Parau ’ōpanira’a

Nā te peresideni Russell M.Nelson

’Ia ti’amā te ta’ata, tītauhia te fa’afāriura’a hope o te ferurira’a ’e te ’ā’au, nō te riro rahi atu ā mai te Fatu.

E au mau taea’e, e au mau tuahine here, ’ua tae tātou i te hope’a o teie ’āmuira’a fa’ahiahia, tē ha’amāuruuru nei tātou i te Fatu nō te fa’aurura’a i te mau a’ora’a ’e te pehe tei fa’aitoito ia tātou. E fa’a’amua pae vārua mau tā tātou i rave na.

’Ua ’ite tātou ē, e fa’atae mai te ’evanelia a Iesu Mesia tei fa’aho’ihia mai i te tīa’i ’e te ’oa’oa i te ta’ata e fa’aro’o ’e e ha’apa’o i tāna ha’api’ira’a tumu. ’Ua ’ite ato’a tātou ē, e nehenehe te ’utuāfare tāta’itahi ’ia riro ’ei vāhi mo’a mau nō te fa’aro’o, i reira te hau, te here ’e te Vārua o te Fatu e pārahi ai.

’E ’oia mau, ’o te hiero mo’a te tupua’i mou’a nō te Fa’aho’i-fa’ahou-ra’a. E mea faufa’a rahi tō te reira mau ’ōro’a ’e mau fafaura’a nō te fa’aineine i te hō’ē pupu ta’ata ’ia ineine rātou nō te fāri’i i te Fa’aora i tōna tae-piti-ra’a mai. I teienei, e 166 hiero tei ha’amo’ahia, ’e tē vai fa’ahou ra.

E fa’atupuhia te ’ōpani ’īriti nā mua a’e i te ha’amo’ara’a o te hiero ’āpī tāta’itahi ’e te mau hiero tei fa’a’āpīhia. E rave rahi hoa e ’ere nō tō tātou fa’aro’o tē haere mai e māta’ita’i i teie mau hiero ’e e ha’api’i rātou i te hō’ē mea nō ni’a i te mau ha’amaita’ira’a o te hiero. ’E tē vai ra te hō’ē pae o rātou e putapū te ’ā’au nō te ha’api’i rahi atu ā nō ni’a i te reira. E ani ateate mai vetahi ē nāhea i te fa’aineine nō te mau ha’amaita’ira’a o te hiero.

Tātou te mau melo o te ’Ēkālesia, tītauhia ia tātou ’ia fa’aineine nō te pāhono atu i tā rātou mau uira’a. E nehenehe tātou e fa’ata’a atu ē, ’ua matara te mau ha’amaita’ira’a o te hiero i te mau ta’ata ato’a e fa’aineine ia rātou. Hou rā rātou ’a tomo ai i roto i te hō’ē hiero tei ha’amo’ahia, tītauhia ia rātou ’ia fa’aineine ia rātou. ’Ua hina’aro te Fatu i tāna mau tamari’i ato’a ’ia rave i teie mau ha’amaita’ira’a mure ’ore e vai ra i roto i tōna hiero. ’Ua fa’aue mai ’oia e aha tei tītauhia i te ta’ata tāta’itahi ’ia rave nō te tomo i roto i tōna fare mo’a.

Hō’ē vāhi maita’i nō tātou nō te ha’amata i taua rāve’a ha’api’ira’a ra, ’o te hi’o-maita’i-ra’a ïa i te mau parau i nana’ohia i rāpae i te hiero : « Ha’amo’ahia i te Fatu ; Te Fare o te Fatu ». ’Ua fa’auru te a’ora’a a te peresideni Henry B. Eyring, i teie mahana, ’e e rave rahi atu ā, ’ia ha’amo’a atu ā ia tātou. E vāhi mo’a te hiero tāta’itahi ; tē tūtava nei te ta’ata haere hiero tāta’itahi ’ia ha’amo’a atu ā iāna.

Te mau tītaura’a nō te tomo i roto i te hiero, e au ïa i te mo’ara’a o te ta’ata tāta’itahi. Nō te hi’opo’a i te ineine o te ta’ata, e ravehia e piti uira’a nō te ta’ata tāta’itahi e hina’aro i te fāri’i i te mau ha’amaita’ira’a o te hiero : nā mua ’e te ’episekōpo, te tauturu o te ’episekōpo ’aore rā te peresideni ’āma’a ; ’e i muri iho, ’e te peresideni titi ’aore rā misiōni, ’aore rā ’e te hō’ē tauturu. I roto i terā mau uiuira’a, e uihia e rave rahi uira’a.

