Nguu a Kerus er Kid
A mnguu a kerus e rkau e oltirakl er a Osobel eng belkul a kmo ke melemolem el ngara klaumerang er a Rubak e diak bo mechesang e ra tekingel a beluulechad.
Rodam me a Rodos, ke de mla ngmai a ungil el osisechakl er a remengetekled er aika el mla mo merek el eru el klebesei. Ak olecholt er a klaumerang er ngak el mo er kau el uase alsekum e kede blak a rengud el mo meruul aika el omekllomes el ngara belsechel el osisechakl er a klengar er kid, a Rubak, el okiu a kerasia er Ngii, a mo olengeseu er derta er kid el mo chellungel er a kerus er kid e remuul a chelngelled el mo kebekakl.
Chelsel a taem el ngara basio er a Caesarea Philippi, e a Osobel a ulecholt er a roltirakl er Ngii aikel ngii a bol charm el kirel er a chimorir a re meklou, rengar bab el prist, me a re meluches a rekord er a Jerusalem. Ng mle bleketakl el olsisechakl er tir el kirel a Kodellel me a kmal klebeokel el Okisel er a Kodall. Tiaikid el taem, e roltirakl er Ngii a dimlak el mui medengelii a chedaol Urerel er a beluulechad. A Peter, er a lerenges aika el bla el dung a Osobel, e ng mocha nguu el mora teliang e oklii, el melekoi, “Bo el cheroid er kau, e Rubak: tiang a diak el be er kau.”
Sel mo ngosouir tirka el oltirakl er Ngii el mo medengei el kmo blak el reng el kirel a Urerel a uldimukl er ngii a kengei me a klechuarm, a Osobel a mocha omeketakl:
“Alsekum a ngii di el chad a mo oltirakl er ngak, e bo likrii a klechad er ngii, e le nguu a kerus er ngii, e bo loltirakl er ngak.
“Ele a ngidi el ta el chad el mo olsobel er a klengar er ngii a mo oridii: e a oridii a klengar er ngii a mo okiu ngak e mo metik er ngii.
“Ngera ng mo kerkerngel a chad, a lsekum e ng mo nguu tia el beluulechad el rokir, e oridii a delbengel? me a lechub e ng ngera bo el kaitutechei er ngii el kirel a delbengel?”
Okiu tia el omelekingel, e a Osobel a smilsichii a omesodel el kmo tirke el tir a kongei el mo oltirakl er Ngii a kirir el mo ikrii a klechad er tir e mo omeksebech aike el kmal soal a reng, teletelel omengelir, sorir el meruul el tekoi, mengam a rengrir er a rokui, uldimukl er ngii tia el klechad alsekum eng kirel, el mui el oltirakl er a soal a Chedam—el di uai Ngii. Tia a uaisei, el klemerang, a cheral el mo mengkad er a mo osebelel a delbenged. A Jesus a mla er ngii er a rengul e milngaibebelau el ousbech er a olechotel a kerus el olengeseu er a roltirakl er Ngii el mo ungil medengelii a kmo ngera el omelenget me a blak el reng el mora moktek er a Rubak ngerang a meral belkul. A olengchelel a kerus a ble lodengelii a roltirakl er remesiou Ngii me a rechad er a beluu er a Roman le rechad er a Roman a ulerrimel er a rechad el mo okodall el di tir el chellungel er a kerus er tir el mo er sel basio el bo lokodall a mo duobech er ngii.
Ng di mlo uriul er a Okisel Osobel er kodall e a uldesuir a ulebok el mo medengei a rokui el mla meluches el Kirel me a ngera mo usbechall er se el taem el mong.
Chelsel a osisiu el teletael, rodam me a rodos, kired el mok a uldesued me rengud el mo uchul eng mo sebeched el lungil el medengelii belkul a denguu a kerus el mei er kid e oltirakl er Ngii. Kede suubii er a chedaol llechul el kmo tirke el tir a oureng el mo nguu a kerus a betik a rengrir er a Jesus Kristo er a teletael el tir a mo kotouar er a rokui el diak el klikiid me a delboes el tekoi er a beluulechad e mo oltirakl a Llechul.
