Ulsiseb er a Telbiil
A mo obengkel a Dios e mo dmak el ngara rolel a Telbilel a mo uchul a klengeltengat el mei er kid le kid el ulsiseb er a chelsel a telbiil.
Rodam me a rodos, a tal cheldecheduch a kirel a ngalek er a Primary el mesuub el meuluuch. “Sulang er a lechukl el A, me a lechukl el B, … me a lechukl el G.” Tial nglunguchel a ngalek a melemolem, “Sulang er a lechukl el X, Y, Z. Chedam el ngara Babeluades, sulang er a ochur el 1, me a 2.” A sensei er a Primary a ko er a sobeka rengul eng di ng melemolem el mengiil. A ngalek a kmo, “Sulang er a ochur el 5, me a 6—e sulang er a sensei er ngak er a Primary. Ngii a di chimol chad el mechikak me ak rokir a nglunguchek.”
A Chedam er a Babeluades a meral remenges a nglunguchir a rebek el ngalek. Ngokiu a cherrungel el beltkil a rengul, e Ngii olengit er kid el mo oumerang e mo ulsiseb er a telbiil
Tial beluulechad a mui er a ongesang, blulak, me a chelbirukel lomeruul. Betok a ko er a ngeldengodech el teletael. Sel bo debechei a ongesang , me a oleko ke de ngerang, me a sorir me a chetirir a rebetok el chad, e oureng er a di kedeb el deureng, tedeb el deleuill, malechub a di klsuul el skel a tekingel a beluulechad. Doureng a saul, el ngar ngii a rael el bo dengai a nger el kirel tial teletael.
Sel dosiik er sel ngarbab el llechul a Dios er a oubeltikereng el mo er Ngii me tirkel ngara bita er kid lokiu a telbiil, eng diak doruul er ngii el uaia dengodech el chad kede bai Ngelekel el ngara blil. Sel-chuodel tekoi a kmal dirk klemerang. A bo debechei a tekingel a beluulechad e desiseb er a deleuill er a telbiil, e kede mo metik e mo er sel kot el ungil el diak a ulebengel el kid—el mededaes, ngar, merang— e mo meruul aikel kot el klou a ututelel el deluill er kid. A ulsiseb er a telbiil a mo meruul e oltirakl a yaksok el mo er a Dios me a ta me a tang, lokiu a chedaol ruoll el ngii a siotai er a kledios el mei er a klengar kid. Se desiseb er a chelsel a telbiil, eng sebeched lemuut el ngosechekl el mo er bab. A ulsiseb er a chelsel a telbiil a meskid a basio er kid, me a cheldecheduch, me a techelled el mo ngerang. Ng mekdebechii a klaumerang el kirel a klengar me a mo suobel.
A chedaol telbiil a mo uchul a beltikereng el mo er a Dios me ngii el mei er kid el dirrek. A Dios, el Demad er a Babeluades, a kmal lemuut el betik a rengul er kid e kmal ungil medengelkid. A klaumerang er a Jesus Kristo me a ngeldechel a chad (ouchelreng) a meskid a chubechub, krasia, me a klausubes. Aika chemolodii a ngara ringel, klsabisi, me a diak el melemalt lomeruul el kid a obangel er tial beluulechad. Ngii el Dios, e a Demad er a Babeluades a soal a bo denguu sel ngarbab el sengk er a Dios—deureng er Ngii, me a diak a ulebengelel klengar Ngii.
A Dios er kid a Dios er a telbiil. Ngokiu a Teletelel, e Ngii “oltirakl a telbiil e odersii a chubechub.” A Telbilel a diak lengemed “le taem a di melemolem, me a beluulechad me ngar ngii, malechub a di blol chimol chad el ngara beluulechad el kirel mo suobel.” Kid a diak de kora di ngara rraureng el diak dodengelii a uchul e kede ngara tiang ng bai kired el mo ngara deureng e kiresii a deleuill er kid er a telbiil “el muut el mesisiich er a rengedel a kodall.”
