E pi’ira’a teitei ta’a ’ē mau

Nā Joy D. Jones

Peresideni rahi o te Paraimere

’Ei vahine nō te fa’aro’o, e nehenehe tātou e ’īriti mai i te mau parau tumu o te parau mau nā roto mai i te mau ’itera’a o te peropheta Iosepha Semita ’o tē hōro’a mai i te mau mana’o nō te fāri’i i tō tātou iho heheura’a.

Tē mauruuru nei au i te fa’atumura’a i tā’u a’ora’a i teie mahana i ni’a i te ti’ara’a tāmau o te mau vahine i roto i te fa’aho’i-fa’ahou-ra’a mai. E mea māramarama ē i te roara’a o te tau o te ’ā’amu, ’ua mau te mau vahine i te hō’ē ti’ara’a ta’a ’ē i roto i te fa’anahora’a a tō tātou Metua i te ao ra. ’Ua ha’api’i te peresideni Russell M. Nelson : « E’ita e roa’a ’ia fāito te fa’aurura’a e mauhia nei… e te mau vahine, i ni’a ana’e i te mau ’utuāfare, i ni’a ato’a rā i te ’Ēkālesia a te Fatu, ’ei vahine fa’aipoipo, ’ei metua vahine ’e ’ei metua tupuna ; ’ei tuahine ’e ’ei paino vahine ; ’ei ’orometua ’e ’ei fa’atere; ’e ’ei pāruru itoito ’e te hi’ora’a maita’i iho ā rā nō te fa’aro’o ». ¹

I te rurura’a mātamua a te Sotaiete Tauturu i Nauvoo, ’ua a’o Iosepha Semita i te mau tuahine « ’ia ora i te fāito teitei o tō [rātou] mau fāna’ora’a ». ² Tē ha’api’i nei tō rātou hi’ora’a ’ia tātou i teie mahana. ’Ua pe’e tāhō’ē rātou i te reo o te peropheta ’e ’ua ora i tō rātou fa’aro’o ia Iesu Mesia ma te ’āueue ’ore ’a ha’amau ai rātou i te niu e ti’ahia nei e tātou i teienei. Tuahine mā, ’ua tae i tō tātou taime. Tei roto tātou i te horora’a hanahana a te Fatu, e riro tā tātou mau tauturura’a ha’apa’o maita’i ’e te hō’ē roa ’ei mea faufa’a.

’Ua tātara te peresideni Spencer W. Kimball ē: : « ’Ei vahine parauti’a i roto i te mau taime hope’a i ni‘a i te fenua nei, hou te tae pitira’a mai o tō tātou Fa’aora, ’ua riro ïa ’ei pi’ira’a teitei ta’a ’ē mau. ’Ua tāta’i’ahuru maoti te pūai ’e te mana o te vahine parauti‘a i teie mahana i te mau tau hau ». ³

’Ua nā reira ato’a te peresideni Nelson i te pehapehara’a : « Tē tāparu nei au i tō’u mau tuahine [o te] ’Ēkālesia … ’ia haere i mua. ’A pārahi i ni’a i tō ’outou ti’ara’a tura ’e te faufa’a iō ’outou iho, i tō ’outou ’oire, ’e i te bāsileia o te Atua—hau i tā ’outou i nā reira noa na ». ⁴

’Aita i maoro a’e nei, ’ua ’oa’oa vau ’e te hō’ē pupu tamari’i nō te Paraimere i te fārerei i te peresideni Russell M. Nelson i roto i te fa’ahōho’ara’a nō te fare o te ’utuāfare Smith i Palmyra, New York. ’A fa’aro’o mai, ’a ha’api’i ai tō tātou peropheta i te mau tamari’i te mea o tā rātou e rave nō te haere i mua.

1:55

Tuahine Jones : « Tē hina’aro nei au e ’ite e uira’a ’ānei tā ’outou e hina’aro e ui i te peresideni Nelson. Tē pārahi nei ’outou i’ōnei ’e te peropheta. Tē vai ra ānei te hō’ē mea ’o tā ’outou e hina’aro noa na e ui i te hō’ē peropheta ? ’Ē, e Pearl ».

Pearl : « Mea fifi ānei te ti’ara’a peropheta ? E mea rahi mau tā ’oe ’ohipa ?

