Ongerung el Ngarbab el Llach
Sel kot el ngarbab el deureng er kid a mei lokiu a ngelseuid el mo er a rodam me a rodos er kid.
Rodam me a rodos er ngak, ko mesulang er a ikel rokui el moruul lolngeseu el mengidb er a Israel er a ikal erul beluu, e melisiich a telungalek er kemiu, e omekngeltengat a klengar er a rengesool. Ko mesulang el kiei el meral loltirakl er a Jesus Kristo. Ko medengei e somiu loltirakl aikel erul ngarbab el Llechul, el mo oubeltikereng er a Dios me a rengara bita er kemiu el chad.
Chelsel aika el mereko lelolem el buil, e a Sister Nelson me a ngak a mla kebetech lobengterir a retelael el Santo er a ki momais er a chelsel a Central me a South America, me a iuns er a South Pacific, me a bebil er a beluu er a Merikel. Me sel ki momais, e ngurungulam el mo melisiich a klaumera er kemiu me bol mechisois. Eng di a luut er kemam e a ki bai mesisiich a klaumera er kemam lokiu a rechedal a ikelesia me a resechelei el ki mkaseues. Msall e kuchais a kldei dirk dilubech el teletael er a ki momais?
Sera Ongeim el buil, e a Sister Nelson me a ngak a ulebengkel a Elder Gerrit W. me a Sister Susan Gong el mo er a beluu er a South Pacific. Sera ki mngara Auckland New Zealand, eng mla er ngii a techellam el mo kebetech me a re Muslim er a teblo el Christchurch, er a New Zealand, el erul buil ruchei, e tirkal chad a miltemall er a remekngit el chad lulemoes er tir.
Aki ulechotii omeledkam el kirir tirkal lodam er a tara klechelid e silsichii a blakereng er kemam el kirel a iilmokl er a tekoi er a klechelid.
Aki dirrek luldars a ngesou er a chim me a udoud el mo lmuut lomekedechor aikel ikelesia er tir. A mitelengam lobengterir tirkal mengeteklel a klechelid er a Muslim a mle mui er a ungil lolchotel a klodam.
Sera Ongeai el buil, e a Elder Quentin L. me a Sister Mary Cook, me a Sister Nelson me a ngak a mlo kebetech lobengterir a rechad er a Buenos Aires, Argentina—el betok er tir a diak el chedal a klechelid er kid—el klengar tir a mla mengodech el ikal wheelchair el mlodars lokiu a Latter-day Saint Charities a uchul. Aki ulemelchesiu lungil a rengmam er a louchais el kirel a deureng me a omereng el saul er a ikal beches locherir.
A ongedei el mekreos el teletael a dirk dilubech er a sesei el sandei er a memong er a Salt Lake City. Ng mlei el mlara tokubets el babier el kngiluu er a tansiobi er ngak el mlara ngeasek el dil el kuleker ngii el Mary—el teruich me a eua rekil.
A Mary a milluches el kirel a tekoi el ki mosisiu er ngii: “Ng teruich a rengelekem. Me kemam meng terucih a rengelekam. Ke melekoi a tekoi er a Mandarin. Teuid er tirkal ngelekam, luldimukl er ngak, a mirrodel er a rechad er a Sina, me a Mandarin a kot lomelekoi el ki mousbech er ngii. Kau a toktang er a hart. A merrengek a mla mo eru le bo er a [botk] er a hart. Kau a soam a eru el sikang el temel a ikelesia. Kemam meng somam a erul sikang el temel a ikelesia. Ngungil chiklem omongitakl. A ochedak meng dirrek el kmal ungil chiklel. Ng mikou el uaia ngak.”
A tekingel a Mary a kmal rirtechii a renguk, el diak di lochotii a klisichel a rengul ng dirrek el uldersel a delal me a demal.
A Ruriul-klebesei el Santo, lobengterir a rebebil er a roltirakl er a Jesus Kristo, a blechoel losiik a techall lolngeseu, mesebechakl, e oubeltikereng el mo er a rebebil. Tirkel tir a blak a rengrir el mo okedongall el chedal a Rubak a “kongei el mo otekau a berraod er a ta me a tang, … e lmangel lobengterir a rengar klengitelreng; … e [dirrek] el mengelaod er a rousbech a chelmongel.”
