2010–2019
Panapos nga Pakigpulong
Oktubre 2019 nga kinatibuk-ang komperensya
2:3

Panapos nga Pakigpulong

Ni Presidente Russell M. Nelson

Ang indibidwal nga katakus nagkinahanglan og hingpit nga pagkakabig sa hunahuna ug kasingkasing aron mahimong mas sama sa Ginoo.

Minahal ko nga kaigsoonan, sa atong pagtapos niining makasaysayanong komperensya, magpasalamat kita sa Ginoo sa pag-aghat sa mga mensahe ug sa musika nga nakadasig kanato. Nakatagamtam gayud kita og espirituhanong pagkabusog.

Nasayud kita nga ang gipahiuli nga ebanghelyo ni Jesukristo makahatag og paglaum ug kalipay sa mga tawo nga maminaw ug mopatalinghug sa Iyang doktrina. Nasayud usab kita nga ang matag panimalay mahimong tinuod nga santuwaryo sa pagtuo, diin ang kalinaw, gugma, ug ang Espiritu sa Ginoo mahimong mopuyo.

Siyempre, ang labing importanting bahin sa Pagpahiuli mao ang balaan nga templo. Ang sagradong mga ordinansa ug mga pakigsaad niini importante kaayo sa pag-andam og katawhan nga andam sa pagsugat sa Manluluwas sa Iyang Ikaduhang Pag-anhi. Niining panahona aduna kitay 166 ka napahinungod nga mga templo, ug daghan pa ang umaabut.

Usa ka open house ipahigayon sa wala pa ang pagpahinungod sa kada bag-o ug gibag-o nga templo. Daghang mga higala nga dili sakop sa atong relihiyon moapil sa mga paglibut [tour] niadto nga mga templo ug dunay makat-unan mahitungod sa mga panalangin sa templo. Ug ang uban niana nga mga bisita madasig nga magkat-on pa og dugang. Ang uban sinserong mangutana kon unsaon nila nga mahimong takus sa mga panalangin sa templo.

Isip mga miyembro sa Simbahan, kinahanglang andam kita sa pagtubag sa ilang mga pangutana. Atong mapasabut nga ang mga panalangin sa templo mahimong maangkon ni bisan kinsa ug sa tanang tawo nga moandam sa ilang kaugalingon. Apan sa dili pa sila makasulod og gipahinungod nga templo, kinahanglan sila nga mahimong takus. Gusto sa Ginoo nga ang tanan Niyang mga anak makaambit sa mahangturong mga panalangin nga anaa sa Iyang templo. Gitudlo Niya unsay angay buhaton sa matag tawo aron mahimong takus sa pagsulod sa Iyang balaang balay.

Usa ka maayong dapit alang kanato sa pagsugod sa ingon nga oportunidad sa pagtudlo mao ang pagdirekta sa ilang atensyon ngadto sa mga pulong nga gikulit sa gawas sa templo: “Pagkabalaan ngadto sa Ginoo; Ang Balay sa Ginoo.” Ang mensahe ni Presidente Henry B. Eyring karon ug sa daghan pang uban nakadasig kanato nga mahimong mas balaan. Ang matag templo usa ka balaan nga dapit; ang matag patron sa templo naningkamot nga mahimong mas balaan.

Ang tanang kinahanglanon aron makasulod sa templo may kalabutan sa personal nga pagkabalaan. Aron matimbang-timbang kana nga kaandam, ang matag tawo kinsa gusto nga makatagamtam sa mga panalangin sa templo adunay duha ka mga interbyu: una uban sa bishop, magtatambag sa bishopric, o branch president; ikaduha uban sa presidente sa stake o mission o usa sa iyang mga magtatambag. Niana nga mga interbyu, adunay pipila ka pangutana.

Ang uban niadto nga mga pangutana bag-o lang nga gi-edit alang sa pagklaro. Gusto nakong ribyuhon kini alang kaninyo karon:

  1. Ikaw ba adunay hugot nga pagtuo ug pagpamatuod sa Dios, ang Amahan sa Kahangturan; sa Iyang Anak, si Jesukristo; ug sa Espiritu Santo?

  2. Ikaw ba adunay pagpamatuod sa Pag-ula ni Jesukristo ug sa Iyang tahas isip Manluluwas ug Manunubos?

  3. Ikaw ba adunay pagpamatuod sa Pagpahiuli sa ebanghelyo ni Jesukristo?

  4. Ikaw ba mopaluyo sa Presidente sa Ang Simbahan ni Jesukristo sa mga Santos sa Ulahing mga Adlaw isip propeta, manalagna, ug tigpadayag ug isip mao ang bugtong tawo sa yuta nga gitugutan sa pagdumala sa tanang mga yawe sa priesthood?

