Cov Tub Txib txoj Hauj Lwm: Qhia tej Yam hauv Nej lub Siab
Txawm nej nyob qhov twg hauv lub ntiaj teb no, muaj cib fim ntau kom qhia Yexus Khetos txoj moo zoo.
Lub hlis tas los peb tus yaj saub, Thawj Tswj Hwm Russell M. Nelson caw Kaum Ob tug Thwj Tim nrog nws mus kom muab lub Tuam Tsev Loos Italis fij tseg. Thaum kuv tseem mus ua rau kuv xav txog tus Thwj Tim Povlauj thiab nws tej kev hla chaw. Nyob hauv nws lub caij nyoog, nyob Yeluxalees mus txog Loos ces yuav tsum mus tau 40 hnub. Hnub no, nyob hauv ib lub nyab hoom uas kuv nyiam, yuav siv 3 teev xwb.
Cov kws kawm txog Phau Vaj Lug Kub Npaiv Npaum ntseeg tias Povlauj nyob hauv Loos thaum nws sau ob peb tsab ntawv, uas txhawb nqa cov mej zeej ntawm lub Koom Txoos thaum ntawd thiab niaj hnub no.
Povlauj thiab lwm tus mej zeej ntawm lub Koom Txoos puag thaum ub, cov Haiv Neeg Ntseeg Thaum Ub paub zoo txog kev cai txi. Lawv feem coob raug tsim txom, twb ua rau lawv tuag.
Txij thaum 200 xyoo tas los, cov mej zeej ntawm Yexus Khetos lub Koom Txoos, cov Haiv Neeg Ntseeg hauv Hnub Nyoog Kawg, kuj raug kev tsim txom ntau thiab. Tiam sis txawm lawv raug kev tsim txom (thiab tej lub sij hawm yog vim lawv raug kev tsim txom), Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg twb loj tuaj thiab tam sim no nyob thoob plaws lub ntiaj teb.
Muaj Ntau Yam Ua
Tiam sis ua ntej peb ua ib lub cake, muab cov me nyuam ntawv nphoo nphoo, thiab pab peb tus kheej zoo siab vim peb vam meej, peb yuav tsum xam pom seb peb loj tuaj npaum li cas tiag,
Muaj yuav luag xya txhiab tsib puas plhom tus neeg nyob hauv lub ntiaj teb, piv rau 16 plhom tus mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg—yog ib pab yaj me me xwb.
Thiab, cov uas ntseeg Khetos nyob hauv tej qhov chaw hauv lub ntiaj teb los nqig zuj zus.
Txawm yog nyob hauv tus Tswv lub Koom Txoos—txawm cov mej zeej muaj coob tuaj zuj zus—muaj neeg coob uas tsis tau cov koob hmoov uas los ntawm kev koom lub Koom Txoos txhua zaus.
Los yog hais tias, txawm nej nyob qhov twg hauv lub ntiaj teb no, muaj cib fim ntau kom qhia Yexus Khetos txoj moo zoo rau cov neeg uas nej ntsib, cov uas nrog nej kawm ntawv, nrog nej nyob, ua hauj lwm los yog nrog nej sib tham.
Xyoo no, kuv twb muaj cib fim kom pab khiav tej dej num ntawm cov tub txib hauv lub Koom Txoos nyob thoob plaws lub ntiaj teb. Kuv tau xav ntau thiab thov Vajtswv txog tus Cawm Seej tej lus txib Nws cov thwj tim—uas yog peb, Nws cov me nyuam—hais tias: “Nej cia li tawm mus qhia txhua haiv neeg hauv qab ntuj no … nej yuav tsum tuav Vaj Leej Txiv, Vaj Leej Tub thiab Vaj Ntsuj Plig tus Dawb Huv lub npe, muab lawv ua kev cai raus dej.”
Kuv xav txog lus nug no “Peb cov uas yog mej zeej thiab Khetos cov thwj tim, yuav ua li cas kom ua raws li tej lus txib no hauv peb lub neej niaj hnub?”
