Remera Loltirakl er a Osobel
Kede mo melchesuar a diak a ulebengelel deureng sel sekum a Osobeled me a ebangkelio er Ngii a mo dodai er a teketekel a klengar kid.
A ko er a uaia leberrotel er a chelsel a Cheuodel Renged er a hong er a Haggai a tekoi el kirel a cheldebechel er a rechad el mle sebechir lousbech aikal tekingel a Elder Holland. Tir a mle cheleuid el dimlak el nguu a Kristo el mo moktek er a klengar tir me a omesiungir. A Haggai a dilu bebil er a mesisiich el tekoi er a loungeroel er tir el kiei e ra rekeblirir e bai diak lomekedechor er a templo.
“Ng mla mo taem el kiriu, Oi kemiu, el mo kiei er a basio, el ngii el basio a di medechel el cheloit?
“Me chelecha eng mla melekoi a Rubak el kmo; Molbedebek omerelliu.
“Ko meringel loureor, e di kekerei omnguu; oi, kom di mengang, e diak bo mui; e di melim, e diak bo lungil a rengmiu; e bleiull, e diak momelchesiu el mekekeald; e mengerker er a chimol sense ng di ng chemars a chipbengiu.
“Ng mla melekoi a Rubak el kmo; Molbedebek omerelliu.”
Ng diak el sal klebokel aika el tekoi el mesoad el kirel sel sekum e kede ngmai a diak a kmal ultutelel tekoi el mo ngaruchei er a tekingel a Dios?
A dirk mla er ngii el miting er a sacrament, e a tal mla misionari el chad a dillii a klebokel el tekingel a demal er a ledu er a rengelekel kmo, “A usbechall er tiang a kesai el Wi-Fi e betok el Nephi!”
Ak mla kiei er a West Africa el eim el rak, me ak miles a betok lokesiu er a rechad el beot er tir a diak el merur el nguu ebangkelio el mo ruchei er a rokui el tekoi. A tara ungil okesiu a ngklel a siobai er a omeruul mlai me a omeklemalt ochil a mlai er a beluu er a Ghana. A ouklalou er tial siobai a mla mengeklii el “Sel Soam a Lemeltel.”
Kede mo melchesuar a diak a ulebengelel deureng sel sekum a Osobeled me a ebangkelio er Ngii a mo dodai er a teketekel a klengar kid. Eng di, ng beot er tial dodai, el bai, mo ulsirs er a tekingel a beluulechad, el ebangkelio a medechel el mo uriul er a rokui el tekoi me a lechub e kede kuk di mo er a ikelesia leru el sikang sel Sandei e merekong. Sel bo el uaisei, eng klengitelreng el uaia “lechars a chipbenged.”
A Haggai a melekoi er kid el mo oba blak el reng—e mo meruul, el uaisel ki molekoi er ngii er a Australia el kmo, “fair dinkum” el kirel otireklel ebangkelio. A rechad a fair dinkum sel loterkeklii sel ngii a uldesuir el kirir.
Ak silubii tial tekoi er a taem el ksal mle blak a renguk e ungil lousekool a rugby. Ak mlo medengei el kmo sel le blak a renguk lousekool, el mo er sel tkul er bab el sebechek, eng kmal mo ungil a renguk lousekool.
Sel kot el soak el rak er a klekool er a rugby a sera ktobed er a high skuul. Tial tim er ngak a mle meduch e mesisiich el tim. Kemam a mle kot el tim er tiaikid el rak. Eng di, a ta er a klebesei e a ki ulusekool lobengkel a tara ko er a mechitechut el tim, el uriul er tial klekool e te mla er ngii a rengalk el redil el ki mdak el mo milil, el mo er a klou lomeloik er a skuul. A kulemdaosu el kmo tia uaia le ko er a di beot el klekool, meng diak sal mo meringel lousekool meng diak mekesakl meng sebechek el mo er tial lomeloik. Me a chelsel tial klekool, eng dimlak el sal blak a rengmam lousekool, me a ki mlo make. E sel kmal mekngit er ngii, a sera bol merek tial klekool eng meral klou loburk, e tebull a berdel a ngerek el diak lungil er a ues el kirel omilil. Ng locha mle kirek el subii a kmo ngerang.
