urrengelii a reng er kid el dirrek. A chedaol llechukl el rokir e kede medengelii a Kristo ra le ngosuterir tirkel reng er tir a mle mechitechut e milngerungel er tir. Sel domtab a ikel blekeradel, e a omeletked ma klaumerang ra klisichel Osobel lomekngeltengat ra klengar er kid a meleketek. A Jesus Kristo a sebechel ngmodech a rengud, churrengelid ra ikel telemellel a chelibirukel malechub eng ongarem el me rekid, e smisichid meng sebeched loltekau a kereor ma chesebreng e okedid ra budech e ngosukid el lotekau a ongarem ra klengar er kid,omkungil er a rengud.
A Kristo a sebechel dirrek el churrengelid sel deruul a mekngit. Kede ruebet ra klengit a dodengei el kmo kede mla tomelii a tara llechul a Dios. Ngdiak a kikiongel el kiei lobengkel a Dios. A mo klikiid ra mekngit [a mo] mecherungel a rengul.”
A Dios el Chedam a medengei el kmo kede mo mekngit, engdi Ngii a mla kutmeklii a rael el kired el muut el mo ngar. A Elder Lynn G. Robbins a ulsisechakl: “A ouchelreng a diak el medechel luldasuel a [Dios] el kirel sel de rebet. A ouchelreng a uldasu el Ngii a medengei el kmo kede mo reuebet.” Sel deruul a mekngit, eng ngarngii a techall el mo ngiltii a ungil ra mekngit. Kede ngiltii a ungil sel douchel ruriul ra de relii a klengit. Ngokiu a Jesus Kristo ma milketmokl el tngakireng er Ngii, e kede mo mengubet ra kngtid e lmuut el mora Dios el Chedam, alsekum e kede ouchel. A cherrengelel a reng a diak el lomekbitang—ng mengerechir er sel klisichel Osobel lomekbeches ma meral ouchelreng er ngikel mekngit. E tirkel melilt el diak louchel, a re melngakl er sel lomengerungel el Kristo oldars er ngii. Tir omes el ua lak el milketmokl a okisel a kodall.
Sel kumekrael ra rechad me bol louchel a rengrir, e ak mechas a renguk ra rechad el ngara klengit el meringel mdasu a melemalt el tekoi. A Chedaol Reng a mo cheroid er tir, e tir a blechoel kurusii el melilt el mo kmeed ra Dios. Te kurusii el mo melai a buil malechub eng rak, el merur malechub e te medakt ra mo dubech lokiu a kengterir. Te blechoel lomelchesiu el kmo ngdiak el sebecherir el moungil malechub el nguu a klausubes. Ak blechoel rongesterir el mesaod el bekikl alsekum e a re betik ra rengrir a mo medengei a telemellir, le te mol mo diak loubeltik el reng el mo er tir malechub e te mechoit. Sel loltirakl er tial teletael ra uldasu, eng mla meruul ra rengrir el dilmuk e kotektii a mo ouchel er tir. Te cheleuid lomtab el kmo ngungil a lak louchel er chelechang me lak el temall a rengrir tirkel le betik a rengrir er tir. Te omdasu lungil a bai le charem ra uriul er tial klengar ra bai le siseb er sel rael ra ouchelreng er chelechang. Rodam ma rodos, ng diak lungil luldasu sel moleiit el mo ouchel ra rengum. A cherarou a blechoel lousbech lomektakt el merrob er kid el mo ouedikel el kirel a klaumerang er kid e ra Jesus Kristo.
Tirkel betik ra rengud sel bolodengei a mekngit el teletael, eng metemall a rengrir, e ng di te blechoel sorir lolngeseu er ngikel meral mouchel a rengul e mo ngodechii e moltirakl ra Dios. Ng uaisei, a reng a mereched el mesumech sel sekum a dengerengel a kombesar e selbechakl er tirkel betik a rengrir er ngii e olngeseu er ngii el chemoit a kngtil. A kulengit me molatk el kmo a Jesus Kristo a mesisiich e le Ngii a dirrek el mengerungel ra re melemalt el mlo chouarm ra mekngit me te mlo chemau Ngii.
A President Boyd K. a dilung: “A reng el ngar kid a seluched sel deruul a telemall ma delengerengel. Engdi ngdiak el ua bedenged, le sel teletael ra ouchelreng sel mekedmokl, eng diak a ultil el medechel leng sel Tngakireng ra Jesus Kristo. Le telbiil a kmul kmo ngkel chad el mla ouchel a rengul ra kengtil a bla lousubes er ngii, e a Rubak a kmul kmo Ngii a diak el luut el mo melatk [Doctrine and Covenants 58:42].”
Sel douchel el meral ngara rengud,” ea sel ngarbab el moktek ra omekbeches a “ mereched el me” soiseb er aklengar er kid. A Osobel a mo churrengelid.
Ngkel keldemel el misionari me tirkel chad ra ukeruul el ngilsouir a millodech el ngelekam ra losiou a mle mereched louedikel. A ngelekam a millilt el mo melai er sel kar lomriid er tial rektel. A ikel chelitechut el telemellel ra le melodech a mle sebechel tomelii el mora ulebengelel a klengar er ngii a milngodech. El di osisiu, sel demereched louchel a rengud e denguu sel Tngakireng ra Jesus Kristo el mera klengar er kid, e kede mereched el mo mecherungel.
A President Russell M. Nelson a uldersii tial ongit: “Alsekum ke mla mecheuid ra rolel a ebangkelio, … e ak mengemedaol er kau … me mluut el mei. A le sebek a rengum, ke chouarm, eng ngarngii a basio er kau er tiang, el Ikelesia ra Rubak. Kau me a telecheroll el direkak el mechell a mo mukngeltengat lokiu omerellem er chelechang sel mluut el mo merael er sel rael ra telbiil.”
A reng sel mecherungel eng kired el kongei a ikel bla le beketakl a Osebeled el mla basech. Lak dongeteket! Douedikel er chelechal sils! Mouedikel er chelechang mesel sechudel el reng lak el terebengii a omerolem el mora ulebongel. Chelechal kungedecheduch, alsekum e ke melchesuar el kirem lolengit a klausubes ra kmung techang el blo mekngit er ngii, e ak siotai er kau me mouedikel kirel. Sbedeterir ra blam temelii. Molengit a klausubes. Alsekum ke mla rulii a klengit el tomelii a deruchellem ra templo, e ak kulengit er kau el mo chadecheduch kau ma bishop er kau er chelechang. Lak mongeteket er ngii.
Rodam ma rodos er ngak, a Dios a oubeltik el reng er kid el Demad ra Babeluades. Ngii a ngilai a rokui el klisiich ma llomes el msa betik ra rengul ngelekel ra, Jesus Kristo. Leng Ngii a uchul, e a rokui el chad a tara klebesei a mo nguu omekungil ra ikel bek el secher el mo cherechar. Leng sel Tngakireng ra Jesus Kristo, e alsekum kede melilt el mo ouchel el mult a rengud el mui el mo ra Osobel, Ngii a mo churungel a rengud. Sel lomengerungel a sebechel lomuchel el di mereched. Se kmal di ngar kid. Ng soad el mo mecherrungel?
A kuchais el kmo a Jesus Kristo a mlo tongetengii me de bode mecherungel. Engdi kid a kired el nguu seikid el kar er a omekungil el Ngii omeskid. Mnguu er chelechal sils. Lak mongeteket er ngii. Loba ngklel a Jesus Kristo, amen