Tē vai nei te tahi mau uira’a tei fa’atanohia, ’ia pāpū-maita’i-hia te reira. Tē hina’aro nei au e fa’a’ite i te reira ia ’outou :

E fa’aro’o ānei tō ’oe ’e te ’itera’a pāpū nō ni’a i te Atua, te Metua Mure ’Ore ; nō ni’a i tāna Tamaiti, ’o Iesu Mesia ; ’e nō ni’a i te Vārua Maita’i ?
E ’itera’a pāpū ānei tō ’oe nō ni’a i te tāra’ehara a Iesu Mesia ’e i tōna ti’ara’a ’ei Fa’aora ’e ’ei Ora ?
E ’itera’a pāpū ānei tō ’oe nō ni’a i te fa’aho’i-fa’ahou-ra’a mai o te ’evanelia a Iesu Mesia ?
Tē pāturu ra ānei ’oe i te Peresideni o Te ’Ēkālesia a Iesu Mesia i te Feiā Mo’a i te mau Mahana Hope’a nei ’ei peropheta, ’ei ’ite ’e ’ei heheu parau ’e ’o ’oia ana’e te ta’ata i ni’a i te fenua nei tei ha’amanahia nō te fa’a’ohipa i te mau tāviri ato’a o te autahu’ara’a ?

Tē pāturu ra ānei ’oe i te mau melo o te Peresidenira’a Mātāmua ’e o te pupu nō te Tino ’Ahuru Ma Piti ’āpōsetolo ’ei mau peropheta, ’ei mau hi’o ’e ’ei mau heheu parau ?

Tē pāturu ra ānei ’oe i te tahi atu mau Huimana fa’atere rahi ’e te feiā fa’atere o te ’Ēkālesia nō te fenua nei ?
’Ua parau te Fatu ē, ’ia « rave-mā-hia » te mau mea atoa’ i mua iāna (Te Parau Ha’api’ira’a ’e te mau Parau Fafau 42:41).

Tē tūtava ra ānei ’oe ’ia vai mā i te pae mōrare, i roto i tō ’oe mau mana’o ’e te mau haere’a ?

Tē ha’apa’o ra ānei ’oe i te ture nō te vi’ivi’i ’ore ?
Tē pe’e ra ānei ’oe i te mau ha’api’ira’a a te ’Ēkālesia a Iesu Mesia i roto i tā ’oe mau peu i ni’a i te mau melo o tō ’oe ’utuāfare ’e i ni’a ia vetahi ’ē, i te vāhi ’ōmo’e ’e i te vāhi ta’ata ?
Tē pāturu ra ānei ’oe ’aore rā tē fa’aitoito ra ānei ’oe i te tahi noa atu ha’api’ira’a, ravera’a ’aore rā ha’api’ira’a tumu e pāto’i nei i tā Te ’Ēkālesia a Iesu Mesia i te Feiā Mo’a i te mau Mahana Hope’a nei ?
Tē tūtava ra ānei ’oe i te ha’amo’a i te mahana Sābati, i te fare ’e i te fare purera’a ; i te haere i tā ’oe mau rurura’a ; i te fa’aineine nō te rave ti’amā i te ’ōro’a ’e nō te ora i te orara’a e au i te mau ture ’e te mau fa’auera’a o te ’evanelia ?
Tē tūtava ra ānei ’oe ’eiaha e ha’avare i roto i te mau mea ato’a tā ’oe e rave ?
E ta’ata ’aufau tuha’a ’ahuru ti’a ānei ’oe ?
Tē māramarama ra ānei ’oe i te parau pa’ari ’e tē ha’apa’o ra ānei ’oe i te reira ?
Tē vai ra ānei tā ’oe i te hō’ē noa atu utu’a ’aore rā tītaura’a i te hō’ē hoa fa’aipoipo mātāmua ’aore rā, i tā ’oe mau tamari’i mātāmua ?

’Oia ānei ra, tē ha’apa’o ra ānei ’oe i taua mau tītaura’a ra ?
Tē ha’apa’o ra ānei ’oe i te mau fafaura’a ’o tā ’oe i rave i roto i te hiero, mai te ’ahura’a i te ’ahu hiero mai tei parauhia i roto i te ’ōro’a hiero ?
Tē vai ra ānei te tahi mau hara teimaha i roto i tō ’oe orara’a tei tītauhia e fa’a’āfaro ’e te mau ti’a mana o te autahu’ara’a ’ei tuha’a nō tō ’oe tātarahapara’a ?
’Ia mana’o ’oe, e mea ti’amā ānei ’oe ’ia tomo i roto i te fare o te Fatu ’e ’ia rave i te mau ’ōro’a o te hiero ?