A chedaol ruoll me a telbilel a Dios a mo er a beluulechad el rokir eng di a techall el kirel a di mo er a dersta el chad. Me ngokiu a tabesul moktek er a Dios, e a rebek el chad er a ngii di el basio a sebechir el ngmai aikal chedaol ruoll. A mimokl lomelilt a usbechall—el dersta el chad a melilt el kmo te kongei aika el chedaol ruoll el ngarngii. A chedaol ruoll er a Dios a olangch el bereked er a Rolel er a telbiil. K ede omekedong er a uldesuel a Dios el kirir a Rengelekel el kmo ng uldasou er a mo suobel, uldasou er a diak a ulebengelel klengar, uldasou er a deureng. A mo suobel, diak a ulebengelel klengar, me a deureng er a celestial a sebechel mo tekoi le Jesus Kristo a “kildmeklii a cherrungel el tngakireng.”
A mo obengkel a Dios e mo dmak el ngara rolel a Telbilel e mo uchul a klengeltengat el mei er kid le kede ulsiseb er a chelsel a telbiil.
A kot, e tial ulsiseb er a chelsel a telbiil a melutk el bedul a Jesus Kristo el ngii a “sebecheklel a beches el telbiil.” A rokui el tekoi a sebechel dmak loureor el mo klungioled sel sekum e ke de “klikiid el ngara Kristo … lokiu a telbilel a Chedam.” A bek el ungil me a yaksok el klengeltengat a mei er tirkel melemolem el ngara klaumerang el mo er a ulobengel. A “deureng el mo er tirkel loltirakl a llechul a Dios” a klengeltengat er a rokui el tekoi, a tekingel a klechad me a chedaol tekoi,” e mo “kiei lobengkel a Dios … el ngara diak a ulebengelel deureng.”
Mesel doltirakl a telbiled, e a bebil er a taem e ke de locha mo omelchesiu el uaia deliuekl er a reanghel. E kid a mo uaisei—tirkel betik a rengud er tir lomekngeltengat er kid er tial beluulechad me tirkel betik a rengud er tir e omekngeltengat er kid er sel belurir a redeleb.
Sister Gong me a ngak a dirk milsang er a chelsel ospitar a kmal ungil lolchotel a ulsiseb er a telbiil. A ngeasek el chedam a kmal ulusbech er a beches el kidney. A telungalek er ngii a mlara klengitelreng, olsengerenger, me a nglunguuch me bol sebechel nguu a beches el kidney. Me sera lemei tekoi el kmo ng mla mo er ngii a kidney, ea bechil a dula el kmo, “A kureng me sel ta er a telungalek a di ungil beserir.” A ulsiseb er a telbiil, el ngara tekingel a Apostol Paulus, “a kngara ongelaod lobengkem loba tal klaumerang er kau me a ngak.”
Chelsel tial omerael er a klengar, e kid a mo remiid a klaumerang er kid er a Dios, eng di Ngii a diak el riid a klaumerang er ngii er kid. El di uaisei, a dichel a di omekellomes. Ngii a mengemedaol el er kid el mong me a lechub e ke de lueta el mo er aikel telbiil el rolel. Ng mengiil el melai er kid, luldimukl a “desal dirk cheroid.” Me sel domes loba ues er a klaumgerang el mo er a omelekl, chaibibeob, mecha lechub eng ngomech aikel bla deruul, e kid a mesa aikel medememk el chubechub me a melisiich er Ngii, tokubets aikel ringel er kid, me a ongarem, ma dirrekl el deureng er kid. Eng di kede blechoel mesibas mecha lechub e ke de ruebet, eng di a dolemolem el merael bedul Ngii, e Ngii a mo ngosukid, er a dersta el dauch.
Ongerung, a Babier er a Mormon a bleketakl sioning el sebeched el mo urrekodel er ngii kid a rulsiseb er a telbiil A Babier er a Mormon a yaksok el dongu el kirel keldibel er a rengelekel a Dios, el ngii a mla mulaoch el beches el telbiil. Sel donguiu er a Babier er a Mormon, a di kid me a dobengterir a rebebil, a dekekerei el menguiu er ngii me a le klou a ngered, eng sebeched loker er a Dios “loba blakereng, el meral ngarngii er a rengud, lultuil er a klaumerang er a Kristo,” e mo nguu nger er a Dios lokiu a klisichel Chedaol Reng el kmo a Babier er a Mormon a klemerang. Tia uldimukl er a nger el kmo a Jesus Kristo a Osobeled, me a Joseph Smith a Profet er a Oluut, e a Ikelesia er a Rubak a okedongall er a Ngklel—el Ikelesia er a Jesus Kristo er a Uriul-klebesei el Santo.