    Ikaw ba mopaluyo sa mga sakop sa Unang Kapangulohan ug sa Korum sa Napulog Duha ka mga Apostoles isip mga propeta, mga manalagna, ug mga tigpadayag?

    Ikaw ba mopaluyo sa ubang mga General Authority ug sa lokal nga mga lider sa Simbahan?

  5. Ang Ginoo miingon nga ang tanang butang “mahimo nga limpyo” sa Iyang atubangan (Doktrina ug mga Pakigsaad 42:41).

    Ikaw ba naningkamot alang sa moral nga kalimpyo sa imong mga hunahuna ug kinaiya?

    Ikaw ba nagsunod sa balaod sa kaputli?

  6. Ikaw ba nagsunod sa mga pagtulun-an sa Simbahan ni Jesukristo diha sa imong pribado ug publiko nga kinaiya sa mga sakop sa imong pamilya ug sa uban?

  7. Ikaw ba nagsuporta o nag-awhag og bisan unsa nga mga pagtulun-an, mga binuhatan, o doktrina nga nahisupak niadtong gidawat sa Ang Simbahan ni Jesukristo sa mga Santos sa Ulahing mga Adlaw?

  8. Ikaw ba naningkamot sa pagbalaan sa adlaw nga Igpapahulay, diha sa panimalay ug sa simbahan; sa pagtambong sa imong mga miting; sa pag-andam ug takus nga pag-ambit sa sakrament; ug sa pagpakabuhi subay sa mga balaod ug kasugoan sa ebanghelyo?

  9. Ikaw ba naningkamot nga magmatinuoron sa tanan nimong gibuhat?

  10. Ikaw ba hingpit nga tigbayad sa ikapulo?

  11. Ikaw ba nakasabut ug nagsunod sa Pulong sa Kaalam?

  12. Ikaw ba adunay pinansyal o laing mga obligasyon ngadto sa kanhi asawa o mga anak?

    Kon oo, kasamtangan ba nimong natuman kadtong mga obligasyon?

  13. Gituman ba nimo ang mga pakigsaad nga imong gihimo sa templo, lakip ang pagsul-ob sa garment sa templo sumala sa gitudlo sa endowment?

  14. Aduna bay bug-at nga mga sala sa imong kinabuhi nga kinahanglang iresolbar sa mga awtoridad sa pagkapari isip kabahin sa imong paghinulsol?

  15. Ikaw ba nagkonsiderar sa imong kaugalingon nga takus nga mosulod sa balay sa Ginoo ug moapil sa mga ordinansa sa templo?

Ugma, kining gibag-o nga mga pangutana sa rekomend sa templo iapud-apod ngadto sa mga lider sa Simbahan sa tibuok kalibutan.

Agig dugang sa ilang matinuorong pagtubag niadto nga mga pangutana, nasabtan nga ang matag hamtong nga patron sa templo mosul-ob sa sagradong garment sa pagkapari ilawom sa ilang regular nga sinina. Simbolo kini sa tiunay nga pasalig nga maningkamot matag adlaw aron mahimong mas sama sa Ginoo. Nagpahinumdom usab kini kanato nga magpabiling matinud-anon matag adlaw sa gihimo nga mga pakigsaad ug maglakaw sa dalan sa pakigsaad matag adlaw sa mas halangdon ug mas balaan nga paagi.

Karon, sa makadiyut, gusto kong mamulong ngadto sa atong kabatan-onan. Moawhag kami ninyo nga mahimong takus alang sa limitado og gamit nga rekomend sa templo. Pangutan-on lamang kamo niadtong mga pangutana nga magamit nganha kaninyo sa inyong pagpangandam alang sa mga ordinansa sa puli nga bunyag ug kumpirmasyon. Mapasalamaton kaayo kami sa inyong katakus ug kaandam sa pag-apil nianang sagrado nga buhat sa templo. Nagpasalamat kami ninyo!

Ang indibidwal nga katakus aron makasulod sa balay sa Ginoo nagkinahanglan og dakong indibidwal nga espirituhanong pagpangandam. Apan uban sa tabang sa Ginoo, walay imposible. Sa ubang paagi, mas sayon ang pagtukod og templo kay sa pag-ugmad og katawhan nga andam alang sa templo. Ang indibidwal nga katakus nagkinahanglan og hingpit nga pagkakabig sa hunahuna ug kasingkasing aron mahimong mas sama sa Ginoo, mahimong matinuoron nga lumulupyo, mahimong mas maayo nga ehemplo, ug mahimong mas balaan nga tawo.

Mopamatuod ko nga ang ingon nga buhat sa pagpangandam nagdala og dili maihap nga panalangin niining kinabuhia ug dili matugkad nga mga panalangin sa sunod nga kinabuhi, lakip na ang pagpadayon sa inyong yunit sa pamilya hangtud sa kahangturan sa “kahimtang nga walay katapusan ang kalipay.”