Ananahi e ’ōperehia teie mau uira’a nō te parau fa’ati’a hiero, tei fa’atanohia, i te feiā fa’atere o te ’Ēkālesia ’ati a’e i te ao nei.

Ta’a ’ē noa atu i te pāhonora’a i teie mau uira’a ma te ha’avare ’ore, e ’ō’omo te ta’ata haere hiero i te ’ahu hiero o te autahu’ara’a i raro a’e i te ’ahu, ’ua ta’a iho ā ïa ia tātou te reira. E tāpa’o ’o roto te reira nō te pūpūra’a iāna ’e te tūtavara’a i te mahana tāta’itahi ’ia riro rahi atu ā mai te Fatu te huru. E fa’aha’amana’o ato’a te reira ia tātou ’ia vai ha’apa’o maita’i noa, i te mahana tāta’itahi, i te mau fafaura’a i ravehia, ’e ’ia haere i ni’a i te ’ē’a nō te fafaura’a i te mahana tāta’itahi ma te fāito teitei a’e ’e te mo’a a’e.

I teienei, nō te hō’ē taime, tē hina’aro nei au e paraparau i te feiā ’āpī. Tē fa’aitoito nei mātou ia ’outou ’ia fa’aineine ’ia noa’a tā ’outou parau fa’ati’a nō te hiero i tā’ōti’ahia. ’O te mau uira’a ana’e tē tano ia ’outou tē uihia, nō te fa’aineinera’a nō te mau ōro’a bāpetizora’a ta’ata mono ’e te ha’amaura’a. ’Ua māuruuru roa mātou i tō ’outou ti’amāra’a ’e te ineine nō te rave i te ’ohipa mo’a o te hiero. Māuruuru ia ’outou !

’Ia ti’amā te ta’ata ’ia tomo i roto i te fare o te Fatu, tītauhia iāna ’ia fa’aineine rahi i te pae vārua. Nā roto rā i te tauturu a te Fatu, ’aita e mea e’ita e haere. I te tahi taime, e mea ’ōhie a’e te patura’a i te hiero, i te fa’aineinera’a i te ta’ata nō te hiero. ’Ia ti’amā te ta’ata, tītauhia te fa’afāriura’a hope o te ferurira’a ’e te ’ā’au, nō te riro rahi atu ā mai te Fatu, nō te riro ’ei tino huira’atira ha’avare ’ore, nō te riro ’ei hi’ora’a maita’i a’e ’e nō te riro ’ei ta’ata mo’a a’e.

Tē fa’a’ite pāpū nei au ē, e fa’atae mai taua fa’aineinera’a ra i te mau ha’amaita’ira’a rahi roa ’ino i roto i teie orara’a, nā reira ato’a te mau ha’amaita’ira’a tē ’ore e nehenehe e feruri i te orara’a nō muri iho, mai te vai-noa-ra’a te autahira’a ’utuāfare nā roto i te mau tau ato’a ē a muri noa atu, « i roto i te ’oa’oa hope ’ore ra ».¹

I teienei e huri au i te tahi atu tumu parau : te mau ’ōpuara’a nō te matahiti i muri nei. I te tau fa’atupura’a rā’au nō te matahiti 2020, e ti’a te 200 matahiti mai te fāra’a hanahana i tupu nō Iosepha Semita, tā tātou e parau nei te ’Ōrama mātāmua. ’Ua fā te Atua te Metua ’e tana Tamaiti here, ’o Iesu Mesia, ia Iosepha, e tamāroa 14 matahiti. E tāpa’o te reira ’ohipa nō te ha’amatara’a o te Fa’ati’a-fa’ahou-ra’a o te ’evanelia a Iesu Mesia i tōna ’īra’a, mai tā te Bibilia Mo’a iho ā i parau ātea.²

Tupu a’era te mau fārereira’a ’e te mau ve’a nō te ra’i mai, mai ia Moroni, Ioane Bāpetizo, ’e te mau ’āpōsetolo mātāmua ra ia Petero, Iakobo ’e Ioane. ’Ua haere ato’a mai vetahi, mai ia Mose, Elia ’e Eliaha. Rātou tāta’itahi tei ’āfa’i mai i te mana hanahana nō te ha’amaita’i fa’ahou ā i te mau tamari’i a te Atua i ni’a i te fenua nei.