Peresideni Nelson : « Ā ’ē, mea fifi roa. Te mau mea ato’a e rave nō te riro mai te Fa’aora, e mea fifi roa. ’Ei hi’ora’a, i tō te Atua hina’arora’a e hō mai i nā Ture Hō’ē ’Ahuru ia Mose, i hea Tāna parau ia Mose ’ia haere ? I te tupu’ai o te hō’ē mou’a, i te tupu’ai o te Mou’a Sinai. Nō reira, ’ua haere Mose e tae roa i ni’a i te tupu’ai o taua mou’a ra nō te ti’i mai i nā Ture Hō’ē ’Ahuru. Teienei, e nehenehe ato’a tō tātou metua i te Ao ra e parau ē : « Mose, nā reira mai ’oe ’ia haere, nā ’ōnei atu vau, ’e i te ’āfara’a o te arati’a vau e fārerei ai ia ’oe ». ’Aita, mea au na te Fatu te tūtavara’a, nō te mea nā te tūtavara’a e hōro’a mai te rē, maoti te reira. ’Ei hi’ora’a, ’ua haere a’ēna ānei ’outou i te ha’api’ira’a piana ?

Te mau tamari’i : « ’Ē ».

Pearl : « Tē ha’api’i nei au i te fīra ».

Peresideni Nelson : « ’E tē rave ra ’outou ? »

Te mau tamari’i : « Ē ».

Peresideni Nelson : « E aha te tupu, mai te mea ’aita ’outou e rave ra ?

Pearl : « E mo’ehia ».

Peresideni Nelson : « ’Ē, e’ita ’outou e haere i mua, e ’ere ānei ? Nō reira, te pāhonora’a e Pearl e ’ē. E tītauhia te tūtava, e rave rahi ’ohipa itoito mau, e rave rahi tuatāpapara’a ’e ’aita e hope’ara’a. Mea maita’i ! Mea maita’i, nō te mea e haere noa tātou i mua. I roto ato’a i tō tātou orara’a a muri a’e, e haere ā tātou i mua.

Te pāhonora’a a te peresideni Nelson i teie mau tamari’i here, nō tātou ato’a ïa. ’Ua here te Fatu i te tūtavara’a, ’e e hōro’a mai te tūtavara’a i te rē. ’Ia tāmau tātou i te rave. E haere noa tātou i mua ’a tūtava ai tātou i te pe’e i te Fatu. ⁵ ’Aita ’oia e tītau nei i te fāito maita’i roa i teie mahana. E tāmau ā tātou i te pa’iuma i tō tātou iho mou’a i Sinai. Mai i tahito ra, ’oia mau, e tītau tō tātou tere i te tūtavara’a, i te ’ohipa itoito mau ’e i te tuatāpapara’a, ’are’a rā tā tātou tapura’a ’ia haere i mua, e hōro’a mai ïa i te mau rē mure ’ore. ⁶

E aha atu ā tā tātou e ha’api’i mai nō roto i te peropheta Iosepha Semita ’e te ’Ōrama Mātāmua, nō ni’a i te tūtavara’a, te ’ohipa itoito ’e te tuatāpapara’a ? E arata’i te ’Ōrama Mātamua ia tātou i roto i tō tātou mau ti’ara’a ta’a ’ē ’e te tāmau. ’Ei vahine nō te fa’aro’o, e nehenehe tātou e ’īriti mai i te mau parau tumu o te parau mau nā roto mai i te mau ’itera’a o te peropheta Iosepha Semita ’o tē hōro’a mai i te mau mana’o nō te fāri’i i tō tātou iho heheura’a. ’Ei hi’ora’a :

Tē ’ohipa nei tātou i raro a’e i te mau fifi.
Tē fāriu nei tātou i ni’a i te mau pāpa’ira’a mo’a nō te fāri’i i te pa’ari nō te ha’a.
Tē fa’a’ite nei tātou i tō tātou fa’aro’o ’e i tō tātou ti’aturi i te Atua.
Tē fa’a’ohipa nei tātou i tō tātou mana nō te tāparu i te Atua ’ia tauturu mai ’ia tātou ’ia pāto’i i te fa’aurura’a o te ’enemi.
Tē pupu nei tātou i te Atua i te mau hia’ai o tō tātou ’ā’au.
Tē tūru’i nei tātou i ni’a i tōna māramarama nō te arata’i i tā tātou mau mā’itira’a o te orara’a, ’e nō tē vai mai ho’i i ni’a ia tātou, ’ia fāriu ana’e tātou i ni’a ’iāna.
Tē ’ite nei tātou, ’ua ’ite ’oia ’ia tātou tāta’itahi, tō tātou i’oa, ’e nāna te mau ti’ara’a tā tātou iho e amo nei. ⁷