Hnub no kuv caw nej xav txog cov lus nug no hauv nej lub siab lub ntsws.
Lub Txiaj Ntsim Txawj Ua cov Tub Txib txoj Hauj Lwm
Cov thawj coj ntawm lub Koom Txoos tau hais kom “Txhua tus mej zeej ua ib tug tub txib!” tau ntev lawm.
Cov mej zeej ntawm Yexus Khetos lub Koom Txoos—tsis hais yav tas los thiab tam sim nog los yog—twb zoo siab thiab muaj kev xyiv fab qhia txoj moo zoo rau cov phooj ywg thiab cov neeg uas lawv paub. Lawv muaj ib zaj lus tim khawv txog Yexus Khetos hauv lawv lub siab, thiab lawv xav kom lwm tus muaj kev xyiv fab uas lawv muaj los ntawm tus Cawm Seej txoj moo zoo.
Ib txhia mej zeej ntawm lub Koom Txoos los zoo li lawv muaj ib lub txiaj ntsim ua li no. Lawv nyiam sawv cev qhia txoj moo zoo rau lwm tus. Lawv ua siab loj thiab zoo siab pab thiab coj txoj hauj lwm no ua tub txib.
Tiam sis, peb ib txhia los yig me ntsis. Thaum hais txog kev ua tub txib txoj hauj lwm hauv kev sib ntsib ntawm lub Koom Txoos, tib neeg maj mam nyo hau zuj zus ua rau yus tsis pom lawv sawv ntawm lub sam thiaj, los sis lawv ntsia ntsoov vaj lug kub los sis qi muag kom tsis txhob saib lwm tus mej zeej.
Vim li cas? Tej zaum peb muaj txim vim tsis ua ntau kom qhia txoj moo zoo. Tej zaum peb tsis paub peb yuav ua li cas. Los yog tej zaum peb ntshai me ntsis kom ua tej yam peb tsis txaus siab ua.
Kuv to taub.
Tiam sis nco ntsoov, tus Tswv yeej tsis tau hais kom peb ua tub txib txoj hauj lwm zoo tag nrho. Tiam sis, “tus Tswv kom neeg yuav tsum muaj lub siab thiab kev txaus siab ua.”
Yog nej ua cov tub txib txoj hauj lwm lawm, thov nej cia li ua mus ntxiv, thiab coj yam ntxwv rau lwm tus. Tus Tswv yuav foom koob hmoov rau nej.
Tiam sis, yog nej xav tias nej tsis tshua txaus siab qhia txoj moo zoo, kuv thov kom nej ua tsib yam uas txhua tus ua tau kom koom tes pab muab Ixayees sib sau ua ke li tus Cawm Seej tau txib peb.
Tsib lub Tswv Yim Yooj Yim
Qhov thib ib, los nyob ze Vajtswv. Thawj txoj lus txib yog kom hlub Vajtswv. Yog vim li ntawd peb thiaj li nyob hauv lub ntiaj teb no. Nug nej tus kheej tias, “Kuv puas ntseeg Leej Txiv Saum Ntuj Ceeb Tsheej tiag tiag?”
“Kuv puas hlub thiab tso siab rau Nws?”
Nej yim los nyob ze peb Leej Txiv Saum Ntuj Ceeb Tsheej, Nws txoj kev kaj thiab kev xyiv fab yim ci hauv nej mus. Lwm tus yuav pom tias nej muaj ib yam zoo thiab tshwj xeeb. Thiab lawv yuav nug txog qhov ntawd.
Qhov thib ob, hlub lwm tus kawg siab kawg ntsws. Nov yog txoj lus txib tseem ceeb thib ob. Saib txhua tus nyob ib puag ncig nej yog Vajtswv cov me nyuam. Txhawb pab lawv—tsis hais nej tsis pom lawv tej npe nyob rau ntawm cov muam los yog kwv tij uas nej txhawb pab.
