Ke Metik a Deureng sel Momerek er a Ebangkelio
Ngar ngii a betik a rengul el Demad el ngara Babeluades el ngii a mengiil er kid el mo obult el mo er Ngii el mo omekngeltengat er a klengar kid me a klengar tirkel tir a meliuekl er kid.
Ta er a kot el soak el chelitakl er a primary a omuchel lobengkel aikal tekoi:
Ng meral beot e klebokel el cheldechedal a klemerang el kid a oumerang er ngii!
Sel de chedal a Ikelesia er a Jesus Kristo er a Uriul-klebesei el Santo, e ke de medengei el kmo ke de techang. Ke de medengei el kmo a “Dios a Demal a delbenged. Kid a … Ngelekel, e Ngii a betik a rengul er kid. Ke de mle kiei [Lobengkel er a babeluades] er a uchei er a [demei] er a beluulechad.”
Ke de medengelii a moktek a Dios. Ke de mlar sei lobengekel sel Ngii a ouchais er ngii. Sel “cherungel el moktek er a Demad el ngara Babeluades-Urelel me a klebkelel-a rulii meng sebechel a desrta er kid el ngmai a deureng er a rokui el klengeltengat er Ngii. Ng … mla meskid sel cherungel el uldasou el mo sebeched er rulii a moktek er Ngii. Kede mle medengelii e kilengei er tial uldasou … er a deureng … mo suobel, me a … diak a ulebengelel klengar” ruchei er a demei er a beluulechad.
“Jesus Kristo a chedul a moktek er a Dios. Ngokiu a Tngakireng er Ngii, a Jesus Kristo a kildmeklii sel moktek er a Demal e rirelii el mo sebechal a desrta er kid el oldeu ra diak el mad me a suobel. Satan, me a lechub eng diabelong, a cherreuel tial moktek er a Dios” e di mle uaisei er a uchelel.
“Mimokl el omelilit, me a lechub eng techall el mo melilt, a tara kot el lungil el sengk er a Dios el mo er Rengelekel. … Ng kired el mo melilt el kmo ke de mo oltirakl er a Jesus Kristo malechub e kede oltirakl er a Diabelong.”
Aikang a beot el klemerang el sebeched el lomerk el mo er a rebebil.
Msall e kuchaisa tekoi le dilung a delak el kirel a beot el klemerang el mimokl losiik a techall er a cheldecheduch e omtab aikal techall.
Betok el rak er a mla memong, a delak a lueta el mo er a Argentina el mo oldingel er a ochedak el sechal. Le delak a di mlak el soal suebek, ngulengit er a tar tirkal ngelekek el sechal mel bsang a omekngeltengat er ngii er a omengelaod me a selbechakl. Ng mlo melchesuar el mo omekngeltengat er a delal mechas loba tokubets el omengetikaik me a ulekrael el mla er a Chedaol Reng el mo melisiich e remutech a rengrir tirkel oureng el mo mesuub er a ebangkelio.
Ngara skozio er a Salt Lake, a delak me a ochedak el sechal a ulsiuekl a euid a rekil el redil el ngii a lueta el meremei el mle ouski lobengkel a telungalek er ngii. Me se er a rechad er a blil a mo melechesuar el kmo ng mla mo meketeket el mengedecheduch er a delak me a ochedak el sechal e te mililit el me teloi er lobengkel a ngelkir el redil. Te uluuchais a ngklir me a ngelekir el redil el Eduardo me a Maria Susana me a Giada Pol. Ng mla er ngii a ungil e mekeald el lomech er tial lungil el telungalek.
Tirkal teblong el telungalek a mle semeriar el dmak el merael el ngara osisiu el skoki el mo er Buenos Aires, Argentina. Ma lolemolem a cheldechederir, a delak a mlo medengei el sel taem el kmo, tir a dirkak a tal rengesii el kirel tial mla moluut el Ikelesia er a Jesus Kristo.
Ta er a kot el ker el Susana a uleker ngii a mle “Sebechem el louchais el kirel sel klebokel el museum el ngar ngii sel kolt el bleob el chaus el nga er a bebul?”