E hau atu, ’ua fa’aho’i mai Iosepha Semita i te ’itera’a ē, e faufa’a hanahana tō tātou ’e te mure ’ore. Nō teie aura’a tō tātou ’e tō tātou Metua i te Ao ra, ’ua ’ite au ē tē tīa’i nei ’oia ’ia fāri’i tātou i te heheura’a no ’ō mai ’iāna ra.

’Ua ha’api’i te Fatu ia Emma Smith ’ia « fāri’i i te Vārua Maita’i », ’ia ha’api’i rahi mai, ’ia « ha’apae i te mau mea nō teie nei ao… ’ia tītau ho’i i te mau mea maita’i a’e ra » ’e ’ia « tāpe’a māite i [tāna] mau fafau » ’e te Atua. ⁸ E tuha’a tumu te ha’api’ira’a mai nō te haerera’a i mua, hau atu i te auhoara’a tāmau o te Vārua Maita’i ’o tē ha’api’i nei ia tātou nō ni’a i te mau mea faufa’a ’ia vaiiho i te hiti—’o te nehene e fa’anevaneva ’aore rā e fa’ataere i tō tātou haerera’a i mua.

’Ua parau te peresideni Russell M. Nelson : « Tē tāparu nei au ia ’outou ’ia fa’arahi atu ā i tō ’outou ’aravihi nō te fāri’i i te heheura’a ». ⁹ Tei roto iā’u te mau parau a tō tātou peropheta ’ia hi’ohi’o vau i te ’aravihi ’o te mau vahine ’ia haere i mua. Tē tāparu nei ’oia ia tātou, ’ei fa’aitera’a i te fā mātamua roa. Tē ha’api’i nei ’oia ia tātou nāhea ’ia vai ora noa i te pae vārua i roto i te hō’ē ao hara mā te fāri’ira’a ’e te ’ohipara’a i ni’a i te heheura’a. ¹⁰ ’A nā reira ai tātou, te aurarora’a ’e te ha’apa’ora’a i te mau fa’auera’a a te Fatu, ’ua fāfauhia ia tātou, mai ia Emma Smith ato’a, te hō’ē « korona parauti’a ». ¹¹ ’Ua ha’api’i te peropheta Iosepha i te faufa’a nō te ’itera’a ē, te ’ē’a tā tātou e pe’e nei i roto i teie orara’a, ’ua ha’apa’ohia e te Atua. ’Āhiri ’aita te reira ’itera’a, e « tupu ïa tātou i te rahi i roto i [tō tātou] ferurira’a ’e tō tātou paruparu ». ¹²

I roto i teie ’āmuira’a, e fa’aro’o tātou i te mau parau mau ’o tē fa’auru ia tātou ’ia taui, ’ia ha’amaita’i ’e ’ia ha’amo’a i tō tātou orara’a. Nā roto i te heheura’a a te ta’ata iho, e nehenehe tātou e pāto’i i te mea e pi’ihia nei e vētahi ē « ’āmuira’a rahi fa’a’ī »—’ia ho’i ana’e tātou mā te mana’o onoono ’ia ha’apa’o pauroa i te reira i teienei. Tē vehi nei te mau vahine e rave rahi taupo’o, e’ita rā e mara’a, ’e aita e faufa’a, ’ia vehi pauroa hō’ē ā taime. E tauturu te Vārua ia tātou ’ia fa’ata’a i te mau ’ohipa e fa’atumu i teie mahana. ¹³

Te fa’aurura’a here a te Fatu nā roto i te Vārua Maita’i, e tauturu ïa ia tātou ’ia ’ite i tāna fā mātamua roa nō tō tātou haerera’a i mua. Te ha’afaufa’ara’a i tā tātou iho heheura’a, e arata’i te reira i tō tātou iho haerera’a i mua. ¹⁴ E fa’aro’o ’e e rave tātou. ¹⁵ ’Ua parau te Fatu : « ’A ani atu i te Metua i roto i tō’u nei i’oa, ma te fa’aro’o ’e te ti’aturi ē ’e hōro’ahia mai, ’e e fāri’i ïa i te Vārua Maita’i, ’o tē fa’a’ite mai i te mau mea ato’a ’o te au ». ¹⁶ Tō tātou ti’ara’a tāmau ’o te fāri’ira’a ïa i te heheura’a tāmau.