Sel moktek er kid el mo melubet aike el ngii a omtok a soal a Dios e mo melenget aike el rokui el ngii a olengit er kid el meruul e mo oltirakl a Osisecheklel a mo ngosukid el mo outekangel er a rael er a ebangkelio er a Jesus Kristo—e osisiu el de chelbangel a ringel, chelitechetul a reng, me a ongetikaik er a buai me a llemesel a beluulechad el ngii a omtok a Osisecheklel.
Ua okesiu, tirke el dirkak el betik er a diak a ulebengelel el chelmengir e locha mo sabisi e diak a urungulir, me a lechub eng tirke el mla mo diak el bechiil e melechesuar el kora cheloit e mla obesbesong, ak klou a renguk el melekoi el kmo se el mkengei er a siotai er a Osobel el mo nguu a kerus e oltirakl er Ngii a belkul a kmo melemolem el oba klaumerang er a rolel a Rubak, e melemolem er a lulsemuuch, e diak molecheech a omeruul er a beluulechad el ngii a locha mo oridii a urunguled er a beltkil a rengul me a kerasia er a Dios.
Aika el osisechakl a dirrek el mo er kemiu el tir a melechesuar el sausechal me a remodil e omelechesiu el mekngit a rengmiu e mechitechut. E tiaikid a locha tara uchul e a rebebil er kemiu a omelchesiu el uase a ebangkelio er a Jesus Kristo a dikea belkul er kemiu. Alsekum e tiaikid a teletael, eng soak louchais el kmo ng blechoel el ngar er ngii a oureng el kirel a Dios me a Uldasu er a deureng er Ngii, er a Jesus Kristo me se el Tngakireng er Ngii, me a kiei el oltirakl a oubeltikelreng a Llecherir. Ngara cherrungel el Llemesel, klisichel, llemeltel, me a kerasia, e a Rubak a mo rongedid el mo er Ngii, el uchul e kede mo sebeched el mo kiei el Lobengkel e mo obang a diak a ulebengelel el olsobel, alsekum e kid a mesisiich e diak de mesmesim el oltirakl a llechul e blechoel el lobengkel a ungil omeruul.
Tirke el tir a mla remuul a meklou el klengit, mo kongei er tia el osisiu el siotai a belkul, el obengkel a bebil er a tekoi, a mo nguu a klengariou el reng er a medal a Dios, e mo ngara omellach el obengterir a kltukl el mengeteklel a Ikelesia, e mo ouuchel a rengmiu e obes a kngtemiu Tia el omeruul a dirrek el mo omekngeltengat er tirke el tir a ngara ringel el odechelakl a mekngit el tir a ultuil er ngii, el uldimul er ngii a mesisiich el kar, mekngit el kar, rrom, me a tekoi er a delboes. Sel moltirakl aika el blsachel a mo ngoikau el mo er a Osobel, el ngii a sebechel el ngoseklau er a klengitelreng er a klengit, klengitelreng, me a klsibai er a reng me a tech. Osisiu, ngeseu er a re merredel er a Ikelesia, ke dirrek el osiik a ngesou er a telungalek er kau, resechelim, me a ulsmuul el chad er a ukeruul me a omellach.
Me kulengit me lak kom kimer er a blechobech el klechitechut me a uldesuem el omdasu el kmo ng diak el sebechem el mo ikrii a klengit e mo mesisiich er a tekoi el kau a mla mo smau er ngii. Ng diak el sebechem el diak molasem el melemolem el mechitechut a rengum e ngara klengit! Bom blechoel el blak a rengum el mo er sel tkul rebab el sebechem, el olecholt el okiu a urerem el soam el mengikiid er a sel kmal chelsel ollemelem, el olisechakl er ngii a Osobel. Bebil er a taem e a rael el kudmokl a bebil er a ringel a mei er a uriul er a betok el buil me a rak er a melemolem lomelasem. A yaksok el de betik er ngii er a Babier er a Mormon el kmo “ngokiu a kerasia e kid a mo suobel, er a uriul er a ike el sebeched el remuul,” a dirrek el uldimukl er tia el teletael er kid el rokui. Bo modengei el kmo a sengk er a kerasia er a Osobel a diak el belkul a kmo ng “deleboded er a cherengel a taem el mo lmuut er a ‘uriul’ er a ike el sebeched el remuul. Kede locha nguu a kerasia er Ngii el uchei, me a chelsel, me a uriul er a taem el dousbech el melasem.”