Nrog lawv luag. Nrog lawv zoo siab. Nrog lawv quaj. Saib lawv rau nqi. Kho, txhawb nqa, thiab txhawb lawv lub zog.
Siv zog coj yam ntxwv hlub lwm tus li Khetos tau hlub—tsis hais rau cov uas ua tsis zoo rau nej, cov uas thuam nej thiab xav kom nej raug tsis zoo los yog. Hlub lawv thiab ua zoo rau lawv vim lawv yog Leej Txiv Saum Ntuj Ceeb Tsheej cov me nyuam.
Qhov thib peb, siv zog taug kev li ib tug thwj tim. Thaum nej txoj kev hlub Vajtswv thiab Nws cov me nyuam loj tuaj, nej txoj kev xav coj raws li Yexus Khetos loj tuaj thiab.
Nej kawm txog Nws txoj kev thaum nej mloog ntsoov Nws tej lus thiab ua raws li cov yaj saub thiab cov thwj tim tej lus niaj hnub no. Nej tso siab ntxiv thiab ua siab loj ntxiv coj raws li Nws thaum nej nrog Leej Txiv Saum Ntuj Ceeb Tsheej tham thiab muaj lub siab mos muag uas xav kawm.
Peb yuav tsum xyaum kom ua li ib tug thwj tim—txhua hnub, me ntsis ntxiv rau me ntsis, “ib qho hwj chim rau ib qho,” “ib nqe lus rau ib nqe lus.” Tej lub sij hawm peb mus tom ntej ob ruam thiab ib ruam thaub qab.
Qhov tseem ceeb yog qhov uas nej tsis tso tseg; nej sim ua yog tas zog. Thaum kawg nej yuav ua neeg zoo dua, nej zoo siab ntxiv, thiab ua tseeb ntxiv. Yuav yooj yim rau nej tham nrog lwm tus txog nej txoj kev ntseeg. Muaj tseeb tiag, txoj moo zoo yuav ua ib yam uas muaj nqi hauv nej lub neej ces ntshe yuav nyuaj rau nej kom tsis txhob qhia txog txoj moo zoo rau lwm tus. Tej zaum yuav tsis muaj li ntawd tam sim no—yuav tsum siv tas ib sim neej. Tiam sis yuav muaj li ntawd.
Qhov thib plaub, qhia tej yam uas muaj hauv nej lub siab. Kuv tsis hais kom nej sawv rau ntawm txoj kev sib tshuam qw nrov nrov txog tej nqe hauv Phau Ntawv Maumoos. Tiam sis kuv thov kom nej nrhiav cib fim kom qhia txog nej txoj kev ntseeg thaum nej tham nrog tib neeg—thaum tham tab meeg lawv thiab nyob online huv tib si. Kuv hais kom nej “sawv ua tim khawv” txog lub hwj chim ntawm txoj moo zoo txhua lub sij hawm—thiab thaum twg yuav tsum ua, hais lus ua li ntawd.
Vim tias “Khetos txoj moo zoo … yog Vajtswv lub hwj chim cawm seej,” thiab nej yuav tsum ua siab loj, ntseeg nej tus kheej thiab txo hwj chim thaum nej qhia. Tej zaum yus xav tias kev ntseeg yus tus kheej, kev ua siab loj, thiab kev txo hwj chim tsis sib haum, tiam sis tej no yeej nyob tau ua ke. Tej no yog los ntawm tus Cawm Seej txoj kev caw kom nej tsis txhob muab phiab khwb txoj moo zoo thiab cov ntsiab cai, tiam sis cia nej txoj kev kaj ci ntsa iab, kom nej tej hauj lwm yuav ua rau nej Leej Txiv Saum Ntuj Ceeb Tsheej tau yeeb koob.
