សាក្សីនៅរស់នៃព្រះគ្រីស្ទដ៍មានព្រះជន្មរស់

ដោយ ប៊ីស្សព ហ្គែរ៉ល កូសសេ

ប៊ីស្សពជាអធិបតី

សារដ៏សំខាន់ នៃ ព្រះគម្ពីរមរមន គឺ ដើម្បីស្តារចំណេះដឹងពិត អំពី តួនាទីដ៏សំខាន់របស់ ព្រះយេស៊ូវគ្រីស្ទក្នុងការសង្រ្គោះ និងការលើកតម្កើង របស់ មនុស្ស លោក ។

នៅថ្ងៃនិទាឃរដូវមួយ ដែលបើកថ្ងៃល្អក្នុងឆ្នាំ ២០១៧ មានការបើកសម្ពោធព្រះវិហារបរិសុទ្ធបារីស ប្រទេសបារាំង កំពុងតែដំណើរការយ៉ាងល្អ ពេលបុរសម្នាក់បានមកជួបនឹងមគ្គុទេសទេសចរណ៍ម្នាក់ដោយ មានទឹកមុខក្រៀមក្រំ ។ គាត់បាននិយាយថា គាត់រស់នៅក្បែរព្រះវិហារបរិសុទ្ធ ហើយបានសារភាពថា គាត់ជាអ្នកប្រឆាំងយ៉ាងសកម្មចំពោះសំណង់មួយនេះ ។ គាត់បានប្រាប់ថា នៅថ្ងៃមួយពេលគាត់កំពុងសំឡឹងទៅក្រៅបង្អួចផ្ទះល្វែងរបស់គាត់ គាត់បានឃើញឡានស្ទួចកំពុងដាក់រូបសំណាកព្រះយេស៊ូវចុះពីលើមេឃ ហើយដាក់វាថ្នមៗទៅលើទីធ្លាព្រះវិហារបរិសុទ្ធ ។ បុរស នោះ បាននិយាយ ថា បទពិសោធន៏នេះ បាន ផ្លាស់ប្តូរ អារម្មណ៍ របស់ គាត់ ចំពោះសាសនាចក្ររបស់យើងទាំងស្រុង ។ គាត់បានដឹងថា យើងជាអ្នកដើរតាមព្រះយេស៊ូវគ្រីស្ទ ហើយបានសុំអភ័យទោសចំពោះការធ្វើទុក្ខទោសដែលគាត់បានបង្កពីមុន ។

រូបសំណាកព្រះគ្រីស្ទ ដែលលម្អទីធ្លាព្រះវិហារបរិសុទ្ធ ប៉ារីស និងកម្មសិទ្ធិផ្សេងៗទៀតរបស់ព្រះវិហារ ថ្លែងទីបន្ទាល់ពីសេចក្តីស្រលាញ់របស់យើងចំពោះ ព្រះអង្គសង្ក្រោះ ។ រូបចម្លាក់ថ្មម៉ាបដើមគឺជាស្នាដៃរបស់វិចិត្រករ ដាណឺម៉ាកឈ្មោះ បឺតថុល ធើវ៉ុលសិន ដែលបានឆ្លាក់រូបនេះនៅឆ្នាំ១៨២០—ឆ្នាំដូចគ្នានឹងការនិមិត្តដំបូងដែរ ។ រូបសំណាកនេះមានលក្ខណៈ ផ្ទុយស្រឡះពីការបង្ហាញសិល្បៈភាគច្រើននៅសម័យនោះ ដែលភាគច្រើនបង្ហាញពីការរងទុក្ខរបស់ព្រះគ្រីស្ទនៅលើឈើឆ្កាង ។ កិច្ចការរបស់ធើវ៉ុលសិនបង្ហាញពីព្រះគ្រីស្ទដ៏មានព្រះជន្មដែលទទួលបានជ័យជំនះលើសេចក្តីស្លាប់ ហើយបើកព្រះហស្ដអញ្ជើញមនុស្សទាំងអស់ ឲ្យមករកទ្រង់ ។ មានតែស្នាមដែកគោលនៅក្នុងព្រះហស្ត និងព្រះបាតទា ហើយនឹងស្នាមរបួសនៅ ចំហៀងព្រះកាយទ្រង់ប៉ុណ្ណោះ ដែលបានផ្តល់ជាសក្ខីភាពអំពីការឈឺចាប់ដ៏មិនអាចរៀបរាប់បាន ដែលទ្រង់បាន ស៊ូទ្រាំដើម្បីសង្គ្រោះមនុស្សជាតិទាំងអស់ ។

