Mui er a Klaumernag, Ng Diak Lak a Klaumerang
Ng kirel morngii a temed er a bek el sils el mo cheroid er a tekingel a beluulechad e mo kmeed er a babeluades.
Telkib el taem er a memong ak milkiis e mle kudmeklak el mesuub a chedaol llechukl. Ak ngilu a dengua rngak e mlo dengchokl ra kingall er a bita er a dukellek el oleko mo er a Gospel Library app. Mak mekengii a dengua er ngak e oleko kmocha omuchel el menguiu e soal mes a betok el tekoi me a text me a email el mlei er sel kesus. Ak ulemdasou, “Ak di mereched el mes ikal klumech,e mochu menguiu chedaol llechukl.” Erul, sikang ruriul e ngak a dirk menguiu a text, email, niius, me a betok el tekoi el ngara social media. Sera kisang a taem, ak mlo rereuchel lorreched el mengemdokl er ngak. Tiaikid el tutau eng dimlak kunguiu a chedaol llechukl, meng dimlak kngai aikel chedaol olisiich el ngii a mle soak.
Chedaol Olisiich
Ak medengei el uase betok er kemiu a mla uaisei. A beches el klekedall a omekngeltengat er kid er a betok el teletael. Ng sebechel lokedid er a resechelid me a telungalek er kid, er a tekoi, me a niius me a betok el chaise r a beluulechad. Eng di, ng dirrek el sebechel osengkid er a ikel ngii a kmal meklou a ultutelel: sel olekeed er kid el mo er a babeluades.
A kumelekl a blal du a profet er kid, President Russell M. Nelson, el kmo: “Kede kiei ra beluulechad el chetituokel e dimerael mo klou a ultok ra chelsel. A social media el di ngarngii er a bek el taem me a lluich me a eua el sikang el nius a mekekid er a betok el klumech. Alsekum e kid oureng el mo mtebengar a betok el bedengel a ngor me a llemesir a rechad loldechelakl er a klemrang, eng kired el mesuub el mo ngmai chedaol ocholt.”
A President Russel M. Nelson a millemolem el melekoi el kmo, “aikal sils el merael mei, eng diak el sebeched el mo selbechakl er a chedaol tekoi a lak a ulekrael, ngesou, ongelaod, me a odbechel Chedaol Reng.”
Tela el rak er a memong, e a President Boyd K. Packer a ulechais er a delbechel el dir, el klungel a snow a uchul, e te miltenget er a blil me te mlo olsengerenger. A rebebil er a ungil chad, el millasm lolsobel aikal dir, a ngilai a betok el hay locha er tial basio—el dimlak el ngii a longa ikal dir, eng tirkal chad a ulemdasou el uase ng sebechel kelel el mo merek a temel a kelekolt. Klengitelreng, le betok er a ikal dir a blol betik ruriul el mla mad. Te milngang aikal hay, eng ding dimlak el besterir a eiio er a bedengel, meng mlemui a delir eng di te mlad.
Betok el tekoi a mekekid er a chais a uaia le chedaol el osisiu ngii me a domekang a dir er a hay—el sebeched el mengang el tal sils, eng di diak el beskid a eiio.
Kede metik er ker a meral chedaol olisiich? Oumesingd, eng diak debetik er a social media. Kede metik er ngii sel sekum “e kede [omakes] el bedul uchei” er a rolel a telbiil, “el melemolem lurrekodel er a deel el sintsyu,” e mo nguu a rdechel a kerrekar er a klengar. Ng belkul a kmo ng kirel morngii a temed er a bek el sils el mo cheroid er a beluulechad e mo olkeed er kid er a babeluades.
Sel berrusel, a Lehi a milsterir a rechad el ngiluu a rodech eng di techilitii le sel klou e meteteu el blai a uchul, me a kldidai el reng er a beluulechad. Ng sebechel a rengeasek el chad el mukeroul el Uriul-klebesei el Santo, e ngara ikel rokui el miting me a klas er a Ikelesia, e dirrek el meruul a ureor er a templo, e sola mereko mo ikrii “el mora ngodech el rael el [sebechel] remiid.” Ngera uchul meng mo uaisei? Chelsel a betok el teletael, eng sebechel uaisei le tir lulemais el meruul a chedaol tekoi, eng di dimlak el sal mui lobult. Te ngilai eng di dimlak lolisiich er tir.