A kuk tara kmal ngodech el teletael el dilubech a mle tara klekool ruriul el ngii a kmal mle blak a renguk lousekool. A kultobed a rretek el bedul a tara chad; e di mle kiul mo melchesuar a ringel er a medak. Eng di ak mla mosisechakl er a demak el kmo ng diak el kirek el mo chemolt el mla metemall, e ak di millemolem lousekool. Sel kesus, er a bocha kumengur, eng merngelang a kuringet a kall. A bol kukuk er a tutau, e ak mlo er a ospitar, e a x-ray a ulechotii el telemall a omellek. A ngerek a ulebuid el elolem el sandei.
Ak siluub a klubelek er tial teletael el tebull a berdel a ngerek e telemall omellek. Meng diak el iior er a ikel lelomel el sandei el kuluureng a meral kall lek di millim e merekong, eng di diak kuuchel a renguk er a telemall lomellek le ng mle blak a renguk lousekool rokir a klekool. Eng di a kuuchel er a renguk er a oburk el berdel a ngerek el uaia le tomer ngak.
A blak el reng lomeruul el mo er sel tkul er bab el sebeched a diak el belkul a kmo kede mo melemolem el bleiull er a klengeltengat malechub e di bo lungil a rokui. Eng di ng belkul a kmo kede mo metik er a deureng. A deureng a diak el kora di deuil a reng malechub el deureng er a chelsel a kedeb el taem. A deureng a melemolem e ultuil er a blakereng er kid er sel soal a Rubak.
A okesiul tial teletael a cheldechedechal a Oliver Granger. Ng uaia tekingel a President Boyd K. Packer el kmo: “A Resanto sera lemodik er a Kirtland, … e a Oliver a di kiliei lolterau a kloklir el kmal mle kekerei el di sel sebechel. Ng dimlak a kmal techall el bo lungil besul. E, meral, dimlak bo lungil besul!” Ng mlodurch er a First Presidency el mo meruul er a meringel lureor, el dimlak el sebechel. Eng di a Rubak a chilat er ngii er a mle bleketakl blakereng er ngii:
“Ak medengelii a mesiungek er a Oliver Granger; me ak, dmu er ngii el kmo a ngklel a mo medechel lodengelii a betok el telcheroll, el mo er a ulebongel, ng millekoi a Rubak.
“A leuaisei, e bol blak a rengul lomecheliu e losebechakl er a First Presidency er a Ikelesia er ngak, e a rrebet e ngelmuut el mekiis, le uldersel a lmuut el chedaol er medak er a klengeltengat lolab, ng millekoi a Rubak.”
Tia klemera el tekoi el mei er kid el rokui—ng diak el iior er a kmo kede mlo ungil ng bai iior er a blakereng, el ngii a klou a ultutelel er a Rubak.
A tara okesiul a meral loltirakl er a Jesus Kristo a kmal sechelimam el chad er a beluu er a Côte d’Ivoire er a West Africa. Ngika el klebokel, e mui er a klaumernag el odos a kmal mlo er a ringel er a reng, me a bedengel, er a mekngit lomerellel a bechil er a klemengetel a taem, el mlo uchul a dertel a chebechielir. Ng dimlak el meterob a klaumerang me a ungil lomerellel, eng di mekngit lomerellel a bechil mo er ngii a uchul, eng mla er a klengit el reng el meketeket el taem. A tekingel, a smodii el kmo ngera dilubech:
“Ng uaisei el bla kdu el kmo ak mla ousubes er ngii, eng di ak dirk ngara klengitelreng; e ngara klengitereng er a bek el sils. Ng uaia le ngau el melul er a chaidirenguk. Betok el taem el kululuuch el mo er a Rubak me lecheridii a ringel kubang, eng di ng kmal mle iimis el meringel me ak mlo omdasou el kmo ak locha di uaisei el mo er a ulebongel. Ngelmuut el meringel er sera kekerei e lemad a delak; e lmuut el meringel er sera lemad a demak me a ngelekek el sechal. Ng ringel el uaia di loleketek el mekekii a chaidirenguk, el rirellak el mo omdasou el kmo ak locha mochu er a kodall.
“Ng mla er ngii a taem eng di ngak loker ngak el kmo a Osobel ng locha mo mekerang er tial teletael kngarngii, eng bai soak el kmo, ‘Ng dikea el sebechek, e Rubak.’