Te meral losiik el mo oltirakl er sel kot me a ongerung el ngarbab el lalch. Sel betik a rengud er a Dios loba rengud el rokir, e Ngii a mult a rengud el mo bedul a rebebil er a chelsel a klebokel, e klikiid el teletael.
Ng diak el sebeched el mechur a iidisel omesiou el Ruriul-klebesei el Santo odars el meliuekl er a belulechad er a bek el rak, eng di sebeched el mechur aikel klungiaol el chelchad er a Ikelesia a remuul lomekngeltengat er a rsechal me a redil—mekekerei el sechal me a redil—el tir ousbech a ngesou.
A ngesou er a Ikelesia a ulemuchel er a sera 1984. A cherrengelel a Ikelesia a mocha olsengerenger e odars a udoud el mo olngeseu er tirkel miltemall a kloklir er tial bosech er a beluu er a Africa. A rechedal a Ikelesia a childelii a $6.4 milion er a di chelsel a tal sils er a sengerenger.
Sel taem e a-Elder M. Russell Ballard me a Brother Glenn L. Pace a mlodurch el mo er a Ethiopia el mo omes el uase aikal udoud ng mo uangera usbechellel. Tial teletael a kildmeklii a uchelel sel ngii a domekedong er ngii el kmo Latter-day Saint Charities.
Seikid el taem el mei er chelechang, e a Latter-day Saint Charities a mla odars a betok er a erul billion ludoud lolngeseu er tirkel ngesool er a beluulechad el rokir. Tial ngesou a mo er a rengesool el diak el iior er a kmo te chad er a Ikelesia ng diak, belurir, iiro er tir, sechal te redil, a lechub, a deruchellir.
Ng diak dil sei el merkong. Sel mo ngosuterir a rechedal a Ikelesia er a Rubak el tir a ngara chelebuul, e kid a semeriar e kiei loltirakl er a chuodel llach er a olsengerenger. Kede olsengerenger lolngeseu er a rebebil el tir olsengereger. Tal sils er a chelsel a tal buil, eng diak domengur e sola odars a cheral aikel kall (sebechel mo klou) el mo olngeseu er a rengesool.
Ng diak kubes er sel kot lomerollek el mo er a West Africa er a 1986. Betok el Santo a mlei er tial miting. Meng betok er tir a diak a kmal ungil kloklir, eng di te betok a mlei el bliull er a ungil becheleleu el bail.
A kuleker er a merredel er a stake el kmo ng mekera omekerreu er a rechad el tir a diak a kmal ngera er tir. Ng ulenger el kmo a rebisop er tir a ungil medengelteir tirkal chad. Alsekum eng sebechir el smiik a kelel a erul blengur er a tal sils, eng diak a ngesou el mo er tir. A blo el lsebechir a cheral a tal blengur me a lak—luldimukl a ngesou er a telungalek—e a rebisop a mesterir a kall, el tuobed er a udoud er a uldars er a sengerenger. E sola dilchelii er tiakid el klemera el tekoi: a uldersir er a sengerenger a blechoel lengelakl er a ikel ludouid lechoit er a kall. Aikel mo derengel a uldars er a sengerenger a mlodurokl el mo er a rechad er a bebil er a basio el tir a kmal lousbech. Tirkal mesisiich el Santo er a Africa a ulsisecheklak a tara suobel el kirel a klisichel a llach me a reng a dolsengerenger.
Kid el chedal a Ikelesia, a kired lomelchesiu chubteterir tirkel ngara ringel. Kid el sechal me a redil ngelekel a Dios, e kede odam e odos el rokui. Kede oltirakl a tekoi el ngara Cheuodel Renged: “A chimam lemodars el mo er a odam er kau, a rengesool, me a remechebuul.”