Eng di, ak mla mesterir a rebetok er kemiu a el Uriul-klebesei el Santo el mesisiich, e mellomes, e blak a rengmiu. Komedengei el uase kemiu a sechal me a redil ngelekel a Dios e Ngii a ngarngii a ureor el kiriu el meruul. Ko betik a rengmiu er a Dios loba “rengmiu, uldesiuiu, bedengiu, me a klisichiu.” Komoltirakl a telbiliu e mesiou er a rebebil, lomuchel er a blai. Ko multuil er a klaumerang, ouchel a rengmiu, e merael mo ungil er a bek el sils, e tiaikid a meskemiu a deureng. Ko mengedmokl el kirel a klengeltengat er a templo me a bebil er a techall el bom ngai kemiu loltirakl er a Ossobel. Ko molngeseu el mengedmokl er a beluulechad el kirel Ongeru Lemei, el sioati er a rebebil el mei er a Kristo me bol lolchesuar a klisichel a Tngakireng er Ngii. Kom kmeed el mora babeluades.
Oi, kom chelbangel a betok lolibesongel. Osisiu me a bek el telcheroll. Tiaikid a sils er kid, e kired el mo mui er a klaumerang, ng diak lak a klaumera er kid. A kuchais el uase a Rubak a medengei a ringel el dengarngii, e okeuii a dereder er a President Nelson, e Ngii olngeseu er kid el mo sumechokl. A kumerang er sel okedong er a profet el mo remuul a rekeblid el mo uaia ikelesia, lobengkel a ngesou er a ikelesia, a mekedmokl el uaisei lolngeseu er kid—el mo mesisiich—er chelechal taem lolngesonges a chedaol tekoi.
Kirel a Blai
Ngera belkul a ikelesia el ngara blai? A blai a mal sebechel kakerous er a beluuelchad. Kom locha ngara telungalek el meketeketang el chedal a Ikelesia el mla mo betok el telecheroll. A lechub e kelocha di kau el tang el chedal a Ikelesia er a telugalek er kau. Kelocha bechiil a lechub e ke mesobil, loungalk a lechub eng diak moungalk.
Ng diak el iior er a teletael el mngara chelsel, eng sebechiu el remuul a rekeblimiu el mo blai er a omesubel ebangkelio me a delenghcokl. Ng belkul a kmo kom nguu a ngerachel el kirel a beltiu me a okeruliu er a chedaol tekoi. Ng belkul a kmo komoltirakl a tekingel a President Nelson el mo “remuul a blimiu el mo basio er a klaumerang.”
A cherarou a mo melasm el mengesuseu el kmo a chedaol ulekeroul a diak a belkul, a lechub eng, sebechel mo uriul tekoi. Ngii a mastang er a ultok e melchesel a omengudelblachel. Ngii a momelasm lolab a bebil er a tekoi el oleko ngorechudel el mengesang er kemiu. Ngrulemiu el kmal mo mechesang “er a betok el tekoi” me komobes er sel “chimol tekoi el [ngii] a kmal usbechall.”
Ak mereng a sulir a kmal “ungil chad er a blik,” el ulmekeroul er a telungalek er tire r a blai el mle blechoel ngarngii chedaol olisiich, beltikereng el deleuill, me a ungil omilil me a omeruul er a chelsel. A osisechakl el bilskak er a kngeasek a mla sobecheklak. Roungalk, a kulengit me msisichii a deleuill er kemiu me a renelekiu. Te ousbech er a klou el temiu, ng diak el kesai.