A Babier er a Mormon a mesaod el kirel a telbiil er a recheuodel me a chelechal taem el mo er a kemiu a rengelekel a Lehi, el ngelekir a reprofet.” A rucheliu a ngiluu a yaksok el kmo kemiu, a rengelekir, bo modengelii a ngor el uaia le ngara chutem er a chelsel a Babier er a Mormon. Tial ngor el molchesuar sel monguiu a ouchais el kmo kemiu a “ngalek er a telbiil” e a Jesus a ngii a Ungil Mengkerengiu.
A Babier er a Mormon a siotai er kid, el uaia tekingel a Alma el kmo, bom siseb “er a telbiil lobengkel [a Rubak], me luchul e [kid] bo dosiou e doltirakl a llechul, me ngii bo loitelii a Reng er ngii el [kired].” Sel sekum eng soad el mengodech el mo ungil—el uaia tal chad el melekoi el kmo, “ng mo diak de ngara klengitelreng e mo dmeu a rengud el ngara deureng” —e sei kid e kid obok el kirel a ulekrael, ngesou, me a klisiich. Sel dultuil a telbiil el mo era rengedel a Dios me a beluu er aklou a klaumerang er tir eng sebeched el ngmai a yaksok el klengeltengat le ngara chosiseklel a kristo—er chelechang.
A mla moluut el ngerachel er a priesthood el mo omekngeltengat er a rokui el Ngelekel a ongedei dauch er a ulsiseb er a telbiil. Chelechal taem, e a Johanes el Techolb me a Apostol Petrus, Jakobus, me a Johanes a mla mei el mui er a klebkall loderchelel a Dios el mle olluut er a ngerachel er a priesthood er Ngii. A priesthood er a Dios me a chedaol Urerel a remuul a deleuill er a beluulechad e oterekokl a deleuill er a telbiil el mo moak er a babeluades.
A priesthood a meral lomekngeltengat er a redirk dongesnges er tir el mo er a rengara debull— lomuchel er a domngakl me a domekngeltengat er a tolechoi el mo lmuut er a oterkeklel a debull. A klengeltengat er a priesthood a omekungil, mengelaod, e olisechakl. A tal chedam a ngilasech a rengul er a ngelekel sechal e a klausubes a uleak kuriul er ngika el chedam er a lebsa ngelekel a klengeltengat er a priesthood. A kuk di chimol chedal a ikelsia er a telungalek er ngii, el ngeasek el dil a ulemededenger er a beltkil a rengul a Dios el kirel mol muut er a taem lengiluu a klengeltengat er a priesthood. Meliuekl er a beluulechad, e a rechetengakl el patriarch a mengemdokl er tir el kirel a klengeltengat er a petriarch. Me a patriarch sel lengai chimal locha er a bebul a bdelum, e ngii omelchesiu e ochotii a beltkil a rengul a Dios el kirem. Ngouchais el kirel a ruchelem er a chelsel a blai er a Israel. E dmung aikel klengeltengat el mla er a Rubak. A kmal bekudasou, el bechil a patriarch a ulechais er ngak el kmo ng mekera telungalek er ngii e siotai er a Chedaol Reng, sel sekum a demerir a mengedmokl a klengeltengat er a patriarch.
Ulebongel, e a klengeltengat er a ulsiseb er a telbiil a mei sel doltirakl er a profet er a Rubak e dengara deureng loltirakl a telbiil, luldimukl a telbiil er a chebechiil. A chebechiil er a telbiil a kmal mo mesisiich a klisichel e diak a ulebengelel sel dolilt er a bek el sils lodeuir a rengul a bechid me a telungalek er kid ruchei er kid. Sel sekum a “ngak” a mo “kid,” e ke de dmak el mukeroul. Ke de dmak el mo mukeroul, e dmak el. Me sel domekngeltengat er a ta me a tang er a chelsel a klengar kid, e ke de mo metik a urunguled me a deureng er kid el klikiid er chelechal taem me a diak a ulebengelel.