ព្រះហស្តរបស់ព្រះអង្គសង្គ្រោះដូចដែលបានបង្ហាញនៅក្នុងរូបព្រះគ្រីស្ទ

មូលហេតុមួយដែលយើងជាសមាជិកនៃសាសនាចក្រព្រះយេស៊ូគ្រីស្ទនៃពួកបរិសុទ្ធថ្ងៃចុងក្រោយស្រលាញ់រូបចម្លាក់នេះ គឺប្រហែលជាវារំឭកយើងពីការពិពណ៌នាដែលមាននៅក្នុងព្រះគម្ពីមរមនអំពីព្រះបង្ហាញព្រះកាយរបស់ព្រះអង្គសង្រ្គោះនៅលើទ្វីបអាមេរិក ៖

« ហើយមើលចុះ គេបានឃើញបុរសម្នាក់យាងចុះមកពីលើមេឃ ហើយទ្រង់ពាក់អាវវែងពណ៌ស ហើយទ្រង់យាងចុះមកឈរនៅកណ្ដាលពួកគេ …

« ហើយហេតុការណ៍បានកើតឡើងថា ព្រះអង្គទ្រង់ហុចព្រះហស្តទ្រង់ទៅមុខ ហើយមានព្រះបន្ទូលទៅកាន់ប្រជាជនថា ៖

« មើលចុះ យើងគឺព្រះយេស៊ូវគ្រីស្ទ…

« …ហើយយើងបានផឹកនូវពែងល្វីង ដែលព្រះវរបិតាបានប្រគល់ដល់យើង ហើយបានតម្កើងព្រះវរបិតាដោយបានទទួលមកដាក់លើខ្លួននូវបាបទាំងឡាយនៃមនុស្សលោក » ។^១

បន្ទាប់មកទ្រង់បានអញ្ជើញឲ្យមនុស្សគ្រប់គ្នា ទាំងប្រុស ស្រី និងកូនក្មេងឲ្យចេញមក ដាក់ដៃរបស់ពួកគេលើចំហៀងព្រះកាយទ្រង់ ហើយស្ទាបស្នាមដែកគោលនៅលើព្រះហស្ត និងព្រះបាតទារបស់ទ្រង់ ដើម្បីទទួលបានសាក្សីផ្ទាល់ខ្លួនថា ទ្រង់ពិតជាព្រះមែស៊ីដែលរង់ចាំជាយូរមកហើយ ។^២

ឈុតឆាកដ៍ពិសេសនេះគឺជាកម្រិតខ្ពស់បំផុតនៃព្រះគម្ពីរមរមន ។ « ដំណឹងល្អ » ទាំងស្រុងនៃដំណឹងល្អមាននៅក្នុងរូបភាពព្រះអង្គសង្រ្កោះនេះ ដែលលាត « ព្រះពាហុនៃសេចក្ដីមេត្តាករុណា »^៣របស់ទ្រង់ដោយទន់ភ្លន់ ដើម្បីអញ្ជើញបុគ្គលម្នាក់ៗ ឲ្យមករកទ្រង់ ហើយទទួលពរជ័យនៃដង្វាយធួនរបស់ទ្រង់ ។