A delak a silodii sel klebokel el basio a diak el museum eng di bai templo er a Rubak el ngii a sebeched el meruul a telbiil lobengkel a Dios meng mo sebeched el lemuut el mo kiei el Lobengkel er a ta er a klebesei. Susanna a uluuchais er a delak el kmo a uchei er tial omerolir el mo er a Salt Lake, eng miluluuch el kirel a kmu el ngerang el so smisichii a delbengel.
Te mel tial omerael, a delak a uluuchais er tial di mle beot eng di ngmesisiich el klaumerang er ngii er a ebangkelio e mengemdaol er a Susana el mo osiik er remisionari er a belual. Susana a uleker er a delak, “Ak mekerang e metik er tir?”
Me a delak a ulenger, “Ng diak el sebechem el metom er tir; te locha tebelong el ngeasek el sechal el loubail a becheleleu el bail, me a lechub e te tebelong el ngeask el redil el lousaiang, e te blechoel el ngar ngii a tag er a bilir el lolecholt er a ngklir me a dirrek el Ikelesia er a Jesus Kristo er Uriul-klebesei el Santo.’”
Tirkal telungalek a mle kaitutechei a dengua er tir e melmesumech er a skozio er a Buenos Aires. Susana, el sei kid el taem a kmal lungil el sechelik, a mlo betok el taem el louchais er ngak el kmo ng mlo mekngit a rengul se er a le becherei a delak er a aiport. Ng dilu, “A delam a mle medidiich.” Ng diak el sebechek el smodii, ng ding mla er ngii a llomes el kirel el ngii a dimlak el sebechel el mo ikrii.”
Me se ra Susana er al lueta el mo er a belual, ngii me ngelekel el redil, Giada, a uluuchais er tial blekeradel el mo er a delal a Susana, el ngii a kiei el kmeid er a blirir. Me sera lomekall, e a Susana a milsterir a teru el ngeasek el sechal el merael er a real loubail aikel bael el ngii a delak a milsaod. Meng mle stob er a mlil er a belngel a rael, e tilobed, e oker tirkal terung el ngeaskel e sechal, “Ngar ngii techall el kemiu a chad era Ikelesia er a Jesus Kristo?”
Te ulenger, “Ochoi.”
“Misionari?” nguleker.
Til terung a ulenger, “Ochoi, kemam a tir!”
Meng dula, “Bemtuu er a mlik; kemiu a mo er a blik el mo olisechakl er ngak.”
Uriul er a eru el buil , ea Maria Susan a miltecholb. A ngelekel el redil, Giada, meng direkl el miltecholb ser a lebol etiu a rekil. Aki dirk oureor er a Eduardo, el ngii a betik a rengmam er ngii.
Sei kid el taem, e a Susana a mlo kot el ungil misionari el kudengelii. Ngii a di ua rengelekel a Mosiah el sechal, lobetiterir a betok el reng el mo er a Kristo.
Chelsel a ta er ikel cheldechedecham, Ak kuleker er ngii, “Ngera bertelem? Ke mekerang e omerek er a ebangkelio el mo er a rebebil?”
Ng uluuchais er ngak el kmo, “Ng kmal di beot.” Bek el sils er a uchei er ak tobed er a blik, ak meluluuch el mo er a Demad el ngara Babeluades el olengit me lomekrael er ngak el mo er a chad el ngii a ousbech er a ebangkelio er a klengar tir. Sel bebil e ak nguu a Babie er a Mormo el mo omerek el lobengterir ma lechub a meskii a kekerei el babier el mla er a remisionari—e sel kumuchel el mengedecheduch er a chad e ak oker er tir kmo te mla rongeseii el kirel a Ikelesia.”
Susana a dirrek el dilung, “Bebil er a taem e ak di klikmechur sel kungiil er a train. A ta er a sils a chad a ulemes er ngak e oker,’ Ke klikmechur el kirel a ngerang?’ Ng kora rirelak me ak kilbetekl.
Me ak kulenger, “Ak klikmechur eleng ngungil a renguk!”
“Meng dilu, ‘E ngerang ungil a rengum el kirel?’
“A kulenger, ‘Ngak a chedal a Ikelesia er a Jesus Kristo er a Uriul-klebesei el Santo, e sei a rulak el mo ungil a renguk. Ng mla ta el mrengesii?”