Karon gusto nakong hisgutan ang laing hilisgutan: mga plano alang sa umaabut nga tuig. Sa tingpamulak sa tuig 2020, eksakto gayud nga 200 ka tuig sukad si Joseph Smith nakasinati sa pagpakita sa Dios nga atong nailhan nga Unang Panan-awon. Ang Dios nga Amahan ug ang Iyang Pinanggang Anak, si Jesukristo, mipakita kang Joseph, usa ka 14 anyos nga batan-on. Kana nga hitabo nagtimaan sa pagsugod sa Pagpahiuli sa ebanghelyo ni Jesukristo sa kahingpitan niini, sa tukmang paagi sigun sa gipanagna sa Biblia.

Dayon miabut ang sunod-sunod nga mga pagbisita sa langitnong mga mensahero, lakip ni Moroni, Juan Bautista, ug ang unang Apostoles nga sila si Pedro, Santiago, ug Juan. Misunod ang uban, lakip ni Moises, Elias, ug Elijah. Ang matag usa nagdala og balaang awtoridad sa pagpanalangin pag-usab sa mga anak sa Dios dinhi sa yuta.

Sa milagrusong paagi, nakadawat usab kita sa Basahon ni Mormon: Lain nga Tugon ni Jesukristo, kauban nga kasulatan sa Balaang Biblia. Ang mga pinadayag nga gimantala diha sa Doktrina ug mga Pakigsaad ug sa Perlas nga Labing Bililhon nakapalambo usab pag-ayo sa atong pagsabut sa mga sugo sa Dios ug sa mahangturong kamatuoran.

Ang mga yawe ug mga katungdanan sa pagkapari napahiuli na, lakip ang mga katungdanan sa Apostol, Seventy, patriarch, high priest, elder, bishop, priest, teacher, ug deacon. Ug ang mga babaye nga nagmahal sa Ginoo maisugong nagserbisyo sa Relief Society, Primary, Young Women, Sunday School, ug uban pang mga calling sa Simbahan—tanan importanting bahin sa Pagpahiuli sa ebanghelyo ni Jesukristo sa kahingpitan niini.

Sa ingon, ang tuig 2020 pagatawgon nga bicentennial [ikaduhang siglo] nga tuig. Ang kinatibuk-ang komperensya sa sunod Abril himoong lahi sa bisan unsang miaging komperensya. Sa mosunod nga unom ka bulan, manghinaut ko nga ang matag miyembro ug matag pamilya mangandam alang sa usa ka talagsaong komperensya nga magsaulog sa mga pundasyon mismo sa gipahiuli nga ebanghelyo.

Mahimo ninyong sugdan ang inyong pagpangandam pinaagi sa pagbasa pag-usab sa istorya ni Joseph Smith sa Unang Panan-awon sumala sa narekord diha sa Perlas nga Labing Bililhon. Ang atong tun-anan alang sa sunod nga tuig sa Dali, Sunod Kanako mao ang Basahon ni Mormon. Mahimo kamong mamalandong og importanting mga pangutana sama sa, “Sa unsang paagi nga mahimong lahi ang akong kinabuhi kon ang akong kahibalo nga naangkon gikan sa Basahon ni Mormon kalit nga kuhaon?” o “Sa unsang paagi ang mga panghitabo nga misunod sa Unang Panan-awon nakahimo og kalainan alang kanako ug sa akong mga minahal sa kinabuhi?” Usab, tungod kay anaa na ang mga video sa Basahon ni Mormon, mahimo ninyo kining ilakip sa inyong tinagsa ug uban sa pamilya nga pagtuon.

Pagpili og inyong kaugalingong mga pangutana. Paghimo og inyong kaugalingong plano. Isubsob ang inyong kaugalingon sa mahimayaong kahayag sa Pagpahiuli. Kon inyong buhaton, ang kinatibuk-ang komperensya sunod Abril dili lang kay halandumon; kini dili gayud makalimtan.

Karon sa pagtapos, akong ibilin kaninyo ang akong gugma ug akong panalangin nga ang matag usa ninyo mahimong mas malipayon ug mas balaan sa matag adlaw. Sa kasamtangan, palihug salig nga ang pagpadayag nagpadayon sa Simbahan ug magpadayon ubos sa direksyon sa Ginoo hangtud “ang mga katuyuan sa Dios matuman, ug ang Halangdong Jehova moingon nga ang buhat nahuman na.”

Sa ingon ako mopanalangin ninyo, mopadayag pag-usab sa akong gugma kaninyo, uban sa akong pagpamatuod nga ang Dios buhi! Si Jesus mao ang Kristo! Kini Iyang Simbahan ug kita Iyang katawhan. Sa sagradong ngalan ni Jesukristo, amen.