សារដ៏សំខាន់នៃព្រះគម្ពីរមរមនគឺ ដើម្បីស្តារចំណេះដឹងពិតអំពីតួនាទីដ៏សំខាន់របស់ ព្រះយេស៊ូវគ្រីស្ទក្នុងការសង្រ្គោះ និងការលើកតម្កើងរបស់មនុស្សលោក ។ ប្រធានបទនេះបន្ទរឡើងតាំងពីទំព័របុព្វកថាទៅដល់ពាក្យចុងក្រោយគេនៃជំពូកចុងក្រោយ ។ តាមរយៈការក្បត់សាសនា និងការភាន់ច្រលំខាងវិញ្ញាណអស់ជាច្រើនសតវត្សរ៍ នោះអត្ថន័យដ៍ជ្រាលជ្រៅនៃអ្វីដែលព្រះគ្រីស្ទបានធ្វើនៅឯសួនច្បារគេតសេម៉ានី និងនៅលើភ្នំលលាដ៍ក្បាលបានបាត់បង់និងខូចអស់ ។ យ៉ូសែប ស្មីធប្រាកដជារំភើបចិត្តខ្លាំងណាស់ ពេលលោកបានបកប្រែនីហ្វៃទី១ ហើយបានរកឃើញការសន្យាដ៍អស្ចារ្យមួយនេះ ៖ « បញ្ជី [ ព្រះគម្ពីរមរមន ] …នឹងតាំងនូវសេចក្ដីពិតអំពីបញ្ជីមុន [ ព្រះគម្ពីរប៊ីប ] … ហើយនឹងបង្ហាញឲ្យដឹងសេចក្ដីដ៏ច្បាស់ និងពិសេសៗ ដែលបានដកយកពីបញ្ជីទាំងនោះ ហើយនឹងបង្ហាញដល់គ្រប់ទាំងពូជមនុស្ស គ្រប់ភាសា និងគ្រប់ទាំងប្រជាជនឲ្យដឹងថា កូនចៀមនៃព្រះគឺជាព្រះរាជបុត្រានៃព្រះវរបិតាដ៏នៅអស់កល្បជានិច្ច ហើយគឺជាព្រះអង្គសង្គ្រោះនៃពិភពលោក ហើយថា មនុស្សទាំងអស់ត្រូវតែមករកព្រះអង្គ បើពុំនោះសោតទេ ពួកគេនឹងពុំបានសង្គ្រោះឡើយ » ។^៤

សេចក្តីពិតដ៍សាមញ្ញ និងមានតម្លៃអំពីដង្វាយធួនរបស់ព្រះអង្គសង្រ្គោះមានពេញទាំងព្រះគម្ពីរមរមន ។ កាលខ្ញុំរៀបរាប់ពីសេចក្ដីពិតទាំងនេះមួយចំនួន ខ្ញុំសូមអញ្ជើញបងប្អូនឲ្យគិតអំពីរបៀបដែលវាបានផ្លាស់ប្តូរ ឬអាចផ្លាស់ប្តូរជីវិតរបស់បងប្អូនបាន ។

