Zaj Lus Qhib
Peb yuav tsum ua txhua yam peb ua tau kom mloog Yexus Khetos, tus uas hais lus rau peb los ntawm tus Vaj Ntsuj Plig Dawb Huv lub hwj chim thiab txoj kev txhawb pab.
Kuv cov kwv tij thiab cov muam, thaum peb tos txais nej rau lub Plaub Hlis Ntuj 2020 lub tuam rooj sab laj ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, nej paub yog vim li cas, tiam sis kuv sawv hauv ib hoob uas tsis muaj leej twg nyob!
Thaum kuv tau cog lus rau nej hauv lub Kaum Hli Ntuj xyoo 2019 lub tuam rooj sab laj hais tais lub rooj sab laj thaum lub Plaub Hlis Ntuj los nej yeej yuav “nco ntsoov tas mus li,” kuv tsis tau paub hais tias qhov uas kuv pom tsawg dua li 10 neeg yeej yuav ua rau kuv “nco ntsoov” lub rooj sab laj no “tas mus li.” Tiam sis qhov uas kuv paub tias nej txais kuv txoj kev tshaj tawm no, thiab qhov uas pawg hu nkauj tau hu zaj nkauj “Kuv tus Ntsuj Plig Nyob Zoo,” ua rau kuv tus ntsuj plig txais kev nplij siab tiag.
Ib yam li nej paub lawm, tsis muaj neeg pes tsawg hauv lub rooj sab laj no vim peb xav ua tib zoo coj raws li cov thawj coj ntiaj teb hais kom peb ua txhua yam peb ua tau thiaj li tsis kis kab mob COVID-19. Kab mob no twb ua rau ntau yam hauv lub ntiaj teb ntxhov hnyo. Twb tau hloov peb tej kev sib ntsib hauv lub Koom Txoos, cov tub txib txoj hauj lwm, thiab tej hauj lwm hauv lub tuam tsev.
Txawm hnub no phaum mob uas txawj kis no txwv tsis pub peb ua tej yam li qub, tej kev sim siab hauv peb lub neej los muaj ntau dua li phaum mob kis thoob plaws no. Yuav muaj tej kev sim siab thaum yav tom ntej xws li kev raug xwm txheej, av qeeg, huab cua phem, los sis kev kho siab heev.
Peb yuav ua li cas nyiaj tej kev sim siab kom dhau mus? Tus Tswv tau qhia peb tias, “yog nej npaj siab nej yuav tsis ntshai.”1 Peb muaj peev xwm khaws zaub mov, dej, thiab nyiaj ceev cia. Tiam sis peb kuj yuav tsum tso khoom hauv peb tej tsev ceev cia ntawm sab ntsuj plig, xws li kev ntseeg, qhov tseeb, thiab zaj lus tim khawv.
Peb lub hom phiaj hauv lub neej no yog kom npaj ntsib tus uas tau Tsim peb. Peb ua li no thaum peb siv zog txhua hnub hloov los ua neeg zoo li peb tus Cawm Seej, Yexus Khetos.2 Thiab peb yuav ua li ntawd thaum peb hloov siab lees txim txhua hnub thiab txais nws lub hwj chim uas ntxuav peb huv, kho peb, thiab txhawb peb dag zog. Ces peb yuav muaj kev kaj siab lug thiab kev xyiv fab, tsis hais thaum peb raug kev ntxhov siab. Yog vim li no tus Tswv thiaj tau thov kom peb sawv hauv tej chaw dawb huv thiab “tsis txav li.”3
Xyoo no peb ua koob tsheej txog 200 xyoo tom qab ib lub sij hawm tseem ceeb kawg nkaus hauv lub ntiaj teb zaj keeb kwm—uas yog Vajtswv Leej Txiv thiab Nws Leej Tub, Yexus Khetos txoj kev tshwm sim rau Joseph Smith. Joseph ua yog toog pom Vajtswv Leej Txiv taw tes rau Yexus Khetos thiab hais tias: “Tus no yog kuv Leej Tub uas kuv hlub. Cia li mloog Nws hais!”4
Cov lus hais rau Joseph los Vajtswv hais rau peb thiab. Peb yuav tsum ua txhua yam peb ua tau kom mloog Yexus Khetos, tus uas hais lus rau peb los ntawm tus Vaj Ntsuj Plig Dawb Huv lub hwj chim thiab txoj kev txhawb pab.
Lub hom phiaj ntawm txhua lub tuam rooj sab laj no yog kom pab peb mloog Nws hais. Peb twb tau thov Vajtswv, thiab caw nej thov Vajtswv hais tias tus Tswv tus Ntsuj Plig yuav nrog nraim peb nplua mias kom nej yuav mloog tej zaj lus uas tus Cawm Seej tau npaj rau nej—tej zaj uas yuav ua rau nej nyob kaj siab lug. Tej zaj lus uas yuav kho nej lub siab puas tas. Tej zaj uas yuav ci ntsa iab rau nej lub siab. Tej zaj uas yuav pab nej paub ua li cas thaum nej mus tom ntej hauv tej lub sij hawm uas muaj kev ntxhov siab thiab kev sim siab, tam sim no thiab thaum yav tom ntej.
Peb thov kom nej yuav nco ntsoov lub rooj sab laj no tas mus li vim los ntawm tej zaj uas nej yuav hnov, tej lus tshaj tawm uas peb yuav hais, thiab tej yam uas yuav caw nej koom tes ua.
Piv txwv hais tias, thaum xaus tuas Hnub Sunday, peb yuav qhib lub koom txoos lub rooj sab laj dawb huv thaum kuv coj nej ua Kev Qw Hauxanas uas dawb ceev. Peb thov kom qhov no yuav txhawb nqa nej sab ntsuj plig thaum peb koom siab koom ntsws ua Vajtswv Leej Txiv thiab Nws Leej Tub tsaug los ntawm kev siv txoj kev no qhuas Nkawd.
Kom ua qhov dawb ceev no, peb yuav siv tej daim phuam dawb huv. Tiam sis yog nej tsis muaj, nej yoj tes xwb los tau. Thaum peb xaus txoj Kev Qw Hauxanas, nej sawv daws yuav koom nrog pawg hu nkauj hu zaj nkauj “Vajtswv tus Ntsuj Plig.”5
Kuv cov kwv tij thiab cov muam, lub rooj sab laj no yeej yuav zoo kawg nkaus. Xyoo no yeej yuav zoo thaum peb tsom ntsoov rau tus Cawm Seej thiab Nws txoj moo zoo. Tej yam tseem ceeb uas los ntawm lub rooj sab laj no yog qhov uas peb lub siab yuav hloov thiab peb yuav pib nrhiav kev mloog Nws hais kom tas peb lub neej.
Nyob zoo rau lub Plaub Hlis Ntuj xyoo 2020 lub tuam rooj sab laj! Kuv paub tias Vajtswv peb Leej Txiv Saum Ntuj Ceeb Tsheej thiab Nws Leej Tub, Yexus Khetos, saib xyuas peb. Nkawd yuav nrog nraim peb ob hnub no nyob hauv rooj sab laj thaum peb xav nyob ze Nkawd thiab qhuas Nkawd. Los ntawm Yexus Khetos lub npe dawb ceev, amees.