Kerekikl el Melemolem el ngara Nglunguuch (Alma 34:39; Moroni 6:4; Luke 21:36)
Melemolem el kerekikl a kmal usbechall el mo omtok a mededaes el uldesued me a beot el rengud.
Ak meluluuch me a Chedaol Reng bo lobengkem e lobengkek el ngara deureng e dedak el oldanges.
Se er a Ongeua el Buil er a 1976, e a Elder Boyd K. Packer a milngedecheduch el mo er a rengeasek er a Ikelesia er a klou el ongdibel. Chelsel a kmal tokubets el cheldechedechal el “Chedaol Ius,” e ngii a uluchais er a loruul er a ngerchelel er a Africa e ngii a ulemes e omtab er a kmal ungil berrotel el ius el omekbat er a mo cheldil. E ngii a mocha omekesiu er a ius el mo er a Diabelong, el ngii a omekbat er a re diak el kerkekikl el ngeasek el omart aike el ngii a kengaol el telengtengil a klengit.
Ak mle 23 a rekik er sel el taem er a Elder Packer a uluchais er a tia el cheldechedechal, e ngak me a Susan a milngichiil er a cherellel a ketengam el ngii a di mle chelsel a tela el klebesei. Aki kmal chilat er tia el belkul a cheldechedechal el kirel a mengeroid er kid er a klengit me a se el kot el ngar er bab el rolel el ngii a oba a teletelel a charm el olisechakl er a kmal el klou a ultutelel el chedaol el omesuub.
Ngak me a Susan a mla ngara betok el ureor el mo er a Africa. E mlo er ngii a techellam el mo omes aika el kmal mengasireng el charm el ngii kiei er tia el beluu. Sel dolbedebek el kmo ngera cheldechedechal a Elder Packer a mla rullii er a chelsel a klengar er kid, e kede mla melasem el omtab e mesuub a meklou a ultutelel el omerellel a charm er rureomel er a Africa.
Ng soak el mo smodii a chedechedelel me a omerellel a teblong el cheetah el ngak me a Susan a ulmes el omekbat a chelderir e mo mengaisisiu a bebil er a tekoi el kemam a ulemes el mo er a bek el sils el de kiei er a ebangkelio er a Jesus Kristo.
Cheetah me a Topi
A cheetah a kot el bekerurt el charm er a ked er a beluulechad el ngii a sebechel el remurt er a bekord el 75 mph (120 km/h) a rretel. Aika el klebokel el charm a sebechel el di dechor e omuchel el rurtii a mo bekord el 68 mph (109 km/h) er a cheungel a di edei el seconds. A cheetahs a charm el ngii a omekbat er a cheldil e rurtii a di kedeb a cherridel el mo oltoir e okeuad.
Ngak me a Susan a chiloit a bekord el eru el sikang el omes aika el teblo el cheetah el omekbat er a klou el cheldebechel er a topi, el ngii a a kmal el oumesingd el de betik el ta er a bedengel a antelope. A mekemangel, e merat el chudel er a oberberek el chutem er a Africa el kora kolt e cheriich a bedengel a blechoel el ungil mart aika el meklou el charm e ngii a okiuellel aika el cheldellel a topi. Aika el cheetah a mle kakebii er a tang er a bekord el 100 yard (91 m) a cherridir e ng di te oureor el ngara blechebechir.
El ua chimo el cheetah a dilengchokl el melemalt er a chudel e diak el ongitengtik, e a chimong a ngar er eou er a chutem el meluduus e mekekokil el mo kmeed er tirka el kmal rrau a rengrir el topi. E ngike el cheetah el dilengchokl a mocha dibus er a chudel er a kmal osisiu el taem el kuk ta er a cheetah a mocha dengchokl el melemalt. Tia el kaiuchit el teletael er a chimo el cheetah el meluduus er eou me a chimong a dengchokl er a delul a chudel a milemolem el kmal mlo meketeket. Se el omerellel el kmal komakai er tia el teletael a ruul el mo mengesang e mengeblad er a iak el topi e ua longeroid er a osengir er a merael el mei el kengaol. Klou a rengrir e diak el mesim, aika el teblo el cheetah a dilak el oureor el mo melai er a mo kelir.