Muaj ntau yam yooj yim kom ua li no, xws li kev ua siab zoo txhua hnub los sis kev ua tim khawv hauv YouTube, Facebook, Instagram, los yog Twitter los sis sib tham nrog cov neeg uas nej ntsib. Xyoo no peb kawm los ntawm Phau Tshiab hauv peb tsev neeg thiab hauv Hnub Caiv Kev Kawm Vaj Lug Kub. Nov yog ib lub cib fim zoo kom caw peb cov phooj ywg thiab cov neeg zej zog tuaj koom lub koom txoos thiab tuaj xyuas nej hauv tsev kom kawm txog tus Cawm Seej nrog peb. Qhia lawv txog qhov app Txoj Moo Zoo cov Ntawv, es lawv nyeem tau Los, Nrog Kuv Mus. Yog nej paub tej tub hluas ntxhais hluas thiab lawv tsev neeg, muab ib phau Ntxiv Dag Zog rau cov Tub Hluas Ntxhais Hluas thiab caw lawv los saib peb cov tub hluas ntxhais hluas sim ua raws li cov ntsiab cai ntawd.
Yog leej twg nug seb koj ua dab tsi thaum hnub Saturday thiab Sunday, cia li nrog lawv tham txog tej yam uas nej ua hauv lub koom txoos. Qhia lawv txog cov me nyuam uas sawv rau ntawm ib pawg neeg thiab rau siab hu nkauj hais tias lawv sim ua neeg zoo li Yexus. Qhia txog cov tub hluas ntxhais hluas uas tau siv sij hawm pab cov laus hauv tej tsev rau neeg laus kom sau lawv zaj keeb kwm. Qhia txog qhov uas tau hloov peb tej kev sib ntsib thaum hnub Sunday thiab qhov uas kev hloov ntawd pab nej tsev neeg li cas. Los sis piav hais tias vim li cas peb hais tias nov yog Yexus Khetos lub Koom Txoos thiab peb yog Tsoom Haiv Neeg Ntseeg hauv Hnub Nyoog Kawg ib yam li cov mej zeej ntawm lub Koom Txoos thaum ub kuj yog Tsoom Haiv Neeg Ntseeg.
Siv tej kev uas yooj yim rau nej qhia tib neeg vim li cas Yexus Khetos thiab Nws lub Koom Txoos tseem ceeb rau nej. Caw lawv “los saib.” Ces yaum lawv kom los pab. Muaj ntau lub cib fim rau tib neeg pab peb tej yam ntxim saib ntxim ua hauv lub Koom Txoos.
Thov Vajtswv pab cov tub txib nrhiav cov uas Vajtswv tau xaiv tseg. Niaj hnub thov Vajtswv kawg siab kom nej yuav nrhiav tau cov uas yuav los thiab saib, los thiab pab, thiab los thiab nyob. Qhia cov tub txib ntxhais txib kom lawv paub nej ua dab tsi. Lawv zoo li cov tim tswv, uas npaj pab nej!
Thaum nej qhia txoj moo zoo, uas yog Yexus Khetos txoj moo zoo, muaj kev hlub thiab ua siab ntev. Yog peb nrog tib neeg tham tsuas yog vim peb xav kom lawv hnav khaub ncaws dawb thiab nug seb yuav tsum mus qhov twg kom ua kev cai raus dej, ces ntshe peb ua tsis yog lawm.
Ib txhia uas los thiab saib, tej zaum, yuav tsis koom lub Koom Txoos; ib txhia yuav koom thaum yav tom ntej. Lawv muaj cai xaiv li ntawd. Tiam sis qhov ntawd tsis tas ua rau peb txoj kev hlub lawv hloov. Thiab qhov ntawd tsis ua rau peb yuav tsum hloov peb txoj kev caw tib neeg thiab tsev neeg los thiab saib, los thiab pab, thiab los thiab nyob mus ntxiv.