Ak olecholt er a klaumerang el kmo se el sekum e kid a blak a rengud e melemolem el mo mesisiich er a ongarm er kid, a Dios a mo omekngeltengat er kid el oba sengkel a klaumerang el mo omekungil mea dirrek el urerel a ongasireng. Ngii a mo meruul el merkid a tekoi el kid a diak el sebeched el remuul el me er kid.
Obengkel, tirke el tir a melechesuar el, kesib a rengrir, mekngit a rengrir, me a lechub e te llechotel er a klengit el reng el tir a omdasu a kmo ng diak el kirel blingelem, el mo nguu a kerus e oltirakl er a Osobel a belkul a kmo ke mo ocheuekl aika el mo omelechesuar e mo obult el bedul a Rubak meng sebechel el Ngubetid er a ika el uldesued e mo ngosukid el mo metik er a budech. E ng di, alsekum e kede orreked aika el diak el ungil el domelechesuar me a kngtil a rengud, e kede mo metik er kid el kiei el diak a ongetikaike er a Chedaol Reng er a Rubak er a chelsel a klengar er kid. Ng diak el sebeched el ouuchel a rengud er a kengtid el kirir a rebebil er a rechad, e ng di ng sebeched el ousubes er tir—el kotouar el mo kelsbus el kirir tirke el tir a mla melemall er kid.
A Chedaol llechukl a olisechakl er kid el kmo ngar er ngii a rolel e kede tuobed er a ika el omeruul—el mengemedaol er a Osobel el mo olsengeseu er kid el omtechei a mekedidai el rengud el obengkel a beches el reng. Tia dilubech, me kid a kired el mei er a Rubak lolab a klitechetud e olengit er Ngesuel me klauseubes, tokubets el cheatol taem sel dolai er a sakrament er a bek el Sundei. Mei e dolilit el mo osiik er a Ngesuel e ngmai aikel klou a ututelel me a ringelel a bakes el mo ousubes er tirkel tir a omecherabech er kid meng mo sebeched el lomuchel el lomkungil. Ak yaksok el kmo se el bo muaisei, e ko metik a selbechakl lokiu a budech lobengkel a Rubak.
Ma le ngara chelsel a kelbus er a Liberty er a 1839, a Profet el Joseph Smith a milluches er a cheldechedechal el mo er a rechedal a Ikelesia el ngii a uldimukl er ngii a ocholt el ngii a kmal sebechel el meruul er a ika keltukl el teletael. Ng milluches, “Rokui el kingall me a omengedereder, blechebechel a omerreder me a klisiich, a kirel mo mocholt e mo melemolem el mo er tirke el tir a mla outekangel el oba blekeu el kirel a ebangkelio er a Jesus Kristo.” Mal le uaisei, e rodam me a rodos er ngak, tirke el tir a nguu a ngklel a Osobel, el oumerang er a yaksok er Ngii e blak a rengrir el mo er a ulebongel, e mo suobel e mo kiei el obengkel a Dios el ngara diak a ulebengelel el deureng.
Kid el rokui a chelbangel er a betok el ongarm el omeruul er a chelsel a klengar er kid el ngii a rullid el mo mekngit a rengud, diak a rengud er a tekoi, me a dirrek el bebil e ng chelitechut. Bebil er a ika el reng a mo omekrael er kid el mo oker er a Rubak: “Ngera me a uchul me a ika a duubech el me er ngak?” me a lechub “Ngera me a ike el tekoi el kungerchiil a diak el mekedmokl? El uaisei, ngak a meruul aike el rokui el ngar ngii a klisichek er ngii el mo nguu a kerus e mo oltirakl er a Osobel!”