Dilchor er a delongelir a meklou el delbechelel a topi me a ika el merael mei el cheetah a mle bebil er a meklou e mesisiich el topi el dilchor el mengkar er a bebul a blil a ngal. Tia el menglou er a osongel er tia bleberek el delul a chudel er a mekekerei el bukl e milsa techellir tirka el mengkar el topis el mo omes a olechotel a kengaol.
E di mle mereched, el tirka el cheetah a mlo chemolt el kmal di kmeed, me tia el delbechelir a re topi a ulbult e rirurt el mo er cheroid. Ng diak kudengei el kmo alsekum tirka el mengkar a topi a mle chadecheduch el obengkel tia el delbechelir a topi, e ng di mlo er ngii a uleklatk, me tirka el topi a millukl el mo er a basio el diak a kengaol er ngii.
E ngera sel kuk bo loruul er ngii a cheetah er ruriul? El diak a omekioud, e a teblo el cheeta a milemolem el kaiuchit er tia el omeruul el chimo el cheetah a mle rireboreb el ngar er iou e a chimong a dilengchokl el melemalt er a delul a chudel. Tia el teletael a di milemolem. Ng dimlak a ta le stob. Ng dimlak a ta el lolengull me a lechub e te mengiil. Te kmal mle blak a rengrir el oltirakl er tia el teletael er a omengesang e mengeroid er a ues el kirel a kengaol. Ngak ma Susan a ulmes aika el cheetah el mo dibus er a cherridam, el blechoel el di merael mo kmeed er a ika el delbechelel a topi.
Sel el kesus e ngak me a Susan a mla er ngii a kmal el ungil el cheldechedechemam el kirel a ngera aki mla mtab e suub. Aki dirrek el milsaod er tia el tekoi el dilubech el merkemam el mo er a rengelekam me a rengelekir a rengelekam e ulecholt a betok el meklou a ultutelel el suobel. Chelechang e ak mo olecholt aike el suobel.
Suobel #1—Bom Kerkikl er se el Berrotel el Ongetikaik er a Diabelong
A denguu er ngak, e a Cheetah a kmal meiaiu, mesiich, e olechau a reng el charm. Se el bebibrurek el mo becheleleu el obengkel a mechedelekelek el chiro el bedengel a cheetah a oureor el menglebokel e omart aika el charm el mo uchul e ng ungil berrotel se el omekbat a mo chelderir er a ika el obereberek el chudel er a Africa.
Osisiu el teletael, e a chedaol el kengaol el uldasu me a omeruul a oumesingd el taem a sebechel el chemolt el olechau a reng, soal a reng, e ungil er a reng. Sola, el chelsel tia el di kedeb el temed er tia el beluulechad, a derta er kid a kired el mo kerekikl el kirel a mekngit el ongetikak el ngii a lekong ungil. El ua ike el ble omeklatk a Isaiah, “Klengit el reng el mo er tirke el omekedong er a diabelong el ungil, me a ungil el diabelong; el tir a msa ikolk a llomes, me a llomes er a ikolk; e msa mecheuached a merekos, me a merekos a mecheuched!”
Chelsel a taem el tekoi el mengai er a klemerang el uldasu e ng di ng ng diak a olechotel el kmo ng klemerang a se el telemellel se el cherrungel el chedaol el klengar er a chad a olengchelel a llemalt e a nglemuu a olechotel a mimokl, ke de mral ngeltengat el kiei er a ika el uriul el klebesei er a ollutel a mla moluut el llemesel a ebangkelio a medidiich el omekllomes er a chelsel a klengar er kid e olengeseu er kid el mo dmangch aike el milkolk el ongeblad me a ongesang er a cherarou.
“El tirke el tir a mellomes a mo nguu a klemerang, e mla nguu a Chedaol Reng el mo omekrael er tir, e dirkak bo el mecheblad uaisei ak melekoi er kau, te diak el bol rebet me a lechub e te mo modik el mo er a ngau, e bai moterkokl er se el sils.”
Suobel #2—Di Mekar e Mereched el Bdelum
A denguu er a topi, e a telkib el taem er a terrekakl me a diak el omtab a tekoi a sebechel el oueling er a di mereched el odelecheklel a cheetah. Osisiu, chedaol el mededaes a uldesued me a beot el rengud a rullid el mo mechitechut er a ika el dauch er a cherarou. Chedaol el tekoi el dobesbesong a siotai a meklou el kengaol el me er a chelsel a klengar er kid.
iStock.com/Angelika
A Nephi a milsaod el kmo ng mekera e a chelsel a uriul klebesei e a Diabelong a mo melasem el mengellakl e mengesuseu er a rengelekel a Dios el mo er a diak el klemerang el “omelechesuar el kirel, a a mo melekoi: Rokui a di ungil er a Zion; uaisei, a Zion a mo duoseb , rokui a di ungil—e uaisei el diabelong a milngeblad er a rengrir, e mekekokil el milngitikaik er tir el mo er a beluu er a ngau.”