Qhov thib tsib, tso siab rau tus Tswv hais tias Nws yuav ua tej txuj ci tseem ceeb. To taub tias tsis yog nej txoj hauj lwm kom tib neeg hloov siab los ntseeg. Txoj hauj lwm ntawd yog tus Vaj Ntsuj Plig Dawb Huv li. Nej lub luag hauj lwm yog qhia tej uas nyob hauv nej lub siab thiab ua neej raws li nej ntseeg.
Yog li ntawd, tsis txhob poob siab yog tias ib tug neeg tsis txais txoj moo zoo tam sim ntawd. Tsis yog vim nej ua txhaum lawm.
Qhov ntawd yeej nyob ntawm tus neeg thiab Leej Txiv Saum Ntuj Ceeb Tsheej.
Nej txoj hauj lwm yog hlub Vajtswv thiab nej cov neeg zej zog, uas yog Nws cov me nyuam.
Cia li ntseeg, hlub, thiab ua.
Yog nej ua li no, Vajtswv yuav siv nej ua tej txuj ci tseem ceeb kom foom koob hmoov rau Nws cov me nyuam uas muaj nqi.
Tsib yam uas kuv tau hais no yuav pab nej ua li Yexus Khetos cov thwj tim tau ua txij thaum ub los. Nws txoj moo zoo thiab lub Koom Txoos yeej yog ib feem tseem ceeb ntawm nej lub neej thiab tej yam uas nej ua. Yog li ntawd, nej yuav xav caw lwm tus los saib thiab los pab, thiab Vajtswv yuav ua Nws txoj hauj lwm cawm seej, thiab lawv yuav los thiab nrog nraim nej nyob.
Yog Tias Nyuaj Nev?
Tej zaum nej nug hais tias, “Yuav ua li cas yog kuv ua tag nrho tej no thiab tib neeg tsis nyiam? Yuav ua li cas yog lawv thuam lub Koom Txoos? Yuav ua li cas yog lawv tsis xav ua phooj ywg?”
Tej zaum yuav muaj li ntawd. Txij thaum ub los, Yexus Khetos cov thwj tim raug tsim txom. Tus Thwj Tim Petus hais tias, “[Cia li] zoo siab, rau qhov uas nej raug kev tsim txom ib yam li Yexus Khetos twb raug los lawm.” Tsoom Haiv Neeg Ntseeg thaum ntawd yeej zoo siab kawg li, “rau qhov Vajtswv pom zoo cia cov uas qhia Yexus zaj raug kev txaj muag.”
Nco ntsoov tias, tus Tswv tej kev yeej tsis muaj neeg paub txog. Tej zaum qhov uas nej ua li Yexus Khetos ua thaum lawv xyeej nej es tej zaum qhov ntawd yuav pab tshoov lawv lub siab kom mos muag me ntsis.
Vim kuv yog tus Tswv Yexus Khetos ib tug Thwj Tim, kuv foom koob hmoov rau nej kom ntseeg nej tus kheej ua raws li txoj moo zoo, nrog kev ua siab loj kom txhua tus paub tias nej yog mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, nrog kev txo hwj chim pab ua Nws txoj hauj lwm kom Nws paub tias nej hlub Leej Txiv Saum Ntuj Ceeb Tsheej thiab Nws cov me nyuam.
Kuv cov phooj ywg zoo, nej yuav xyiv fab vim nej paub tias nej koom tes ua txoj hauj lwm muab Ixayees sib sau ua ke, npaj rau Khetos txoj kev los “muaj hwj chim thiab yeeb koob loj; nrog tag nrho cov tim tswv dawb huv.”
Leej Txiv Saum Ntuj Ceeb Tsheej paub nej. Tus Tswv hlub nej. Vajtswv yuav foom koob hmoov rau nej. Nws pom zoo ua txoj hauj lwm no. Nej muaj peev xwm ua tau. Peb muaj peev xwm ua qhov no ua ke.
Kuv hais lus tim khawv txog qhov no los ntawm Yexus Khetos lub npe, amees.