Ngesou er a Ikelesia
Sel moruul el uaisei, e a Ikelesia a ngarngii lolngeseu er kemiu. A doruul er a chelsel a ikelesia a sebechel smisiich aikel chedaol tekoi el duubech er a blai. Chelechal rak, e kede mla mesang tial teletael er a ngesou er a Ikelesia er a chelsel a Sandei Skuul me a Primary. Kede dirrek el mo mesang er a chelsel aikel miting er a Aaronic Priesthood me a Young Women. Ngomuchel er chelechal Kot el buil, e a teletelel aike el miting a mo telkib el mengodech. Ng disisiu el chemau ebangkelio, eng di aika el suobel a mengaisisiu ngii ma Come, Follow Me—For Individuals and Families. Tia kekerei el ngeldechel, eng di kmal klou a relii er a chedao ulekeroul er a rengeasek.
Ngera bebil er a ngesou el ngara Ikelesia? A ikelesia e ked emelai er a sakrament, el ngosukid el muut el mo blak a rengud el kirel Osobel er a bek el sadnei. E dirrek el chelsel a ikelesia e kid a teloi er a roumerang el tir a mla rulii osisiu el telbiil. A beltikereng el duubech lobengterir a rebebil er a roltiakl er a Jesus Kristo a sebechel mesisiich el ngesou el dengai el mora rekeblid e oltirakl.
Sera leteruich me a eua rekik, e a rechad er a blik a millukl el mora beches el basio. Tiang a locha diak el sal klou el tekoi el mo er kemiu, eng di denguu er ngak, eng kmal mle chetik. Ng belkul a kmo ak mo obengteri a rechad el diak kudengelterir. Ng belkul a kmo a rokui el ngeasek el sechal er a ward e rngak a mora ngodech el skuul el diak el sel kborngii. A uldesuek er sel taem el teruich me a eua rekik, a kmo, “Ngera me a rechad er a blik a uaisei er ngak?” Ak mlo omelchesiu el klengar ngak a mla metemall.
Eng di, ngokiu aikel omeruul er a Young Men, eng mlo sebechek el toketekii a ungil deleuill lobengterir a rebebil er a rechedal a quorum e rngak, e te mlo sechelik. Osisiu, a rechedal a klebisop me a romtebechel er a rengara Aaronic Priesthood a mle semeriar lolngeseu er ngak. Te mle duum er a ikel taem el kngara klekool. Te milluches a klemechir el melisiich e rngak el dirk kulab er chelechal sils. Te millemolem el meluches el mei er ngak ruriul er a kbora daingak me sera kurael el mora mission. A ta er tir a mlara skozio er sera bek rei. Ng diak kubes a sulir tirkal ungil odam me a beltikereng er tir me a ngarbab el urungulir el kirek. Te silbecheklak el merael bedul a babeluades, me ak mlo semeriar, e ungil a renguk, e ngara deureng.
Ng mekerang kid, a roungerachel me a roungerachel, a dengesuterir a rengeasek el mo medengei el uase te diak el cheloit er tial rolel a telbiil? A mo bengkel sel omak a deleuill, e kede siotai er tir el mora ikel meklou me a mekekerei el ongdibel—el rua ongdibel er a Strength of Youth me a youth camp el mol muut er a quorum me a omeruul er a chelsel a klas. Lak el metetoech a medam el kirel a klisiich el mei lokiu sel omdak lobengterir a rebebil el tir a dirrek el melasm el mo mesisiich. Rebisop me a roungerachel, a kulengit me molisiich er a rengalek me a rengeasek er a ward er kemiu. Tir ousbech a klou el temiu, ng diak el kesai.
A omoungerachel, tonari, chedal a quorum, a lechub e kuk di Santo, alsekum e ngarngi a techellem el sobecheklii a klengar er a ngeasek el chad, e mngeseuir el mo kmeed er a babeluades. A omerellem a locha ngii a “ngesou er a Ikelesia” el ngeasek el chad ousbech.
Rodam me a rodos, a kuchais el uase a Jesus Kristo a bdelul tial Ikelesia. Ngii omekellomes er a remengetekled e omekrael er kid el mora ikel chedaol lolisiich el dousbech er chelechal taem. A chedaol olisiich a ngosukid el mo mui er a klaumerang, ng diak lak a klaumera er kid. Lobang a ngklel a Jesus Kristo, amen.