Kede dirrek el melasm loltirakl osischeklel a Rubak el Jesus Kristo el llechukl er a Mateus 25:
“Ak mle songerenger, e ke milkelak: mle meched a renguk, e ke milngelmak: ak mle ngodech el chad, e ke ngilikak:
“Di meau, e ke mililak: silecher, e kuldngelak. …
“… Sel bla mrelii el mora ta er tirikal kmal ngariou el chedak, e ke mla rulii el mei er ngak.”
Ak di mo dmung a bebil er a okesiu el kmo ng mekera Ikelesia oltirakl aika el osischeklel Osobel.
A ngesou el kirel a sebecheklel a sengerenger, e a Ikelesia a ngarngii a dart me a lluich me a kleuang el soko er a kall er a rebisop er a beluulechad el rokir. Ngokiu tir, eng kmeed el eual dart el telael el kall a tuobed er a bek el rak el mo er a remechebuul chad. Aikel basio el kuk diak a soko er a kall er ngii, e a rebisop me a remerredel a branch a ousbech a uldars er a sengerenger er a Ikelesia lomechar a kall me a ikel lousbech a remechebuul chedal a ikelesia.
Eng di, a teletael er a klengerenger a chengelakl er sel ultekellel a Ikelesia. Ng di merael mo obdois er a beluulechad. A dirk tilobed el report er a United Nations a kmo a iidisir a rechad lolngesonges er a kall er a beluulechad a mla chengelakl er a 820 el million—ng kmeed el tang er a chelsir a retetiu el chad er a beluulechad.
Kede mechelaol er ngii el tekoi! Aki mereng a suliu er a uldersiu. Ko mesulang er a meral ngara rengmiu el ngesou, el million el chad er a beluulechad el rokir a ngmai aikel kmal usbechall el rua kall, bail, ulderuul er a chelsel a kedeb el taem, wheelchairs, kar, ungil ralm, me a lmuut el bebil.
Betok el secher er a beluuelchad a duubech el kikiongel ralm a uchul. Me lmuut er chelechal sils, e a ngesou er a Ikelesia a mla ngosuterir a rechad er a ungil ralm er a chelsel a dart el basio el ngara chelsel a okeuid me a kllolem el beluu.
A ureor el mla er ngii er a beluu er a Luputa, el ngara Democratic Republic er a Congo, a kmal ungil okesiu. Te obdois er a dart el telael chad, e tial beluu a diak a rolel a ralm er ngii. A rechad er a beluu a kirir merael er a kemanget lomerael losiik a rolel a ralm. A ralm er a omeuachel a le biltik er ngii el teruich me a eai el mile (29 km) a cherridel, eng di rechad er a beluu a diak el sebechir ngmai a ralm er a di mitil a taem.
A rolngeseu el misionari er kid er a rengesii tial teletael, e te mlo dmak loureor lobengterir a remengeteklir er a Luputa e siliik a klekedall e riruul a baeb er a ralm el mo er a beluu. A rechad er a Luputa ulureor ledei el rak el milengiis el kmeed el tal metor a delechel chibedbad me a oreomel. Ngokiu a kltalreng le dilak loureor, eng merema sils er a deureng el mechelins, e ungil ralm a mlo sebechel mo er a rechad er a beluu el rokui.
A Ikelesia dirrek lolngeseu er a remodik er a delengcheklir, a lultok er a beluu, ngii di el duubech el kerior, a lechub a lodechelakl el klechelid a uchul. Ng kmeed el okeuid el million el chad a mla modik er a delengcheklir.
Sera rak ra 2018, e a Ikelesia ultobed a klekedall el mo er a rediak a delengcheklir el chad er a chelsel a okeim me a kllolem el beluu. Osisisu, betok el chedal a Ikelesia chemoit a temir lolngeseu er a rechad el tir a melukl el mo er a beches el basio. Aki mereng a sulir a rebek el chad lolngeseu er tirkel tir a melasm lomekedechor a beches el delengcheklir.
Ngokiu a blekorurau el ngesou el mo er a Deseret Industries er a Beluu er a Merikel, eng kmeed el million el bond er a bail a mengai e mekedmokl er a bek el rak. Ng uaisei el rebisop ousbech er tial mo olngeseu er a remechebuul chedal a ikelesia, eng di a klou er ngii a modars el mo er a bebil er a chelechad lolngeseu el remous aikal klalou er a beluulechad el rokir.