’A tāpae ai tātou i te hō’ē fāito rahi a’e o te ’aravihi nō te rave i te reira, e rahi atu ā te mana e mauhia e tātou i roto i tō tātou iho mau ti’ara’a nō te aupuru ’e nō te amo i te ’ohipa nō te fa’aorara’a ’e te fa’ateiteira’a—’ia « ha’apae i te mau mea nō teie nei ao, … ’e [ ia] tītau ho’i i te mau mea … maita’i a’e ra ». ¹⁷ I reira tātou e nehenehe ai e fa’auru maita’i a’e i tō tātou u’i ’āpī ’ia nā reira ato’a.

Te mau taea’e ’e te mau tuahine, tē tītau nei tātou pā’āto’a i te mana o te Atua i roto i tō tātou orara’a. ¹⁸ Tē vai nei te hō’ēra’a fa’ahiahia i rotopū i te mau vahine ’e te mau tāne nō te fa’aoti i te ’ohipa a te Atua i teie mahana. Tē fāri’i nei tātou i te mana o te autahu’ara’a nā roto i te mau fafaura’a, tei ravehia nā mua atu i roto i te pape nō te bāpetizora’a ’e i muri iho i roto i te mau papa’i o te hiero mo’a. ¹⁹ Ua ha’api’i te peresideni Nelson ia tātou, « te vahine ’e te tāne ato’a ’o tē fafau ’e te Atua, ’e e ha’apa’o i te reira mau fafaura’a, ’e ’o tē tomo ma te ti’amā i roto i te mau ’ōro’a o te autahu’ara’a, e fāri’i ’āfaro rātou i te mana o te Atua ». ²⁰

Tā’u iho fa’ira’a i teie mahana, ’oia ho’i i roto i tō’u ti’ara’a vahine, ’aita vau i ’ite noa na i mua ra ē, e noa’a iā’u nā roto i tā’u mau fāfaura’a, te mana o te autahu’ara’a. ²¹ ’Ē te mau tuahine, tē pure nei au ’ia ’ite ’e ’ia poihere tātou i te mana o te autahu’ara’a « ’a ’ati atu [ai] tātou i te mau fafaura’a », ²² ’a fāri’i ai i te parau mau o te mau pāpa’ira’a mo’a, ’e ’a ha’apa’o ai i te mau parau a tō tātou peropheta ora.

E matā na tātou i te fa’a’ite pāpū i tō tātou taiva ’ore i tō tātou Metua i te ao ra ’e i tō tātou Fa’aora, « ma te fa’aro’o ’āueue ’ore iāna ra, i te ti’aturi-maite-ra’a i te maita’i nōna, nō tei pūai ’ia fa’aora ». ²³ E matā na tātou i te haere ’oa’oa noa na te ’ē’a o tō tātou pūai pae vārua teitei a’e, ’e i te tūra’i i te feiā e ha’ati nei ia tātou ’ia nā reira ato’a, nā roto i te fa’aterera’a, te here, te aupurura’a ’e te aroha.

’Ua fa’aha’amana’o aroha mai o Elder James E. Talmage ē : « Te ’aito rahi roa a’e o te ao nei nō ni’a i te vahine ’e i te auvahinera’a, o Iesu Mesia ». ²⁴ I roto i te hi’opo’ara’a hope’a nō ni’a i te mau ti’ara’a i mau haerehia e te mau vahine i teie tau nō te Fa’aho’i-fa’ahou-ra’a mai, ’e nō tātou pā’āto’a, e aha te ti’ara’a teitei a’e ? Tē fa’a’ite pāpū nei au ē, ’o te fa’aro’ora’a iāna, ²⁵ te pe’era’a iāna, ²⁶ te ti’aturira’a iāna, ²⁷ ’e te rirora’a ’ei aveave nō tōna here. ²⁸ ’Ua ’ite au tē ora nei ʼoia. ²⁹ Nā roto i te i’oa mo’a o Iesu Mesia, ’āmene.