“A tal tutau eng uaia kulsiik er a ringel er a chelsel a renguk, el melasm losiik er ngii er sel kmal chelsel a renguk. Ng dimlak betik er ngii. Ak mlo omdasou aikel rokui luchul e ak [ngara] ringel, eng di dimlak kulchesuar a ringel. Ng tal sils el kulengiil el uase ak locha mo melchesuar a ringel er a renguk; e dimlak kulchesuar. Ak mlo terrob e ulureng a sulel a Dios er a tngkaireng er a Rubak el kirek.”
Ngika el odos er chelechang a kmal ulak el bechiil el mo er a, chad el kmal betik a rengul er ngii.
A leuasiei eng kirel uangera blekerdeled alsekum e kede meral loltirak er a Kristo? E ngera belkul ebangkelio er kid sel “domtab a [teleteled] el uaia,” tekingel a Haggai?
Ng soak sel okesiu er a melemalt el blekeradel el mla er a demal a King Lamoni. Kom dobedebekii sel kot el ngesechel a rengul er a bol betik er a ngelekel lobengkel a Ammon, el Nephite—el Lamanites a ouketiu er tir el chad. Ngultebedii olsengel el oleko ng mo oldechelakl er a Ammon e bai olsengel a Ammon a mle ulturk er a chiklel. “Chelecha e ngika el king, a medektang el mo er a kodall, meng dula el kmo: A lak mokotkak e ak meskau a ngii di el ngera el soam, luldimukl er a tedobech er a beluu.”
Ka momtab er a tekingel—tedobech er a beluu me luchul e lak lemad.
Uriul, er a bo lodengelii ebangkelio, eng liluut lodersii a tara tekoi. “Ngika el king a uleker el kmo: Ngera krullii luchul e ak mo nguu tial diak a ulebengelel klengar el kau a mesaod el kirel? Oi, ak mekerang e mo mechell el beches er medal a Dios, me tial mekngit el reng bol mesuld el mo cheroid er ngak, e bo kuba Reng er ngii, e bok mui er a deureng, me lak bok riid er a uriul klebesei? E millekoi, el kmo, ak mo mechei a rokui el kloklek, oi, ng mo medechel a beluak, me bol sebechek el nguu tial ngarbab el deureng.”
Tiaikid el taem, eng mle kldmokl el mo mechei a rokui el kloklel, le ebangkelio a lmuut el ngaruchei er a ikel rokui lolab! Ngiluu ebangkelio el mo ruchei.
A leuaisei, e a ker el mei er kid a kmo, kid kede dirrek el mo mechei a rokui el kirel ebangkelio? Le alsekum eng telaod a rengud eng diak doba blakereng! E a Dios a diak lomekngeltengat er tirkel louralmesils a rengir.
Ng diak a ngii dil mekreos el kalou, ngii dil ngera el soam, a lechub eng deruchall, a lechub eng social media, a lechub eng klekool er a video, a lechub e ngii dil klekool, a lechub eng deleuill lobengterir a remerael chisir el chad, a lechub e ngii dil ngera er a beluulechad el muut el mekreos er a diak a ulebengelel klengar. Me a tekingel a Rubak el mo er a rebek el chad a kmo “momtab a blekerdeliu.”
A kumelchesiu aikel tekingel a Nephi el kmo: “Ak chemat a bleketakl el tekoi; ak chemat er a klemerang; ak chemat er a Jesus, le ngii a mla osebelak er a beluu er a ngau.”
Kid kede meral loltirakl er Ngii el Ngii a milskid a rokui? Ngii a Osobeled e Mesebechakl er kid er a medal a Chedam? Ngii el kmal mle blak a rengul er sel tngakireng er Ngii lultuil er a beltikereng er Ngii, chubechub er Ngii, me sel blakereng er Ngii el bo denguu a diak a ulebengelel deureng? A kulengit er kid el rokui me bo dorrenges e donguiu aika el tekoi: A kulengit, me lak becherei a sel mui el blakereng er kau el mo uriul taem el diak modengei el kmo, ng oingerang. Bol blak a rengmiu er chelechang me bo molchesuar a deureng! El ngara a ngklel a Jesus Kristo, bol uaisei.