ដង្វាយធួនរបស់ព្រះយេស៊ូវគ្រីស្ទគឺជាអំណោយមិនគិតថ្លៃដែលផ្តល់ឲ្យមនុស្សលោកទាំងអស់ដែលបានរស់នៅ ដែលកំពុងរស់នៅ និងអ្នកដែលនឹងរស់នៅលើផែនដីនេះ ។^៥
បន្ថែមលើការរែកបន្ទុកអំពើបាបរបស់យើងព្រះគ្រីស្ទបានលើកដាក់មកលើព្រះអង្គទ្រង់នូវទុក្ខព្រួយ ជំងឺ ការរងទុក្ខ ការឈឺចាប់និងទុក្ខវេទនាទាំងអស់ដែលកើតមាននៅក្នុងស្ថានភាពរមែងស្លាប់របស់មនុស្សលោក ។ គ្មានការថប់បារម្ភ ការឈឺចាប់ ឬទុក្ខព្រួយណាដែលទ្រង់មិនបានរងទុក្ខសម្រាប់យើងនោះទេ ។^៦
ពលិកម្មដ៏ធួនរបស់ព្រះអង្គសង្រ្គោះអនុញ្ញាតឲ្យយើងយកឈ្នះលើលទ្ធផលអវិជ្ជមាននៃការធ្លាក់ចុះរបស់អ័ដាម ដែលរួមមានទាំងការស្លាប់ខាងរូបកាយផងដែរ ។ ដោយសារតែព្រះគ្រីស្ទ នោះបុត្រាបុត្រីរបស់ព្រះទាំងអស់ដែលកើតនៅលើផែនដីនេះ ដោយមិនគិតពីសេចក្តីសុចរិតរបស់ពួកគេ នោះពួកគេនឹងមានបទពិសោធន៏នៃការរួបរួមឡើងវិញនៃវិញ្ញាណ និងរូបកាយរបស់ពួកគេតាមរយៈអំណាចនៃការរស់ឡើងវិញ^៧ហើយត្រឡប់ទៅរកទ្រង់វិញ « ដើម្បីបានកាត់សេចក្ដីតាមកិច្ចការដែលពួកគេបានធ្វើ » ។^៨
ផ្ទុយទៅវិញ ការទទួលពរជ័យដ៏ពេញលេញពីដង្វាយធួនរបស់ព្រះអង្គសង្រ្គោះគឺផ្អែកទៅលើការព្យាយាមរបស់យើង ^៩ ក្នុងការរស់នៅតាម « គោលលទ្ធិនៃព្រះគ្រីស្ទ » ។^១០ នៅក្នុងសុបិនរបស់លោក លីហៃបានឃើញ « ផ្លូវមួយតូច ហើយចង្អៀត »^១១ ដែលនាំទៅរកដើមនៃជីវិត ។ ផ្លែរបស់វា ដែលតំណាងឲ្យសេចក្តីស្រឡាញ់របស់ព្រះ ដូចបានបង្ហាញតាមរយៈពរជ័យដ៏ល្អឯកនៃដង្វាយធួនរបស់ព្រះគ្រីស្ទ « មានផ្លែដ៏ពិសេស ហើយគួរឲ្យប្រាថ្នាជាងផ្លែណាៗទាំងអស់ … [ ហើយ ] គឺជាអំណោយទានដ៏មហិមាបំផុតនៃព្រះ » ។^១២ ដើម្បីទទួលបានផ្លែឈើនេះ យើងត្រូវអនុវត្តសេចក្តីជំនឿទៅលើព្រះយេស៊ូវគ្រីស្ទ ប្រែចិត្ត « ប្រុងស្ដាប់តាមព្រះបន្ទូលនៃព្រះ »^១៣ ទទួលពិធីបរិសុទ្ធសំខាន់ៗ និងរក្សាសេចក្តីសញ្ញាដ៏ពិសិដ្ឋរហូតដល់ចុងបញ្ចប់នៃជីវិតរបស់យើង ។^១៤
តាមរយៈដង្វាយធួនរបស់ទ្រង់ ព្រះយេស៊ូវគ្រីស្ទមិនគ្រាន់តែលាងសម្អាតបាបកម្មរបស់យើងប៉ុណ្ណោះទេ ប៉ុន្តែទ្រង់ក៍ផ្តល់នូវអំណាចដែលអាចធ្វើឲ្យសិស្សទ្រង់អាច « [ សម្រាត ] ភាពខាងសាច់ឈាមចេញ »^១៥រីកចម្រើនឡើង « មួយបន្ទាត់ម្ដងៗ »^១៦ហើយបង្កើនបរិសុទ្ធភាព^១៧ដើម្បីថ្ងៃណាមួយពួកគេអាចក្លាយទៅជាបុគ្គលឥតខ្ចោះ ដែលមានលក្ខណៈដូចជាព្រះគ្រីស្ទ ^១៨មានលក្ខណៈសម្បត្តិគ្រប់គ្រាន់ដើម្បីរស់នៅជាមួយព្រះម្ដងទៀត^១៩ហើយទទួលបានពរជ័យទាំងអស់នៃនគរស្ថានសួគ៍ ។^២០