Melemolem el kerekikl a kmal usbechall el mo omtok a mededaes el uldesued me a beot el rengud. Se el bo de kerekikl e kede ngara blekeradel me a lechub e ng omeruul el kerekikl el omes a tekoi el sebechel mo uchul a kengaol me a lechub e ng ringel. E a kerekikl el omes a olechotel a omeruul el di mekar el mengkar e mesebechakl. Denguu er a chedaol el omelekoi, e kid a kired el di mekar e kerekikl er a ongelulau er a Chedaol Reng me a ike el ocholt el ngii a mengai er a remengkerengel a tebekebok er a Rubak.
“Choi, ak dirrek el mengesuseu er kau … el kmo bom kerekikl el melemolem el ngara nglunguuch, meng diak bom mechetikaik el mo er a cheroid el okiu a ongetikaik er a diabelongl, … el uaisei, ngii a mo ousengk er kau a diak el ungil.”
Dolterekokl er a klengar er kid er ngii e okiu a Osobel me a ebangkelio er Ngii e ng rullid me ng mo sebeched el mo mesisiich er a ike el blechoel el rullii a chad el mo mesaul e mesaik el kirel chedaol tekoi er a reng. El kid a kmal ngeltengat el ngar er ngii a medad el omes me a dingad el orrenges, a Chedaol Reng a sebechel el kilungii se el sebeched el mo omes e orrenges se el sekum kede locha diak desa el omdasu el kmo ng kired el omes e orrenges me a lechub e kede omdasu el kmo ng diak el sebeched el mes me a lechub e kede remenges a tekoi.
Suobel #3—Modengei a Moktek er a Cherreuem
A Cheetah a charm el ngii a ruul el omekbat er a bebil er a charm. Ta el sils, er a bek el sils, e a cheetah a charm el omekbat.
Diabelong “a cherreuel a llemalt me tirke el tir a osiik el mo meruul er se el soal a Dios.” Ta el sils, er a bek el sils el di se el kmal di soal e kmal di moktek er ngii a mo rulteterir a resechal me a redil el rengelekel a Dios el mo cheuarm el di uai ngii.
A Uldesuel a Rubak er a Deureng a moktek er ngii a mo olecholt er a rael el mo er a Rengelekel, el mo olengeseu er tir el mo ngara diak a ulebengelel deureng, e mo ngoititerir el selbechakl el me remei el Obengkel el mla mokiis, e diak el mad el tech. A diabelong a urerel el meruul er a rengelekel a Dios el mo ngara rrau el reng e diak el ngara deureng e mo mengesader er a bekesir el kirel a diak ulebengelel. A cherarou a blak a rengul el oureor el melemall aike el telengtengil a uldesuel a Chedam el ngii a kot el chetil.
A diabelong a diak a bedengel, e a bekesel mo er a diak a ulebengelel a mla mo er a ulengull. El di ua ralm el omaoch er a omoachel a mla mekaud er a olenget, me a bekesel a cherarou el kirel a diak a ulebengelel a mla meterob le ngii el diak a bedengel er a tech. El uchul e ng mle omtok, a Lucifer a di mle ngii el kotouar er ngii a ike el rokui el klengeltengat er a klechad me a ike el tekoi el duubech el okiu a telengetengil a tech me a chiuis. A ta er a kmal mesisiich el belkul a tekoi er a chedaol llechukl el delbeakl a mucholt er ngii el diak el sebechel el melemolem el omakes el mo uaia Demad er Babeluades .