Nā roto i te semeio, ’ua fāna’o ato’a tātou i te Buka a Moromona : Te tahi fa’ahou ’ite nō Iesu Mesia, e pāpa’ira’a mo’a ’āpiti nō te Bibilia. ’Ua fa’arahi mau ato’a te mau heheura’a i roto i Te Parau Ha’api’ira’a ’e te mau Parau Fafau ’e te Poe Tao’a Rahi, i tō tātou māramarama i te mau fa’auera’a a te Atua ’e te parau mau mure ’ore.

’Ua fa’aho’ihia mai te mau tāviri ’e te mau tōro’a o te autahu’ara’a, mai te mau tōro’a ’āpōsetolo, Hitu ’Ahuru, patereareha, tahu’a rahi, peresibutero, ’episekōpo, tahu’a, ha’api’i ’e diakono. ’E nō te mau vahine tei here i te Fatu, tē tāvini itoito nei rātou i roto i te Sōtaiete Tauturu, te Paraimere, te Feiā ’Āpī Tamāhine, te Ha’api’ira’a Sābati ’e te tahi atu mau pi’ira’a—e mau tuha’a faufa’a rahi ana’e nō te Fa’aho’i-fa’ahou-ra’a o te ’evanelia a Iesu Mesia i tōna ’īra’a.

Nō reira e fa’ata’ahia te matahiti 2020 ’ei piti hanerera’a o te matahiti. E ta’a ’ē te ’āmuira’a rahi nō te ’āva’e ’Ēperēra i muri nei i te tahi atu ’āmuira’a nā mua atu. I roto i nā ’āva’e e ono e haere mai nei, tē tīa’i nei au i te mau melo ato’a ’e te mau ’utuāfare ato’a ’ia fa’aineine nō te ’āmuira’a ta’a ’ē roa e fa’anahanaha i te mau niu mau o te ’evanelia i fa’aho’ihia mai.

E ha’amata paha ’outou i tā ’outou fa’aineinera’a nā roto i te tai’o-fa’ahou-ra’a i te fa’ati’ara’a a Iosepha Semita nō te ’Ōrama mātāmua, mai tei pāpa’ihia i roto i te Poe Tao’a Rahi. Tā tātou buka e tuatāpapa i te matahiti i muri nei nō te Mai, pe’e mai ’o te Buka a Moromona ïa. E feruri paha ’outou i te mau uira’a rahi mai teie : « E aha tē taui i roto i tō’u orara’a ’āhani e rave-’ē-hia i teie iho taime te ’ite tei noa’a mai iā’u i roto i te Buka a Moromona ? » ’aore rā, « E aha te ’ohipa ta’a ’ē i tupu nō’u ’e te feiā tā’u i here maoti te mau ’ohipa i tupu i muri iho i te ’Ōrama mātāmua ? » I teienei ato’a tē matara ra te mau video nō ni’a i te Buka a Moromona, e fa’aō ato’a paha ’outou i te reira i roto i tā ’outou tuatāpapara’a ta’ata hō’ē ’e tā ’outou tuatāpapara’a ’utuāfare.

’A mā’iti i tā ’outou iho mau uira’a. ’A feruri i tā ’outou iho fa’anahora’a. ’A utuhi ia ’outou i roto i te māramarama hanahana o te Fa’ati’a-fa’ahou-ra’a. ’A nā reira ai ’outou, e ’ere ē, e ha’amana’o-noa-hia te ’āmuira’a rahi nō ’Ēperēra, e’ita roa atu te reira e mo’ehia.

I teienei nō te ’ōpani, tē vaiiho nei au ia ’outou i tō’u here ’e tā’u ha’amaita’ira’a, ’ia rahi atu ā tō ’outou ’oa’oa ’e te mo’ara’a i te mahana tāta’itahi. I teienei rā, ’ia ’ite pāpū ’outou ē, tē tāmau noa nei te heheura’a i roto i te ’Ēkālesia ’e e tāmau noa te reira i raro a’e i te fa’aterera’a a te Fatu ē tae noa atu « ’ua hope te mau ’ōpuara’a a te Atua i te fa’atupuhia ’e ’a parau mai ai ’o Iehova Rahi ē ’ua oti te ’ohipa ».³

’O tā’u ïa e ha’amaita’i nei ia ’outou, ma te ha’apāpū fa’ahou ā i tō’u here ia ’outou, ’e tō’u ’itera’a pāpū ē, tē ora nei te Atua ! ’O Iesu te Mesia ! ’O tāna ’Ēkālesia teie ’e ’o tātou tōna nūna’a. Nā roto i te i’oa mo’a o Iesu Mesia, ’āmene.