Tial mlo merek el rak, e a Ikelesia uldars a klekedall er a mad el mo er a betok er a edei el dart el telael el chad er a chelsel a okedei me a kleim el beluu, me a klekedellir a retolechoi el mo er a rechedil me a retolechoi er a chelsel okedei me a kltiu el beluu, me a wheelchairs el mo er a okeim el telael chad el kiei er a kakerous el beluu.
A Ikelesia a lodengelii a rechad el tara kot el mereched lodars a ngesou sel dubech a kerior. Nguldimukl ruchei a lemei a ichadedaob, e a remengeteklel a Ikelesia me a rechad loureor er a ikel miltemall el basio a mengedmokl el kirel a ngesou me a rechad el mo olngeseu er tirkel metemall a kloklir.
Tial mlo merek el rak, e a Ikelesia a ulengeseu a kmeed el dart el basio er a beluulechad, lolngeseu er a remetemall er a ichadedaod, seseb, ieleb, desiu, me a bebil er a kerior. A le sebechir, e a rechedal a Ikelesia er kid loubail aikel bibrurk el bail llechukl el kmo Chim Lolngeseu a obdois lolngeseu er tirkel metemall er a kerior. Tiaikid el teletael er a omesiou, el mocholt er a rebetok er kemiu a ngii a kmal techel a odingel.
Rodam me a rodos er ngak, aikal blak basech a kmal di kesai lolchotel a tekoi er a ngesou el modars lokiu a Ikelesia er a Jesus Kristo er a Uriul-klebesei el Santo. E kemiu tirkel remuul aika el rokui el di mo sebechel. Ngokiu a ungil lokesiu er a klengar kemiu, me a bekerurau el rengmiu, me a chimomiu lolngeseu, eng meral tekoi el betok el basio me a remengeteklel a kabelment a chemat omerelliu.
Sera bo Kurredel er a Ikelesia, eng mechas a renguk el kmo te tela el merredel, me a re prime minister, me a re ambassador a mla oureng a sulek el kirel a ngesou el kid odars el mo er a rechederir. E tir a dirrek lochotii omereng el saul er a klisiich el rechedal a ikelesia er kid ochotii a blakereng er tir el kirel a belurir, el ungil chad er a buai.
Ng dirrek el mechas a renguk er a remengeteklel a beluulechad el me oldingel er a First Presidency a ochotii a urungulir me a Ikelesia bol mechederoder er a rekebelurir. E le ngerang? Le tir el medengei el kmo a Ruriul-klebesei el Santo a olngeseu el meleketek a mesisiich el telungalek me a beluu, el uchul a ungil klengar el mo er a rebebil er a ngii di el ker le kiei er ngii.
Ng diak el iior er a kmo ng ker sel domekedong er ngii el blid, le rechedal a Ikelesia a mui el mengeluolou a klechedam er a Dios me a klodam er a rechad. Seikid a uchul, e sel ngarbab el deureng er kid a mei sel dolngeseu er a rodam me a rodos er kid, el diak el iior er a dengarngii el basio er tial beluulechad.
A ngesou el dodars el mo er a rebebil—el blak a rengud lomekerreu er a rebebil ruchei er kid a ngii—a deureng el mei er kid. Oumesingd, ek dechelii el kmo, sel desal meriked el betok a doruul e dirrek el ngoikid lotebedid er sel lungil dengarngii.. Adoltirakl er tial ongeru el ngarbab el llach a ngii a kiis er a meral loltirakl er a Jesus Kristo.
Rodam me a rodos er ngak, kemiu a meral kiei el redechel okesiu er a otireklel osischeklel a Jesus Kristo. AK mereng a suliu! Ng betik a renguk er kemiu!
Ak medengei el kmo a Dios a ngar. A Jesus a Kristo. A Ikelesia er Ngii a mla moluut er chelechal uriul klebesei el mo mengedmokl er sel chedaol moktek er ngii. Aika kdung el ngara ngklel a Jesus Kristo, amen.