Ng uaisei el kakerous a teletael, me sel doruul aikel rokui el sebeched, tkul rebab el sebeched, e meral lolengit e osiik a ngeso er Ngii, e a Rubak a mo omekrael er kid, er sel Temel me a teletelel, lokiu a Chedaol Reng.} A telbiil er a chebechiil a merengenged lokiu tirkel melilit el meruul er ngii—omeklatk er a Dios e kid el mengull er a omelilit me a klengeltengat er a Ngelseuil sel de dak el losiik er ngii.
A rdechel a ulsiseb er a telbiil er a chelsel a rokui el telcheroll a dolchesuar er a rekeblid me a chelsel a rengud. Msall e kuchotii okesiu lousbech er ngak.
Me se er a Sister Gong me a ngak er a ki mkasisiik e ki bocha mosaod er a mo kaubuch, e ak silubii a teletael er a omelilt me a uldasou. Ng mle telkib el taem, e ki ble mkiei er a teblo kakerous el beluu el ngara tebelong el kakerous el basio. Tiaikid a uchul e ak bleketakl louchais el kmo ak ngiluu a PhD er ngak er a omesuub el kirel a deluill er a beluu.
Sera kuker el kmo, “Chedam er a Babeluades, ng locha di ungil a bok bechil a Susan?” Ak milchesuar a budech. Eng di tiaikid e ak silubii sel doluluuch loba blakereng, “Chedam er a Babeluades, ng kmal betik a renguk er a Susan e soak el mo bechil. Ak yaksok el kmo a kot el mo ungil buch e chedam”—e sel kngara omeruul e kungil melilt, e a mesisiich el chedaol ocholt a mlei.
Chelecha er a reksi er a telungalek er a Gong me a Lindsay er a FamilySearch, cheldecheduch, me a siasing a ngosukemam e omak aikel mla duubech er a klengar el tekoi er a betok el telcheroll lulsibeb er a telbiil. E a denguu er kemam, e a rekuoll luchelam a uldimukl:
A delal a delal a delal a Alice Blauer Bangerter, el di mle ta tedei el chad a melekoi a chebechiil er ngii er a chelsel a tal sils, a ulengit er a bechil me relii a ongesimel a mesil er ngii el meruul a bata me el sebechel meruul a bata, e lorasm, e longuiu er a osisiu el taem.
A demal a demal a demal a Loy Kuei Char a uleltour er a rengelekel er a ulekel me a sesei el kloklir e ngara donki el merael bebul a ked er a Klou el beluu er a Hawaii. Telcheroll er a telungalek er a Cher lokiu a blakerneg me a duchelreng a mla omekngeltengat er a telungalek er kemam er chelechal sils.
A delal a delal a Alice Powell Lindsay a ulemekeroul er a reteim el ngalek er a lemad a bechil me a klou el ngelekel sechal el di tela el klebesei a delongelir. A mla melakl dil el okeua me a euid a rekil, er a Gram a ulemekeroul er a rengelekel loba belitk el reng el mlara remeredel me a chad er a ikelesia. Chelsel aikel betok el rak, e a Gram a tilbir el mo er a Rubak el kmo alsekum e Ngii a ngoseuir, eng diak el luut loumondai. A Rubak a ngilseuir. Ng dimlak loumondai.
Rodam me a rodos, ngokiu a sioning er a Chedaol Reng, e a rokui el ungil tekoi me a diak a ulebengelel a ultuil er a ngar e meral Dios, el Diak a Ulebengelel el Chedam, me a Ngelekel, el Jesus Kristo, me a Tngakireng er Ngii. A Osobeled el Jesus Kristo, a ngii a Sebechekled er a beches el telbiil. Sel douchais el kirel a Jesus Kristo a moktek er a telbiil er a Babier er a Mormon. Ngokiu a yaksok me a telbiil, e a moktek er a mla moluut el ngerachel er a priesthood er a Dios a mo omekngeltengat er a rokui el ngelekel a Dios, luldimukl a chebechiil er a telbiil, bek el telcheroll er a telungalek, me a klengeltengat el mo er a dersta el chad.
A Osobeled a dilu el kmo, Ngak a Alpha e Omega, el Kristo el Rubak, ngak a ngii, el uchelel e ulebengelel, el Osobelel a beluulechad.
Me ngulbengked er a uchelel, e Ngii obengked, er a ikel rokui el telbiil, el mo er a ulebongel. A kuchais el ngara chedaol ngklel a Jesus Kristo, amen.