សេចក្តីពិតលួងលោមមួយទៀតដែលមាននៅក្នុងព្រះគម្ពីរមរមននោះគឺថាទោះបីជាដង្វាយធួនមានភាពនិរន្តរ៍ និងធំទូលាយយ៉ាងណាក៏ដោយ ក៏ដង្វាយធួនរបស់ព្រះអម្ចាស់គឺជាអំណោយទានផ្ទាល់ខ្លួន និងជិតដិតយ៉ាងខ្លាំងមួយ ដែលសមនឹងយើងម្នាក់ៗ ។^២១ ដូចព្រះយេស៊ូវបានអញ្ជើញសិស្សសាសន៍នីហ្វៃម្នាក់ៗឲ្យស្ទាបស្នាមរបួសរបស់ទ្រង់ដែរ ទ្រង់បានសុគតសម្រាប់យើងម្នាក់ៗដោយផ្ទាល់ ហាក់ដូចជាបងប្អូន ឬខ្ញុំជាមនុស្សតែម្នាក់គត់នៅលើផែនដីនេះ ។ ទ្រង់បានអញ្ជើញយើងដោយផ្ទាល់ឲ្យមករកទ្រង់ហើយទទួលបានពរជ័យដ៍អស្ចារ្យនៃដង្វាយធួនរបស់ទ្រង់ ។^២២

លក្ខណៈផ្ទាល់ខ្លួននៃដង្វាយធួនរបស់ព្រះគ្រីស្ទកាន់តែមានភាពប្រាកដប្រជា នៅពេលយើងពិចារណាពីគំរូដ៍គួរឲ្យកត់សម្គាល់ របស់បុរស និងស្រ្តីនៅក្នុងព្រះគម្ពីរមរមន ។ នៅក្នុងចំណោមពួកគេមាន អេណុស អាលម៉ា ស៊ីអែសរ៉ុម ស្តេចឡាម៉ូណៃ និងភរិយារបស់ទ្រង់ ព្រមទាំងប្រជាជនរបស់សេ្តចបេនយ៉ាមីន ។ រឿងរ៉ាវនៃការប្រែចិត្តជឿ និងទីបន្ទាល់ដ៍រស់រវើករបស់ពួកគេផ្តល់នូវសក្ខីភាពដ៍រស់រវើកពីរបៀប ដែលដួងចិត្តរបស់យើងអាចត្រូវបានផ្លាស់ប្តូរហើយជីវិតយើងត្រូវបានផ្លាស់ប្តូរតាមរយៈសេចក្តីល្អសប្បុរស និងមេត្តាករុណាដ៍គ្មានទីបញ្ចប់របស់ព្រះអម្ចាស់ ។^២៣

ព្យាការីអាល់ម៉ាបានសួរសំណួរដ៏ឆេះឈួលនេះទៅប្រជាជនលោក លោកបានមានប្រសាសន៍ថា ៖ « បើសិនជាអ្នករាល់គ្នាបានស្គាល់ការផ្លាស់ប្ដូរនៅក្នុងដួងចិត្តអ្នក ហើយបើសិនជាអ្នករាល់គ្នាបានចាប់អារម្មណ៍ចង់ច្រៀងនូវចម្រៀងនៃសេចក្ដីស្រឡាញ់ដែលប្រោសលោះ ខ្ញុំសូមសួរថា តើអ្នករាល់គ្នាអាចចាប់អារម្មណ៍យ៉ាងនេះ ឥឡូវទេ ? »^២៤សំណួរនេះសំខាន់ណាស់សព្វថ្ងៃនេះ ពីព្រោះក្នុងនាមជាសិស្សរបស់ព្រះអម្ចាស់ អំណាចប្រោសលោះរបស់ទ្រង់គួរតែរួមដំណើរជាមួយយើង លើកទឹកចិត្តយើង និងផ្លាស់ប្តូរយើងម្នាក់ៗរៀងរាល់ថ្ងៃ ។