Me se er a ledu ek mo ng diak, ng mileskii a babier e siotail er ngii el mo er a ongdibel er a merael mei el Sandei. Tial merael mei el Sandei, eng mo mengemdaol er ngii er a medal a tuangel.
A President Dallin H. Oaks a ulsisechakl:
“Ngarngii a kldei el tekoi el rokui el chedal a ikelesia a sebechir meruul el mo omerk er a ebangkelio. …
“Kot, ng sebeched el rokui el meluluuch el kirel a klemeriar reng el molngeseu er tial klou a belkul tebedechel a ureor er a mo suobel. …
“Ongerung, ng sebeched el loltirakl a llach. … Oumerang el chad er a ikelesia a blechoel loba Chedaol Reng er a Osobel … el lobengterir el lomekarel er tir sel losiik el mo dechelel tial ungil el ureor el lomerek er tial mla moluut el ebangkelio er a Jesus Kristo.
Ongedei, ng sebeched el meluluuch lolengit a ulekrael el kid a sebeched el meruul … lomerk er a ebangkelio el mora rebebil … [e] e meluluuch el mo oba blakelreng el mo oltirakl aika el ulekrael.”
Rodam, rodos, rengalek, me a rengeasek, ng sebeched el di mo uai a sechelik er a Susana e omerek er a ebangkelio el mo er a rebebil? Ng sebecehd el siotai er a sechelid el ngii a diak el osisiu a klaumerang er ngii er kid el mo er ikelesia lobengked er a Sandei? Malechub eng locha sebeched el merous er a Babier er a Mormon lobengkel a chedad me a lechub eng sechelid? Ng sebeched el olengeseu er a rebebil el mo osiik er a rechederir er a FamilySearch malechub e ke de omerek lobengterir a rebebil er a debla desuub er tial sandei el di bla dosuub Mei, Moltirakl er Ngak? Ng sebeched el mo uaia Osobeled el Jesus Kristo lomerk el mora rebebil sel ngii a meskid a deureng er a klengar kid? A nger elmora ikal rokui el ker a oi! Ng sebeched el kudmeklii!
Chelsel chedaol llechukl e kede menguiu el kirir a rechad er a Ikelesia er a Jesus Kristo el modurokl el mo ‘oureor er a beluulechad lolsobel er a rechad’ (mesa Doctrine and Covenants 138:56). Tial ureor er a mo suobel a uldimukl er a rechedal a ikelesia el meruul a urerel a misionari, urrekokel ra rulebult, olngeseu er tirkel diak lebo ra ikelesia, templo me a ureor er a reksi er a telungalek, me a olsisechakl er a ebangkelio.”
Resechelik, a Rubak a ousbech er kid el mo mengedibel ra Israel. Ngii a mla yaksok er kid er a chelsel a Doctrine and Covenants el kmo ng diak a tar kemiu a milatk er a uchei el kmo ngera kom mo dmung, eng di ko mo reked aikal tekoi er a klengar er a udesuiu, e ngii a mo meskemiu er a chesel a taem a ikel ulsbechall rl mora bek el chad.”
Dechelel, Ngii a mla yaksok er kid:
“Me a omoureor er a rokui el sils er kau el kirel a ngebetel a kngterir tirkal chad, e mnguu, a di chimol chad el mo suobel er ngak, eng kol uangerang a deuil a rengum lobengkel er a rengedel a Demak!
E a chelechang, aslekum ke nguu a deureng le kau el ngiluu a chimo el chad el mera Rengedel a Demak, ng kol mo uangerang a deureng er kau alskeum e ke ngoititerir a rebetok el chad el mei er ngak!
Sel chelitakl er a primary el ngak a ulemuchel er ngii a mo merek loba tial ungil el llechukl:
A kuuchais el kmo aikal tekoi a klemerang e kid a ngar ngii a betik a rengul el Demad el ngara Babeluades, el ngii a mengiil er kid el mo obult el mo er Ngii el mo omekngeltengat er a klengar kid me a remeliuekl er kid. Mei el bor ngii a klemeriar er a rengud el mo nguu a rodam me a rodos er kid el mo er a Kristo el ngii a nglunguchek el ngara ngklel a Jesus Kristo, amen.