E le bedenged er a tech a kmal kelulull a uldesuel a Chedam el kirel a deureng me a omeleketek el chedaol tekoi er a reng, e a Lucifer a osiik el mo omekringel a bekesed el mengetikaik er kid el mo ousbech a bedenged el diak el ngara mera el teletelel. President Russell M. Nelson a ulsisechakl el kmo a omengeluolu a chedaol tekoi er a reng a kmal el ultiul er a kmo “‘kelem nguu a kot el bekesel ochim el bedul a diak el kirel el mo er ngii me a lechub e ng diak el kirem el meruul er ngii.’ … [E] kid el rechad a di rokui el ngar er ngii aike el oureng a [bedenged er a tech] el tekoi el ngii a klou a ultutelel el kirel a mo suobel. ‘Aika el doureng a kmal el klou a belkul el kirel a omengeluolu a klengar. Meng, mekera a cherarou? … Ngii a melemall er kid el okiu aikakid el tekoi el doureng. Ngii a mengetikaik er kid el mo menga kall el diak el kired el mengang, ilumel el diak el kired el melim, e oubeltikelreng sel diak el kired el oubeltikelreng!’”
A ta er a biteklel a diak a ulebengelel a kmo a cherarou, a ngii a ngara klengitelreng el kmal uchul el diak a bedengel er a tech, e ngii a bai mengesuseu e orrimel er kid el mo obengkel el ngara klengitelreng el okiu a diak el mera el usbechel a bedenged. Se el kmal dongu el ngii a diak el lobang e diak el sebechel el ousbech er ngii a bai kmal oltaut a omelasem er ngii el omedikl er kid el mora telemellel a bedenged er a tech me a tekoi er a chedaol reng.
Medengei a moktek er a cherarou a kmal klou a belkul e usbechall el kirel a omengedmokl el kirel a sebechel el duubech el omeruul. Osisiu el Captain Moroni a mle medengei aike el moktek er a re Lamanites, e ngii a milngedmokl er ngii el mo omtech er tir er a temir el mei e ngii a mlo mesisiich. Ng osisiu el osisechakl me a yaksok a dirrek el meruul el me er kid.
“Alsekum ke kldmokl, e ng diak el kirem el medakt.
“E kau a locha sebechem el mo chemiis er a klisichel a cherreuem.”
Siotai, Yaksok, me a Olechotel a Klaumerang
El uasei el meklou a ultutelel el suobel a sebechel el mesuub el okiu a omes el blekerdelel a cheetah me a topi, me a derta er kid a kired el osiik a suobel me a uleklatk el ngii a debetik er a di beot el tekoi el duubech er a bek el sils er tia el klengar. Me se el dosiik er a uldesued me a rengud el mo obok el mo ngmai a olechotel a rael el okiu a klisichel a Chedaol Reng, e a bebil er a kot el meklou el mesisiich el uleklatk a sebechel el mengesebechakl er kid a mo omuchel er a di tekoi el duubech er a klengar er kid. Mesisiich el ollachitnger a ngara chelsel a chedaol llechukl me a chelsel a klengar er kid.
Ak mla masech a edei er a chelsel a betok el suobel el sebeched el ngmai er tia el omerollek ngak ma Susan er a Africa. Ak siotai e mengesuseu er kau el mo melbedebek er tia el omerellel a cheetah me a topi e masech aike el kuk bebil er a suobel el mo er kau me a telungalek er kau. Kulengit me blechoel el medengei el kmo a blim sei a uldalem el kelulul a omesubel e kiei er a ebangkelio.
Se el moba a klaumerang el meruul er tia el siotai, e a ungil uldasu a mei er a uldesuem, melechesuar a chedaol tekoi a mo kloi er a chelsel a rengum, e kau a mo sebechem el dmangch a omeruul el ngii a kirel mekedmokl me a lechub e ng melemolem el mo uchul e ng sebechem el “nguu [se el] rokir el sebecheklel [a Dios], el mo ngosukau el mo mesisiich er a sils, er a diabelong, el mo otekau el rokui, e di melemolem el sebechem el dechor.”
Ak yaksok el kmo a klengeltengat el kirel a meral omengedmokl me a mengkerengel a chedaol el tekoi er a reng a mo omaoch el me er a chelsel a klengar er kau se el sekum kau a kerekikl e blak a rengum el melemolem el ngara nglunguuch.
Ak olecholt er a klaumerang el kmo a bakes el bedul uchei el ngara rael er a telbiil a mengkerengel a chedaol tekoi er a reng e siotai a diak a ulebengelel deureng el mera klengar er kid. E ngak a sioning el kmo a mla mokiis e ngar el Osobel a mo oldubech e melisiich er kid er a ike el ungil me a mekngit el taem. A ikal klemerang a kulekoi loba chedaol ngklel a Rubak el Jesus Kristo, amen.