Betik er a renguk el resechelik, kid a kired el medengei el kmo mo nguu a kerus a uldimukl er ngii a oba klengariou el reng e oumerang er a Dios e a diak a ulebengelel Llemesel. Ng kired el mo medengei el uase Ngii a medengelkid me a ikel dousbech. Ng dirrek el kired el mo kongei er a klemerang el kmo a temel a Rubak a ngodech er a temed. Bebil er a taem e kede osiik er a klengeltengat e rullii a belsechel el Rubak a mo kudmeklii. Ng diak el sebeched el Msang a soad el taem el Ngii a mo kudmokl a nger er a doureng. Se el doruul er tiang, e kede kmal di uaia romair er a rengrir el Nephites er a ngara mong, el tir a ultuub er a rebebil er tir el mengedecheduch el kmo a taem a mla imiu el kirel a tekingel a Samuel el chad er a Lamanite el mekedmokl, el meruul a rrau el reng er a delongelir tirke el tir a uluumerang. Ng kired el oumerang er a Rubak el rullid el cholleklid e mo medengei e kmo Ngii a Dios, el kmo Ngii a medengei a rokui el tekoi, e Ngii a medengelkid a desrta er kid.
Ng kmal dirk mlo er ngii a techellek el mo olisechakl er a mla melakl el odos el ngklel a Franca Calamassi, el ngii a smecher er a meringel el secher. Sister Calamassi a mle kot el chad er a telungalek er ngii el mo chdeal tia el mla moluut el Ikelesia er a Jesus Kristo. El uaisei el dimlak a ta el bo el metecholb, ngii a kilengei el ngara ongdibel el obengterir a remisionari e blechoel el ngara ongdibel er a Ikelesia. El diak el ior er a ika el tekoi el dilubech, a Sister Calamassi a millemolem el oba klaumerang e ulemekeroul er tirka el teua el ngelekel er a ebangkelio er a Jesus Kristo. Tal rak er a lemad a bechil, e a Sister Calamassi a ngilteterir a rengelekel mora templo, el mlo meruul chedaol ruoll e mloak el telungalek el mora ulebongel. A yaksok el obengkel aika el chedaol ruoll a milsa a reng er a oureng, deuil a deureng me a deureng el ngii a ngilsuir el melemolem er a klengar er ngii.
Se er a lekot el mo er ngii a olechotel a rektel, e a bisob er ngii a ulemekngeltengat er ngii. Sel taem e ngii a dilu er a bisob er ngii el kmo ng mle kldmokl el mo nguu se el soal a Rubak, lochoti a klaumera er ngii el mo ungil lobengkel a klaumerang loutekangel er tial secherel mora ulebongel.
Ulebongel el odngelek, e a kurreked er chimal a Sister Calamassi e ulemes a chelsul a medal, e ak milsa dichel a anghel el melidiich er a medal—el meluich er a klemeriar el reng er ngii er a uldesuel a Dios me a tokubets el didichel a deureng er a beltkil a rengul me a uldesuel a Rubak el mo er ngii. Ak mlo melechesuar er a diak el mesim el blakelreng er ngii el mo outekangel er a klaumerang er ngii el mo lmuut er a ulebongel el mo nguu a kerus, el diak el ior er a ike el ringel el ngii a mle chelbangel. Tia el klengar er ngika el odos a olechotel a klaumerang er a Kristo, el ngii a omeketeklel a klaumerang me a blakelreng el mo er Ngii.
Rodam me a rodos, ng soak el olecholt er a klaumerang er ngak el kmo sel bo denguu a kerus er kid e mo oltirakl er a Osobel a ultuil er kid el mo oltirakl er a Okesiul e mo melasem el mo uai Ngii, e klou a rengum el chelbangel aike el teletelel a klengar, el kotouar e oltngakl a klengerngerel a klechad, e mengiil er a Rubak. A chad er a Omeluches a milluches:
“Mongiil er a Rubak: bom oba ungil el blakelreng, e ngii a mo smisichii a rengum: msall, ak melekoi, el kirel Rubak.”
“Ngii a olengeseu er kid e tekernged.”
Ak kuchais er a klaumerang er ngak el kmo se el moltirakl a ultil ochil a Merredel e mongiil er Ngii el ngii a kot el ngar er uchei el omekungil er a klengar er kid e mo meskid a delbenged a ulengul e remuul a chelngelled el mo beot e mekebekakl. Aika el klemerang a kulekoi loba ngklel a Jesus Kristo, amen.