សំណួររបស់អាលម៉ាក៍អាចត្រូវបានគេសួរឡើងវិញដែរថា តើបងប្អូនបានទទួលឥទ្ធិពលដ៏ផ្អែមល្ហែមពីដង្វាយធួនរបស់ព្រះអង្គសង្រ្គោះនៅក្នុងជីវិតរបស់បងប្អូនលើកចុងក្រោយនៅពេលណា ? រឿងនេះកើតឡើង នៅពេលបងប្អូនមានអារម្មណ៍នៃសេចក្ដីអំណរដ៏ « ជ្រួតជ្រាប ហើយផ្អែមល្ហែម »^២៥កាលបងប្អូនថ្លែងជាសាក្សីចំពោះព្រលឹងរបស់បងប្អូនថា អំពើបាបរបស់បងប្អូនត្រូវបានអភ័យទោសឲ្យ ឬពេលការសាកល្បងដ៏ឈឺចាប់ បានស្រាលជាងមុនភ្លាមៗ ឬនៅពេលដួងចិត្តបងប្អូនទន់ភ្លន់ ហើយបងប្អូនអាចបង្ហាញការអត់ទោសដល់នរណាម្នាក់ដែលបានធ្វើឲ្យបងប្អូនឈឺចាប់ ។ ឬវាប្រហែលជាគ្រប់ពេលដែលបងប្អូនកត់សម្គាល់ថា សមត្ថភាពរបស់បងប្អូនដើម្បីស្រឡាញ់ និងបម្រើអ្នកដទៃបានកើនឡើង ឬថាដំណើរការនៃការរាប់ជាបរិសុទ្ធធ្វើឲ្យបងប្អូនក្លាយទៅជាមនុស្សផ្សេងម្នាក់ ដែលយកគំរូតាមព្រះអង្គសង្រ្គោះ ។^២៦

ខ្ញុំសូមថ្លែងជាសាក្សីថា បទពិសោធន៏ទាំងអស់នេះគឺពិត ហើយជាភស្ដុតាងថា ជីវិតអាចត្រូវបានផ្លាស់ប្តូរ តាមរយៈសេចក្ដីជំនឿទៅលើព្រះយេស៊ូវគ្រីស្ទនិងដង្វាយធួនរបស់ទ្រង់ ។ ព្រះគម្ពីរមរមនបញ្ជាក់ និងពង្រីកចំណេះដឹងរបស់យើងអំពីអំណោយទានដ៍វិសេសវិសាលនេះ ។ នៅពេលបងប្អូនសិក្សាព្រះគម្ពីរនេះ នោះបងប្អូននឹងឮសំឡេងព្រះគ្រីស្ទដ៏មានព្រះជន្មរស់កំពុងអញ្ជើញបងប្អូនឲ្យមករកទ្រង់ ។ ខ្ញុំសូមសន្យាថា ប្រសិនបើបងប្អូនទទួលយកការអញ្ជើញនេះ ហើយកែប្រែជីវិត របស់បងប្អូនតាមគំរូរបស់ទ្រង់ នោះឥទ្ធិពលនៃការប្រោសលោះរបស់ទ្រង់នឹងចូលមកក្នុងជីវិតរបស់បងប្អូន ។ តាមរយៈព្រះចេស្តានៃព្រះវិញ្ញាណបរិសុទ្ធ ព្រះអង្គសង្រ្គោះនឹងផ្លាស់ប្រែបងប្អូនពីមួយថ្ងៃទៅមួយថ្ងៃ « រហូតដល់ថ្ងៃបានល្អឥតខ្ចោះ »^២៧ជាពេលដែលបងប្អូននឹង « បានឃើញព្រះភក្រ្ដរបស់យើង ហើយស្គាល់ថាយើងជាព្រះ » ដូចដែលទ្រង់បានប្រកាសមក ។^២៨ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